Ene Mambo Kuvwala Bulongo ne Kumweka Kipaale o Kwanemena

Atweba bonse tufuukulapo byo tukeba kuvwala ne byo tusakumweka. Inge twalondela mafunde a mu Baibolo, kiketukwasha kuvwalanga bulongo ne kutokesha Yehoba ku muchima. Twayai twisambe pa mafunde amo.

1. Ñanyi mafunde afwainwa kwitukwasha kusala bulongo bya kuvwala?

Twafwainwa “kuvwalanga bulongo, na kwipelula ne kwikala na milanguluko yawama.” Kabiji kumweka kipaale kumwesha’mba ‘tunemeka Lesa.’ (1 Timoti 2:9, 10) Akilangulukai pa ano mafunde ana: (1) Twafwainwa “kuvwalanga bulongo.” Pa kupwila, mumona bantu ba Yehoba bavwala bivwalo byapusana pusana. Nangwa byonkabyo, mvwajilo ne byo tuzañuna nsuki yetu bimwesha byo twanemeka Lesa ye tupopwela. (2) Kuvwala “na kwipelula” kulumbulula kubula kuvwala bivwalo bilengela bantu kwikala na kilaka kya kwilaala. Kabiji kechi tulengela bantu kutatu muchima pa byo twavwala ne. (3) Tumwesha’mba tuji na “milanguluko yawama” inge ke tubule kulondela mafwashonyi onse ajiko lelo jino. (4) Bivwalo byetu kimye kyonse byafwainwa kumwesha’mba ‘tunemeka Lesa’ wetu ne kulengela bantu kuyuka’mba tupopwela Lesa wa kine.​—1 Kolinda 10:31.

2. Mambo ka o twafwainwa kulangulukilanga pa balongo ne banyenga kimye kyo tubena kufuukula bya kuvwala ne byo tusakumweka?

Nangwa kya kuba tuji na luusa lwa kwisajila bya kuvwala, twafwainwa ne kulangulukapo inge byafwainwa kutuntwisha bakwetu nangwa ne. Onkao mambo, kechi tukeba kuvwala bya kuvwala byafwainwa kutuntwisha bakwetu ne. Mambo a Lesa aamba’mba “tutokeshenga bakwetu ku muchima kupichila mu kwibobila byawama bya kwibakomesha.”​—Tangai Loma 15:1, 2.

3. Mvwajilo yetu yafwainwa kulengela byepi bantu kukeba kufunda pe Yehoba?

Twibikako kimye kyonse kuvwala bulongo konse ko tuji. Pano bino, twafwainwa kutako bingi muchima kuvwalanga kipaale inge tubena kuya na kupwila ne mu mwingilo wa kusapwila. Kechi tukeba bantu kukana kuteleka ku mambo awama na mambo a mvwajilo yetu ne. Pakuba tukeba mvwajilo yetu ne mmwekelo yetu kulengela bantu kukeba kufunda pe Lesa ne kulengela “lufunjisho lwa Mupulushi wetu aye Lesa, kutotwa.”​—Titusa 2:10.

FUNJILAIPO BIKWABO

4. Kumweka kipaale kumwesha’mba twanemeka Yehoba

Ñanyi kintu kine kitulengela kuvwala bulongo? Tangai Lumwekesho 4:11, ne kwisamba ano mepuzho:

• Byo twayuka’mba twimenako Yehoba, mvwajilo yetu yafwainwa kwikala byepi?

• Nanchi kyanema atweba kutako bingi muchima kuvwala bulongo ne kumweka kipaale inge tubena kuya na kupwila ne mu mwingilo wa kusapwila nyi? Mambo ka o mwakumbwila byobyo?

5. Bintu byafwainwa kwitukwasha kumweka bulongo ne kusala bya kuvwala

Tambai VIDYO.

VIDYO: “Bintu Byonse Saka Mwibyubila Lukumo lwa Lesa” (10:18)

Nangwa kya kuba bya kuvwala byetu bya mutengo nangwa ne, byafwainwa kwikala byatooka kabiji byafwainwa kuyilamo na byo tubena kuba. Tangai 1 Kolinda 10:24 ne 1 Timoti 2:9, 10. Kabiji mwisambe ene mambo o twafwainwa kubujila kuvwala bya kuvwala . . .

• byabula kuwama kabiji biji na ndochi nangwa bya kukayilamo.

• byakwata pa mubiji, bibena kumwesha bya mukachi nangwa bilengela bantu kwikala na kilaka kya kwilaala.

Nangwa kya kuba bena Kilishitu kechi bakiji mu Mizhilo ya Mosesa ne, bino bafwainwa kufunjilako byavula pe Yehoba byo akeba bantu kuvwalanga. Tangai Mpitulukilo ya mu Mizhilo 22:5, ne kwisamba buno bwipuzho:

• Mambo ka o twafwainwa kubujila kuvwala bivwalo byafwainwa kulengela mwanamulume kumweka nobe mwanamukazhi ne mwanamukazhi naye kumweka nobe mwanamulume?

Tangai 1 Kolinda 10:32, 33 ne 1 Yoano 2:15, 16, ne kwisamba ano mepuzho:

• Mambo ka o twafwainwa kutelako bingi muchima ku mvwajilo ne mmwekelo yetu? Ñanyi mvwajilo yafwainwa kubula kutuntwisha bantu mu mpunzha mo twikala nangwa balongo ne banyenga mu kipwilo?

• Ñanyi mvwajilo yatemwa kuvwala bantu ku mpunzha ko mwikala?

• Nanchi mwalanguluka’mba mvwajilo yabo yafwainwa bena Kilishitu nyi? Mwakumbwila ka byobyo?

ÑANYI BISHINKA BYO MWAFUNDA?

Inge twafuukulapo kuvwala bulongo ne kumweka kipaale, tumwesha byo twanemeka Yehoba ne bakwetu.

Mepuzho a kupitulukamo

• Mambo ka Yehoba o akebela’mba tuvwalenga bulongo ne kumweka kipaale?

• Ñanyi mafunde amo afwainwa kwitukwasha pa kupota bya kuvwala?

• Mvwajilo ne mmwekelo yetu yakonsha kulengela bantu kumonanga byepi bupopweshi bwa kine?

KEBAI BISHINKA BIKWABO

Yukai bantu byo balanguluka pe anweba inge bamona byo mwavwala.

“Nanchi Amiwa Mmweka Byepi?” (Kibaaba kiji pa jw.org)

Patanshi langulukaipo saka mukyangye kwinemba nnembo pa mubiji.

“Baibolo Waambapo’mba ka pa Kwinembaula pa Mubiji?” (Kibaaba kiji pa jw.org)

Monai mafunde akwabo afwainwa kwitukwasha kusala bulongo bivwalo bya kupota.

“Nanchi Mvwajilo Yenu Itumbijika Lesa Nyi?” (Kyamba kya Usopa, September 2016)

Nga mwanamukazhi umo wakebeshenga kutokesha Yehoba ku muchima, wafunjijileko byepi ku bakwabo pa kusala bya kuvwala?

“Kuvwala Bulongo ne Kwipyola Byantuntwishanga Bingi” (Labainga!, December 22, 2003)