Bya Kwituvululako pa Kushonkena kwa Kijiiji

◼ Bimye Bikatendekelangapo Kushonkena: Binzhilo bakebishinkulanga na kimye kya 7 koloko lukelo. Nyimbo pa kushonkena ikatendekanga na kimye kya 08:20 pa moba onse asatu. Umvwe nyimbo yatendeka, atweba bonse twafwainwa kwikela jimo pa kuba’mba kushonkena kukatatule na mushingi. Mutanchi wa juba jitanshi ne juba ja bubiji ukapwa pa 16:00, kabiji wa juba ja busatu ukapwa pa 15:00.

◼ ‘Totai Yehoba na Lwimbo’: Bantu ba Lesa ba kala, batotanga Yehoba mu nyimbo, kabiji nyimbo yatwajijila kwikala lubaji lwanema mu bupopweshi bwa kine lelo jino. (Sala. 28:7) Kipungu kyonse kya kushonkena kwetu kwa kijiiji kikatendeka na nyimbo. Ino nyimbo beinengezha kwitukwasha kunengezha muchima kufunda pe Yehoba ne kumupopwela. Onkao mambo, inge wa kumupando wabijika’mba nyimbo katataka itendeke, twafwainwa kwikala na kuteleka ku ino nyimbo, kechi kimye kya kwisamba ne. Kuba bino kumwesha’mba twanemeka jibumba ja banyimbi ba Watchtower bemba ino nyimbo. Jibiji mu mwaka bano balongo ne banyenga bengijisha mali abo kuya ku Patterson, mu New York, na kwimba nyimbo yawama yo twiyowa. Inge twapwisha kuteleka ku ino nyimbo, bonse twafwainwa kutota Yehoba kupichila mu kwimba nyimbo yetu ya Bufumu.

◼ Mwa Kwimikila Myotoka ne Makinga: Pa mapunzha ponse pakekela kushonkena, kechi kukekala kulipilisha pa kwimikila myotoka nangwa makinga ne, bino mpunzha bakapanga yenka wafika bukiji. Na mambo a kuba pa mapunzha pa kushonkena kechi paji mpunzha yabaya ya kwimikilapo myotoka ne, kyawama kwingijishatu motoka umo inge mwavula kwa kubula kuba awu na wanji awu na wanji. Twimutundaika kukookela boba bo bapa mwingilo wa kwimubuula pa kwimikila myotoka ne makinga.

◼ Kukebela Jimo pa Kwikala: Kimye kyo mubena kutwela mu mpuzha mwaikela kushonkena, kechi mwafwainwa kunyemenanga kusala bipona byo mukeba kwikalapo nobe mubena kwikyombesha ne. Twafwainwa kulangulukilangako bakwetu ne kwibashila pa kwikala. Muchima wa kwipana ye umwesha’mba twi bena Kilishitu bakine kabiji ulengela babena kwitumona kutumbijika Lesa. (Yoa. 13:34, 35; 1 Ko. 13:5; 1 Pe. 2:12) Bo mwakonsha kulamina pa kwikala ke boba bo mwaiya nabo mu motoka umo, bo mwikala nabo nzubo imo nangwa bantu bo mufunjisha Baibolo. Mwafwainwa kulangulukilako bakwenu inge mukeba kubika masumbulenyi kuba’mba mwikale mu kimfutele. Mwafwainwa kusala bulongo mpunzha pa kubikila bino bintu. Mwafwainwa kwiipuzha’mba: Nanchi kino kyo mbena kubika kisakuzhita bakwetu kya kuba bakankalwa kumwenamo mu mutanchi nyi? Banengezhezha jimo pa kwikala bakikulumpe ne bakolwakolwa. Na mambo a kukepa kwa bipona bya bakikulumpe ne bakolwakolwa, kyawama kuba’mba muntu umotu nangwa babiji ba mu kisemi baikala nabo na kwibakwasha.

◼ Kuvwala Bulongo: Twafwainwa kuvwala bulongo kabiji na mushingi kimye kyo tubena kushonkena, kechi kulondela mvwajilo ya bantu ba mu ino ntanda ne. (1 Timo. 2:9) Kimye kyo tubena kufuma ne kubwela pa mazubo po twafikila nangwa po tubena kwikala, ne pa bimye bya kukookoloka pa kushonkena, twafwainwa kuchinuzhukanga kuvwala nobe bantu ba mu ino ntanda. Inge ke tuvwale bulongo kimye kyonse, tukakasuluka bingi kuvwala baaji wetu wa kushonkena, kabiji kechi tukomvwa bumvu kushimuna bukine ku bantu inge kimye kyamweka ne. Mwekelo ne byubilo byetu kimye kya kushonkena kechi bikalengelatu bantu kukeba kufunda byambo bya bumi biji mu Baibolo ne, bino bikasangajika ne muchima wa Yehoba.—Zefwa. 3:17.

◼ Kwingijisha Bulongo Mafoni ne Biñambañamba Bikwabo: Tumwesha mushingi kimye kya kushonkena kupichila mu kuzhimya mafoni ne biñambañamba bikwabo bya kumvwañenamo pa kuba’mba bibule kuvulañanya bakwetu. Inge mubena kukopa na vidyo kamela ne makamela akwabo po mwaikala, mwafwainwa kumona’mba kechi mwazhita bakwenu ne. Kabiji tumwesha mushingi kupichila mu kubula kwitumina tubyambo pa foni nangwa kiñambañamba kikwabo pa kimye kya kushonkena.

◼ Lubatizhilo: Kechi mwafwainwa kwishindaikanga pa kukopa bipikichala kimye kya lubatizhilo ne. Kabiji baana kechi bafwainwa kukayilanga pa mpunzha ya lubatizhilo ne. Aba batanwako ku bino bimye byanema, bafwainwa kwimana palepa ne kumwesha mushingi. Inge baana bataanwako, bafwainwa kwikala paji bansemi babo.

◼ Kajo ka Pachaile: Mwane mukasendele jimo kajo ka pachaile kukila kusha mpunzha po mwashonkena ne kuya na kukeba kajo kungi. Mwakonsha kwingijisha kipe kyaesakana kya kusendelamo kajo kyo mwakonsha kubika munshi ya kipona kyenu. Kechi mwafwainwa kusendela kajo mu bipe bilalaika ne. Mwafwainwa kusenda kajo kashalapo ne bintutu bikwabo byo mukengijishanga ne kuya na kwibitaya ku mazubo enu.

◼ Bupe: Twakonsha kumwesha lusanchilo lwetu kupichila mu kupanako bupe bwa kukwasha mwingilo wa ntanda yonse pa kushonkena kwa kijiiji. Cheki wa mali yense wapanwa pa kushonkena kwa kijiiji wafwainwa kupanwa ku “Watch Tower Society.”

◼ Muchi: Umvwe mukakebanga muchi ye bemunembela ku kipatela, mwafwainwa kumona’mba mwasendela jimo yewo muchi wavula mambo kechi kukekala kupana muchi wa uno mutundu pa mpunzha ya kushonkena ne. Umvwe muji na kikola kya shuka kabiji mwaiya na maguya, panyuma ya kwiengijisha kechi mwafwainwa kutaya ano maguya ne bya michi mu byo banengezha mwa kutaya biko pa kushonkena ne.

◼ Kwizhikijila ku Mapuso: Mwane jimukai ne kwizhikijila ku mapuso akonsha kumweka na mambo a kutezhimuka ne kwituntula ku bikokolo. Pa mwaka pa mwaka, bantu bekozha na mambo a kuvwala masapato alepa tushiko. Kyakonsha kuwama inge mwavwala masapato abula kulepa tushiko pa kuba’mba mwendenga bulongo. Bansemi bafwainwa kumona kuba’mba baana babo kechi babena kuba bintu byakonsha kuleta mapuso ne. Bafwainwa kufunjisha ne kujimuna baana umvwe ke bavulañanye bakwabo.

◼ Tubipona ne Tumakinga twa Kusendelamo Baana Babacheche: Kechi mwafwainwa kwiya na tubipona ne tumakinga twa kusendelamo baana babacheche pa mpunzha pa kushonkena ne. Bino mwakonsha kusenda tubipona twa baana inge mwakonsha kwitubika kwipi na bipona paikala bansemi.

◼ Binunka Bulongo: Kikawama bingi atweba bonse inge twabula kukizhamo kwifyukawila binunka bulongo, mambo byakonsha kuvulumuna bikola bya bantu bakolwa mu kyaji nangwa bikola bikwabotu.—1 Ko. 10:24.

◼ Tupepala twa Mwane Monai Uno Muntu (S-43): Kapepala ka Mwane Monai Uno Muntu mwafwainwa kwikengijisha kunembelapo mabulañano a muntu ukeba kufunda bukine ye mwasapwijile busapwishi bwa kushukilwa kimye kya kushonkena. Tupepala panembwa mabulañano twakonsha kupanwa ku Kibamba kya Mabuku nangwa ku munembeshi mu kipwilo umvwe mwabwela ku kipwilo kyenu.

◼ Mazubo mwa Kujiila, Mashitolo ne Mapunzhatu Akwabo: Nemekainga jizhina ja Yehoba kupichila mu kumwesha byubilo byawama mu mazubo mwakujiila kajo ne mu mashitolo. Mwafwainwa kutekanya ne kumwesha mushingi pa kukanjila mu myotoka, pa kwendesha myotoka ne pa kwenda mu mashinda. Mwafwainwa kuvwala bivwalo bimwesha’mba mwi basapwishi ba Bufumu.

◼ Mwingilo wa Kwipana: Aba bakeba kuba bino, bafwainwa kuya ku Dipatimenti wa Mwingilo wa Kwipana pa kushonkena. Baana bakyangye kukifikizha myaka 16 nabo bakonsha kwingilako uno mwingilo na lutangijilo lwa bansemi nangwa muntu mukwabo ye baswisha ku bansemi.