Kumvwa ne Kufunda
1. Mambo ka o kikebewa kutako muchima kimye majashi kyo abena kwambiwa?
1 Katatakatu tutatule kushonkena kwa nkambi kwa uno mwaka wa 2013. Kuno kushonkena bekunengezha kala kabiji kukakwasha bantu bavula mwaya ntanda. Nanchi mwinengezha kukatanwako moba onse asatu nyi? Pa kushonkena kwikala bintu byavula byakonsha kwitulubankanya, onkao mambo, mukatesheko muchima kimye majashi kyo akambiwanga. Kimye kibaya bingi kukila ku kipwilo, o ene mambo, o twafwainwa kutako maana kya kine kine pa kuba’mba tukabulenga kukunuka. Kabiji kwenda misinso yalepa ne bintutu bikwabo byakonsha kwitulengela kukoka. Ñanyi bintu biketukwasha pa kuba’mba tukomvwenga ne kufunda?—Mpitu. 31:12.
2. Twakonsha kwinengezha byepi kushonkena saka kukyangye kutatula?
2 Kushonkena Saka Kukyangye Kutatula: Mwakonsha kutana mutanchi wa majashi wa kushonkena pa intaneti kwingijisha keyala wa www.jw.org. Umvwe muji na intaneti, mwakonsha kumwena jimo mutanchi pa kuba’mba muyukile jimo majashi akekalako. (Eze. 7:10) Nanchi kechi mwakonsha kwisambapo pa kimye kya Kupopwela kwa Kisemi pa kuba’mba muyukile jimo biji mutanchi nenyi?
3. Ñanyi bintu byo mwafwainwa kuba pa kuba’mba mukateko maana kimye majashi kyo akambiwanga?
3 Kimye Majashi kyo Abena Kwambiwa: Mwafwainwa kwinengezhezha jimo, majashi saka akyangye kutatula kuchina kulupuka lupuka. Kabiji mwafwainwa ne kuzhimya mafoni kuchina kwimulubankanya nangwa kutuminanga bakwenu tubyambo pa foni kimye majashi kyo abena kwambiwa. Umvwe mukengijishanga kompyuta nangwa kechi kikakonsheka kuzhimya foni ne, mwafwainwa kumona kuba’mba kechi mubena kulubankanya bakwenu ne. Kechi mwafwainwa kuja bya kuja nangwa kutoma bya kutomatoma kimye majashi kyo abena kwambiwa ne. (Sapwi. 3:1) Mukatalenga ñambi kimye kyo abena kwamba jashi. Umvwe ubena kutanga kinembelo mwafwainwa kulondelangamo ne kunemba bishinka.
4. Bansemi bafwainwa kukwasha byepi baana babo kuta muchima ku bibena kwambiwa?
4 Tukeba baana betu nabo kumvwa ne kufunda. Pa Byambo bya Mana 29:15 paamba kuba’mba “mwana ye babula kufunda uletela inanji bumvu.” Onkao mambo, bansemi bafwainwa kwikala pamo na baana babo, pa kuba’mba bebamonenga kuchina kupanga kyongo, kutumanga mafoni nangwa kwendaukanga. Nangwa kya kuba baana kechi bakonsha kumvwa byonse bibena kwambiwa ne, bino mwafwainwa kwibakwasha kutelekanga ne kubula kupanga kyongo.
5. Kyawamina ka kupituluka mu byo mukafundanga, kabiji twakonsha kuba byepi bino?
5 Panyuma ya Kupwisha Kushonkena Juba Jimo Jimo: Mukalalenga bukiji pa kuba’mba mukakokolokenga. Kupituluka mu byo mukafundanga kukemukwasha kubula kulubamo. Kyawama kupitulukamo na kisemi kyenu mabanga. Umvwe mu bena kuya na kupota bya kuja na bakwenu, abya nanchi mwakonsha kwisambapo pa bishinka bimo byo mwaji kutemwa mu majashi nyi? Umvwe kushonkena kwapwa mwafwainwa kwisambangapo pa Kupopwela kwa Kisemi mashinda mo mwakonsha kwingijisha bishinka byo mukafunda. Mwafwainwa kwikala na mutanchi mu mulungu wa kwisambanga pa bibaba biji mu mabuku o mukatambula.
6. Ñanyi bintu byo twakonsha kuba pa kuba’mba tukamwenemo pa kushonkena? Lumbululai.
6 Umvwe mwanengezha kijiilo kwafwainwa kwikala bantu ba kuja kajo ko mwanengezha. Byobyo kiji ne kijiilo kya ku mupashi kikekalako pa kushonkena kwa nkambi. Tukamwenamo umvwe twatanwako moba onse asatu, kuteleka ne kwingijisha byo tukafunda.