Nanchi Mwatambwila “Mupashi wa Bukine” Nyi?
“Batata . . . bakemupa Nkwasho mukwabo, ye ukekala nenu myaka, ye Mupashi wa bukine.”—YOANO 14:16, 17.
1. Ñanyi byambo byanema Yesu byoabujile baana banji babwanga munzubo yapeulu kimye kyanji kyapeleleko?
“NKAMBO, muya kwepi?” Jino jipuzho najo jajinga paoa mepuzho obamwipwizhe Yesu batumwa banji kimye kyapeleleko kyoajinga nabo munzubo yapeulu mu Yelusalema. (Yoano 13:36) Byobakisambilenga, Yesu wibabujile’mba pano kimye kyafika kyakwibasha nekubwela kwi Shanji. (Yoano 14:28; 16:28) Pano kechi usakwikalanga nabo sabamumona nakwibafunjisha nekukumbula mepuzho abone. Bino wibalaile’mba: “Ne amiwa nkalomba Batata, ne abo bakemupa Nkwasho [nangwa’mba wakwimutekenesha] mukwabo, ye ukekala nenu myaka.”—Yoano 14:16.
2. Kika Yesu kyoalaile kutumina baana banji babwanga umvwe waya?
2 Yesu wibabujile yewo nkwasho nekulumbulula byoakakwashanga baana banji babwanga. Wibabujile’mba: ‘Bino bintu, kechi nemwambijile ku ntendekelo ne, mambo najinga nenu. Pakuba pano ka ngye kuji aye wantumine; . . . kimufwainwa amiwa kufumapo; mambo inge amiwa ne kufumapo ne, Nkwasho kechi akeye kwi anweba ne; kabiji inge naya, amiwa nkamutuma kwi anweba. . . . aye Mupashi wa bukine byoakeya ukemutangijila ku byonse byakine.’—Yoano 16:4, 5, 7, 13.
3. (a) Kyajinga kimyeka “Mupashi wa bukine” kyoatuminwe kubena Kilishitu batanshi? (b) Ñanyi jishinda jimo janema mupashi wazhila moaikejile “Nkwasho” kwiabo?
3 Uno mulaye wafikizhiwe pa Pentekosta mu 33 C.E., mambo mutumwa Petelo walumbulwile’mba: “Uno Yesu bamusangwile kwi Lesa, ne atweba bonse twi batumonyi banji. Byonkabyo byo atumbijikilwe ku kilujo kya Lesa, ne kutambula kwi Shanji kyo alayile kya Mupashi Wazhila, aye waitulula kino, kyo mwamona nekumvwa anweba.” (Byubilo 2:32, 33) Byonka byotusakumona mukakimye kacheche, mupashi wazhila waitulwilwe pa Pentekosta waingijile bintu byavula bingi kubena Kilishitu batanshi. Kabiji Yesu wibalaile’mba ‘Mupashi Wazhila ukebavulula byonse byoaambile nabo.’ (Yoano 14:26) Wibakwashishe kuvuluka mwingilo wakwa Yesu nemafunjisho anji, kabiji nekunemba bine byambo byoaambile. Kino kyakwashishe bingi kikatakata mutumwa Yoano waubile wakota kala kunangijila kumpelo yakitota-myaka kitanshi C.E. kimye atatwile kunemba Mambo anji awama. Muano mambo awama muji nelufunjisho lwanema lwafunjishe Yesu kimye atatwile kuja kijiilo Kyakuvuluka lufu lwanji.—Yoano kyapitala 13-17.
4. “Mupashi wabukine” wakwashishe byepi bena Kilishitu batanshi bashingwa?
4 Kabiji Yesu walaile boba baana banji babwanga batanshi kuba’mba mupashi wazhila ‘ukebafunjisha bintu byonsetu nekwibatangijila mubyonse bya bukine.’ Mupashi wibakwashishe kumvwisha bintu byazhika byamu Binembelo nekwibinemba byonka byobiji nankebelo yabyo kwakubula kupampuka. (1 Kolinda 2:10; Efisesa 4:3) Onkao mambo, mupashi wazhila wapele bulume boba bena Kilishitu batanshi bonse kwikala ‘kalume wa kishinka ne wa maana’ wakupana “kajo pa kimye pafwainwa” kubena Kilishitu bakwabo bashingwa.—Mateo 24:45.
Aye Mupashi Mwine Ushimuna
5. (a) Jishukoka jikwabo joashimwine ku baana banji babwanga bufuku bwa Nisani 14, 33 C.E.? (b) Ñanyi mwingilo mupashi wazhila yeaingijile mukufikizha mulaye wakwa Yesu?
5 Bufuku bwajuba ja Nisani 14, 33 C.E., Yesu washimwine kubaana banji babwanga amba palutwe kacheche ukebatambula nekwikala neaye ne Bashanji mwiulu. Wibabujile’mba: “Mu nzubo ya Batata muji mwakwikala mwavula; inge ka mwaji byobyo ne, inge nemubula; pakuba mbenakuya mu kwimumwena kuntu. Kabiji inge naya na kwimumwena kuntu, nkeya jibiji, ne kwimutambula kwami ami mwine; namba akwa ko nji amiwa ne anweba mukekale konka.” (Yoano 13:36; 14:2, 3) Bakalamanga nanji pamo mu Bufumu bwanji. (Luka 22:28-30) Pano pakuba’mba baye mwiulu bakebewenga ‘kusemwa ku Mupashi’ kwikala ke baana ba Lesa bakumupashi bashingwa kwikala bamfumu nebañanga pamo ne Kilishitu mwiulu.—Yoano 3:5-8; 2 Kolinda 1:21, 22; Titusa 3:5-7; 1 Petelo 1:3, 4; Lumwekesho 20:6.
6. (a) Lwito lwamwiulu lwatendekele kimyeka, kabiji banga baitwa? (b) Aba baichilwe babatizwe muka?
6 Luno “lwito lwa mwiulu” lwatendekejile pa Pentekosta mu 33 C.E. kabiji lumweka nobe lwapwijile mukachi kamyaka yamuma 1930. (Bahebelu 3:1) Aba bonse babikwa tuyukilo namupashi wazhila kwikala bena Isalela bakumupashi baji 144,000, ‘bafuma mu mikoka ya bantu.’ (Lumwekesho 7:4; 14:1-4) Bano babatizwe mumubiji wakumupashi wa Kilishitu, mukipwilo kyanji, nemulufu lwanji. (Loma 6:3; 1 Kolinda 12:12, 13, 27; Efisesa 1:22, 23) Byobabatizwe mumema nekushingwa namupashi wazhila, batwelele mubwikalo bwakwipana, ko kuba’mba kusunga bulumbuluke mubwikalo bwabo bonse kufikatu nekulufu.—Loma 6:4, 5.
7. Mamboka bashingwatu bonka bobajako bimpashañano pa Kivuluko?
7 Byobaji bena Isalela bakumupashi, bano bena Kilishitu bashingwa baji mululayañano lupya lwa Yehoba ne “bena Isalela ba Lesa.” (Ngalatiya 6:16; Yelemiya 31:31-34) Bukine bwaluno lulayañano lupya bwamwekejile mumashi a Kilishitu aichikile. Yesu wikitongwele kino kimye atatwile kuja kijiilo kya Kuvuluka lufu lwanji. Luka wanembele’mba: “Washikwile shinkwa, ne pa kusanta, wamutebwile ne kwibapa’mba, Uno ye mubiji wami wimupainwa anweba: kasa muba bibye mu kundanguluka amiwa. Byonkabi ne katomeno pa kupwisha kuja’mba, Kano katomeno lo lulayañano lupya mu mashi ami, emwichikila anweba.” (Luka 22:19, 20) Bashingwa bakiji panopantanda bamu ba 144,000, bobonka bajako shinkwa ne waini wakimpashañano pa Kivuluko kya lufu lwa Kilishitu.
8. Bashingwa bayuka byepi’mba baitwa kuya mwiulu?
8 Nanchi bashingwa bayuka byepi amba baitwa kuya mwiulu? Batambwila lushimuno lwamupashi wazhila kwakubula kuzhinaukane. Mutumwa Paulo wibanembejile bano bantu’mba: ‘Bonse mo bavujila bo batangijila ku Mupashi wa Lesa, bo baana ba Lesa. . . . Mupashi mwine ushimuna pamo ne mipashi yetu, amba twi baana ba Lesa: kabiji umvwe twi baana, twi banswanyi pamo; banswanyi ba Lesa, ba kuswana pamo ne Kilishitu, umvwe twamanama nanji pamo, amba tukatumbijikilwe nanji pamo.’ (Loma 8:14-17) Luno lushimuno lwamupashi luji nabulume bukatampe kyakuba aba bajiko nakaluzhinauko kakuba’mba kana baitwa kuya mwiulunyi nangwane, bafikenatu bayuka’mba kechi baitwane, baleka nekujako bimpashañano pa Kivuluko.
Mupashi Byoengila mu Mikooko Ikwabo
9. Ñanyi mabumba abiji atongolwa mu Mambo awama nemubuku wa Lumwekesho?
9 Byoayukile kibelengelo kicheche kya bena Kilishitu baitwa kwikala bena Isalela bakumupashi, Yesu wibatelele amba “kajitanga kacheche.” Bakonkanyiwa mu “kipaka” kyalulayañano lupya, bapusanako na ‘mikooko ikwabo’ yakukankalwa kubala Yesu yoatongwele’mba nayo ukeikonkanya. (Luka 12:32; Yoano 10:16) Ino mikooko ikwabo yakonkanyiwa mukimye kyakumpelo jo “jibumba jikatampe” jikapuluka “malwa akatampe,” jiji naluketekelo lwakwikala myaka nemyaka mu paladisa panopantanda. Kabiji kimwesho kyamwene Yoano kumpelo ya kitota-myaka kitanshi C.E. kyalumbulula bulongo byapusana jibumba jikatampe nebena Isalela ba Lesa abo ba 144,000. (Lumwekesho 7:4, 9, 14) Abya bamikooko ikwabo nabo batambula mupashi wazhilanyi, umvwe ibyo, wingila byepi mubwikalo bwabo?
10. Bamikooko ikwabo babatizwa byepi mu “jizhina ja Tata ne ja Mwana ne ja Mupashi Wazhila”?
10 Mupashi wazhila wingila mwingilo wabaya bingi mubwikalo bwa ba mikooko ikwabo. Bamwesha patoka kwipana kwabo kwi Yehoba mukubatizwa mu “jizhina ja Tata ne ja Mwana ne ja Mupashi Wazhila.” (Mateo 28:19) Bayuka’mba Yehoba yenkambo walengele byonse, bakokela Kilishitu amba Mfumu wabo kabiji ye Mukuzhi, nekukokela bikeba mupashi wazhila wa Lesa, nangwa’mba ngovu ingila mubwikalo bwabo. Juba nejuba bebikako kumwesha “bipangwa bya mupashi,” kwibitela ke ‘butemwe, lusekelo, mutende, kukoka muchima, lusa, buwame, bukishinka, bukimote, nekwikanya.’—Ngalatiya 5:22, 23.
11, 12. (a) Bashingwa bazhijikwa byepi mujishinda jiikajila? (b) Muñanyi jishinda bamu mikooko ikwabo mobazhijikilwa nekwikala bazhila?
11 Bamikooko ikwabo bafwainwa nekuswisha Byambo bya Lesa nemupashi wanji kwibazhijika. Bashingwa bazhijikwa kala mujishinda jiikajila, mambo batelwa’mba baoloka kabiji bazhila byobaji basongoshi ba Kilishitu. (Yoano 17:17; 1 Kolinda 6:11; Efisesa 5:23-27) Ngauzhi Danyela wibatelele’mba “bazhijikwa ba kwa aye Mwine Wakila,” batambula Bufumu buji mubukalama bwa “mwana muntu” aye Yesu Kilishitu. (Danyela 7:13, 14, 18, 27) Kala Yehoba kupichila mwi Mosesa ne Alona washimwine ku mukoka wa bena Isalela amba: “Amiwa ne Yehoba Lesa wenu; byonkabyo mukezhijike anwe bene, mwikale bazhila, mambo amiwa nazhila.”—Bena Levi 11:44.
12 Kyambo kya “buzhile” kilumbulula kwizhijika kubintu bimo namambo amwingilo wa Yehoba Lesa; kwengulwa.” Kuntendekelo ya 1938, Kyamba kya Usopa kya Kizungu kyaambile’mba ba Yonadaba, nangwa’mba bamikooko ikwabo, “bafwainwa kuyuka’mba aba bakekala bajibumba jikatampe jikekala panopantanda bafwainwa kwipana nekwizhijika.” Bano baambiwapo mukimwesho kyajibumba jikatampe kyanembwa mu Lumwekesho ‘baovwa bivwalo byabo ne kwibitokesha mu mashi a Mwana mukooko’ kabiji babena kwingijila Yehoba mwingilo wazhila “mute ne bufuku monka mu nzubo yanji yazhila.” (Lumwekesho 7:9, 14, 15) Mupashi wazhila ukwasha bamikooko ikwabo kwibikako kulondela mizhilo ya Yehoba yabuzhile.—2 Kolinda 7:1.
Kwibobila Byawama Balongo Bakwa Kilishitu
13, 14. (a) Kwesakana nakishimpi kyakwa Yesu kyamikooko nebambuzhi, lupulukilo lwamikooko ikwabo lwaimena paka? (b) Muano moba apelako, bamikooko ikwabo bakwasha byepi balongo bakwa Kilishitu?
13 Mukishimpi kyamikooko nebambuzhi kiji mubungauzhi bwanji bwa [“mpelo ya buno bwikalo” NW], Yesu momo alumbulwile mikooko ikwabo byoikwasha kajitanga kacheche. Mukino kishimpi, Yesu walumbulwile patoka kuba’mba lupulukilo lwaba mikooko ikwabo lwaimena pakukwasha bashingwa boaichile’mba “balongo bami.” Waambile’mba: “Mfumu ukebambila ba ku kilujo kyanji amba, Iyai, anweba bo bapesha kwi Batata, swanai bufumu bo emutujila ne ku ntendekelo ya panopantanda. . . . Kine nemwambila namba, Monka mo mwamubile uno wapelako wa bano balongo bami, mo mwangubile ne amiwa.”—Mateo 24:3; 25:31-34, 40.
14 Byambo byakuba’mba “monka mo mwamubile” bitongola bukwasho bwabutemwe bwakukwasha balongo bakwa Kilishitu bashingwa namupashi bamonwa kubantu bakwa Satana amba benyi, nekutayapo bamo mutuleya. Bakajilwa kajo, byakuvwala, nekwibasungako umvwe bakolwa. (Mateo 25:35, 36) Mu ano moba apelako kutatulatu mu 1914, bashingwa bavula bapitapo kala muano makatazho. Bwikalo bwa Bakamonyi bakwa Yehoba mu ano moba, bumweshatu patoka kuba’mba bebakwasha kubalunda nabo bakishinka bamikooko ikwabo, byonka bibatundaika mupashi.
15, 16. (a) Muñanyi mwingilo kikatakata bamikooko ikwabo mobakwashisha balongo bakwa Kilishitu bashingwa baji panopantanda? (b) Bashingwa basanchila byepi bamikooko ikwabo?
15 Balongo bakwa Kilishitu bashingwa panopantanda muano moba apelako bebakwasha bingi kuba mikooko ikwabo kwingila mwingilo wibapa Lesa wa ‘kusapwila mambo awama a bufumu panopantanda ponse mwa kwibashimwina ba mu mikoka yonse ya bantu.’ (Mateo 24:14; Yoano 14:12) Kibelengelo kyabashingwa byokibena kuya nakukepelako mukuya kwamyaka, bamikooko ikwabo babena kuyatu nakuvujilako. Bavula bamu bano kebasapwishi bakimye kyonse, nabiji bapainiya ne bamishonale, babena kusampanya mambo awama a Bufumu “monse mwapela ntanda.” (Byubilo 1:8) Bakwabo nabo bengilako mwingilo wabusapwishi papelela bulume bwabo nekupanako mali akukwasha uno mwingilo wanema.
16 Balongo bashingwa bakwa Kilishitu basanta bingi pabuno bukwasho bwakishinka bobebakwasha kubakwabo bamikooko ikwabo. Lusanchilo lwabo lwanembwa mubuku wa Umutelelwe wa mu Kusalala kwa Calo pe Samba lya kwa “Cilolo wa Mutende,” wanembelwe najibumba ja kalume wakishinka mu 1986. Baambile’mba: “Kufumatu kimye kya Nkondo ya kibiji ya Ntanda yonse, bungauzhi bwakwa Yesu bwa [“mpelo ya buno bwikalo,” NW] bubena kufikizhiwa pakatampe namambo amwingilo ubena kwingila ‘jibumba jikatampe’ ja ‘mikooko ikwabo.’ . . . Onkao mambo tusanchila bingi ba ‘jibumba jikatampe’ bafuma mu mikoka yapusana-pusana pamwingilo mukatampe yebabena kwingila mukufikizha bungauzhi bwakwa [Yesu] bwamu Mateo 24:14!”
‘Pabula Atweba Kechi Bakonsha Kulumbululwane’
17. Muñanyi jishinda bantu bakishinka bajingako kala bakasangulwa panopantanda mobabula ‘kulumbulwilwa pabula’ bashingwa?
17 Byoajinga naye washingwa nekutongola banabalume nebanabakazhi bajingako Kilishitu saka akyangye kwiya, Paulo wanembele’mba: “Bano bonse bashimwinwe mambo a lwitabilo lwabo, kechi batambwile kyalayilwe ne, mambo Lesa witumwena atweba kintu kyakila mu kuwama, amba, abo pabula atweba kechi balumbululwe ne.” (Bahebelu 11:35, 39, 40) Mumyaka Kiumbi kimo, Kilishitu nebalongo banji bashingwa ba 144,000 mwiulu, bakengilanga mingilo yabumfumu ne buñanga nekuleta mapesho ankuulo ya kitapisho kya Kilishitu panopantanda. Mujino jishinda bamikooko ikwabo bakekala bantu ‘balumbuluka’ kumubiji nemumilanguluko kumo.—Lumwekesho 22:1, 2.
18. (a) Bishinka byamu Baibolo byafwainwa kukwasha bamikooko ikwabo kuyuka ka? (b) Kika kyobaketekela bamikooko ikwabo byobabena kutengela ‘kusoloka kwa baana ba Lesa’?
18 Bino byonse byafwainwa kulengela bamikooko ikwabo kuyuka ene mambo Binembelo byabwina Kilishitu bya Kingiliki kyobyaambila javula pe Kilishitu nebalongo banji bashingwa kabiji nemwingilo wabo mukatampe mukufikizha nkebelo ya Yehoba. Bamikooko ikwabo bamona’mba kejishuko jikatampe bingi kukwashako jibumba jabashingwa mujishinda jiji jonse byobabena kutengela ‘kusoloka kwa baana ba Lesa’ pa Amagedonyi nemu Myaka Kiumbi Kimo. Onkao mambo, babena kupembelela ‘kupokololwa ku buzha bwa bubole, nekwikala na bwana bwa bene bwa lukumo bwa baana ba Lesa.’—Loma 8:19-21.
Kukwatankena Pamo Bonse Mumupashi Pakivuluko
19. “Mupashi wa bukine” wibobilaka bashingwa neba mikooko ikwabo, kabiji kikatakata bakakwatankana byepi mabanga apa March 28?
19 Mululombelo lwanji lwakupezhako bufuku bwa Nisani 14, 33 C.E., Yesu waambile’mba: “Nebalombela ... namba bonse bekale ke umo; byonka biji anweba, Tata, byo muji mwi amiwa ne amiwa mwi anweba, byonkabi ne abo nabo bekale mwi atweba: namba ba panopantanda betabile’mba, anweba yenu mwantumine.” (Yoano 17:20, 21) Mubutemwe bwanji, Lesa watumine Mwananji kwiya nakufwila bashingwa ne bantu balukokelo amba bapuluke. (1 Yoano 2:2) “Mupashi wa bukine” wakwatankanya balongo bakwa Kilishitu nebakwabo bamikooko ikwabo. Mabanga apa March 28 pakuzhika juba, ano mabumba abiji onse akakonkana nakuvuluka lufu lwa Kilishitu nebyonse Yehoba byoebobila kupichila mukitapisho kya Mwananji yeatemwisha, Yesu Kilishitu. Kutanwako kwabo pakyokya kimye kyanema kukakosesha kukwatankana kwabo nekwibatundaika kutwajijila nakuba kyaswa muchima wa Lesa, nekumwesha kuba’mba basekela kwikala paboba boatemwa Yehoba.
Tupitulukemo Pacheche
• “Mupashi wa bukine” watuminwe ñanyi kimye kubena Kilishitu batanshi, kabiji waikele byepi ke “Nkwasho”?
• Bashingwa bayuka byepi’mba baitwa kuya mwiulu?
• Muñanyi mashinda mupashi wazhila moengijila muba mikooko ikwabo?
• Bamikooko ikwabo bauba byepi byawama kubalongo bakwa Kilishitu, kabiji mamboka obakonsha ‘kubujila kulumbulwilwa pabula’ bashingwa?
[Kipikichala pa peja 29]
“Mupashi wa bukine” waitulwilwe pabaana babwanga pa Pentekosta mu 33 C.E.
[Bipikichala pa peja 31]
Bamikooko ikwabo bebobila byawama balongo ba Kilishitu byobebakwasha mukwingila mwingilo yebebapa wakusapwila