Kabokoshi Kamepuzho
◼ Mvwajilo nemwekelo yetu byafwainwa kwikala byepi kimye kyotubena kuya nakufwakesha pa Betele?
Kimye kyotubena kuya nakufwakesha pa Betele, kikale nakumonatu mpunzha nangwa kupempula balongo bamukisemi kya Betele, “mvwajilo, mwekelo, nebyubilo byetu byafwainwa kwikala byafwainwa byonka byotumwekana kimye kyotubena kupwila mu Nzubo ya Bufumu.” (om-CW 131) Pano bino, kyatanyiwa kuba’mba mvwajilo yabalongo nebanyenga bamo pakwiya nakufwakesha maofweshi amisampi kechi ikala yamushingine. Kino kechi byobyo kyafwainwa kwikala pakwiya nakufwakesha bino bifulone. Mwekelo yetu yafwainwa kwikala yawama, kabiji yakipale, saimwesha mushingi wafwainwa bakalume ba Yehoba Lesa. Bamo byobafwakesha Betele, mvwajilo yabo kechi ikala yamushingine, kimo kimye bavwalatu jilaya kwakubula kwijitwezha mukachi, kampe sikipa yanembwapo byambo, nangwa bivwalo byakukailamo. Abya kyawama kufwakasha satwavwala bivwalo byandochinyi? Ine. Mujino jishinda, twafwainwa kuvwalanga mvwajilo ipusanya bantu ba Lesa kubantu baino ntanda. (Loma 12:2; 1 Ko. 10:31) Kechi twafwainwa kwikala namukose wakowa nekuchapa bivwalone. Kubula kowa nangwa kulekelela mibiji yetu keifumye bwema bwatama kumwesha kubula butemwe kubakwetu. Pakuba buzhile nebutooto byobyendela pamo kwesakana nabyo byalumbululwa mu Baibolo, twafwainwa kutako muchima kwikala babutooto kimye kyonse saka tukyangye nekwimana kuya nakufwakasha.—1 Timo. 2:9, 10.
Kino kyanema bingi kikatakata inge tubena kufwakesha mazubo a Betele mambo tukebula bingi bantu bavula betumona babula Bakamonyi. Bano bantu betumona bakonsha kutatula kulangulukanga bintu bingi pabantu ba Lesa nejibumba janji namambo abintu byobamona. Kyawama kubuula botufunjisha lufunjisho lwa Baibolo nebakwabotu bantu bakeba kufwakasha, kwibavululako byokyawamina kuvwala nekumweka bulongo. Kisemi kya Betele kikasanta bingi umvwe mwauba kino.
Byotuji bena Kilishitu bamwingilo, twafwainwa kujimuka nekumona kuba’mba mwekelo yetu kechi yatuntwisha bakwetune. (2 Ko. 6:3, 4) Mumwekelo yetu yawama, twayai atweba bonse ‘tulengele lufunjisho lwa Lesa, Mupulushi wetu, kumweka bulongo mu bintu byonse.’—Titu. 2:10.