BUTALA BWA MABUKU BWA PA INTANETI
Kyamba kya Usopa
BUTALA BWA PA INTANETI
Kikaonde
Pa kukebela
  • Bisopelo
  • BAIBOLO
  • MABUKU
  • KUPWILA
  • km 7/04 p. 6
  • Mwekelo Yawama Ilengela Muntu Kunemekwa

Vidyo ufwamo.

Yakana kushinkuka.

  • Mwekelo Yawama Ilengela Muntu Kunemekwa
  • Mwingilo Wetu wa Bufumu—2004
  • Byambo Bipashako
  • Ene Mambo Kuvwala Bulongo ne Kumweka Kipaale o Kwanemena
    Mukekala Myaka ne Myaka!—Fundainga Baibolo
  • Mvwajilo Yafwainwa Ipana Mushingi kwi Yehoba
    Mwingilo Wetu wa Bufumu—2003
  • Totai Yehoba mu Kipwilo Kikatampe
    Mwingilo Wetu wa Bufumu—2005
  • Nanchi Mvwajilo Yenu Itumbijika Lesa Nyi?
    Kyamba kya Usopa Kibena Kubijika Bufumu Bwa Yehoba (Kya Kufundamo)—2016
Monai Bikwabo
Mwingilo Wetu wa Bufumu—2004
km 7/04 p. 6

Mwekelo Yawama Ilengela Muntu Kunemekwa

1. Pa kunengezha kupwila kwetu kwa nkambi, mambo ka o twafwainwa kutelako maana ku mwekelo yetu?

1 Mukulumpe wa pa hotela umo waambile pa balongo ne banyenga yetu pa kupwila kumo kwa nkambi mwaka wapwa amba: “Bakamonyi ba kwa Yehoba ke bantu bawama bingi! Bantu benu baji bingi na lusa kabiji bavwala bingi bulongo ne kumwesha mushingi.” Pa kupwila kukwabo, wa mwingilo umo wa pa hotela naye waambile’mba: “Kyamwekanatu patoka’mba bantu benu bavwala kuba’mba batokeshe Lesa pa muchima.” Ee, bantu beya pa kupwila kwa nkambi bebamona bingi ku bakwabo. Onkao mambo, tukeba kuvwala ‘mwafwainwa mambo awama,’ kabiji javula kino kitundaika bena kengi kwitunemeka ne kwamba patoka amba twi ba mwingilo ba Lesa. (Fili. 1:27) Byo tubena kunengezha kupwila kwa nkambi, kyawama kulangulukilapo jimo pa mwekelo yetu saka kukiji kimye.

2. Kyashupila ka muntu kuvwala ne kumwekana bulongo?

2 Mwana wa bwanga Yakoba wanembele’mba: ‘Maana afuma mwiulu, patanshi o awamishatu.’ (Yako. 3:17) Kyakonsha kushupa bingi kuvwala mvwajilo yalumbuluka. Ino ntanda ibi ya kwa Satana itundaika bantu kuvwala mvwajilo yabula kufwainwa, ibindankanya bakwabo mibiji, kabiji imwekatu bingi bingitu. (1 Yoa. 2:15-17) Onkao mambo, kimye kyo tubena kufuukula bya mvwajilo ne mwekelo yetu, twafwainwa kutesha muchima ku mukambizho wa mu Baibolo waamba’mba “tukanenga bumbulwa kwakamwa Lesa ne bya lwiso lwa panopantanda, twikale batekanya ... panopantanda.” (Titu. 2:12) Kechi tukeba kukozha bakwetu ku muchima na mambo a mwekelo yetu ne, kikale balongo betu nangwatu bantu bakwabo betumona.—1 Ko. 10:32, 33.

3. Ñanyi mepuzho aketukwasha kulangulukapo pa mwekelo yetu?

3 Kuvwala Byafwainwa na Butekanye: Pa kwinengezha kuya na kupwila, iipuzhai anwe bene’mba: ‘Nanchi bivwalo byami bijitu bulongo nyi, inyi bisakundengesha bumvu? Abya bibena kumwesha mushingi ku bantu nyi? Nanchi malaya ami aipipa kwiulu ne kunshi nyi? Nanchi bivwalo byami bibena kumwesha mubiji wami nangwa byafinankana nyi? Nanchi bivwalo byami byatoka ne kubula kufumya bwema bwatama nyi? Kimye kyo mbena kukokoloka panyuma ya kupwila, nanchi nsakuvwala bivwalo byatoka, mwekelo yawama yafwainwa wa mwingilo, inyi mvwajilo yami isakwikala ya busaji, yatama, ilala mizhilo, kabiji yabula kufwainwa kuvwala muntu waiya na kupwila wavwala baaji nyi? Nga bivwalo byo mvwala kimye kya kukokoloka, abya bindengeshanga bumvu bwakukankalwa kusapwila busapwishi bwa kushukilwa nyi?’—Loma 15:2, 3; 1 Timo. 2:9.

4. Bakwetu bakonsha kwitukwasha byepi kuba’mba tumwekanenga bulongo?

4 Bena Kilishitu bafikapo bakonsha kwitubulako byo tubena kumwekana. Banabakazhi bafwainwa kwipuzha bena kwabo kwibabula mvwajilo yabo byo yakonsha kumwekana ku bantu. Bansemi ba bwina Kilishitu bakonsha kukwasha baana babo bakomako kuyuka bya kuvwala. Kabiji banyenga bakikulumpe bazhijikwa bakonsha ‘kufunda banabakazhi bakyanyike kutemwa ... kwikala ba michima yatekanya, ba kubula bubi’ mu mwekelo yabo “kuchina’mba, mambo a Lesa akanenwa bibi.” (Titu. 2:3-5) Mabuku etu aji na byakumwenako byawama bingi bitukwasha kuvwala byafwainwa ne kwikala batekanya.

5. Atweba bonse twakonsha kuleta byepi lutotelo kwi Yehoba kimye kya kupwila?

5 Panai Lutotelo kwi Yehoba: Kupwila kwa Nkambi kechi kupanatu kimye kyawamisha ku boba bonka bekala mu mbaji ya mapologalamu ne, bino kwitupa atweba bonse kimye kya kutotelamo Yehoba. Byubilo ne ñambilo yetu ya bwina Kilishitu nabyo bimutumbijika. Pano bino kintu kitanshi bena kengi kyo bamona kwi atweba ke mvwajilo ne mwekelo yetu. Twayai atweba bonse tupanenga lutotelo kwi Yehoba kupichila mu mwekelo yawama ilengela muntu kunemekwa.—Sala. 148:12, 13.

[Kitenguluzha pa peja 6]

Bukwasho Bwakonsha Kwitulengela Kumwekananga Bulongo

◼ Byambo bya Lesa

◼ Kwipima atweba bene

◼ Bakwetu bakonsha kwitubulako

◼ Mabuku a bwina Kilishitu

    Mabuku a mu Kikaonde (1992-2025)
    Shinkai
    Shinkulai
    • Kikaonde
    • Tuminaiko Bakwenu
    • Byo Mukeba
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Shinkulai
    Tuminaiko Bakwenu