Pwishai Kilaka Kyenu Kyakumupashi
1 Kupwila kwetu Kwankambi kwa “Bamukoyo Wakutaya Mbila ya Bufumu” kukekalako kuketupa jishuko jakupwisha kilaka kyetu kyakumupashi. Byonkatu bikala kajo kawama kotuja, kuno kupwila kuketujisha kumupashi “na byambo bya lwitabilo.” (1 Timo. 4:6) Kuketufwenyesha kwipi ne Yehoba. Kabiji kuketufunjisha nekwitutundaika kushinda meseko mubwikalo bwetu. Yehoba witulaya’mba: ‘Amiwa nkakubula nekukufunjisha jishinda jo ukayamo: Nkakubulanga maana ne jiso jami saka jikutala.’ (Sala. 32:8) Byotwapeshiwapo kwikala naluno lutangijilo lwawama byonkabye mubwikalo bwetu! Monai mashinda amo akonsha kwitukwasha kuba’mba tukomvwishe majashi akambiwanga pakupwila kwankambi.
2 Twafwainwa Kunengezhezha Jimo Michima Yetu: Atweba bonse pamuntu pamuntu tuji namwingilo wakulamawizha muchima wetu wakifwanyikizho. (Mana. 4:23) Akino kikebewa atweba bene kwikinjika nekwiketekela kufuma panshi yamuchima. Kupwila kwankambi kekimye kyakulangulukisha pabulunda bwetu ne Yehoba, kabiji kyokimye kya ‘kutajijisha mumizhilo yalumbuluka, ya bwana bwabene.’ Kunengezha michima yetu kuba’mba ‘tutambule ao mambo abyalwamo,’ twafwainwa kulomba namukoyo kwi Yehoba kuba’mba etutajijishe, nekwitolola kufuma mu “jishinda jabubi,” nekwitutangijila “mu jishinda ja myaka.”—Yako. 1:21, 25; Sala. 139:23, 24.
3 Telekai Nekulanguluka-langulukapo: Yesu watakaikile Maliya mambo watelekeshe kubyambo byanji, byoaambile’mba: “Maliya wasalulula akya kyawama, kabiji kechi kikamwangatwa ne.” (Luka 10:39, 42) Umvwe neatweba tuji namuchima wabyonkabyo, kechi tukaleka tubintu tucheche kwitulabikane. Tukamona kuba’mba twaikala nekutelekesha kimye kikambiwanga majashi onse. Kechi tukapanganga kyongo nangwa kwendauka pabula nekine kintune, kabiji tukamona kuba’mba kechi tubena kulabika bakwetu namaselulafoni, ma pager, makamela, nemavidyo kamelane.
4 Kimye kyotubena kuteleka majashi, kyawama kunembangako bishinka bipi byakwitukwashako kuyuka jashi byojibena kwambiwa. Twafwainwa kukwatankanya byotubena kumvwa kubintu byotwayukila jimo. Kino kiketukwasha kumvwisha nekulama byotwafunda. Kimye kyotubena kupituluka mubishinka byotwanemba, twafwainwa nekulangulukanga pabyotukengijisha byobyo bishinka. Atweba bonse pamuntu pamuntu twafwainwa kwiipuzha’mba: ‘Nanchi kino kyalamata byepi bulunda bwami ne Yehoba? Bintuka byonakonsha kwingijilapo mubwikalo bwami? Nakonsha kwingijisha byepi bino bishinka kubakwetu? Nakonsha kwibingijisha byepi mumwingilo wami?’ Twafwainwa kwisamba nabakwetu kikatakata bishinka byotwamona amba byakonsha kukwasha. Kuba bino bintu kuketukwasha kulamanga byambo bya Yehoba ‘mukachi ka muchima wetu.’—Mana. 4:20, 21.
5 Twayai Twingijishenga Byotufunda: Panyuma yakutanwa kukupwila kwankambi, mwanamulume umo waambile’mba: “Kupwila kwajingako kwafikilenga bingi bantu umo umo pamuchima, kwatundaikilenga bingi bantu kumona biji mumichima yabo neyaba mubisemi byabo kabiji nekupana bukwasho bwabutemwe bwamu Binembelo. Kwannkwasha bingi kuyuka mwingilo wami wakupana bukwasho kukipwilo.” Neatweba bavula byobyotwiumvwa byonkabyo. Bino kufumatu kukupwila kwankambi sakwitukosesha nekwitufunjisha kechi kyokyonkatune. Yesu waambile’mba: ‘Inge anweba mwibiyuka bino, mwatokwa inge mwibyuba.’ (Yoa. 13:17) Twafwainwa kuteshako muchima kutatula kwingijisha bishinka byakonsha kwitukwasha atweba bene. (Fili. 4:9) Jino jojishinda jakupwishishamo kilaka kyakumupashi.
[Kitenguluzha pa peja 5]
Langulukainga Pabyomumvwa:
■ Byoñumvwa byalamata byepi bulunda bwami ne Yehoba?
■ Binkwasha kwingila byepi nabakwetu?
■ Nakonsha kwibingijisha byepi mubwikalo bwami?