Teshai Muchima ku Byambo Byazhila
1 Kechi byonse byamba muntu byafwainwa kutewako muchima ne. Bino inge Lesa waamba, kyanema bingi kuteshako muchima. (Mpitu. 28:1, 2) Twasanchila banembi bapuyiwemo banembele, “byambo [byazhila] bya Lesa” kuba’mba tumwenemo. (Lo. 3:2) Kupwila kwa nkambi kubena kwiya kuketupa mashuko a kumvwa ku bino byambo kimye kyo bikambiwanga ne kutangwa. Nanchi mwakonsha kuba byepi pa kuba’mba mutesheko muchima?
2 Fikai Bukiji Kila-lukelo: Fwanyikizhai byasangalele bena Isalela byo babujiwe kuya na kusambakana Yehoba pa Mutumba wa Sinai na kumvwa Mizhilo yanji! (Lupu. 19:10, 11, 16-19) Umvwe ne anweba muji na mulanguluko wajingapo na bena Isalela wa kutambwila lufunjisho lwa kwa Yehoba pa kupwila kwa nkambi, mwafwainwa kwinengezha kufika bukiji kila-juba. Kechi twafwainwa kuteleka ku pologalamu yonse umvwe sa tukelwa ne kuvulañanya bakwetu pa kwenda kukeba pa kwikala ne. Kila-juba pologalamu ukatendekanga na kimye kya 8:45 hrs.
3 Nangwatu bamo bafika bukiji kechi bekala bukiji pa bipona kuntendekelo ya pologamu ne. Mambo ka o bobila bibye? Mambo bapembelela poso cheyamani watongola lwimbo wa kushinkwila popo baleka kwisamba na balunda nabo ne kuya na kwikala. Twafwainwa kuyuka kuba’mba sa ku kiji maminiti avula lwimbo wa kushinkwila pologalamu saka akyangye kutendeka, cheyamani ukekajilanga jimo pa pulatifomu aku nyimbo ya Bufumu itanshi saka imbiwa. Kano ko kayukilo ketu ka kuba’mba ke kimye kya kwikala panshi! Apa bino kimye kikatongolwa lwimbo wa kushinkwila, tukekala benengezha kwimba ya kutota Yehoba.
4 Kila-kisemi Kiteleke mu Kukwatankana: Byambo byazhila byo byatangiwenga ku bena Isalela bapwijile pamo, bisemi kubikapo “ne bana,” batelekelenga ne kufunda. (Mpitu. 31:12) Pa kupwila kwetu bana kechi bafwainwa kwikala ‘babula kufundwa’ ne. (Mana. 29:15) Anweba bansemi nengezhai kwikala pamo na kisemi kyenu kyonse kubikapo ne bana benu bakiitwala. Bansemi bamo bapembelela lwimbo wa kushinkwila wakitendeka bino po kebatwale bana ku kyolonyi. Akye, kechi kyakonsha kufunjisha bana buneme bwa nyimbo ne milombelo mu mpopwelo yetu ne. Byo kyakonsha kuwamapo kubila jimo bintu bya yeo mutundu pologalamu saka ikyangye kutendeka ne!
5 Kiketukwasha kuteleka umvwe twaikala na kimye kya kukokoloka bulongo kila-bufuku ne kuchinuzhuka kujisha kimye kya mute. Teshai muchima ku bibena kwamba ñambi. Kange muleke milanguluko yenu kulanguluka bintu bingi ne. Londelai binembelo bya mu Baibolo byo bibena kutangwa. Nembai bishinka bipi. Kimye jashi kyo jibena kwambiwa, pitulukai mu byaamba ñambi ne kumona byo mwakonsha kwibingijisha. Isambilai pamo na kisemi pa byo mwafunda kimye kya mabanga. Nanchi ñanyi bishinka kila-muntu byo amwenamo? Nanchi kisemi kyenu kyakonsha kwingijisha byepi bino byambo?
6 Shingikai Kyambo kya kwa Lesa: Kupwila kwitupa jishuko jawama ja kwisamba na balongo ne kwiyowa kulamankana kukomesha. Kupichila mu kufika bukiji, tukekalanga na kimye kya kwisamba na balongo pologalamu saka ikyangye kutendeka ne. Nangwa byonkabyo, bamo besamba mu kimye kya pologalamu ne kulanguluka’mba kechi babena kuvulañanya bakwabo ne, mambo luonde lwabaya. Nangwa kyakuba kupwila kubiwa na bantu bavula, kikala kimye kya kuteleka byonka byo kikala pa kupwila ku Nzubo ya Bufumu. Kechi twafwainwa kuleka maselula foni, kuzhikaula-zhikaula mapepala, mavidyo kamela a kukopako ne makamela kuvulañanya bantu kimye majashi kyo abena kwambiwa ne.
7 Kimye Mosesa kyo atambwilenga Mizhilo kufuma kwi Yehoba, “kechi wajilenga kajo ne, nangwa kutoma mema ne.” (Lupu. 34:28) Byonkabyo, kechi kyafwainwa kuwama inge ketuje nangwa kutoma mu kimye kya pologalamu ne. Umvwe kechi mwi balwazhi bakeba kuja nangwa kutoma pa kimye ne pa kimye ne, mwafwainwa kupembela kufikilatu ‘kimye [kyatongolwa]’ kya kujilapo bya kuja.—Sapwi. 3:1.
8 Pa kupwila kumo, lukatazho lwa kupitañana kimye kya pologalamu lukitwajijila ku balongo, banyenga ne bana pamo. Baasha bakakambizhiwa kubula bano bantu kubwela na kwikala mu kipaka. Bamwingilo ba kwitemenwa babena kwingijila mu madipatimenti apusana-pusana bafwainwa kwikala mu luonde bukiji-bukiji akubapwishatu mingilo yabo. Umvwe kya kuba bamwingilo ba kwitemenwa kechi bapewa mingilo ikwabo yanema mu kimye kya pologalamu ne, bafwainwa kwikala mu luonde na kuteleka ku mapologalamu. Kechi bafwainwa kuwaya-waya mu madipatimenti sabesambatu kimye majashi kyo abena kwambiwa ne.
9 Kabiji kechi tukeba ‘kwaluka ke babanda kumvwa’ pa kuteleka ku Kyambo kya kwa Lesa ne. (Hebe. 5:11) Lekai tumweshe mushingi kupichila mu kutelekesha kimye byambo byazhila bya kwa Yehoba kyo bibena kwambiwa pa kupwila kwetu kwa nkambi kubena kwiya.