Londelainga Kilishitu Kupichila mu Kumwesha Munema
1. Nga kishina kya kupwila kwa nkambi kwa uno mwaka kyakwatankana byepi na kumwesha munema?
1 Baibolo wamulumbulula Nkambo walengele bintu byonse, aye Yehoba amba wavwikwa na buneme. (Sala. 104:1) Yesu kimye kyonse waambilenga ne kuba bintu mu jishinda jamwesheshenga munema kwi Shanji ne ku lunengezho Lwanji. (Yoa. 17:4) Atweba bonse tukekala na jishuko ja kulonda Yesu kabiji ne kutumbijika Yehoba pa Kupwila kwetu kwa Nkambi kubena kwiya kwa “Londelainga Kilishitu!”
2. Nga kwinengezha kutanwako ku bipungu byonse kumwesha byepi amba twamunemeka Yehoba?
2 Mpopwelo Yanema: Twakonsha kumunemeka Yehoba kupichila mu kwinengezha kutanwako ku kijiilo kya ku mupashi kyo etunengezhezha. Nanchi mwamubula mukulumpe wa nkito ne kunengezhezha jimo bikebewa pa kuba’mba mukatanweko ku kupwila kwa nkambi pa moba onse asatu nyi? Nanchi mwinengezha kufika bukiji kuba’mba mukamwene jimo pa kwikala kabiji ne kwivwangamo mu kwimba lwimbo wa kushinkwila ne lulombelo nyi? Nanchi mwalangulukila jimo kajo ko mukanengezha kuja pachaile na balongo benu nyi? Pa kutendeka kipungu kiji kyonse, umvwe cheyamani witwambila kwikala nyimbo saka ikyangye kutendeka, twafwainwa kuchibikizha misambo yetu ne kwikala kuba’mba kupwila kutendeke.
3. Nga kutesha michima yetu ku kupwila kumwesha byepi amba twanemeka mpopwelo yetu?
3 Kabiji kutesha michima yetu ku kupwila nako kumwesha’mba twamunemeka Shetu wa mwiulu. Panyuma ya kumona kupwila kwa nkambi byo kwaubiwenga, munembeshi wa byambo umo wanembele’mba bantu bapichilenga bakomokelenga bingi “byubilo byawama byamwesheshenga boba batainweko, byo batelekelenga na mushingi ku majashi ne kuta muchima bintu bya ku mupashi.” Kabiji waambile ne pa “baana bapuseneko na bakwabo . . . , bamweshenga byubilo byawama kabiji ne kutesha muchima kuzhikaula byepelo bya mu Baibolo Wazhila.” Umvwe kupwila kwatendeka, kechi twafwainwa kulokota, kwitumina byambo pa selula foni, kuja nangwa kupitañana ne. Bakyanyike bafwainwa kwikala pamo na bansemi babo pa kuba’mba bakonshe kwibakwasha kumwenamo mu kupwila. (Mpitu. 31:12; Mana. 29:15) Kwibikishako kwetu kwa kuba bino kumwesha mushingi ku bakwetu ne lusanchilo lwetu lwa kajo kanema kanengezhiwa ka ku mupashi.
4. Mambo ka o twafwainwa kwikala na mwekanyikilo ya mushingi pa kupwila kwa nkambi?
4 Mwekanyikilo ya Mushingi: Bavula bamwesheshe lusanchilo lwabo pa mambo a bintu byo bavulwilweko mu jashi jaambiwe pa kupwila kwa nkambi kwa mwaka wapwa ja kuba’mba “Mweshainga Munema wa Bwina Kilishitu Kimye Kyonse,” ajo jaambishepo amba bakalume ba Yehoba bafwainwa kwibikishako kumwesha munema wa bwina Kilishitu kupichila mu mvwajilo ne mu mwekanyikilo yabo. Kabiji ne uno mwaka twafwainwa kutesha bingi michima yetu ku kino kya kwituvululako. Mwekanyikilo yetu imwesha byo tulanguluka pe Yehoba ne jishuko ja kwikala Bakamonyi banji. Kimye kyonse twafwainwa kuvwalanga byafwainwa boba “betela’mba, twi ba kunemeka Lesa.”—1 Timo. 2:9, 10.
5. Twakonsha kutwajijila byepi kumwesha mwekanyikilo ya mushingi mu kimye kya kukokoloka pa mpunzha ya kupwila kwa nkambi?
5 Nanchi twafwainwa kumweshatu mwekanyikilo ya mushingi pa kutanwa ku kupwila konkatu nyi? Vulukainga’mba bavula baketumona saka twavwala mabaji pa mpunzha ya kupwila kwa nkambi. Mwekanyikilo yetu yafwainwa kwitupusanyako na bena kengi. Onkao mambo, nangwatu pa kimye kya kukokoloka nabiji pa kuya na kuja panyuma ya kupwila, twafwainwa kuvwala mvwajilo yafwainwa bamwingilo batanwa ku kupwila kwa nkambi kwa bwina Kilishitu kabiji kechi twafwainwa kuvwala bivwalo nabiji majinizi, tuputula nangwa mashikipa ne. Kino kikalengela bukamonyi kushimunwa ku bantu betumona. Yehoba usekela bingi umvwe mwekanyikilo yetu keimweshe’mba twi bamwingilo banji.
6. Bintu ka byawama bifuma mu kumwesha munema wa bwina Kilishitu?
6 Bintu Byawama Bifumamo: Kumwesha munema wa bwina Kilishitu pa kupwila kwetu kwa nkambi kwitushinkwila jishinda ja kusapwilako busapwishi bwa kushukilwa kabiji kilengela ne boba betumona kukomoka byubilo byetu. Pa kupwisha kupwila kwa nkambi kumo, kineme umo watakaikile’mba: “Tukyangye kumonapo kala bantu banji na byubilo byawama nobe bano ne. Muba bintu monka mukebela Lesa amba tubenga.” Kwikala ba munema kumwesha mushingi ne butemwe ku bakwetu kabiji kutumbijika bingi Yehoba. (1 Pe. 2:12) Kumwesha munema wetu wa kumunemeka Lesa ne lusanchilo lwetu pa kwikala na jishuko ja kufunjishiwa kwi aye Shetu. (Hebe. 12:28) Mwane twayai twibikengako kumwesha munema byo tubena kutengela Kupwila kwa Nkambi kwa uno mwaka kwa “Londelainga Kilishitu!”
[Kitenguluzha pa peja 5]
Bya Kuvululako bya Kupwila kwa Nkambi
◼ Bimye Bikatendekelangamo Kupwila: Pa moba onse asatu, kupwila kukatendekanga na kimye kya 8:20hrs. (Pa Nzubo ya Kupwila Kukatampe ya mu Lusaka, binzhilo bikashinkulwanga na kimye kya 7:00hrs). Umvwe nyimbo ya Bufumu itanshi yatendeka, atweba bonse twafwainwa kwikela jimo kuba’mba kupwila kukatatule na mushingi. Kupwila kwa Juba Jitanshi ne kwa Juba ja Bubiji kukapwa na kimye kya 16:25hrs, kabiji pa Juba ja Busatu kukapwa na kimye kya 15:45hrs.
◼ Kusunga pa Kwikala: Mwakonsha kusungila bantu bipona nangwa pa kwikala bo mwaiya nabo mu motoka umo nangwa bo mwikala nabo nzubo imo.
◼ Kajo ka Pachaile: Mwane mukasendele jimo kajo ka pachaile kukila kusha mpunzha po mwapwila ne kuya na kukeba kajo kungi. Mwakonsha kwingijisha kipe kyaesakana kya kusendelamo kajo kyo mwakonsha kubika munshi ya kipona kyenu. Kechi kyaswishiwa kusendela kajo mu bipe bikatampe, bipe bimwesha biji mukachi, ne kusenda maalwa ku kupwila ne.
◼ Mibingu: Pataiwa mali avula bingi pa kubatu’mba kupwila kwa nkambi kunengezhiwe. Twakonsha kumwesha lusanchilo lwetu kupichila mu kubingulako mibingu ya kwitemenwa ya mwingilo wa ntanda yonse pa Nzubo yetu ya Bufumu nangwa pa kupwila kwa nkambi. Cheki ya mali iji yonse yapanwa pa kupwila kwa nkambi yafwainwa kupanwa ku “Watch Tower Society.”
◼ Mapuso ne Bintu Bikwabo bya Kubazhimukila: Umvwe muntu wakolwa pa kupwila kwa nkambi, mwane monañanai na asha uji pepi usakuya bukiji bukiji ku Dipatimenti ya Bukwasho bwa Bukiji Bukiji kuba’mba wamwingilo ujiko amone kubaya kwa kyokyo kikola ne kupana bukwasho.
◼ Kulekoda: Bijimba kechi byafwainwa kusomekwa ku biñambañamba bya kwambilamo bya pa kupwila ne, byafwainwa kwingijishiwatu mu jishinda ja kubula kulabika bakwetu.
◼ Mafuta Anunkila Bulongo: Kikawama bingi atweba bonse kwesakanya pa kwisuba mafuta aji na bwema bwakilamo kununkila bulongo ao akonsha kuvundumuna bikola bya bantu babela mu kyaji nangwa bikola bikwabo bipashako.−1 Ko. 10:24.
◼ Tupepala twa Monai Uno Muntu: Kapepala ka Mwane Monai Uno Muntu (S-43) kafwainwa kwingijishiwa kunembelapo mabulañano a muntu wamwesha lusekelo kimye kya kusapwila busapwishi bwa kushukilwa mu kimye kya kupwila kwa nkambi. Basapwishi bakonsha kusenda kapepala ka monai uno muntu kamo nangwa tubiji ku kupwila kwa nkambi. Tupepala panembwa mabulañano twakonsha kupanwa ku Kibamba kya Mabuku nangwa ku munembeshi mu kipwilo umvwe mwabwela ku kipwilo kyenu.−Monai Mwingilo Wetu wa Bufumu wa February 2005, pe. 7.
◼ Kwela Biko: Twafwainwa kutwajijila kulama mpunzha yetu ya kupwila kwa nkambi kwikala ya butooto. Umvwe ketulangulukileko bakwetu kupichila mu kusenda ku mazubo etu kajo ketu kashalapo, bipepala ne bintutu bikwabo bya biko, kimwesha bulongo amba tuji na munema wa kunemeka Lesa mu bwikalo bwetu. Mu kimye kya kupwila kwetu kwa nkambi kubena kwiya, mwane lekai tukebikeko kulama mpunzha yetu ya kupopwelapo kwikala ya butooto kabiji ne kwikala na byubilo byawama pa kuba’mba ‘tukalengele lufunjisho lwa Lesa, Mupulushi wetu, kumweka bulongo mu bintu byonse.’—Titu. 2:10.
◼ Byolonyi: Baana kimye kyonse bafwainwa kwibashinjikinyako ku ba nsemi babo nangwa ku bakwabo bakoma pa kuya na kowa kabiji ne ku byolonyi. Mu kimye kya kupwila, kimye kimo baana batendeka kwendauka ne kukaya panyuma ya kupitapo awala umo nangwa avula. Pa kuba’mba bamone jishinda ja kutendeka kupitañenamo, baana javula batemwa kuyayaya ku byolonyi pa bimye byavula kupwila saka kubena kubiwa, kulengela bantu kubula kuteleka bulongo ku bibena kwambiwa. Umvwe bansemi kebatwajile jimo baana babo ku kyolonyi kupwila saka kukyangye kutendeka, baana kechi bakonsha kebobe bufinda bantu babena kuteleka panyuma ya kupitapo kakimye ne. Kabiji kushinjikinya baana ku kyolonyi ne mu kowa, kwibazhikijila bingi ku mapuso.