LUFUNJISHO 51
Mwafwainwa Kutokesha Byepi Yehoba ku Muchima mu byo Mwamba na Bakwenu?
Yehoba byo etulengele, witupeele kya bupe kyanema bingi. Akino kya bupe ke kwamba. Nanchi utako muchima pa byo twingijisha kino kya bupe nyi? Ee utako bingi muchima! (Tangai Yakoba 1:26.) Pano twafwainwa kwingijishanga byepi kino kya bupe kya kwamba pa kuba’mba tutokeshenga Yehoba ku muchima?
1. Twafwainwa kwingijisha byepi bulongo kino kya bupe kya kwamba kitupa Yehoba?
Baibolo witukambizha’mba: “Itundaikainga ne kwikomesha anwe bene na bene.” (1 Tesalonika 5:11) Nanchi kujipo bantu bamo bo mwafwainwa kutundaika nyi? Mwafwainwa kwibatundaika byepi? Mwafwainwa kwibabuula’mba mwibata muchima. Kabiji mwafwainwa ne kwibasanchila pa bintu bimo byo boba. Nanchi kujipo kinembelo kyo mwafwainwa kwingijisha kutundaikilamo muntu ye mwayuka nyi? Mu Baibolo muji binembelo byavula bingi byo mwafwainwa kwingijisha. Onkao mambo, vulukainga kuba’mba byambo byo mwamba byakonsha kutundaika bantu nangwa kwibakozha ku muchima. O ene mambo o twibikilako kwamba na jiwi jakooka kabiji saka twatekanya.—Byambo bya Maana 15:1.
2. Ñambilo ya mutundu ka yo twafwainwa kuchinuzhuka?
Baibolo waamba’mba: “Kange muleke byambo byatama bilupuke mu kanwa kenu ne.” (Tangai Efisesa 4:29.) Kino kibena kulumbulula’mba kechi twafwainwa kwingijisha ñambilo yatama nangwa kwamba byambo bya kukozha bakwetu ku muchima ne. Kabiji twafwainwa kwikileka kuyebeka bakwetu.—Tangai Byambo bya Maana 16:28.
3. Ñanyi kintu kyafwainwa kwitukwasha kwamba byambo byafwainwa kutundaikanga bakwetu?
Bintu byo twambapo kimye kyonse bimwesha bintu biji mu muchima wetu nangwa byo tubena kulangulukapo. (Luka 6:45) Onkao mambo, twafwainwa kufunjisha milanguluko yetu kuta muchima pa bintu byawama, bintu byaoloka, bintu bilengela muntu kwilama bulongo, bintu bimwesha butemwe ne bintu byafwainwa kutotwa ku bantu. (Filipai 4:8) Pa kuba’mba tute muchima pa bintu byawama, twafwainwa kusalanga bulongo makayo, bya kisangajimbwe ne kusala bulongo balunda. (Byambo bya Maana 13:20) Saka tukyangye kwamba byambo, kyawama kukilangulukapo patanshi. Kabiji mwafwainwa kulanguluka pa byo mukeba kwamba inge bisakutundaika bakwenu nangwa bisakwibakozhatu ku muchima. Baibolo waamba’mba: “Byambo bya kupulumukatu byasañana nobe mpoko, pakuba byambo bya muntu wa maana bibukañana.”—Byambo bya Maana 12:18.
FUNJILAIPO BIKWABO
Fundai kwamba byambo byawama bitokesha Yehoba ku muchima kabiji bitundaika bakwenu.
4. Chinuzhukainga ñambilo yatama
Kimye kimo twamba byambo bitulengela kwilangulusha kulutwe. (Yakoba 3:2) Tangai Ngalatiya 5:22, 23, ne kwisamba ano mepuzho:
Ñanyi byubilo bimo biji mu kino kinembelo byo mwafwainwa kulombapo byafwainwa kwimukwasha kwambanga byambo byawama? Kabiji bino byubilo byafwainwa kwimukwasha byepi?
Tangai 1 Kolinda 15:33, ne kwisamba buno bwipuzho:
Balunda nenu ne bya kisangajimbwe byo mwatemwa byafwainwa kulengela ñambilo yenu kwikala byepi?
Ñanyi bintu byakonsha kwimulengela kwikala na ñambilo yawama nangwa yatama?
Tangai Musapwishi 3:1, 7, ne kwisamba buno bwipuzho:
Ñanyi kimye kyawama kuzhindamapotu kabiji ñanyi kimye kyawama kwambilamo?
5. Ambainga bintu byawama pa bakwenu
Ñanyi kintu kyafwainwa kwitukwasha kubula kwambila bakwetu byambo bikozha ku muchima nangwa byambo byatama? Tambai VIDYO, ne kwisamba ano mepuzho.
Mu vidyo ye mwatamba, ñanyi kintu kyalengejile uno mulongo kutendeka kwamba bintu byawama pa bakwabo?
Ñanyi bintu byo aubile pa kuba’mba apimpule ñambilo yanji?
Tangai Musapwishi 7:16, ne kwisamba buno bwipuzho:
Ñanyi bintu byo twafwainwa kuvulukanga inge ketukebe kwamba bintu byatama pa bakwetu?
Tangai Musapwishi 7:21, 22, ne kwisamba buno bwipuzho:
Abino byepelo byafwainwa kwimukwasha byepi kubula kuzhingila bukiji inge bakwenu bemwambila byambo byatama?
6. Mweshainga kifyele ne lusa pa kwisamba na ba mu kisemi kyenu
Yehoba ukeba’mba tumweshenga kifyele ne butemwe pa kwisamba na ba mu kisemi kyetu. Tambai VIDYO, ne kwisamba buno bwipuzho.
Ñanyi kintu kyafwainwa kwimukwasha kwisamba na kisemi kyenu na jiwi jakooka?
Tangai Efisesa 4:31, 32, ne kwisamba buno bwipuzho:
Ñanyi ñambilo yafwainwa kutundaika ne kukomesha kisemi kyetu?
Yehoba wamwesheshe byo atemwa Mwananji, aye Yesu. Tangai Mateo 17:5, ne kwisamba buno bwipuzho:
Mwafwainwa kufunjilako ka kwi Yehoba pa kwisamba na ba mu kisemi kyenu?
Monaingapo bimye bya kusanchila bakwenu
BANTU BAMO BAMBA’MBA: “Amiwa ñambatu byonse biya ku muchima. Kechi ngakamwa umvwe bakwetu basakutemwa byo nsakwamba nangwa ne.”
Nanchi kwamba bino kwawama nyi? Mambo ka o mwakumbwila byobyo?
ÑANYI BISHINKA BYO MWAFUNDA?
Byambo byo twamba byakonsha kukwasha bakwetu nangwa kwibakozha ku muchima. Onkao mambo, twafwainwa kulangulukapo saka tukyangye kwamba, kimye kya kwamba ne jishinda jakwambilamo.
Mepuzho a kupitulukamo
Ñanyi mashinda o mwafwainwa kwingijishishamo kya bupe kya kwamba pa kukwasha bakwenu?
Ñanyi ñambilo yo mwafwainwa kuchinuzhuka?
Ñanyi bintu byafwainwa kwitukwasha kwambanga na kifyele ne kutundaika bakwetu?
KEBAI BISHINKA BIKWABO
Ñanyi bintu byafwainwa kwitukwasha kwambanga byambo byawama bitundaika bakwetu?
Monai bintu byafwainwa kwimukwasha kuchinuzhuka ñambilo yatama.
“Nanchi Kine Kutukana Kwatama Nyi?” (Kibaaba kiji pa jw.org)
Monai byo mwafwainwa kuba pa kuba’mba mubulenga kuyebeka bakwenu.
Monai Yehoba byo akwashishe mwanamulume umo ye kyakatazhanga kuleka kwamba byatama pa bakwabo.
“Natendekele Kulanguluka Bingi pa Bikekala Bwikalo Bwami Kulutwe” (Kyamba kya Usopa, August 1, 2013)