“Ikalainga na Byubilo Byawama mu Bantu ba Pano pa Ntanda”

1. Mambo ka o kyanemena kwikala na byubilo byawama kimye kya kushonkena?

¹ Pa mwaka pa mwaka, kimye kya kushonkena, bantu bavula bamona byo tuba bintu. Onkao mambo, kyanema kumona kuba’mba byubilo byetu bibena kutumbijika Lesa wetu. (Levi. 20:26) Byubilo byetu byawama ne mwekelo yetu byafwainwa kumwesha’mba twi baana ba bwanga bakishinka ba kwa Kilishitu. Kimye kyo tukatanwa ku kushonkena kwa nkambi ne kukonkana kwa byalo, twakonsha ‘kwikala byepi na byubilo byawama mu bantu ba pano pa ntanda’ ne kutumbijika Shetu wa mwiulu?—1 Pe. 2:12.

2. Mu ñanyi mashinda mo twakonsha kumweshesha byubilo bya bwina Kilishitu kimye kya kushonkena?

² Mweshai Byubilo bya Bwina Kilishitu: Butemwe botwimwesha atweba bene na bene ne byo tuba na bantu ‘babula ba mu kipwilo’ byapusana bingi na byubilo biji mu ino ntanda. (Kolo. 3:10; 4:5; 2 Timo. 3:1-5) Twafwainwa kwikala bakoka muchima kabiji batekanya kimye kyo tubena kwisamba na bamingilo mu ma hotela ne mo bapotesha kajo, nangwatu inge pamweka lukatazho. Byubilo byawama bimwekela ne mu byo tusanchila bantu babena kwitutambwila ne kwitukwasha pa mpunzha ya kushonkena nangwa inge twafikila ku bwenyi.

3. Ñanyi mukambizho wafwainwa kuvuluka bansemi, kabiji mambo ka?

³ Bansemi bafwainwa kusopanga baana babo kimye kyo baji pa mpunzha ya kushonkena, mu ma hotela ne mo bapotesha kajo. (Mana. 29:15) Mwina hotela umo wabujile bamulume ne mukazhi bena Kilishitu amba: “Twimutemwa bingi anweba bantu. Bisemi byenu ne baana benu baji bingi na byubilo byawama kabiji baji bingi na mushingi. Bamingilo bonse baambilengatu pe anweba. Mwaji mwaiyanga pa hotela wetu pa mulungu pa mulungu, inge kyawamine bingi.”

4. Kimye kyo tuji ku mpunzha kwaikela kushonkena, mvwajilo yetu yafwainwa kwikala byepi?

⁴ Kuvwala Bulongo: Twafwainwa kuvwala bulongo kabiji na mushingi kimye kyo tubena kushonkena, kechi kulondela mvwajilo ya bantu ba mu ino ntanda ne. (1 Timo. 2:9) Kimye kyo tubena kufuma ne kubwela pa mazubo po twafikila nangwa po tubena kwikala, ne pa bimye bya kukokoloka pa kushonkena, twafwainwa kuchinuzhukanga kuvwala nobe bantu ba mu ino ntanda. Inge ke tuvwale bulongo kimye kyonse, tukakasuluka bingi kuvwala baaji wetu wa kushonkena, kabiji kechi tukomvwa bumvu kushimuna bukine ku bantu inge kimye kyamweka ne. Mvwajilo ne mwekelo yetu kimye kya kushonkena kechi ikalengelatu bantu kukeba kufunda bukine ne, bino ikasangajika ne muchima wa Yehoba.—Zefwa. 3:17.

Bya Kwituvululako pa Kushonkena kwa Nkambi kwa mu 2014

◼ Bimye Bikatendekelangapo Kushonkena: Binzhilo bikashinkukanga na kimye kya 07:00 hrs. Nyimbo pa kushonkena ikatendekanga na kimye kya 08:20 hrs pa moba onse asatu. Umvwe nyimbo ya Bufumu itanshi yatendeka, atweba bonse twafwainwa kwikela jimo pa kuba’mba kushonkena kukatatule na mushingi. Mutanchi wa juba jitanshi ne juba ja bubiji ukapwa pa 15:55 hrs, kabiji wa juba ja busatu ukapwa pa 15:10 hrs.

◼ Kukonkana kwa Byalo: Mu byalo bimo mukekala kukonkana kwa byalo. Yukai kuba’mba ofweshi wa musampi waitako kala bipwilo bimo ne balongo bakafuma ku byalo biji kwalepa panyuma ya kuyuka nambala ya bipona bikekalako, kwa kwimika myotoka, ne ma hotela mwa kulaala. Inge basapwishi baya na kutwana ku kukonkana kwa kyalo ko babula kwibeta ne, kino kikalengela kwishindaika na mambo a kuvujisha kwa bantu. Inge kuji bimo byalengela’mba mubule kuya ko mwafwainwa kuya na kushonkena, kechi mwafwainwa kusalapo kuya kuji kukonkana kwa byalo ne.

◼ Mwa Kwimikila Myotoka ne Makinga: Pa mapunzha ponse pakekela kushonkena kwa nkambi, kechi kukekala kulipilisha pa kwimikila myotoka nangwa makinga ne, bino mpunzha bakapanga yenka wafika bukiji. Na mambo a kuba pa mapunzha pa kushonkena kwa nkambi kechi paji mpunzha yabaya ya kwimikilapo myotoka ne, kyawama kwingijishatu motoka umo inge mwavula kwakubula kuba awu na wanji awu na wanji. Twimutundaika kukokela baasha babena kwimumwesha pa kwimikila myotoka ne makinga.

◼ Kukebela Jimo pa Kwikala: Kimye kyo mubena kutwela mu mpuzha mwaikela kushonkena, kechi mwafwainwa kunyemenanga kusala bipona byo mukeba kwikalapo nobe mubena kwikyombesha ne. Kwikala na muchima wa kwipana kwafwainwa kwitulengela kubila bakwetu byawama. Kuba bino kumwesha’mba twi bena Kilishitu bakine kabiji kulengela babena kwitumona kutumbijika Lesa. (Yoa. 13:34, 35; 1 Ko. 13:4, 5; 1 Pe. 2:12) Bo mwakonsha kusungilatu pa kwikala ke bantu bo mwaiya nabo mu motoka umo, bo mwikala nabo nzubo imo nangwa bantu bo mufunjisha Baibolo. Bantu bo balaminatu bipona ke bakikulumpe ne bakolwakolwa. Na mambo a kukepa kwa bipona bya bakikulumpe ne bakolwakolwa, kyawama kuba’mba muntu umotu nangwa babiji ba mu kisemi baikala nabo na kwibakwasha.

◼ Kajo ka Pachaile: Mwane mukasendele jimo kajo ka pachaile kukila kusha mpunzha po mwashonkena ne kuya na kukeba kajo kungi. Inge mukashonkenanga pa mpunzha yashimikwa bulongo na bipona, mwakonsha kwingijisha kipe kyaesakana kya kusendelamo kajo kyo mwakonsha kubika munshi ya kipona kyenu. Pa kwiya na kushonkena, kange mukasendele kajo kenu mu bipe bikatampe nangwa mu bipe bilalaika ne.

◼ Mibingu: Twakonsha kumwesha lusanchilo lwetu kupichila mu kubingulako mibingu ya kwitemenwa ya mwingilo wa ntanda yonse pa kushonkena kwa nkambi. Cheki wa mali yense wapanwa pa kushonkena kwa nkambi wafwainwa kupanwa ku “Watch Tower Society.”

◼ Muchi: Umvwe mukakebanga muchi ye bemunembela ku kipatela, mwafwainwa kumona’mba mwasendela jimo yewo muchi wavula mambo kechi kukekala kupana muchi wa uno mutundu pa mpunzha ya kushonkena ne. Umvwe muji na kikola kya shuka kabiji mwaiya na maguya, panyuma ya kwiengijisha kechi mwafwainwa kutaya ano maguya ne bya michi mu byo banengezha mwa kutaya biko pa kushonkena nangwa po mwafikila ne. Bino, mwafwainwa kwibilonga bulongo ne kukebitayila ku mazubo enu.

◼ Kwizhikijila ku Mapuso: Mwane jimukai ne kwizhikijila ku mapuso akonsha kumweka na mambo a kutezhimuka ne kwituntula ku bikokolo. Pa mwaka pa mwaka, bantu bekozha na mambo a kuvwala masapato alepa ku tushiko. Kyakonsha kuwama inge mwavwala masapato abula kulepa ku tushiko pa kuba’mba mwendenga bulongo pa mushiji wapoyaika, patuntuka nangwa pa kukanjijila peulu.

◼ Bipona ne Tumakinga mwa Kusendelamo Baana Babacheche: Mwakonsha kusenda bipona ne tumakinga mwa kusendelamo baana babacheche inge mubena kushonkena pa mpunzha pabula pa kwikala. Bino inge mpunzha iji na bipona byashimikwa kala, kechi mwafwainwa kuleta bipona ne tumakinga twa kusendelamo baana ku mpunzha ya kushonkena ne.

◼ Binunka Bulongo: Kikawama bingi atweba bonse inge twabula kukizhamo kwifyukawila binunka bulongo, mambo byakonsha kuvulumuna bikola bya bantu bakolwa mu kyaji nangwa bikola bikwabotu.—1 Ko. 10:24.

◼ Tupepala twa Mwane Monai Uno Muntu (S-43): Kapepala ka Mwane Monai Uno Muntu mwafwainwa kwikengijisha kunembapo mabulañano a muntu wamwesha lusekelo kimye kya kushonkena. Tupepala panembwa mabulañano twakonsha kupanwa ku Kibamba kya Mabuku nangwa ku munembeshi mu kipwilo umvwe mwabwela ku kipwilo kyenu.

◼ Mwingilo wa Kwitemenwa: Aba bakeba kuba bino, bafwainwa kuya ku Dipatimenti wa Mwingilo wa Kwitemenwa pa kushonkena. Baana bakyangye kukifikizha myaka 16 nabo bakonsha kwingilako kupichila mu kwibatangijila ku bansemi nangwa ku mukulumpe mukwabo watongolwa.