Moba Asatu a Kutambwilamo Mapesho kwi Yehoba

1. Bintu ka byo twakonsha kutengela kutambwila pa kushonkena kwa nkambi kwa uno mwaka?

¹ Mu ino ntanda ya kwa Satana muji nzala ya ku mupashi, Yehoba watwajijila kupesha bakalume banji. (Isa. 58:11) Jishinda jimo Yehoba jo etupesheshamo ke kushonkena kwa nkambi kwikalako pa mwaka pa mwaka. Kushonkena kwa uno mwaka byo kubena kufwenya pepi, twakonsha kwinengezha byepi pa kuba’mba tukapeshiwe kabiji ne kwikosesha atwe bene na bene?—Mana 21:5.

2. Ñanyi bintu byo twafwainwa kupwisha kunengezha?

² Umvwe mukyangye kwinengezha, monai byo mwakonsha kuba lonka luno kuba’mba mukekale na kimye kya kutanwa ku kushonkena pa moba onse asatu. Nanchi mwalanguluka pa kimye kyo mukemenangapo kuya ku mpunzha ya kushonkenapo kuba’mba pa moba onse asatu mukafikenga bukiji ne kutana pa kwikala kushonkena saka kukyangye kutendeka nyi? Kechi tukeba kushalapo pa kajo ka ku mupashi ka kwitukosesha ketunengezhezha Yehoba ne! (Isa. 65:13, 14) Nanchi mwanengezha kala kwa kulaala ne byo mukenda nyi?

3. Mashinda ka aketukwasha atweba ne ba mu kisemi kyetu kumwenamo pakatampe pa kushonkena?

³ Bi ka bikemukwasha kutesha muchima ku bipungu byonse bya majashi kwa kubula kulabikwa ne? Umvwe kyakonsheka, mwafwainwa kulaalanga bukiji mu moba a kushonkena. Kabiji mwafwainwa kutala bañambi bakambanga jashi. Mukatangenga binembelo byonse mu Baibolo wenu ne kunemba bishinka. Bisemi byafwainwa kwikala pamo kuba’mba bansemi bakatundaikenga baana babo kutesha muchima ku bikambiwanga. (Mana 29:15) Kampe mwakonsha kwisamba na kisemi bishinka byo mwafunda jojo juba ja kushonkena mabanga. Pa kuba’mba kisemi kyenu kikatwajijile kumwenamo nangwatu panyuma ya kushonkena, mwakonsha kumonapo kimye pa Kupopwela kwa Kisemi kya kwisambapo bishinka byafwainwa kwingijisha ba mu kisemi kyenu.

4. Twakonsha kukwasha byepi basapwishi mu kipwilo mwetu kuba’mba nabo bakakoseshiwe ku mupashi?

⁴ Kwashai Bakwenu Kukatambwila Mapesho: Tukeba bakwetu kuba’mba nabo bakakoseshiwe ku mupashi. Nanchi mu kipwilo mwenu mujipo basapwishi bakikulumpe nangwa bakwabotu bakeba kwibakwasha kuba’mba bakatanwe ku kushonkena nyi? Abya mwakonsha kwibakwasha nyi? (1 Yoa. 3:17, 18) Bakulumpe mu kipwilo kikatakata bakalama ba mabumba bafwainwa kumona’mba bakwasha basapwishi bakeba bukwasho.

5. Tukasha byepi tupepala twa kwichilapo bantu ku kushonkena? (Monai ne kakitenguluzha kaji peulu)

⁵ Byonka byo kikala kimye kyonse, milungu isatu kushonkena kwetu saka kukyangye kutendeka ne, tukengilako mu mukwekele wa kwita bantu ku kushonkena. Bipwilo byafwainwa kwibikila kikonkwanyi kya kusha tupepala tonse twa kwichilapo bantu mu nyaunda yonse ya kipwilo. Panyuma ya mukwekele, umvwe kisemi kyenu kyakankalwa kupwisha tupepala twa kwichilapo bantu, mwafwainwa kwitusenda ku kushonkena kwa nkambi kuba’mba muketwingijishe pa kuba busapwishi bwa kushukilwa. Pa mambo a kino, mukomvwa mabulañano akwabo pa juba jitanshi ja kushonkena. Tupepala twa kwichilapo bantu ba mu kisemi kyo bamona’mba kechi baketwingijisha ku kushonkena ne, bafwainwa kwitupana kwi asha pa kufika pa mpunzha pa kushonkena. Mwafwainwa kushalapo na kapepala kamo ka kwichilapo bantu ka kwingijisha kimye kya jashi jikapelako pa juba ja busatu.

6. Mu ñanyi mashinda mo twakonsha kubila bintu bulongo pa kushonkena?

⁶ Kuba Bintu Bulongo Kukoseshañana Bingi: Byo kiji kuba’mba lelo jino bantu bavula ‘betemwa abo bene’ kabiji ne kuba’mba kechi bata bakwabo muchima ne, kitukosesha bingi kwikala pamo na bakwetu bena Kilishitu boba bintu bulongo! (2 Timo. 3:2) Tuba bintu bulongo kupichila mu kutwela mukachi mwa kushonkena na mushingi kwa kubula kupupumina kabiji ne kulamina ba mu nzubo yetu bipona nangwa boba bo tufunjisha Baibolo kwapwa, kechi bonse ne. Tulondela mikambizho ya wakumupando umvwe witwambila kwikala mu bipona byetu ne kuteleka ku nyimbo imbiwa kipungu saka kikyangye kutendeka. Kimwesha’mba tuba bintu bulongo umvwe twazhimya tumafoni twetu twa lupi nangwa kwitusha pa kishinshi kuba’mba bantu babule kulabika kimye kibena kwambiwa majashi. Kabiji tuba bintu bulongo kupichila mu kubula kwisamba, kuja, kutuma tumakalata pa kafoni nangwa kwendauka kimye kibena kwambiwa majashi.

7. Twakonsha kupeshiwa ne kukosesha byepi balongo betu pa kupwanañana nabo?

⁷ Kwisamba Kukoseshañana: Kushonkena kwitulengela kwikala na kimye kya kupwanañana pamo na bena Kilishitu mu bwanabwankazhi. (Sala. 133:1-3) Mwakonsha kwitendekelako anwe bene ‘kubayisha michima yenu’ kupichila mu kwimuna balongo ne banyenga bafuma ku bipwilo bikwabo. (2 Ko. 6:13) Mwakonsha kwibikila kikonkwanyi kya kuyukapo muntu umo wa katataka nangwa kisemi kya katataka pa juba pa juba. Mwakonsha kuba bino pa kimye kya kukokoloka mute. Onkao mambo, mwafwainwa kusendatu kajo kaesakana ka kujiila ponka pa nkambi ne kupwanañana na bakwenu mu kifulo kya kuya na kupota kajo nangwa kujiila mu kishimikwa mwa kujiila. Kino kyakonsha kwimulengela kwikala na balunda bawama bakatataka.

8. Mambo ka o twafwainwa kwipana kwingilako mingilo pa kushonkena kabiji twakonsha kuba byepi kino?

⁸ Kitukosesha bingi kwingijila pamo na bapopweshi bakwetu mu mwingilo wazhila! Nanchi mwakonsha kwipana kwingijila mu dipatimenti umo nangwa kwingijila pamo na balongo mwingilo ye bapa kipwilo kyenu? (Sala. 110:3) Umvwe mukyangye kwinembesha kwingilako mingilo pa kushonkena, langulukaipo bya kuya na kunembesha ku Dipatimenti wa Mwingilo wa Kwipana pa kushonkena. Mingilo iwama ne kupeela inge bantu ba kwingila bavula.

9. Mambo ka o twafwainwa kumweshesha byubilo ne mwekelo yetu yawama pa kushonkena?

⁹ Kwikala na Byubilo Byawama Kukosesha Bantu: Atweba bonse twafwainwa kumwekana bulongo pa moba onse asatu a kushonkena kechi pa kimyetu kibena kwambiwa majashi ne. Bantu betumona kimye kyo tuji pa mpunzha ya kushonkenapo ne mapunzhatu akwabo bafwainwa kumona lupusano luji pakachi ka atweba Bakamonyi ne bantutu. (1 Pe. 2:12) Mvwajilo ne mwekelo yetu pa mpunzha ya kushonkena, kwa kulaala ne mu bishimikwa mwa kujiila yafwainwa kumwesha munema kwi Yehoba. (1 Timo. 2:9, 10) Umvwe twavwala mabaaji etu, bantu baketuyuka’mba twi Bakamonyi ba kwa Yehoba. Kino kikalengela bantu kuyuka’mba tubena kushonkena kabiji kiketulengela ne kwibasapwila.

10. Byakumwenako ka bimwesha’mba byubilo byetu bya bwina Kilishitu bilengela bantu kukeba kufunda bukine?

¹⁰ Byubilo byetu byawama pa kushonkena bilengela bantu kuba byepi? Kwesakana na byaambiwe mu kibaba kya mu pepala wa byambo umo, mukulumpe wa kishimikwa kyashonkenangamo Bakamonyi waambile’mba: “Bakamonyi ke bantu ba mushingi. Pa mwaka pa mwaka, tumvwa bingi bulongo umvwe baiya na kushonkena.” Mwaka wapwa, muntu wabula Kamonyi waelele kikwama kyanji kya mali mu hotela mwalaajilenga Bakamonyi baishile na kushonkena. Kimye kyo babwezhezhe kikwama kya mali ku mukulumpe wa mu hotela ne bintu byonse saka bijimo, uno mukulumpe waambijile mwine mwina kikwama amba: “Washukwa bingi kuba’mba Bakamonyi ba kwa Yehoba bashonkenejilenga kwipi na hotela kabiji mu uno hotela mwajinga Bakamonyi bavula balaajilengamo. Inge ne byobyo ne, kikwama kyobe umvwe kechi kyamweka ne.”

11. Bukwasho ka bupana boba baji mu Dipatimenti wa Bukwasho bwa Bukiji Bukiji, kabiji ñanyi bintu byo bafwainwa kuyukila jimo aba baya ku kushonkena?

¹¹ Dipatimenti wa Bukwasho bwa Bukiji Bukiji ukwasha bantu bakolelwa pa mpunzha ya kushonkena. Kechi shitolo nangwa kipatela kwa kuya na kusenda muchi ponka po mukebela ne. Umvwe mukolwa kolwa, mwafwainwa kwisendela muchi wenu, nabiji muchi wa mutwe, munda, mabandeji ne michi ikwabotu, byo kiji kuba’mba pa kushonkena kechi kukekala kupana michi ya uno mutundu ne. Aba bakolwa bikola bikatampe nabiji bya muchima, kifwafwa, ne bikwabotu, bafwainwa kwisendela michi yabo bene. Bafwainwa kwiyapo na muntu umo wa mu kisemi kyabo nangwa mulongo umo mu kipwilo wayuka kikola kyanji byo kiji kabiji wakonsha kumukwasha umvwe kikola kyanji kyavulumuka. Pekala bingi makatazho pa kushonkena inge bantu baji na bikola bikatampe bakolwa kwa bunke bwabo kwa kubula wa kilongo nangwa muntu mukwabo wibayuka bulongo. Umvwe bantu bakolwa kolwa kechi baji na bakilongo ba kwibakwasha ne, bakulumpe bafwainwa kuyuka bulongo bikola bya bano bantu kabiji bafwainwa kunengezha mashinda mwa kwibakwashisha. Pa mpunzha pa kushonkena kechi pekala kunengezha bibamba bya kulaminamo bantu baji na bikola bikatampe bya uno mutundu ne.

12. Kushonkena byo kwafwenya kala pepi, kikonkwanyi ka kyo twafwainwa kwibikila kabiji mambo ka?

¹² Kushonkena kwa uno mwaka kwafwenya kala pepi. Kimye kyabaya ne ngovu yatayiwapo bingi pa kuba’mba bantu bakamwenemo bingi pa kushonkena. Ibikilai kikonkwanyi kya kuba’mba mukatanweko moba onse asatu kabiji inengezhai kuba’mba mukeyowe bintu Yehoba ne jibumba janji byo bemunengezhezha. Inengezhai kuba’mba mukatundaike bakwenu kupichila mu kuba bintu bulongo, kupwanañana nabo kabiji ne kumwesha byubilo byawama. Umvwe mwauba bino, anweba ne bakwenu po po mukeumvwa byonka biumvwine mulongo waishile ku kushonkena kwa mwaka wapwa. Wanembele’mba, “Mvuluka bingi kushonkena kwawama ko natainweko mwaka wapwa!”

[Mabulañano pa peja 3]

Byonka byo kikala kimye kyonse, milungu isatu kushonkena kwetu saka kukyangye kutendeka ne, tukengilako mu mukwekele wa kwita bantu ku kushonkena

[Mabulañano pa peja 5]

Mvwajilo ne mwekelo yetu pa mpunzha ya kushonkena, kwa kulaala ne mu bishimikwa mwa kujiila yafwainwa kumwesha munema kwi Yehoba

[Mabulañano pa peja 6]

Inengezhai kuba’mba mukatundaike bakwenu kupichila mu kuba bintu bulongo, kupwanañana nabo kabiji ne kumwesha byubilo byawama

[Kitenguluzha pa peja 3-6]

Bya Kwituvululako pa Kushonkena kwa Nkambi kwa mu 2011

◼ Bimye Bikatendekelangamo Kushonkena: Pa moba onse asatu, kushonkena kukatendekanga na kimye kya 8:20hrs. (Pa Mazubo a Kupwila Kukatampe, binzhilo bikashinkulwanga na kimye kya 7:00 hrs.) Umvwe nyimbo ya Bufumu itanshi yatendeka, atweba bonse twafwainwa kwikela jimo pa kuba’mba kushonkena kukatatule na mushingi. Mutanchi wa Juba Jitanshi ukapwa pa 15:55 hrs, wa Juba ja Bubiji ukapwa pa 16:15 hrs, wa Juba ja Busatu ukapwa pa 15:10 hrs.

◼ Mwa Kwimikila Myotoka ne Makinga: Mpunzha pa kwimikila myotoka nangwa makinga ikekalako, bino kyakonsha kuwama kwimika bino bintu bulongo mu ndonda. Kabiji kyawama kwingijishatu motoka umo inge mwavula, mu kifulo kya kuba awu wanji awu wanji.

◼ Kukebela Jimo pa Kwikala: Mwakonsha kukebela jimo pa kwikala bantu bo mwikala nabo nzubo imo, kubikapotu ne boba bo mufunjisha Baibolo.—1 Ko. 13:5.

◼ Kajo ka Pachaile: Mwane mukasendele jimo kajo ka pachaile kukila kusha mpunzha po mwashonkena ne kuya na kukeba kajo kungi. Mwakonsha kwingijisha kipe kyaesakana kya kusendelamo kajo kyo mwakonsha kubika munshi ya kipona kyenu. Kechi mwafwainwa kusendela kajo mu bipe bikatampe, nangwa bipe bimwesha biji mukachi pa mpunzha pa kushonkena ne.

◼ Mibingu: Twakonsha kumwesha lusanchilo lwetu kupichila mu kubingulako mibingu ya kwitemenwa ya mwingilo wa ntanda yonse pa kushonkena kwa nkambi. Cheki wa mali yense wapanwa pa kushonkena kwa nkambi wafwainwa kupanwa ku “Watch Tower Society.”

◼ Mapuso ne Bintu Bikwabo bya Kubazhimukila: Umvwe muntu wakolwa nangwa kwikozha pa kushonkena kwa nkambi, mwane monañanai na asha uji pepi usakuya bukiji bukiji ku Dipatimenti ya Bukwasho bwa Bukiji Bukiji kuba’mba wamwingilo ujiko amone kubaya kwa kyokyo kikola nangwa kilonda ne kupana bukwasho.

◼ Muchi: Umvwe mukakebanga muchi ye bemunembela ku kipatela, mwafwainwa kumona’mba mwasendela jimo yewo muchi wavula mambo kechi kukekala kupana muchi wa uno mutundu pa mpunzha ya kushonkena ne.

◼ Binunka Bulongo: Kikawama bingi atweba bonse kubula kukizhamo kwifyukawila binunka bulongo, mambo byakonsha kuvulumuna bikola bya bantu bakolwa mu kyaji nangwa bikola bikwabotu.—1 Ko. 10:24.

◼ Tupepala twa Mwane Monai Uno Muntu (S-43): Kapepala ka Mwane Monai Uno Muntu mwafwainwa kwikengijisha kunembelapo mabulañano a muntu wamwesha lusekelo kimye kya kushonkena. Basapwishi bafwainwa kusenda kapepala ka monai uno muntu kamo nangwa tubiji ku kushonkena kwa nkambi. Tupepala panembwa mabulañano twakonsha kupanwa ku Kibamba kya Mabuku nangwa ku munembeshi mu kipwilo umvwe mwabwela ku kipwilo kyenu.—Monai Mwingilo Wetu wa Bufumu wa November 2009, jipa 4.

◼ Lubatizhilo: Pa Mazubo a Kupwilamo Kukatampe aji na kakizhiba ka kubatizhilwamo, bantu bafwainwa kulondela mizhilo ya kwikala mu bipona byabo kimye kya lubatizhilo. Ku mapunzha akwabo ko baya na kubatizha bantu mu mukola nangwa mu kizhiba, baana kechi bafwainwa kunyemena kulutwe ya babena kuya na kubatizwa ne, bafwainwa kwenda mu munongo kasa balondela baasha. Pa myaka yapitapo, kyatanwa kuba’mba bakulumpe bavula kechi baya na kumona babena kubatizwa ne. Nangwatu bansemi baji na baana babena kuya na kubatizhiwa kechi batanwako ku kikye kimye kyanema ne. Bansemi ne bakulumpe bakwabo batundaikwa kuya na kumona babena kubatizhiwa pa kuba’mba banemeke kikye kimye kyanema.

◼ Kifwanyikizho: Kafwako nangwa umo wafwainwa kukopa bipikichala kimye kya kifwanyikizho nangwa kulabika bakwabo kubula kutamba bulongo kifwanyikizho ne. Monai’mba kechi mwazhita bakwenu ne. Baana bafwainwa kwikala na bansemi babo. Baasha baji na lūsa lwa kwabanya mabumba a baana baikala pamo kabiji ne kwibabwezha ku bansemi babo nangwa kwibatwala pangye ya nsakwa pa kuba’mba babulenga kuvulañanya bantu.

◼ Kwela Biko: Twafwainwa kutwajijila kulama mpunzha yetu ya kushonkena kwa nkambi na butooto. Umvwe ketulangulukileko bakwetu kupichila mu kusenda ku mazubo etu kajo ketu kashalapo, kutaya bipepala ne bintutu bikwabo bya biko mu ngungulu nangwa mu kimbo, kimwesha’mba tuji na munema wa kunemeka Lesa mu bwikalo bwetu. Mu kimye kya kushonkena kwa nkambi kubena kwiya, twayai tukebikeko kulama mpunzha yetu ya kupopwelapo na butooto kabiji ne kwikala na byubilo byawama pa kuba’mba ‘tukalengele lufunjisho lwa Lesa, Mupulushi wetu, kumweka bulongo mu bintu byonse.’—Titu. 2:10.

◼ Byolonyi: Baana kimye kyonse bafwainwa kwibashinjikinyako ku bansemi babo nangwa ku bakwabo bakoma pa kuya na kowa kabiji ne ku byolonyi. Pa kupwila, kimye kimo baana batendeka kwendauka ne kukaya panyuma ya kupitapo awala umo nangwa avula. Pa kuba’mba bamone jishinda ja kutendeka kupitañenamo, baana batemwa kuyayaya ku byolonyi pa bimye byavula kupwila saka kubena kubiwa ne kulengela bantu kubula kuteleka bulongo. Umvwe bansemi kebatwajile jimo baana babo ku kyolonyi kupwila saka kukyangye kutendeka, baana kechi bakonsha kuba bufinda bantu babena kuteleka panyuma ya kupitapo ka kimye ne. Kabiji kushinjikinya baana ku kyolonyi ne pa kuya na kowa, kwibazhikijila bingi ku mapuso.

◼ Mwingilo wa Kwitemenwa: Lusekelo lo twikala nalo na mambo a kutanwa ku kushonkena lukabayilako umvwe twipana kwingilako mingilo imo. (Byu. 20:35) Aba bakeba kuba bino, bafwainwa kuya ku Dipatimenti wa Mwingilo wa Kwitemenwa pa kushonkena. Baana bakyangye kifikizha myaka 16 nabo bakonsha kwingilako kupichila mu kwibatangijila ku bansemi nangwa ku mukulumpe mukwabo watongolwa.

[Kitenguluzha pa peja 4]

Tukashanga Byepi Tupepala twa Kwichilapo Bantu?

Pa kuba’mba tukambe na bantu bonse mu nyaunda yetu, twafwainwa kwamba byambo bichechetu. Twakonsha kwamba bino amba: “Muji byepi mwane? Tubena kwingila mwingilo ubena kwingijiwa ntanda yonse wa kusha tupepala twa kwichilapo bantu. Kapepala kenu ke mwane. Musakutana mabulañano akwabo pa kano kapepala.” Byambo ne bipikichala biji pa ntendekelotu ya kano kapepala, bizakula bingi muchima, onkao mambo, pa kupa muntu kano kapepala, mwafwainwa kumumwesha bino byambo ne bipikichala. Mwafwainwa kumwesha lusekelo. Pa kusha tuno tupepala ku mpelo ya mulungu, mwafwainwa kusha ne magazini umvwe kyakonsheka.