Kabokoshi Ka Mepuzho

◼ Twakonsha kuvwala byepi pa kuya ku mazubo pengijiwa mwingilo wa Yehoba?

Kuzhokoloka mwaya ntanda yonse, Mazubo a Bufumu, Mazubo a kupwilamo Kukatampe, mazubo a Betele kabiji ne misampi ke mazubo apanwa kwingijilamo mwingilo wa Yehoba. Ano mazubo a butooto kabiji amwesha mushingi ku bantu. Apusanako bingi na mazubo aji mu ino ntanda ya kwa Satana. Onkao mambo, aba bonse bafwakesha mapunzha pengijiwa mwingilo Yehoba bafwainwa kuyukanyikwa’mba bantu ba Yehoba babena kuba kyaswa muchima wanji.

Byo tuji bena Kilishitu, “twilumbulula byo tuji ba mingilo ya Lesa” mu mbaji yonse kubikakotu ne mvwajilo kabiji ne mwekanyikilo yetu. (2 Ko. 6:3, 4) Kabiji twafwainwa ne kumwesha byubilo byawama. Mu bimye byonse mvwajilo ne mwekanyikilo yetu yafwainwa kwikala ibena kumwesha munema wafwainwa bakalume ba Yehoba Lesa. Kino kikebewa bingi kikatakata pa kufwakesha ofweshi mukatampe uji mu muzhi wa New York ne misampi mwaya ntanda yonse.

Kwamba pa buneme bwa mvwajilo ne mwekanyikilo yawama, buku wa Bakwatankana Kuba Kyaswa Muchima wa Yehoba waamba’mba, pa kuya mu mwingilo wa mu bujimi ne pa kutanwa ku kupwila kwa bwina Kilishitu kikebewa kwikala ba butooto, kuvwala ne kumwekanyika bulongo. Pa peja 138 palagalafu 3, paambiwa’mba: “Vulukai’mba jizhina ja kuba’mba Betele jilumbulula’mba ‘Nzubo ya Lesa.’ Onkao mambo, mvwajilo, mwekanyikilo ne byubilo byetu byafwainwa kwikala byonka byo kikala umvwe tubena kuya ku kupwila pa Nzubo ya Bufumu.” Basapwishi ba Bufumu bonse bafwainwa kulondela jino jifunde pa kufwakesha Betele iji kwipi na ko baji ne bobatu bafuma ku mapunzha a kwalepa. Mu jino jishinda, aba beya na kufwakesha ano mapunzha bamwesha lusanchilo ne munema.—Sala. 29:2.

Mvwajilo yetu yafwainwa kwituyukisha’mba “twi ba kunemeka Lesa.” (1 Timo. 2:10) Mvwajilo ne mwekanyikilo yawama yakonsha kulengela bantu kunemeka mpopwelo ya kine ya Yehoba. Nangwa byonkabyo, kyatanyiwa kuba’mba balongo ne banyenga bamo kechi bavwala bulongo pa kufwakesha mazubo pengijiwa mwingilo wa Yehoba ne. Bamo bavwalatu bingibingitu nangwa bibindankanya muchima. Bena Kilishitu kechi bafwainwa kuvwala mvwajilo ya uno mutundu pa kimye kiji kyonse ne. Mu luno lubaji ne mu mbajitu ikwabo ya bwikalo bwa bwina Kilishitu, twafwainwa kulama mafunde apusanyako bantu ba Lesa ku ino ntanda, kabiji ne kubila byonse lukumo lwa Lesa.—Loma 12:2; 1 Ko. 10:31.

Onkao mambo, pa kufwakesha ofweshi mwine mukatampe ne musampi mu muzhi wa New York State nangwa misampi ikwabotu, kikale mwanengezha kufwakasha nangwa muji pa moba a kukokoloka o mwaingijisha kufwakeshamo pa musampi, ishikishai anwe bene amba: ‘Nanchi mvwajilo ne mwekanyikilo yami ibena kumwesha munema wakunemeka mpunzha yo mbena kufwakesha nyi? Nanchi ibena kunemeka Lesa ye mpopwela nyi? Nanchi yakonsha kutuntwisha bantu nyi?’ Kupichila mu mvwajilo ne mu mwekanyikilo yetu, twayai ‘tulengelenga lufunjisho lwa Lesa, Mupulushi wetu, kumweka bulongo mu bintu byonse’!—Titusa 2:10.