Kupwila Pamo na Kutota Yehoba
1. Mutwe wa kupwila kwa nkambi waamba’mba ka, kabiji mambo ka o twafwainwa kumutotela Yehoba?
1 Yehoba ye wa bulume bonse, ye uji na maana akatampe, bunchibamambo bwaoloka kabiji ye butemwe. Byo aji Mulenga, Upana Bumi, kabiji Nkambo Walengele Bintu byonse, aye yenka yetwafwainwa kupopwela. (Sala. 36:9; Lum. 4:11; 15:3, 4) Kupwila kwa Nkambi kwa uno mwaka kwa “Pai Lesa Lukumo” kuketukosesha bingi kukeba kumutota aye yenka Lesa wakine.—Sala. 86:8-10.
2, 3. Kwinengezha bulongo kuketukwasha byepi kuba’mba tukamwenemo pakatampe?
2 Pabena Kukebewa Lunengezho Lwawama: Pakuba’mba tukamwenemo pakatampe mu kijiilo kya ku mupashi kitunengezhezha Yehoba, kibena kukebewa kwinengezha bulongo. (Efi. 5:15, 16) Nanchi mwanengezha kala kwa kukafikila, ñendelo, ne kulombela jimo moba ku nkito nangwa ku sukulu nyi? Kange mukobe bino umvwe kwashalatu moba acheche ne. Umvwe mwakelwa kulombela jimo moba, mwakonsha kupuswako majashi amo akuno kupwila kwa lusekelo. Atweba bonse twafwainwa kukatanwako ku bipungu byonse.
3 Ibikilai kikonkwanyi kya kukafikanga bukiji pa mpunzha ya kupwila moba onse. Kino kikemukwasha kwikela jimo pa kipona kyenu lwimbo wa kutendekelapo saka akyangye kwimbiwa, kabiji kikemukwasha ne kwinengezhezha jimo mu milanguluko kuba’mba mukatambwile mikambizho ikambiwanga.
4. Mambo ka o kyawamina amba atweba bonse tukasendelenga jimo kajo ka kuja pa chaile?
4 Bonse bakasendelenga jimo kajo ka kuja pa chaile kimye kya kukokoloka, kukila kusha mpunzha ya kupwila ne kuya na kupota kajo ku mashitolo nangwa ku basulu batanchika mu mikwakwa. Kukwatankena kwenu pamo na luno lunengezho kukemuletela lusekelo ne kwimupako kimye kikatampe kya kwisamba na bakwenu ba mu lwitabilo. (Sala. 133:1-3) Mwane vulukai kuba’mba maalwa kechi aswishiwa pa mpunzha ya kupwila ne.
5. Twakonsha kutendeka byepi kunengezhezha jimo michima yetu pa kupwila?
5 Telekai ne Kufunda: Ezela wateleko muchima kunengezhezha jimo muchima wanji kuba’mba afunde byambo bya Lesa. (Ezela 7:10) Watesheshe muchima wanji ku mafunjisho a Yehoba. (Mana. 2:2) Ne atweba, nangwa saka tukyangye kwimana kuya na kupwila, twakonsha kutendekelako jimo kunengezha michima yetu kupichila mu kulanguluka langulukapo pa mutwe wa kupwila ne kwisambila pamo uno mutwe na kisemi kyetu.
6. Kika kyakonsha kwitukwasha kuteshako maana ku majashi? (Monai kabokoshi)
6 Papwila bantu bavula, pekala bingi bintu byavula kuya meso ne kyongo abyo byakonsha kwitulabika. Bintu bya uno mutundu byakonsha kwitulengela kubula kutako maana ku ñambi. Umvwe twalabikwa mu jino jishinda, kafwako ne kyotukomvwapotu ne. Mashinda amo aji mu kabokoshi ka mu kino kibaba, akonsha kwitukwasha kutako maana na kutelekesha.
7, 8. Twakonsha kulangulukilako byepi bakwetu?
7 Langulukilaiko Bakwenu: Mwakonsha kwingijisha kamela ne vidyo kamela kimye kibena kwambiwa majashi, pano bino pakuba’mba mubule kulabika bakwenu, mwafwainwa kukopa saka mwaikala monka mu kifulo kyenu. Mwafwainwa kuzhimisha jimo maselula foni ne ma pager kuba’mba akabulenga kupanga kyongo ne kulabika bakwenu. Kafwako nangwa umo wafwainwa kusukika kiñambañamba kyanji ku malaichi nangwa ku biñambañamba byakwambilamo bya kupwila kwa nkambi ne.
8 Byotubena kutengelapo kupwila pamo tukatote Yehoba! Twayai atweba bonse tukamutakaikenga kupichila mu kutanwako ku bipungu byonse, kutelekesha kabiji ne kulondela byonse byotukafunda mu bwikalo bwetu bonse.—Mpitu. 31:12.
[Kitenguluzha pa peja 3]
Kuteleka pa Kupwila kwa Nkambi
▪ Languluka langulukaipo pa mitwe ya majashi
▪ Tangai binembelo byaambiwa
▪ Nembainga bishinka bikatampe
▪ Monaipo bishinka bikatampe byo musakwingijishanga mu bwikalo bwenu
▪ Pitulukaimo mu byo mwafunda