‘Umvwai ne Kufunjilapo Bikwabo’
1 Buku wa Byambo bya Mana umwesha maana abena kwamba’mba: ‘Umvwai, mambo amiwa nsakwamba bintu bya kishinka; ne mu kanwa kami musakulupuka byaoloka; Amiwa nji na maana a kishinka a kulangulukila jimo mwa kubila bintu... . Ñumvwai amiwa; mambo bo bene ba lusekelo bendangatu mu mashinda ami. Mambo awa wantana amiwa watana bumi kabiji ukatalwa bulongo kwi Yehoba.’ (Mana. 8:6, 14, 32, 35) Abyo byambo bibena kulumbulula bingi bulongo mikambizho yo tubena kutengela kukomvwa pa Kupwila kwa Nkambi kwa “Bafunjishi ba Mambo a Lesa.”
2 Majashi a kupwila kwa nkambi akambanga pa kukajilwa kwetu ne balongo betu bonse mwaya ntanda yonse. Onkao mambo, kwingijisha mikambizho ne maana a ku mupashi o tukafunda kwakonsha kwitukwasha kwikala na lusekelo, kwikala balunda na Yehoba ne kutwajijila kwenda mu jishinda ja bumi bwa myaka ne myaka. Kyo kyo twafwainwa ‘kumvwina ne kufunjilapo byavula.’—Mana. 1:5.
3 Majashi Saka Akyangye Kutendeka: Pa kuba’mba tukafunde byavula mu bikambiwanga, twafwainwa kwikala panshi ne kutesha muchima ku majashi inge atendeka. Kino kikebewa kwikokozha bulongo. Kintu kikatampe ke kutatwilako jimo. Laalai bukiji byo mwayuka kuba’mba kesha mukaya na kupwila. Bukai lukelokelo pa kuba’mba bonse ba mu kisemi kyenu bekale na kimye kyafwainwa kwinengezha ne kwiaula kajo. Fikai bukiji pa mpunzha ya kupwila pa kuba’mba mukebe bulongo pa kwikala ne kuba bintu bikwabo byo mukeba kubila jimo majashi saka akyangye kutendeka. Pologalamu ikatatulanga na kimye kya 8:45 pa juba pa juba.
4 Na mambo a kuba kintu kikatampe kitulengela kukonkena pamo ke kutota Yehoba “monka mu bipwilo,” kipungu kyonse kya kupwila kyafwainwa kutatula mu jishinda ja kutumbijika Lesa wetu. (Sala. 26:12) Pa kuba’mba tube kino, bonse twafwainwa kwikala panshi, cheyamani saka akyangye kutongola lwimbo wa kushinkwila. Kino kibena kyaswañana na kufunda kwa mu Binembelo: “Bintu byonse byubiwe na mushingi ne mo byalondakena.” (1 Ko. 14:40) Kino kibena kulumbula ka kotuji? Umvwe mwamona cheyamani waikala pa pulatifomu kimye kya nyimbo ya kutendekelapo, nenuwa mwafwainwa kwikala bukiji-bukiji. Kino kikemulengela kwimbako na kimenge lwimbo wa kutota Yehoba ukembiwa pa kutatula kipungu.—Sala. 149:1.
5 Kimye Majashi kyo Abena Kwambiwa: Ezela “watesheshe muchima wanji mu kufunda ne mu kwibyuba.” (Eze. 7:10) Twakonsha kutesha byepi muchima ku mizhilo ya Yehoba yoetufunjisha? Byo mubena kutanga mitwe ya majashi apusana-pusana aji pa pologalamu, ishikishai’mba, ‘Kika nanchi Yehoba kyo abena kumbula mu ano majashi? Nakonsha kwingijisha byepi bino byambo pa kuba’mba amiwa ne kisemi kyami tumwenemo?’ (Isa. 30:21; Efi. 5:17) Twajijilai na kwishikisha ano mepuzho moba onse a kupwila kwa nkambi. Nembai bishinka byo mubena kukeba kwingijisha. Ikalai na kimye kya kwisambapo pa bino bishinka panyuma ya majashi a jojo juba. Kino kikemukwasha kulabijila ne kuba byo mwafunda.
6 Kyakatazha bingi kwikala kimye kyabaya na kuteleka. Pano kika kyakonsha kwitukwasha kubula kulanguluka bintu bingi? Ingijishai bulongo meso. Javula, kintu kyo tubena kutajisha ko kuya milanguluko yetu. (Mat. 6:22) Onkao mambo, kange mutalengatu konse komwaumvwa kyongo nangwa bantu babena kupitañana ne. Talainga ñambi. Zhikulai Baibolo wenu ne kutangila pamo kinembelo na ñambi kabiji kange muzhikepo kimye ñambi kyo abena kwikilumbulula ne.
7 Butemwe bwa bwina Kilishitu buketulengela kubula kuvulañanya bakwetu kimye majashi kyo abena kwambiwa. (1 Ko. 13:5) Kino kyo “kimye kya kuzhindaminamo” ne kumvwa. (Sapwi. 3:7) Onkao mambo, kange mulokotenga ne kupitañana-pitañana ne. Inengezhezhai jimo kubula kuyayaya ku kyolonyi. Kange mujenga bya kuja ne kutoma bya kutoma kimye kya kubilamo kino saka kikyangye kufika ne, kanatu muji na kikola kikeba’mba mujenga ne kutoma pa kimye ne pa kimye. Aba baji na maselula foni, ma pager, mavidyo kamela nangwa makamelatu akwabo kechi bafwainwa kuvulañanya bantu pa kwibingijisha ne. Bansemi bafwainwa kwikala pamo na baana babo babacheche ne bakomako pa kuba’mba bebasopenga bulongo.—Mana. 29:15.
8 Mwaka wapwa mukulumpe umo mu kipwilo watanwa ku kupwila kwa nkambi pa myaka yavula waambile’mba: “Paji kishinka kimo kikwabo kyo namwene kyawamishe pa kuno kupwila. Bavula mu luonde banembelenga bishinka, kubikapotu ne baana babacheche. Kino kyawamine bingi. Batangilenga ma Baibolo abo kimye kyonse ñambi kyo ebabujilenga kwiazhikula ne kutangila pamo nanji.” Tusanchila bingi bantu bateleka mu jishinda ja uno mutundu. Kuba kino kechi kulengelatu atweba pamo ne bonse botuji nabo pa kupwila kumvwisha ne, bino kyanema mambo kitumbijika Mufunjishi wetu Mukatampe, aye Yehoba Lesa.—Isa. 30:20.