Nanchi Mwinengezha Kutanwa ku Kijiilo Kikatampe kya ku Mupashi Nyi?
1. Bintu bya mutundu ka byavwangwa mu kunengezha kijiilo?
1 Kijiilo kikala na bintu byavula bya kunengezha. Kwikala kukeba kajo, kuteka ne kwikanengezha bulongo. Kabiji kwikala ne kunengezha bulongo bya kwikapana ku bantu. Kunungapo, mpunzha kwikela kino kijiilo nayo bafwainwa kwiinengezhezha jimo. Benyi nabo bafwainwa kwinengezha bya kwenda, kikatakata umvwe bekala kwalepa na yoyo mpunzha. Nangwa kya kuba mwavwangwa mingilo yavula, kujiila pamo kajo kanengela bulongo na balunda ne ba mu kisemi kwanema bingi. Katatakatu Bakamonyi ba kwa Yehoba mwaya ntanda yonse bakashonkene pamo mu mabumba akatampe ne acheche na kwiyowa kijiilo kikatampe kya ku mupashi kyo babena kutengela, ko kuba’mba, Kushonkena kwa Nkambi kwa “Labainga Mukenkentenga!” Mingilo yavula ya kunengezha uno mutanchi beingila kala. Atweba bonse twaitwa. Pa kuba’mba tukatanweko ne kumwenamo mu uno mutanchi, twafwainwa ne atweba kwinengezha bulongo.—Mana. 21:5.
2. Bi ka bikebewa pa kuba’mba tukatanweko moba onse asatu a kijiilo kyetu kya ku mupashi?
2 Inengezhai Kumwenamo Pakatampe: Nanchi mwapwisha kunengezha byonse bikebewa pa kuba’mba mukatanweko moba onse asatu a kino kijiilo kya ku mupashi nyi? Umvwe kibena kukebewa, bulai bakulumpe benu ba nkito kuba’mba mukaya ku kushonkena kwa nkambi pa moba asatu. Abya mwanengezha kala byo mukenda ne ko mukalaalanga nyi? Bakulumpe mu kipwilo bafwainwa kumona’mba bakwasha bakikulumpe ne boba bakolwakolwa kubikapotu ne bakwabo bakonsha kukeba bukwasho.—Yele. 23:4; Nga. 6:10.
3. Mambo ka o twafwainwa kubula kuya ku kukonkana kwa byalo ko babula kwitwita ne?
3 Bamo bakaya ku kukonkana kwa byalo. Vulukai’mba bantu bamo baitwa kuya na kutanwako. Pa kunengezha kuno kukonkana, jibumba jamwena jimo kibelengelo kya bantu bafwainwa kutanwako kwesakana na mo jamwena ajo jine. Kyakonsha kukatazha bingi umvwe basapwishi baya ku kukonkana kwa byalo ko babula kwibeta ne.
4. Bya kuvululako ka biketukwasha kwinengezha bulongo kutendeka mutanchi wa pa juba pa juba?
4 Inengezhai kuba’mba mukafikenga pa kushonkena kwa nkambi bukiji ne kumwena jimo pa kwikala mutanchi saka akyangye kutendeka ne. Monaipo ka kimye kacheche ka kutala pa mutanchi, kipungu saka kikyangye kutendeka ne. Kino kikemukwasha kunengezha muchima wenu ku majashi akambiwanga. (Eze. 7:10) Umvwe wakumupando wa kipungu wabijika’mba ke kimye kya nyimbo, ikalai ne kuteleka apa bino mwinengezha kwimba lwimbo ne kuteleka ku lulombelo lwa kushinkwila.
5. Ba mu kisemi kyetu bakonsha kumwenamo byepi pakatampe mu majashi?
5 Umvwe ba mu kisemi baikala pamo kimye kya kuno kushonkena, kino kikakwasha bansemi kumona’mba baana babo babena kuteleka ku majashi. (Mpitu. 31:12) Bonse batundaikwa kulondela mu ma Baibolo abo kimye kyo babena kutanga binembelo. Kunemba bishinka bipi kwakonsha kwimulengela kuteshako muchima. Kulutwe, bishinka byo mwanembele bikemukwasha kuvuluka bishinka bikatampe bya majashi. Chinuzhukainga muteeto wa kwisamba nangwa kwendauka pa kimye kya kipungu. Umvwe muji na ka mu lupi, kechi kafwainwa kwimulabika anweba nangwa bakwabo kimye kyo babena kwamba majashi ne. Panyuma ya kupwisha mutanchi mabanga, mwafwainwa kwisambanga na bakwenu bintu byo mwafunda pa jojo juba.
6. Bintu ka byawama bikala pa kushonkena kwetu kwa nkambi, kabiji twakonsha kuba byepi pa kuba’mba tukeyowe?
6 Pa kushonkena kwa nkambi, twikala na jishuko ja kwiyowa kupwanañana na balongo ne banyenga betu kwabula mu ino ntanda. (Sala. 133:1-3; Mako 10:29, 30) Nanchi kuba mwibikila kikonkwanyi kya kwilumbulula ku bo mwaikala nabo ne kwisamba nabo pa kimye kya pachaile nenyi? O ene mambo o kyanemena kusenda kajo kaesakana ne kwikajila ponka pa nkambi kukila kuya na kupota ku mazubo mwa kujiila nangwa kuya na kunengezhezha kajo ku nzubo. Monai kuba’mba kechi mwashalapo ku kikye kimye kya kwikosesha ne.—Lo. 1:11, 12.
7. Lunengezho ka lo twafwainwa kuba pa mambo a bya kuvwala byo tukavwala?
7 Mvwajilo: Yehoba wakambizhe bena Isalela kumona’mba ku bya kuvwala byabo kunshi ya minyumbwe babikako musombelo wa kifufya. (Bala. 15:37-41) Kino kibavululangako kuba’mba bajinga bantu Yehoba bo asajile kumupopwelanga. Mu ano moba, mvwajilo yetu yawama yo tuvwala pa kushonkena kwa nkambi itupusanyako ku bantu ba ino ntanda. Kabiji kupana bukamonyi bwawama bingi ku betumona nangwatu twaya na kupota kajo mu mazubo mwa kujiila panyuma ya kipungu. Onkao mambo, monai’mba byo mukavwala byanengela.
8. Twakonsha kusapwila byepi bantu kimye kyo tuji mu muzhi mwaikela kushonkena kwa nkambi nangwa ku mpunzhatu ikwabo?
8 Kushimuna Bukamonyi: Kupichila mu kwinengezhezha jimo, twakonsha kusapwila bantu monka mu muzhi mwaikela kushonkena kwa nkambi. Mulongo umo wayile na mukazhanji mu nzubo imo mwa kujiila panyumatu ya kipungu, wamwesheshe baaji wanji ne kwipuzha upana kajo ku bantu beya amba: “Nanchi wamona bantu bavula bavwala mabaaji nobe ino nyi?” Uno muntu waambile’mba wibamwene kabiji wakuminye bingi ene mambo bonse o bavwajile mabaaji. Kyafuminemo, mwisambo watendekele, kabiji mulongo wamwichile kuba’mba atanweko ku kushonkena kwa nkambi.
9. Tukamwesha byepi lusanchilo lwetu ku witwita, aye Yehoba?
9 Nangwa kya kuba balongo bo bakamba majashi onse, misambo ya mepuzho ne bimwesho, Yehoba Shetu wa mwiulu ye mwine wanengezha kino kijiilo kikatampe kya ku mupashi. (Isa. 65:13, 14) Tukamwesha lusanchilo lwetu ku witwita kupichila mu kutanwako pa moba onse ne kwiyowa kajo ka ku mupashi ko anengezha. Nanchi mwinengezha kala kuba’mba mukatanweko nyi?
[Kitenguluzha pa peja 5]
Bya Kuvululako bya Kushonkena kwa Nkambi
◼ Bimye Bikatendekelangamo Kushonkena: Pa moba onse asatu, kushonkena kukatendekanga na kimye kya 8:20hrs. (Pa Mazubo a Kupwila Kukatampe, binzhilo bikashinkulwanga na kimye kya 7:00hrs). Umvwe nyimbo ya Bufumu itanshi yatendeka, atweba bonse twafwainwa kwikela jimo kuba’mba kushonkena kukatatule na mushingi. Mutanchi wa Juba Jitanshi ukapwa pa 15:55 hrs, wa Juba ja Bubiji ukapwa pa 16:05 hrs, wa Juba ja Busatu ukapwa pa 15:30 hrs.
◼ Mwa Kwimikila Myotoka ne Makinga: Pa mapunzha onse pakekela kushonkena kwa nkambi, kechi kukekala kulipilisha pa kwimikila myotoka nangwa makinga ne, bino kikalondelanga pa muntu wafika bukiji. Mabaaji a kushonkena kwa nkambi o akekala kayukilo pa kupana mwa kwimikila myotoka nangwa makinga.
◼ Byambo bya Kwimujimunako: Konse ko mwaimikila motoka nangwa nkinga yenu, mwafwainwa kwiifunga bulongo kimye kyonse kabiji kechi mwafwainwa kusha bintu mukachi ka motoka bibena kumweka ku bantu ne. Umvwe kyakonsheka, bintu byo mwasenda mu motoka, bilaminai mu kibokoshi kikatampe ne kufungako. Jimukai na bangivi ne bantu bavutula bintu batemwa kupitañena ku mapunzha kushonkena bantu bavula. Kabiji kechi mwafwainwa kusha bintu bya buneme pa kipona kyenu ne. Masawakya amo abena kushimunwa kuba’mba kunyumakwe bantu bamo bakebelenga kubombola baana pa mpunzha pa kushonkena kwa nkambi. Onkao mambo, mwafwainwa kujimuka.
◼ Kukebela Jimo pa Kwikala: Mwakonsha kukebela jimo bantu pa kwikala bo mwaiya nabo mu motoka umo nangwa bo mwikala nabo nzubo imo.
◼ Kajo ka Pachaile: Mwane mukasendele jimo kajo ka pachaile kukila kusha mpunzha po mwashonkena ne kuya na kukeba kajo kungi. Mwakonsha kwingijisha kipe kyaesakana kya kusendelamo kajo kyo mwakonsha kubika munshi ya kipona kyenu. Kechi kyafwainwa kusendela kajo mu bipe bikatampe, bipe bimwesha biji mukachi, ku kushonkena ne.
◼ Mibingu: Twakonsha kumwesha lusanchilo lwetu kupichila mu kubingulako mibingu ya kwitemenwa ya mwingilo wa ntanda yonse pa Nzubo yetu ya Bufumu nangwa pa kushonkena kwa nkambi. Cheki ya mali yonse yapanwa pa kushonkena kwa nkambi yafwainwa kupanwa ku “Watch Tower Society.”
◼ Mapuso ne Bintu Bikwabo bya Kubazhimukila: Umvwe muntu wakolwa nangwa kwikozha pa kushonkena kwa nkambi, mwane monañanai na asha uji pepi usakuya bukiji bukiji ku Dipatimenti ya Bukwasho bwa Bukiji Bukiji kuba’mba wamwingilo ujiko amone kubaya kwa kyokyo kikola nangwa kilonda ne kupana bukwasho.
◼ Kulekoda: Bijimba kechi byafwainwa kusomekwa ku biñambañamba bya kwambilamo bya pa kushonkena ne, bafwainwa kwibingijishatu mu jishinda ja kubula kulabika bakwabo.
◼ Mafuta a Kwifyukawila: Kikawama bingi atweba bonse kwesakanya mafuta a kwifyukawila ao akonsha kuvundumuna bikola bya bantu bakolwa mu kyaji nangwa bikola bikwabo bipashako.—1 Ko. 10:24.
◼ Tupepala twa Monai Uno Muntu: Kapepala ka Mwane Monai Uno Muntu (S-43) mwafwainwa kwikengijisha kunembelapo mabulañano a muntu wamwesha lusekelo kimye kya kusapwila busapwishi bwa kushukilwa mu kimye kya kushonkena kwa nkambi. Basapwishi bakonsha kusenda kapepala ka monai uno muntu kamo nangwa tubiji ku kushonkena kwa nkambi. Tupepala panembwa mabulañano twakonsha kupanwa ku Kibamba kya Mabuku nangwa ku munembeshi mu kipwilo umvwe mwabwela ku kipwilo kyenu.—Monai Mwingilo Wetu wa Bufumu wa February 2005, pe. 7.
◼ Kifwanyikizho: Kafwako nangwa umo wafwainwa kukopa bipikichala kimye kya kifwanyikizho nangwa kulabika bakwabo kubula kutamba bulongo kifwanyikizho ne. Mwane, monai’mba kechi mwazhita bakwenu ne. Baana bafwainwa kwikala na bansemi babo. Baasha baji na lūsa lwa kwabanya mabumba a baana baikala pamo kabiji ne kwibabwezha ku bansemi babo nangwa kwibatwala pangye ya nsakwa kuba’mba babule kulabika bakwabo.
◼ Lubatizhilo: Pa mambo a Mazubo a Kupwilamo Kukatampe aji na kakizhiba ka kubatizhilwamo, bantu bafwainwa kulondela mizhilo ya kwikala mu bipona byabo kimye kya lubatizhilo. Ku mapunzha akwabo ko baya na kubatizha bantu mu mukola nangwa mu kizhiba, baana kechi bafwainwa kunyemena kulutwe ya babena kuya na kubatizwa ne, bafwainwa kwenda mu munongo. Pa myaka yapitapo, kyatanwa kuba’mba bakulumpe bavula kechi baya na kumona babena kubatizwa ne. Nangwatu bansemi baji na baana babena kuya na kubatizwa kechi batanwako ku kikye kimye kyanema ne. Bansemi ne bakulumpe bakwabo batundaikwa kuya na kumona babena kubatizwa kuba’mba banemeke kikye kimye kyanema.
◼ Kwela Biko: Twafwainwa kutwajijila kulama mpunzha yetu ya kushonkena kwa nkambi kwikala ya butooto. Umvwe ketulangulukileko bakwetu kupichila mu kusenda ku mazubo etu kajo ketu kashalapo, bipepala ne bintutu bikwabo bya biko, kimwesha bulongo amba tuji na munema wa kunemeka Lesa mu bwikalo bwetu. Mu kimye kya kushonkena kwetu kwa nkambi kubena kwiya, mwane lekai tukebikeko kulama mpunzha yetu ya kupopwelapo kwikala ya butooto kabiji ne kwikala na byubilo byawama pa kuba’mba ‘tukalengele lufunjisho lwa Lesa, Mupulushi wetu, kumweka bulongo mu bintu byonse.’—Titu. 2:10.
◼ Byolonyi: Baana kimye kyonse bafwainwa kwibashinjikinyako ku ba nsemi babo nangwa ku bakwabo bakoma pa kuya na kowa kabiji ne ku byolonyi. Pa kupwila, kimye kimo baana batendeka kwendauka ne kukaya panyuma ya kupitapo awala umo nangwa avula. Pa kuba’mba bamone jishinda ja kutendeka kupitañenamo, baana batemwa kuyayaya ku byolonyi pa bimye byavula kupwila saka kubena kubiwa ne kulengela bantu kubula kuteleka bulongo ku bintu byo babena kwamba. Umvwe bansemi kebatwajile jimo baana babo ku kyolonyi kupwila saka kukyangye kutendeka, baana kechi bakonsha kebobe bufinda bantu babena kuteleka panyuma ya kupitapo ka kimye ne. Kabiji kushinjikinya baana ku kyolonyi ne pa kuya na kowa, kwibazhikijila bingi ku mapuso.