Mvwajilo Yafwainwa Ipana Mushingi kwi Yehoba
1. Twakonsha kumwesha byepi lusanchilo lwa kupwila kwa nkambi kubena kwiya?
1 Katatakatu tukekale na jishuko ja kwikala benyi ba Yehoba pa Kupwila kwa Nkambi kwa mu 2003 kwa “Pai Lesa Lukumo.” Twamusanchila bingi Yehoba pa kwitwita ku kijiilo kikatampe kya ku mupashi! Twakonsha kumwesha mushingi kwi aye ne kusanchila lunengezho lwanji lwa kwitupa kajo ka ku mupashi kupichila mu mvwajilo ne mwekelo yetu.—Sala. 116:12, 17.
2. Mambo ka o kyanemena kwi atweba kwikala ba butooto ne mwekelo ya mushingi?
2 Butooto ne Kuba Monka mo Byalondankena: Mwekelo yetu yafwainwa kumwesha buzhile bwa Lesa wetu wa butooto kabiji uba bintu monka mo byalondankena. (1 Ko. 14:33; 2 Ko. 7:1) Mubiji wetu, nsuki yetu, ne ngala yetu byafwainwa kwikala bya butooto, kabiji mwekelo yetu nayo yafwainwa kwikala ya mushingi. Lelo jino mwekelo ya busaji ibakumbane bingi. Mwina Kilishitu kechi wafwainwa kulondela mwekelo ya busaji amba mambo byo bimweka bantu baya nkuwa ne. Umvwe ketulondeletu mafwashonyi abasampukemo, kyakonsha kulengela bantu kukankalwa kuyuka lupusano luji pakachi ka bantu bengijila Lesa wa kine ne boba babula kumwingijila.—Mala. 3:18.
3. Twakonsha kumona byepi kuba’mba mwekelo yetu ikekala yafwainwa kwesakana na lujimuno luji mu 1 Timoti 2:9, 10?
3 Mvwajilo Yafwainwa ba Mwingilo ba Bwina Kilishitu: Mutumwa Paulo byo anembejile nkalata mukulumpe wa bwina Kilishitu aye Timoti, wakoseshe ne ‘banabakazhi kuvwala bibafwainwa na bumvu ne butekanye; ... na mingilo yawama, byafwainwa banabakazhi betela’mba, twi ba kunemeka Lesa.’ (1 Timo. 2:9, 10) Pakuba’mba tumone kuba amba bivwalo byetu byafwainwa, kikebewa kulangulukishapo bulongo. Bivwalo byafwainwa kwikala byatooka kabiji bya mushingi, kechi bya kwimwesha ne kubindankanya bakwenu michima ne.—1 Pe. 3:3.
4, 5. Lujimuno ka lobafwainwa kumvwina banabakazhi ne banabalume ba bwina Kilishitu?
4 Kabiji Paulo wajimwineko ne kubula kukizhamo ‘kwichika nsuki, nangwa na bya ngolode, nangwa bamangalite, nangwa na bivwalo bya mutengo wanema ne.’ (1 Timo. 2:9) Kuyuka pa kupelela mu kwingijisha bya kwikobaika kobaika, bya kwishinga shinga ne bintu bikwabotu byawama ke jishinda jimo ja maana banabakazhi ba bwina Kilishitu jo bafwainwa kulondela.—Mana. 11:2.
5 Lujimuno lwa kwa Paulo ku banabakazhi ba bwina Kilishitu, lwingila ne ku banabalume ba bwina Kilishitu. Balongo bafwainwa kuchinuzhuka mafwashonyi amwesha ndangulukilo ya ku kyalo. (1 Yoa. 2:16) Kyakumwenako, mu byalo bimo kyasampuka bingi kuvwala bivwalo byalukula byakila pa nsaishi. Ino mvwajilo kechi yafwainwa muntu wingijila Lesa ne.
6. Mambo ka o twafwainwa kutwajijila na mvwajilo ne mwekelo yawama kimye kyotuji pa lwendo lwa kuya na kupwila ne pa kufumako, kimye kyo tubena kupwila ne kimye kya kupwisha kupwila pa juba pa juba?
6 Mu Bimye bya Panyuma ya Kupwila: Kimye kya kutanwa ku kupwila, balongo ne banyenga boba bingi bulongo mu mvwajilo ne mu mwekelo. Bino nangwa byonkabyo, masawakya amwesha’mba bamo mvwajilo ne mwekelo yabo kechi iwama kimye kyo baji pa lwendo lwa kuya na kupwila, kimye kya kubwela kufuma ku kupwila, nangwa panyuma ya kupwila ne. Kwambatu kine, mvwajilo ne mwekelo yetu, kikale kimye kibena kwambiwa majashi nangwa pa bimyetu bikwabo ikebula bantu bangi byobamona bantu ba Lesa. Byotuvwala ma baaji a pa kupwila kwetu kwa nkambi, twafwainwa kimye kyonse kuvwalanga bivwalo byafwainwa ba mwingilo wa bwina Kilishitu. Javula kino kilengela bantu kwitutakaika ne mu jino jishinda kitushinkwila jishinda ja kutendekelamo kusapwila.—1 Ko. 10:31-33.
7. Mvwajilo ne mwekelo yetu yawama yakonsha kulengela bantu kubapo ka?
7 Byonkatu kumwemwesela kwa na lusekelo byo kuwamisha mwekelo ya kilungi, po pamotu na mvwajilo ne mwekelo yawama nayo ipana munema wa byambo byotusapwila ne kunemeka jibumba jo twimenako. Bamo baketumonanga pa Kupwila kwa Nkambi kwa “Pai Lesa Lukumo” kwa uno mwaka, bakakonsha kukeba kuyuka ene mambo o twapusenako kabiji kipelako bakonsha ne kwamba’mba: ‘Tuyenga nenu, mambo twaumvwa [ne kumona] amba Lesa muji nanji.’ (Zeka. 8:23) Twayai atweba bonse tumweshe munema kwi Yehoba kupichila mu mvwajilo ne mwekelo yetu.
[Kitenguluzha pa peja 5]
Vwalai ne Kumweka Bulongo
▪ Kimye kyo muji pa lwendo
▪ Pa kupwila kwa nkambi
▪ Kimye kya kukokoloka kyomubilamo bintu biji byonse