Kuvwala Nekuzañuna Bulongo
1 “Sawakya wamupepala wabyambo washimwine’mba: Banabalume bonse, kuvwangakotu nebansongwalume, bavwajile matai. Banabakazhi bonse nebansongwakazhi, bakyanyike nebakomako, bavwajile madeleshi nangwa mashikechi. Kafwako nangwa umo wavwajile jinizi nangwa jilaya kwakubula taine. Bonse bamwekelenga kipale.” Uno pepala wabyambo washimwinenga ñanyi jibumba? Jibumba jabamulwila ntanda bakonkenejile pamonyi? Bantu bakailenga makayonyi, inyi bajinga pasandaunyi? Ine, kwalepeshatu! Uno pepala wabyambo watongwelenga jibumba jabalongo nebanyenga bajinga pakupwila kwankambi mwaka wapwa.
2 Pakupwila kukwabo kwankambi, mwanamulume umo ushimuna masawakya amupepala wabyambo wijilumbulwile bino jino jibumba ja Bakamonyi amba: “Banabalume bonse bajinga babutooto kabiji bavwajile masuchi nematai. Banabakazhi bavwajile namushingi saka bamwekana bulongo.” Mwanamulume umo malonda naye wibamwene, waambile’mba: “Mwibantu bamushingi, babutooto kabiji bakipale. Byombena kumona pano byawama bingi. Muino ntanda yasombela, anweba mwafumamo muino ndochi!” Byobijipo byambo byawama peatweba! Nanchi kechi tusanta bwana bwetu bwankazhi byobubena kushimunwa bulongo nenyi? Ee kine, bonse Bakamonyi balengejile kuba’mba ano masawakya awame namambotu amwekelo yabo yamushingi.
3 Twayukanyikwa bingi mwaya ntanda namambo amwekelo yapusanako yotumwekelamo. (Mala. 3:18) Mamboka? Mambo tulondela lujimuno luji mu Binembelo lwakwikala “bafwainwa na bumvu ne butekanye, ... na mingilo yawama, byafwainwa [boba] betela’mba, twi ba kunemeka Lesa.”—1 Timo. 2:9, 10.
4 Mvwajilo Nenzañwino Yenu Imweshaka? Bivwalo byotuvwala kabiji nemvwajilo yotwibivwajilamo yoitushimwinako byotuji—byotwaitabilamo, byubilo byetu, nebyotufuukula kuba. Nsajilo yotusajilamo bivwalo yoilumbulula bumuntu bwetu kabiji nebyotufuukula kuba. Kechi twafwainwa kulondela ndangulukilo nebyubilo byasampuka muino ntandane. Atweba kyotukeba kechi kubatu’mba kana fwashonyi umo wawamane, tukeba kumona inge abyo bivwalo byafwainwa kuvwala muntu wambamba newamwingilo wa Lesa. (Loma 12:2) Mukifulo kyakusala kivwalo namambo abyokibena kumwekana pangye bino sakibena kumwesha mupashi wabukitolwele nangwa kibena kutundaika byubilo byatama, tukeba kumwesha kuba’mba kine kine ‘tutumbijika Lesa.’—1 Pe. 2:12.
5 Kimo kimye, muntu wakatataka mubukine, nangwa wakoka kumupashi wakonsha kwitaba kiji kyonse kyaino ntanda nabiji mvwajilo nemwekelo, kwakubula patanshi kukilangulukapo pabyokyakonsha kumweka kwi Yehoba nejibumba janjine. Atweba bonse pamuntu pamuntu twafwainwa kwipima atweba bene nekumona umvwe twasendwa nandangulukilo yabantu baino ntanda. Twakonsha kusolomokapo mulongo nangwa nyenga wakoma kumupashi, wamushingi, nekumwipuzha kuba’mba etubuleko bulongo biji mvwajilo nemwekelo yetu, apa bino nekulangulukishapo pabyoetubula.
6 Bamo bafikena kwitaba amba ee, kyawama kumona byobavwala sabaji pampunzha yakupwila kwankambi. Pano bino pakupwisha kupwila kwajojo juba, kimye kyakukokoloka babwela bavwalatu bivwalo byonka byobavwalapo kimye kyonse. Mwekelo yetu yafwainwa kwikala yamushingi yafwainwa bamingilo babwina kilishitu. (2 Ko. 6:3, 4) Konse kotuya kutanwa bantu, mabaji etu apakupwila kwankambi, mvwajilo nenzañwino yetu byobituyukisha amba twi Bakamonyi bakwa Yehoba. Onkao mambo, mvwajilo yetu yafwainwa kwikala yamushingi kabiji yawama, imwesha kuba’mba kechi twi “ba panopantanda” ne.—Yoa. 15:19.
7 Twayai tukengile papelela bulume bwetu pakuno Kupwila Kwankambi kwauno mwaka kwa “Bamukoyo Wakutaya Mbila ya Bufumu” nekumwesha’mba “twi bantu bazhila kwi Yehoba Lesa [wetu].” Buwame bufumamo bulenga ‘kutakaika, kutumbijika nekumunemeka Yehoba.’—Mpitu. 26:19.
[Kitenguluzha pa peja 6]
Byakumutumbijika Yehoba:
■ Vwalai mvwajilo yafwainwa bamwingilo ba Lesa.
■ Chinuzhukai mafwashonyi amwesha mupashi waino ntanda.
■ Twafwainwa kwikala batekanya.