Kimye kya Kujishiwa kwi Yehoba ne Kusangalala ku Mupashi
1. Yehoba uta byepi muchima bakalume banji ku mupashi?
1 Yehoba mu butemwe ubena kunengezhezha bakalume banji bya kuja bya ku mupashi. Bantu bavula mu ntanda baji bingi na nzala ya ku mupashi, pa kuba atweba bya kuja bya ku mupashi byaubatu mbwee. (Isa. 65:13) Jishinda Yehoba jo abena kwingijisha kwitujishishamo ku mupashi, ke kupichila mu kupwila kwetu kwa nkambi kubiwa pa mwaka pa mwaka. Nanchi mubena kwinengezha kukatanwako ku bipungu byonse bya Kupwila kwa Nkambi kubena kwiya kwa “Tangijilwainga na Mupashi wa Lesa” nyi? Kijiilo kya bya kuja byawama bya ku mupashi kyanengezhiwa kala.
2. Twakonsha kuba byepi pa kuba’mba tukatanweko ku kupwila kwa nkambi?
2 Inengezhezhai Jimo: “Muntu ulangulukila jimo ne kukosakana pa kwingila ukamona bintu byavula.” (Mana. 21:5) Onkao mambo, byo mubena kwinengezha kukatanwako pa moba onse asatu a kuno kupwila kwa nkambi, lombelai jimo moba ku bakulumpe benu ba nkito. Umvwe mukeba pa kukafikila, abya mwanengezha kala nyi? Kabiji mwafwainwa ne kulangulukila jimo kajo ko mukajanga pachaile na balongo benu pa kuno kupwila. Tendekai kunengezha lonka luno kukafika pa kupwila kwa nkambi bukiji pa kuba’mba mukamwene jimo pa kwikala kabiji ne kwimbila pamo lwimbo wa kushinkwila ne lulombelo.
3. Mvwajilo ya mutundu ka yo tubena kulangulukapo kukavwala?
3 Twafwainwa kuvwala mvwajilo yafwainwa. (1 Timo. 2:9, 10) Kupwila kwa nkambi kwitupa mashuko awama bingi a kushimwinamo bukamonyi ku bakinkalankulo. Kupichila mu kuvwala mabaji etu ne bivwalo bya mushingi pa kufwakasha mu muzhi mwaikela kupwila kwa nkambi, kwitulengela kupusanako na babula kwitabila ne kubula kaneneno ku bantu.
4. Ki ka kiketukwasha ne bisemi byetu pamo kumwenamo mu majashi?
4 Telekeshainga: Kechi tubena kukeba kukashalapo pa kajo konse kanengezhiwa pa kikye kijiilo kya ku mupashi ne! (Mana. 22:17, 18) Mukalondelengamo na Baibolo wenu mu binembelo bikatangiwanga ne kunembako bishinka bipi mambo kuba bino kukemukwasha kuta muchima pa bikambiwanga ne kubula kulabama na bintutu bikwabo. Kabiji kimye kya mabanga, twafwainwa kwikingijisha kwisambilamo bishinka na bakwetu byo twaji kufunda. Kyatanwa kuba’mba bakyanyike bavula beikela mulwabo na banyike bakwabo pa kupwila kwa nkambi kabiji ne kwisamba kupwila saka kubena kubiwa nangwa kwitumina byambo mu kamulupi nangwa kubanga bintutu bikwabo. Umvwe tuji na baana, kyakonsha kuwama bingi kwikala nabo pamo na kisemi kyonse ne kuteleka ku majashi kukila kuleka baana betu ba bacheche kwiikela na bakwabo banyike.
5. Twakonsha kuba byepi pa kuba’mba tukamwenemo pa kupwila kwa nkambi?
5 Mwenaimo mu Kupwanañena Pamo: Kajo kawama bingi umvwe twikajila pamo na bakwetu. (Mana. 15:17) Mu jishindatu jimo, kupwanañana na balongo ne banyenga yetu kwitulengela kusekela bingi pa kupwila kwa nkambi. Onkao mambo, umvwe kipungu kya kupwila kyapwa, kyawama bingi kupwanañana na bakwetu baiya ku kupwila! (Sala. 133:1) Umvwe cheyamani witwambila kwikala nyimbo saka ikyangye kutendeka, twafwainwa kuchibikizha misambo yetu ne kwikala kuba’mba kupwila kutendeke.
6. Shimikizhaipo kintu kimo kyamwekele kimwesha byo twakonsha kushimuna bukamonyi ku bantu mu muzhi mwaikela kupwila kwa nkambi.
6 Sapwilai Ponse Pamwekela Jishuko: Kupwila kwa nkambi kwitupa mashuko awama bingi kusapwilamo. Bavula beya ku kupwila kwa nkambi, bebepuzha pa mambo a kishina kinembwa pa mabaji abo. Kino kyalengela bavula kutendekelamo mwisambo ne kushimwinamo bukine bwawama. Bantu bamo baipwizhenga, baichilwe kutanwa ku bipungu bya kupwila kwa nkambi kabiji ne kutanwa batainweko.
7. Mambo ka o twafwainwa kutainwako ku kupwila kwa nkambi kubena kwiya?
7 Pataiwa kimye kyabaya bingi pa kunengezha kuno kupwila, bishimikwa mwa kupwila kabiji ne kunengezha madipatimenti ne majashi a kupwila kwa nkambi. Mingilo yonse yataiwapo pa kunengezha kino kijiilo kya ku mupashi, imwesha’mba Yehoba wata bingi muchima bantu banji. Lekai atweba bonse tukatanweko kuba’mba tukafunde byavula! Kupusanako na ino ntanda, atweba ‘tukembanga na mambo a lusekelo lwa mu michima yetu.’—Isa. 65:14.
[Kitenguluzha pa peja 4]
Bya Kuvululako bya Kupwila kwa Nkambi
◼ Bimye Bikatendekelangamo Kupwila: Pa moba onse asatu, kupwila kukatendekanga na kimye kya 8:20 hrs. (Pa Nzubo ya Kupwila Kukatampe ya mu Lusaka, majiba (binzhilo) bikashinkulwanga na kimye kya 7:00 hrs). Umvwe nyimbo ya Bufumu itanshi yatendeka, atweba bonse twafwainwa kwikela jimo kuba’mba kupwila kukatatule na mushingi. Kupwila kwa Juba Jitanshi ne kwa Juba ja Bubiji kukapwa na kimye kya 15:55 hrs, kabiji pa Juba ja Busatu kukapwa na kimye kya 15:00 hrs.
◼ Kusunga pa Kwikala: Mwakonsha kusungila bantu pa kwikala bo mwaiya nabo mu motoka umo nangwa bo mwikala nabo nzubo imo.
◼ Kajo ka Pachaile: Mwane mukasendele jimo kajo ka pachaile kukila kusha mpunzha po mwapwila ne kuya na kukeba kajo kungi. Mwakonsha kwingijisha kipe kyaesakana kya kusendelamo kajo kyo mwakonsha kubika munshi ya kipona kyenu. Kechi kyaswishiwa kusendela kajo mu bipe bikatampe, bipe bimwesha biji mukachi ne kusenda maalwa ku kupwila ne.
◼ Mibingu: Twakonsha kumwesha lusanchilo lwetu kupichila mu kubingulako mibingu ya kwitemenwa ya mwingilo wa ntanda yonse pa Nzubo yetu ya Bufumu nangwa pa kupwila kwa nkambi. Cheki ya mali yonse yapanwa pa kupwila kwa nkambi, yafwainwa kupanwa ku “Watch Tower Society.”
◼ Mapuso ne Bintutu Bikwabo bya Kubazhimukila: Umvwe muntu wakolwa pa kupwila kwa nkambi, mwane monañanai na asha uji pepi usakuya bukiji bukiji ku Dipatimenti ya Bukwasho bwa Bukiji Bukiji kuba’mba wamwingilo ujiko amone kubaya kwa kyokyo kikola ne kupana bukwasho.
◼ Mafuta Anunkila Bulongo: Kikawama bingi atweba bonse kwesakanya pa kwishinga mafuta aji na bwema bwakilamo kununkila bulongo ao akonsha kuvundumuna bikola bya bantu babela mu kyaji nangwa bikola bikwabo bipashako.—1 Ko. 10:24.
◼ Tupepala twa Monai Uno Muntu: Kapepala ka Mwane Monai Uno Muntu (S-43) kafwainwa kwingijishiwa kunembelapo mabulañano a muntu wamwesha lusekelo kimye kya kusapwila busapwishi bwa kushukilwa mu kimye kya kupwila kwa nkambi. Basapwishi bakonsha kusenda kapepala ka monai uno muntu kamo nangwa tubiji ku kupwila kwa nkambi. Tupepala panembwa mabulañano twakonsha kupanwa ku Kibamba kya Mabuku nangwa ku munembeshi mu kipwilo umvwe mwabwela ku kipwilo kyenu.—Monai Mwingilo Wetu wa Bufumu wa February 2005, pe. 7.
◼ Kwela Biko: Twafwainwa kutwajijila kulama mpunzha yetu ya kupwila kwa nkambi kwikala ya butooto. Umvwe ketulangulukileko bakwetu kupichila mu kusenda ku mazubo etu kajo ketu kashalapo, bipepala ne bintutu bikwabo bya biko, kimwesha bulongo amba tuji na munema wa kunemeka Lesa mu bwikalo bwetu. Mu kimye kya kupwila kwetu kwa nkambi kubena kwiya, mwane lekai tukebikeko kulama mpunzha yetu ya kupopwelapo kwikala ya butooto kabiji ne kwikala na byubilo byawama pa kuba’mba ‘tukalengele lufunjisho lwa Lesa, Mupulushi wetu, kumweka bulongo mu bintu byonse.’—Titu. 2:10.
◼ Byolonyi: Baana kimye kyonse bafwainwa kwibashinjikinyako ku ba nsemi babo nangwa ku bakwabo bakoma pa kuya na kowa kabiji ne ku byolonyi. Mu kimye kya kupwila, kimye kimo baana batendeka kwendauka ne kukaya panyuma ya kupitapo awala umo nangwa avula. Pa kuba’mba bamone jishinda ja kutendeka kupitañenamo, baana javula batemwa kuyayaya ku byolonyi pa bimye byavula kupwila saka kubena kubiwa, kulengela bantu kubula kuteleka bulongo ku bibena kwambiwa. Umvwe bansemi kebatwajile jimo baana babo ku kyolonyi kupwila saka kukyangye kutendeka, baana kechi bakonsha kebobe bufinda bantu babena kuteleka panyuma ya kupitapo kakimye ne. Kabiji kushinjikinya baana ku kyolonyi ne mu kowa, kwibazhikijila bingi ku mapuso.