‘Konkanyai Bantu’
1. Kushonkena kwa nkambi ne kukonkana kwa byalo bipasha byepi na kukonkana kwaubile bena Isalela panyuma ya kufuma mu Ijipita?
1 Panyuma ya kufuma mu Ijipita, Yehoba wakambizhe Mosesa amba ‘akonkanye bantu’ pa Mutumba wa Sinai na kuteleka ku byambo bya Lesa pa kuba’mba bayuke kumwakamwa ne kufunjisha baana babo mashinda anji. (Mpitu. 4:10-13) Kine kino kyajinga kimye kya kwibatundaika ne kwibakosesha mu lwitabilo. Mu ba ñondo bacheche babena kwiya, bantu ba Yehoba bakapwila pamo pa kushonkena kwa nkambi ne pa kukonkana kwa byalo pa kuba’mba Yehoba akebafunjishe. Twafwainwa kuba byepi pa kuba’mba tukamwenemo mu kuno kupwila?
2. Ñanyi bintu byo twafwainwa kuba pa kuba’mba ‘twinengezhezhe jimo’ pa kushonkena?
2 ‘Inengezhai’: Yehoba wakambizhe bena Isalela amba “bakenengezhezhe jimo” pa kukonkana kukatampe kwa pa Mutumba wa Sinai (Lupu. 19:10, 11) Ne lelo jino, bantu bonse bakatanwa ku kushonkena bafwainwa kwinengezhezha jimo, kechi bonkatu bakambanga majashi ne. Aba baya ku makito bakonsha kulomba moba ku bakulumpe bamingilo pa kuba’mba bakatanweko. Apo kampe mwakonsha kuba byaubile Nehemiya. Nehemiya wakebelenga kulomba moba kwi Mfumu Atazakeshi ko aingilanga mwingilo wa bu kaseya pa kuba’mba akaye na kukwasha kushimukulula nsakwa ya Yelusalema. Bino, wayukile’mba mfumu kechi ukamuswisha ne. Onkao mambo, Nehemiya walombele kwi Lesa ne kubuula mfumu wanji byo akebelenga. Kyafuminemo, mfumu wamuswishishe kuya kabiji wamupelepo ne bukwasho kimye kyo ailenga na kushimukulula nsakwa. (Ne. 2:1-9) Kununga pa kulomba moba ku bakulumpe bamingilo, nanchi mwanengezhezha jimo bya ñendelo ne pa kulaala inge mukaya na kushonkena kwalepa nyi? Bakulumpe mu kipwilo bepana kukwasha bonse bakonsha kukebewa bukwasho. Nengezhai kuba’mba mukafikenga bukiji moba onse a kushonkena ne “kuteshako bingi muchima” ku bikambiwanga.—Hebe. 2:1.
3. Ñanyi bintu biketukwasha kunengezhezha jimo muchima wetu saka tukyangye kuya na kushonkena?
3 Kintu kikwabo kyo twafwainwa kuba mu kwinengezha kwetu ke kunengezha michima yetu pa kuba’mba tuteleke ne kufunda. (Eze. 7:10) Mutanchi wa majashi akambiwa pa kushonkena ukekela jimo pa Keyala wa pa intaneti wa jw.org, kabiji pakekala mitwe ya majashi ne kinembelo kimo nangwa bibiji paimena yewo mutwe. Mwakonsha kwisambapo pa ino mitwe pa kimye kya Kupopwela kwa Kisemi mu moba ashalako saka mukyangye kuya na kushonkena. Basapwishi bamo bakopolola uno mutanchi uji pa keyala wetu pa kuba’mba bakamwingijishe kunembamo bishinka bimo kimye kya kushonkena.
4. Bansemi bakonsha kwingijisha byepi kimye kya kushonkena kufunjishishamo baana babo?
4 ‘Funjishainga Baana Benu’: Kintu kikwabo kyalengejile kukonkana kwa bena Isalela pa Mutumba wa Sinai ke kuba’mba bansemi ‘bakafunjishenga baana babo.’ (Mpitu. 4:10) Kushonkena ke kimye kyawama bansemi kyo bafunjishishapo baana babo. Bansemi bafwainwa kwikala na baana babo kimye kibena kwambiwa majashi pa kuba bebakwashenga kuteleka. Panyuma ya juba jimo ja kushonkena kabiji ne pa Kupopwela kwa Kisemi mu moba alondelapo, bafwainwa kwisambapo pa majashi a pa kushonkena.
5. Tukamwenamo byepi mu kutanwa ku kushonkena kubena kwiya?
5 Kukonkana kukatampe kwajingako pa Mutumba wa Sinai kwakwashishe bena Isalela kuyuka buwame bwa kwikala bantu ba Lesa basalululwa. (Mpitu. 4:7, 8) Kyo kimo ne atweba, kushonkena ko tukekala nako bekunengezha kwitukwasha. Pa moba asatu, tukoba nobe twafumamo mu kiselebwa kya ntanda ya kwa Satana ne kupwañana na balongo ne banyenga kimye kyo tukatambwilanga mambo awama kufuma kwi Lesa. (Isa. 35:7-9) Juba ja Yehoba byo jibena kufwenya pepi, twayai twingijishe bulongo kino kimye kya kupwila pamo ne kwitundaika atwe bene na bene.—Hebe. 10:24, 25.