Kukonkanya Bintu Biji Mwiulu Ne Biji Panopantanda

“Monka mwayila akya kyamutokela ku muchima . . . ne kwibikonkenya bintu byonse mwi Kilishitu, ne biji mwiulu, ne biji panopantanda.”—EFISESA 1:9, 10.

1. Ki ka “kyamutokela ku muchima” Yehoba kutazha ku biji mwiulu ne biji panopantanda?

MUTENDE wa ntanda yonse! Kino kyo kintu kya lukumo kyo afukwijile jimo Yehoba “Lesa wa mutende.” (Bahebelu 13:20) Waambijile mutumwa Paulo kunemba’mba “kyamutokela ku muchima” ke ‘kwibikonkenya bintu byonse mwi Kilishitu, biji mwiulu, ne biji panopantanda.’ (Efisesa 1:9, 10) Nga kyambo kiji mu kino kyepelo kyatuntululwa’mba ‘kwibikonkanya bintu byonse’ kyatala mwepi? Shayuka wa Baibolo aye J. B. Lightfoot waambilepo’mba: “Kino ke kyambo kyalumbulula lukwatankano lukekala pakachi ka bilengwa byonse mwi Kilishitu. Bundengamambo, lufu, bulanda, ne makatazho byonse bikapwa.”

“Biji Mwiulu”

2. “Biji mwiulu” byo bakonkenya pamo bo bañanyi?

² Mutumwa Petelo watongwele luketekelo lusangajika bena Kilishitu bakine byo anembele’mba: “Monka mwayila mulaye wanji, tutengela bya mwiulu bipya ne ntanda ipya, mo bwaikala bololoke.” (2 Petelo 3:13) Bino “bya mwiulu bipya” byatongolwa ke kafulumende mupya wa Bufumu bwa Bumesiasa. Paulo naye mu nkalata yanji yo anembejile bena Efisesa watongwele “biji mwiulu” bya kukonkenya “mwi Kilishitu.” Ke kajibumba kacheche ka bantu basalululwa kulama pamo ne Kilishitu mwiulu. (1 Petelo 1:3, 4) Bano bena Kilishitu bashingwa ba 144,000 “bakujilwe panopantanda.” “Bakujilwe mu bantu” amba bekale ke banswanyi bakulama pamo na Kilishitu mu Bufumu bwanji bwa mwiulu.—Lumwekesho 5:9, 10; 14:3, 4; 2 Kolinda 1:21; Efisesa 1:11; 3:6.

3. Mambo ka o kyakonsha kwambiwa’mba bashingwa ‘bebekazha mwiulu’ nangwa kya kuba bakiji panopantanda?

³ Bena Kilishitu bashingwa bakuulwa, nangwa’mba basemwa jibiji na mupashi wazhila amba bekale baana ba Yehoba ba ku mupashi. (Yoano 1:12, 13; 3:5-7) Byo balulwa ke ‘baana’ ba Yehoba, bekala ke balongo ba kwa Yesu. (Loma 8:15; Efisesa 1:5) Onkao mambo, nangwatu bakiji panopantanda, bebalumbulula amba ‘bobabusha pamo ne aye, ne kwibekazha pamo ne aye mwiulu, mwi Kilishitu Yesu.’ (Efisesa 1:3; 2:6) Baikala pa bino bifulo bya ku mupashi mambo ‘babikwa kayukilo, ye mupashi wazhila wa mulaye, ye bukikizhi bwa buswanyi [bwabo],’ bo bebalamina mwiulu. (Efisesa 1:13, 14; Kolose 1:5) Bano, byo bintu “biji mwiulu” byakuulwa, Yehoba byo akonkanya pamo.

Kwibakonkanya Kwatatula

4. Kukonkanya “biji mwiulu” kwatatwile ñanyi kimye, kabiji kwatatwile byepi?

⁴ Kupichila mu “bukalama” nangwa’mba jishinda Yehoba jo obilamo bintu, kukonkanya “biji mwiulu” kwatatwile ‘ponka pa kufikila myaka yo atongwele.’ (Efisesa 1:10) Ino myaka yafikile pa Pentekosta mu 33 C.E. Jino jo juba mupashi wazhila jo aitulwijilwe pa batumwa ne pa jibumba ja banabalume ne banabakazhi baana ba bwanga ba kwa Yesu. (Byubilo 1:13-15; 2:1-4) Kino kyamwesheshe patoka kuba’mba lulayañano lwatatula kwingila kabiji pano po patendekejile kipwilo kya bwina Kilishitu kya mukoka mupya wa bena Isalela ba ku mupashi, “bena Isalela ba Lesa.”—Ngalatiya 6:16; Bahebelu 9:15; 12:23, 24.

5. Mambo ka Yehoba o alengejile “mukoka” mupya wakupingizha pa bena Isalela ba ku mubiji?

⁵ Mu lulayañano lwa mu Mizhilo lwa bena Isalela kechi mo mwafumine “bufumu bwa bañanga ne mukoka wazhila” wa kwingijila mwiulu myaka ne myaka ne. (Kulupuka 19:5, 6) Yesu waambijile bantangi ba bupopweshi bwa Bayudea amba: “Bufumu bwa Lesa bakemwangatabo, bakebupana ku mukoka ukapanga bipangwa byabo.” (Mateo 21:43) Mukoka wa bena Isalela ba ku mupashi walengwa na bena Kilishitu bashingwa baji mu lulayañano lupya. Mutumwa Petelo wibanembejile’mba: “Anweba mwi kisemi kyasalululwa, mwi ba buñanga bwa bufumu, mwi mukoka wazhila, mwi bantu ba kunonkwa kwi Lesa mwine, amba, mulondolole byanji byawamisha, yenka aye wimwichile byo mwaji mu mfishi, mwikale mu kyeya kyanji kya kukumya; kala mwabujilwe bu bantu, pakuba pano mwi bantu ba Lesa.” (1 Petelo 2:9, 10) Bena Isalela ba ku mubiji balekele kwikala bantu ba Yehoba. (Bahebelu 8:7-13) Byonka Yesu byo aambijile jimo, bebangachile jishuko jabo ja kulama mu Bufumu bwa Bumesiasa ne kwijipana ku ba 144,000 bena Isalela ba ku mupashi.—Lumwekesho 7:4-8.

Kwikajika Lulayañano lwa Bufumu

6, 7. Ñanyi lulayañano Yesu lo alayañene na balongo banji ba ku mupashi, kabiji lulumbulula ka kwi abo?

⁶ Juba Yesu jo atendekeshe Kivuluko kya lufu lwanji, waambijile batumwa banji bakishinka’mba: “Anweba mwi boba bakelwa ne amiwa mu lweseko lwami; kabiji nemutongwela bufumu byonka byo bantongwejile Batata, namba muje ne kutoma ku tebulu wami mu bufumu bwami; kabiji mukekala pa matanda na kuchiba mambo a mikoka jikumi na ibiji ya bena Isalela.” (Luka 22:28-30) Yesu walumbulwilenga lulayañano lo alayañene na balongo banji basemenwe ku mupashi ba 144,000, bakelwa mu “lwitabilo kufika ne ku lufu” ne ‘kushinda.’—Lumwekesho 2:10; 3:21.

⁷ Bano bantu balenga kajibumba kacheche kechi baji na luketekelo lwa kwikala panopantanda myaka ne myaka na mibiji ya mashi ne. Bakalama pamo ne Kilishitu mwiulu, kabiji bakekala pa matanda na kwibachibila mambo bantu. (Lumwekesho 20:4, 6) Pano twayai tumone binembelo bikwabo byaamba pa bano bashingwa kabiji bimwesha ene mambo ‘mikooko ikwabo’ o ibujila kujako ku bipashañano pa Kivuluko.—Yoano 10:16.

8. Bashingwa byo baja shinkwa kilumbulula ka? (Monai kabokoshi kaji pa peja 15.)

⁸ Bashingwa nabo bamanama byonka byamanamine Kilishitu kabiji bepana kufika ne ku lufu pamo nobe aye. Paulo umo wa mu kano kajibumba waambile’mba wipana mu kuba kiji kyonse kuba’mba ‘amwenemo Kilishitu . . . ne kumuyuka kabiji ne kuyuka bulume bwa lusanguko lwanji, ne lumvwañano lwa bya kumanama kwanji.’ Kine, Paulo wipaine pamo nobe Yesu “mu lufu lwanji.” (Filipai 3:8, 10) Bena Kilishitu bashingwa bachinchika kimye kyo bakiji panopantanda, ne ‘kusenda mu mibiji yabo kufwa kwa Yesu.’—2 Kolinda 4:10.

9. Mubiji wa kwa ñanyi ufwanyikizhiwa ku shinkwa wa pa Kivuluko?

⁹ Yesu byo atendekeshe Kijiilo kya Nkambo, waambile’mba: “Uno ye mubiji wami.” (Mako 14:22) Walumbulwilenga mubiji wanji ye bapumine ne mashi ke apokomoke. Shinkwa wa kubula mbizho ye wafwanyikizhenga mubiji wanji. Mambo ka? Mambo mu Baibolo mbizho ko kayukilo ka bundengamambo nangwa bubi. (Mateo 16:4, 11, 12; 1 Kolinda 5:6-8) Yesu wajinga waoloka, ne mubiji wanji kechi wajinga wa bundengamambo ne. Wapaine mubiji wanji walumbuluka ke mulambo. (Bahebelu 7:26; 1 Yoano 2:2) Kuba bino kwalengela bena Kilishitu bonse bakishinka kumwenamo bumi bwa myaka ne myaka, kikale baji na luketekelo lwa kukekala mwiulu nangwa lwa kwikala panopantanda.—Yoano 6:51.

10. Mu ñanyi jishinda aba batomako binyu pa Kivuluko mo ‘babena mashi a Kilishitu’?

¹⁰ Paulo wanembele kutazha ku binyu bitomapo bena Kilishitu bashingwa pa Kivuluko amba: “Lelo katomeno ka mapesho ko tupesha kechi ko kwabañana kwa mashi a Kilishitu nenyi?” (1 Kolinda 10:16) Mu ñanyi jishinda aba batomako binyu mo ‘babena mashi a Kilishitu’? Kechi bapanako kitapisho kya bukuzhi ne, mambo nabo bakeba kukulwa. Kupichila mu lwitabilo lwabo lwa kwitabila mu mashi a Kilishitu aji na bulume bwa kukula, balekelwa mambo ne kubingishiwa amba bekale na bumi mwiulu. (Loma 5:8, 9; Titusa 3:4-7) Ba 144,000 balama pamo ne Kilishitu basalululwa kabiji baovwewa kufuma mu bundengamambo ne kwaluka ke “bazhijikwa.” (Bahebelu 10:29; Danyela 7:18, 27; Efisesa 2:19) Ee, kupichila mu mashi a kwa Kilishitu aichikile ‘bamupotejile Lesa na mashi anji bantu ba mu bisaka byonse, ne ba mu njimi yonse, ne ba mu mitundu ne kwibalulula bekale kwi Lesa wetu ke bufumu ne bañanga; kabiji bakekala mu bufumu panopantanda.’—Lumwekesho 5:9, 10.

11. Bashingwa byo batomako binyu bya pa Kivuluko kimwesha ka?

¹¹ Yesu byo atendekeshe Kivuluko kya kuvuluka lufu lwanji, wapaine katomeno ka binyu ku batumwa banji bakishinka ne kwibambila’mba: “Shilañanai anweba bonse; mambo ano o mashi ami a lulayañano, aichikila bavula mu kwibalekela mambo.” (Mateo 26:27, 28) Byonka mashi a bañombe ne bambuzhi byo alumbulwilenga lulayañano lwa Mizhilo Lesa lo alayañene na mukoka wa bena Isalela, mashi a kwa Yesu nao alumbulula lulayañano lupya Yehoba lo alayañene na Isalela wa ku mupashi, kutatula pa Pentekosta mu 33 C.E. (Kulupuka 24:5-8; Luka 22:20; Bahebelu 9:14, 15) Bashingwa byo batomako binyu bimenako “mashi a lulayañano” kimwesha’mba batambulwa mu lulayañano lupya kabiji babena kumwenamo byawama.

12. Bashingwa babatizwa byepi mu lufu lwa Kilishitu?

¹² Bashingwa bavululwako ne kintu kikwabo. Yesu waambijile baana banji ba bwanga amba: “Mukatoma aka katomeno ko ntoma amiwa; ne lubatizhilo lo mbatizwa amiwa, nalo mukelubatizwa.” (Mako 10:38, 39) Palutwe kacheche mutumwa Paulo naye waambilepo kuba’mba bena Kilishitu ‘babatizwe mu lufu [lwa Kilishitu].’ (Loma 6:3) Bashingwa bekala bwikalo bwa kwikana. Kyambiwa kuba’mba bafwa lufu lwa bukitapisho mambo luketekelo lwabo kechi lwa kwikala myaka ne myaka panopantanda ne. Kubatizwa mu lufu lwa Kilishitu kwa bano bena Kilishitu bashingwa kubiwa inge bafwilatu mu lwitabilo ne kusangulwa ke bilengwa bya mupashi ‘bakekala nanji mu bufumu’ bwa mwiulu.—2 Timoti 2:10-12; Loma 6:5; 1 Kolinda 15:42-44, 50.

Kuja ne Kutoma ku Bipashañano

13. Mambo ka baji na luketekelo lwa kwikala panopantanda o babujila kujako ku bipashañano bya pa Kivuluko, pano bino mambo ka o batainwako?

¹³ Kechi kyafwainwa boba baji na luketekelo lwa kwikala panopantanda kuja shinkwa ne kutomako binyu bipishiwamo kimye kya Kivuluko ne. Aba baji na luketekelo lwa kwikala panopantanda bayuka abo bene kuba’mba kechi bashingwa ne kwikala mubiji wa kwa Kilishitu ne, kabiji kechi baji mu lulayañano lupya Yehoba lo alayañana na boba bakekala na Kilishitu mu bufumu ne. “Katomeno” byo kalumbulula lulayañano lupya, baji mu luno lulayañano lupya bo bonka baja ne kutomako ku bipashañano. Aba baketekela kwikala na bumi bwa myaka ne myaka mu bololoke panopantanda kechi babatizwa mu lufu lwa Yesu nangwa kulama pamo nanji mwiulu ne. Umvwe ke bajeko ne kutomako ku bipashañano, kilumbulula amba babena kuba kintu kyabula kwibafwainwa ne. Onkao mambo nangwa kya kuba batanwako ku Kivuluko kechi bajako ne kutomako ne. Bamusanchila Yehoba pa mambo a byonse byo ebobila kupichila mu Mwananji ne pa kwibalekelako mambo mu mashi a Kilishitu aichikile.

14. Bashingwa bakosesha byepi bumupashi bwabo byo baja shinkwa ne kutoma binyu?

¹⁴ Kubika kayukilo pa bena Kilishitu bachechetu baitwa kuba’mba bakalamenga pamo ne Kilishitu mwiulu kuji pepi na kupwa. Kufikatu ne kimye kyo bafwa ne kusha bwikalo bwa panopantanda, bena Kilishitu bashingwa bafwainwa kuja ne kutomako ku bipashañano. Bakwatankana pamo na bakwabo bashingwa balenga mubiji wa Kilishitu. Kuja shinkwa ne kutoma binyu kwibavululako mutembo ye baji naye wa kukelwa mu lwitabilo poso ne lufu lwabo.—2 Petelo 1:10, 11.

Kukonkanya “Biji Panopantanda”

15. Bañanyi bo babena kukonkenya ku bena Kilishitu bashingwa?

¹⁵ Kufuma mu ma 1930, ‘mikooko ikwabo’ iji na luketekelo lwa kwikala na bumi bwa myaka ne myaka panopantanda ibena kwingijila pamo na bashingwa. (Yoano 10:16; Luka 12:32; Zekaliya 8:23) Baikala ke balunda bakishinka ba balongo ba kwa Kilishitu, babena kwibakwashako mu mwingilo wanema wa kusapwila “mambo awama a bufumu” ku mikoka yonse ya bantu. (Mateo 24:14; 25:40) Byo boba bino, Kilishitu ukebabingisha’mba ‘mikooko’ yanji ne kwibafungila ku “kilujo kyanji” kuba’mba bakekale na bumi bwa myaka ne myaka kimye kyo akachibila mambo bonse ba mu mikoka ya bantu. (Mateo 25:33-36, 46) Byo baitabila mu mashi a Kilishitu balenga “jibumba jikatampe” jikapuluka “malwa akatampe.”—Lumwekesho 7:9-14.

16. Bañanyi bakalenga jibumba ja “biji panopantanda,” kabiji bano bakekala byepi na jishuko ja kwikala ‘baana ba Lesa’?

¹⁶ Umvwe bapwisha kubika tuyukilo pa bilungi bya ba 144,000, po po bakalekako “luvula” kuba’mba lonaune ntanda yatama ya kwa Satana. (Lumwekesho 7:1-4) Bantu bakukankalwa kubala bakasangulwa kufuma ku bafu ne kutendeka kulamwa na Bukalama bwa Myaka Kiumbi Kimo bwa kwa Kilishitu ne bañanga ba Lesa bakekala nanji mu bufumu. (Lumwekesho 20:12, 13) Bano bakekala bangikazhi bakalamwanga na Mfumu wa Bumesiasa aye Kilishitu Yesu. Myaka Kiumbi kimo byo ikapwa, byonse “biji panopantanda” bakebyeseka. Aba bakekala bakishinka bakatelwa’mba ‘baana ba Lesa.’—Efisesa 1:10; Loma 8:21; Lumwekesho 20:7, 8.

17. Yehoba ukafikizha byepi nkebelo yanji?

¹⁷ Onkao mambo kupichila mu “bukalama” bwanji, Yehoba ukafikizha nkebelo yanji ya ‘kwibikonkenya bintu byonse mwi Kilishitu, biji mwiulu, ne biji panopantanda.’ Bilengwa bya mwiulu ne bya panopantanda bakebikonkenya pamo mu mutende wa ntanda yonse, kabiji bikakokela na lusekelo bumfumu bwaoloka bwa Yehoba.

18. Bashingwa ne balunda nabo bamwenamo byepi mu kutanwa ku Kivuluko?

¹⁸ Kajibumba kacheche ka bashingwa ne mikooko ikwabo bakakosesha lwitabilo lwabo byo bakapwila pamo pa April 12, 2006! Bakatanwa ku Kivuluko kya lufu lwa Kilishitu byonka Yesu byo ebakambizhizhe’mba: “Kasa muba bibye mu kundanguluka amiwa.” (Luka 22:19) Bonse bakashinkwapo bafwainwa kuvuluka Yehoba byo ebobila kupichila mu Mwananji yenka ye atemwisha, Kilishitu Yesu.

Kupitulukamo

• Ñanyi nkebelo ya Yehoba ya biji mwiulu ne biji panopantanda?

• “Biji mwiulu” byo bi ka, kabiji bebikonkanya byepi?

• “Biji panopantanda” byo bi ka, kabiji biji na ñanyi luketekelo?

[Kitenguluzha pa peja 15]

“Mubiji wa Kilishitu”

Mu 1 Kolinda 10:16, 17 Paulo byo aambilenga pa shinkwa ye babañana balongo ba kwa Kilishitu bashingwa na mupashi, waambilepo pa “mubiji.” Waambile’mba: “Shinkwa ye tutebula kechi ko kwabañana kwa mubiji wa Kilishitu nenyi? Bino shinkwa byo aji umotu, ne atweba nangwa twi bavula, twi mubiji umo mambo bonse tuja ku shinkwa umo.” Bena Kilishitu bashingwa byo bajako ku shinkwa wa pa Kivuluko, bamwesha buumo bwabo mu jibumba ja bashingwa, ne kwikala mubiji umo na Kilishitu aye Mutwe.—Mateo 23:10; 1 Kolinda 12:12, 13, 18.

[Bipikichala pa peja 15]

Mambo ka o kyaikela kuba’mba bashingwa bo bonkatu bafwainwa kujako shinkwa ne kutomako binyu?

[Kipikichala pa peja 17]

Kupichila mu bukalama bwa Yehoba, bilengwa byonse biji mwiulu ne panopantanda bikakwatankana pamo