LUFUNJISHO 28
Santainga pa Bintu Bimubila Yehoba ne Yesu
Mumvwa byepi ku muchima inge mukwenu wimupa kintu kyawama? Mutemwa bingi ne kumusanchila pa bupe bo emupa. Yehoba ne Yesu betupeele bupe bwanema bingi bwakila bintu byonse. Nanchi buno bupe bo bwepi kabiji twafwainwa kumwesha byepi amba tusanta?
1. Ñanyi jishinda jo tumwesheshamo’mba tusanchila Lesa ne Yesu pa bintu byo betubila?
Baibolo waamba’mba “bonse bamwitabila [Yesu]” bakekala na bumi bwa myaka ne myaka. (Yoano 3:16) Nanchi kwitabila mwi Yesu kulumbulula ka? Kuji bintu byavula byo twafwainwa kuba kechi kwambatu pa kanwa’mba twaitabila mwi Yesu ne. Tumwesha’mba twaitabila mwi Yesu kupichila mu bintu byo tufuukulapo ne byo tuba. (Yakoba 2:17) Inge lwitabilo lwetu saka twilumweshesha mu bintu byo tuba ne mu byo twamba, ko kuba’mba tukakosesha bulunda bwetu ne Yesu ne Yehoba shanji.—Tangai Yoano 14:21.
2. Ñanyi kintu kyanema kikalako pa mwaka pa mwaka mo tumweshesha’mba tusanchila Yehoba ne Yesu pa byo betubila?
Yesu saka akyangye kufwa, wabuujile baana banji ba bwanga jishinda jikwabo mwa kumweshesha lusanchilo lwabo pa kitapisho kyanji. Wibabuujile kupwila pamo ne kuvuluka kintu kyanema kyo batongola mu Baibolo amba “Kijiilo kya Nkambo kya Mabanga” nangwa’mba Kivuluko kya Lufu lwa kwa Kilishitu. (1 Kolinda 11:20) Yesu waikele na kino kijiilo kuba’mba batumwa banji ne bena Kilishitu bonse ba kine bakavulukenga’mba Yesu witufwijile. Onkao mambo, Yesu wibakambizhe’mba: “Saka muba kino mu kumvuluka.” (Luka 22:19) Inge mwataanwa ku Kivuluko, mumwesha’mba musanta pa butemwe bukatampe bwitumwesha Yehoba ne Yesu.
FUNJILAIPO BIKWABO
Langulukaipo mashinda akwabo mo mwafwainwa kumweshesha’mba musanta pa butemwe bukatampe bwitumwesha Yehoba ne Yesu. Yukai ene mambo kuvuluka lufu lwa kwa Yesu o kwanemena.
3. Ñanyi kintu kyo twafwainwa kuba kumwesha’mba twasanta?
Fwanyikizhai mubena kutomena, bino muntu umo waiya wimwabulapo pa mema. Nanchi mukatuntukapotu ne kulubako muntu wimwabulapo nyi? Nanchi kechi mukamonapo mashinda a kumusanchilamo pa byo emubila nenyi?
Tukekala na bumi bwa myaka ne myaka na mambo kuba Yehoba witutemwa bingi. Tangai 1 Yoano 4:8-10, ne kwisamba ano mepuzho:
Mambo ka kitapisho kya kwa Yesu o kyanemena?
Mumvwa byepi ku muchima pa bintu bimubila Yehoba ne Yesu?
Tumwesha byepi amba tusanchila Yehoba ne Yesu pa bintu byo betubila? Tangai 2 Kolinda 5:15 ne 1 Yoano 4:11; 5:3. Inge mwapwisha kutanga kila kinembelo, ipuzhai buno bwipuzho buntutu bumo:
Kwesakana na kino kinembelo, tumwesha byepi amba tusanta pa buno bupe?
4. Ikalai byajinga Yesu
Jishinda jikwabo mo tumweshesha’mba tusanta ke kwikala byajinga Yesu. Tangai 1 Petelo 2:21, ne kwisamba buno bwipuzho:
Mumwesha byepi mu bwikalo bwenu amba mubena kulondela byaubanga Yesu?
Yesu watemenwe bingi Mambo a Lesa, wasapwijilenga mambo awama ne kukwasha bantu
5. Tanwainga ku Kivuluko kya lufu lwa kwa Kilishitu
Pa kuba’mba mumone byo kyajinga pa kuvuluka Kijiilo kitanshi kya Nkambo kya Mabanga, tangai Luka 22:14, 19, 20. Kepo mwisambe ano mepuzho:
Ñanyi kintu kyamwekele pa Kijiilo kya Nkambo kya Mabanga?
Nanchi shinkwa ne binyu bimenako ka?—Monai kyepelo 19 ne 20.
Yesu wakebelenga baana banji ba bwanga kwikalanga na Kijiilo kya Nkambo kya Mabanga kya kuvuluka lufu lwanji jimotu pa mwaka. Onkao mambo, kyo kilengela Bakamonyi ba kwa Yehoba kuvulukanga lufu lwa kwa Kilishitu jimo pa mwaka monkatu mo akambizhizhe aye mwine. Pa kuba’mba muyuke bikala kuno kupwila kwanema byonkabye, tambai VIDYO. Kepo mwisambe buno bwipuzho:
Ñanyi bintu byubiwa pa Kivuluko?
Shinkwa ne binyu bimenako bintu byapusana. Shinkwa wimenako mubiji wa kwa Yesu wabula bundengamambo ye apaine na mambo a atweba. Kabiji binyu bimenako mashi a kwa Yesu
BANTU BAMO BAMBA’MBA: “Amiwa namutambula kala Yesu kwikala Nkambo yami kabiji mupulushi wami. Ko kuba’mba kafwako kintu kikwabo kyo nafwainwa kuba ne.”
Mwakonsha kwingijisha byepi kinembelo kya Yoano 3:16 ne Yakoba 2:17 kukwashishamo muntu wamba bino kuba’mba kuji bintu bikwabo byo afwainwa kuba?
ÑANYI BISHINKA BYO MWAFUNDA?
Tumwesha kusanta pa bintu bitubila Yesu inge twamwitabila ne kutaanwanga ku Kivuluko kya lufu lwanji.
Mepuzho a kupitulukamo
Nanchi kwitabila mwi Yesu kulumbulula ka?
Mwafwainwa kumwesha byepi amba musanchila Yehoba ne Yesu pa bintu byo bemubila?
Mambo ka o kyanemena kutaanwa ku Kivuluko kya lufu lwa Kilishitu?
KEBAI BISHINKA BIKWABO
Nanchi lufu lwa Kilishitu lwimutundaika kuba ñanyi kintu?
Funjilaipo bintu byavula pa bilumbulula lwitabilo ne byo twafwainwa kwikala nalo.
“Itabilai Milaye ya Yehoba” (Kyamba kya Usopa, October 2016)
Tangai jino jishimikila jaamba’mba “Pano Luno Nakasuluka Naleka Byonse Byatama” ja mwanamukazhi umo wafunjile mwatala kitapisho kya Kilishitu byo kwapimpwile byubilo byanji.
“Baibolo Upimpula Bwikalo bwa Bantu” (Kyamba kya Usopa, August 1, 2011)
Monai ene mambo bantu bachechetu o bajiilako ku shinkwa ne kutoma binyu pa Kivuluko.