“Twayai Tutumbijike Jizhina Janji Bonse Pamo”
1. Ñanyi kimye kyo tukekala nakyo kya kutumbijikilamo Lesa pamo, kabiji twafwainwa kuba ka luno lonka mu kwinengezha?
1 Nyimbi wa masalamo waimbile’mba: “Munemekeshai Yehoba pamo ne amiwa, tutumbijike jizhina janji bonse pamo.” (Sala. 34:3) Kupwila kwetu kwa Nkambi kubena kwiya kwa “Endainga na Lesa” kuketupa kimye kya kutumbijikilamo jizhina ja Yehoba pamo na balongo ne banyenga yetu ba mu bipwilo byavula. Nanchi mwanengezha mwakufikila, ñendelo, ne kutambwila jimo moba pa nkito nyi? Twafwainwa kuba bulongo kunengezhezha jimo bino bintu saka kukiji kimye.—Mana. 21:5.
2. Mambo ka o kyawamina kunengezhezha jimo kufikanga bukiji pa mpunzha pa kupwila?
2 Kufika pa Mpunzha pa Kupwila: Kuji bintu byavula bingi bikebewa kutako muchima kimye kyotutanwa ku kupwila kwa nkambi. Kuya bukiji ku kupwila kuketukwasha kubula kukelwa na mambo a bintu bisolomokatu kwa kubula kuketekela, kabiji kuketukwasha kwikala pa bipona byetu saka kukiji kimye kuba’mba tukembeko lwimbo kufuma panshi ya muchima wetu ne kutanwa ku lulombelo. (Sala. 69:30) Kimye kicheche kyashalako kipungu saka kikyangye kutendeka, cheyamani ukekela jimo pa pulatifomu aku nyimbo ya Bufumu ya kutendekelapo saka imbiwa. Mu kikye kimye, atweba bonse twafwainwa kwikela jimo pa bipona byetu kuba’mba kupwila kukatatule na mushingi.—1 Ko. 14:33, 40.
3. Twafwainwa kulangulukilako byepi bakwetu kimye kyo tubena kukeba pa kwikala?
3 Byambo bya Lesa bitujimuna’mba ‘byonse byo tuba, kasa twibyubila mu butemwe.’ (1 Ko. 16:14) Kyawama kulangulukilako bakwetu kubula kunyemanyema, kukumpauka, kwishindaika mu kulwisha amba wafwa yaya ngikale pa kipona nangwa pa mpunzha yo natemwa bakwetu saka bakyangye kwikalapo. Bipona nangwa mpunzha byafwainwatu kusungila boba bomwaiya nabo motoka umo nangwa bomwikala nabo nzubo imo.—1 Ko. 13:5; Fili. 2:4.
4. Lunengezho lwa pachaile lwafwainwa kukekala byepi, kabiji kino kyawamina ka?
4 Mwane mukasendele jimo kajo kapachaile kukila kusha mpunzha po mwapwila ne kuya na kukeba kajo kimye kya kukokoloka kwa mute. Kino kikakwasha bonse kwisambila pamo misambo ikoseshañana ne kutanwako ku ntatwilo ya kipungu kya mute. Umvwe kyafwainwa, mwakonsha kwingijisha kipe kyaesakana kusendelamo kajo kuba’mba mukekibike munshi ya kipona kyenu pomwaikala. Kechi kyaswishiwa kusendelanga kajo mu bipe byakilamo kubaya, bipe bya makalashi, ne kusenda maalwa pa mpunzha pa kupwila ne.
5. Twakonsha kunengezha byepi michima yetu ku mikambizho yo tukafunda?
5 Kijiilo Kikatampe kya ku Mupashi Kibena Kwitupembelela: Mfumu Yehoshafwata ‘wateshe [wanengezhezhe, NW] muchima [wanji] mu kukeba Lesa.’ (2 Moba. 19:3) Twakonsha kunengezha byepi muchima kupwila saka kukyangye kufika? Nga mambo ka a kubula kwikalako na kimye ne kulanguluka pa kishina kya kupwila, kubaisha mujojo wa bintu Yehoba byo etunengezhezha? Kabiji kunengezha michima yetu kwavwangamo ne kulomba kwi Yehoba kuba’mba aketukwashe kumvwa mikambizho yo tukafundanga ne kwiingijisha.—Sala. 25:4, 5.
6. Ñanyi kutonga kotuji nako, kabiji mambo ka?
6 Atweba bonse tubena kutonga kukafunda byavula bingi mu Byambo bya Lesa, mambo twayuka’mba kupichila mu bino byambo momo twakonsha kufikila ku lupulukilo. (1 Pe. 2:2) Onkao mambo, twayai tukatanwe ku Kupwila kwetu kwa Nkambi kwa “Endainga na Lesa” ne ‘kutumbijika jizhina ja Yehoba bonse pamo.’—Sala. 34:3
[Kitenguluzha pa peja 3]
Mashinda a Kutumbijikilamo Jizhina ja Lesa
◼ Kunengezhezha jimo
◼ Mweshai butemwe ku bakwenu
◼ Nengezhai muchima wenu