Lwitabilo Lwenu Lwakosa Byepi?

“Mu lwitabilo mwakoselamo.”—2 KOLINDA 1:24.

1, 2. Mamboka otwafwainwa kwikela nalwitabilo, kabiji lwakonsha kukoselako byepi?

BAKALUME ba Yehoba bayuka kuba’mba bafwainwa kwikala nalwitabilo. Mambo ‘pabula lwitabilo kechi kyakonsheka kumutokesha Lesa pa muchima ne.’ (Bahebelu 11:6) Onkao mambo, tulomba namaana mupashi wazhila nelwitabilo luji pabipangwa byamupashi bikebewa. (Luka 11:13; Ngalatiya 5:22, 23) Kulonda lwitabilo lwabakwetu baitabila nako kwakonsha kukosesha kino kyubilo mwiatweba.—2 Timoti 1:5; Bahebelu 13:7.

² Lwitabilo lwetu lukakoselako umvwe twakosako nakulonda mashinda aji mu Byambo bya Lesa akulondela bena Kilishitu bonse. Kutanga Baibolo moba onse nekuteshako muchima kufunda Binembelo nabukwasho bwamabuku akokozhewa na ‘kalama wa kishinka newa maana’ kwakonsha kubaisha lwitabilo lwetu. (Luka 12:42-44; Yoshua 1:7, 8) Twikosesha mulwitabilo atweba bene nabene pakutanwa jonse kukupwila kwabwina Kilishitu, kupwila kwajuba jimo kwiikajila nekwakijiiji, nekupwila kwankambi. (Loma 1:11, 12; Bahebelu 10:24, 25) Kabiji lwitabilo lwetu lukoselako kimye kyotwisamba nabantu mumwingilo wamubujimi.—Masalamo 145:10-13; Loma 10:11-15.

3. Pamambo alwitabilo, ñanyi bukwasho botutambula kubakulumpe mukipwilo babwina Kilishitu babutemwe?

³ Bakulumpe mukipwilo babwina Kilishitu baji nabutemwe betukwasha kukomesha lwitabilo lwetu byobetufunjisha mu Binembelo nekwitutundaika. Baji namuchima wajingapo namutumwa Paulo, wabujile bena Kolinda amba: “Twi bankwasho ba lusekelo lwenu: mambo mu lwitabilo mwakoselamo.” (2 Kolinda 1:23, 24) Bino byambo mu Baibolo ikwabo byanembwa’mba: “Twingijila pamo neanweba kuba’mba musangalale, mambo lwitabilo lwenu lwakosa.” (Contemporary English Version) Mololoke umwena bumi mulwitabilo. Pano bino, kafwako muntu wakonsha kwitwikela nalwitabilo lwetune, nangwa kwitulengela kwikala bakishinka mubulumbuluke bwetune. Onkao mambo, ‘twafwainwa kusenda bisendwa byetu, au kyanji, au kyanji.’—Ngalatiya 3:11; 6:5.

4. Mashimikila amu Binembelo abakalume ba Lesa bakishinka akonsha kwitukwasha byepi kukosesha lwitabilo lwetu?

⁴ Mubinembelo muji bingi mashimikila avula abantu bajinga nalwitabilo. Kampepo twayuka byubilo byawama byobajinga nabyo, pano abya twiluyuka lwitabilo lwabo lobamweshanga moba onse, nangwa pamyaka yavula yabwikalo bwabonyi? Kulanguluka-languluka pabyobamwesheshenga lwitabilo mubwikalo bwabo bwajinga byonka biji bwetu kyakonsha kwitukwasha kukosesha lwitabilo lwetu.

Lwitabilo Lwitulengela Kuchinchika

5. Ñanyi kiyukisho kyamu Binembelo kyamwesha kuba’mba lwitabilo lwitukosesha kusapwila byambo bya Lesa nakuchinchika?

⁵ Lwitabilo lwitukosesha kutaya mbila yamambo awama nakuchinchika. Enoka wachinchikile nekutongwela jimo bunchibamambo bwa Lesa. Waambile’mba: “Talai, Nkambo waiya ne biumbi ne biumbi bya bazhila banji, mu kwibachibila mambo bonse, ne kwibazhachisha babulwa kwakamwa Lesa bonse na mambo a mingilo yabo yonse ya kubulwa kwakamwa Lesa, yo baingila mu kubulwa kwakamwa Lesa, ne na bintu byonse byakosa byo bamwambila bandengamambo babulwa kwakamwa Lesa.” (Yuda 14, 15) Byobaumvwinetu bino byambo, balwanyi bakwa Enoka babujile moyo wakwakamwa Lesa bakebele kumwipaya. Bino mulwitabilo wachinchikile nekwamba kwakubula kwibachinane, ne Lesa “wamutwajile,” nekuchibikizha bumi bwanji nekufwa wafwile kwakubula kumvwa misongo yalufune. (Ntendekelo 5:24; Bahebelu 11:5) Nangwa kyakuba byakukumya byayewa mutundu kechi bitumwekelane, Yehoba ukumbula milombelo yetu kuba’mba tusapwile byambo byanji nalwitabilo nenakuchinchika.—Byubilo 4:24-31.

6. Lwitabilo nekuchinchika kobamupele Nowa kwi Lesa kwamukwashishe byepi?

⁶ Mulwitabilo Nowa ‘wafikijile jimo bwato bwa kupulwishamo ba mu nzubo yanji.’ (Bahebelu 11:7; Ntendekelo 6:13-22) Kabiji Nowa wajinga “musapwishi wasapwijilenga bololoke” watailenga mbila yabyambo bya Lesa byakujimuna bantu bamu oa moba. (2 Petelo 2:5) Kampe bamubilenga nekapunyi pabyambo byoasapwijilenga bya Muyulo waishilenga, byonka bantu bamo byobetuba kapunyi umvwe twibabula biyukisho byamu Binembelo bimwesha kuba’mba buno bwikalo bujipo katatakatu bukonaunwe. (2 Petelo 3:3-12) Nangwa byonkabyo, byonka byaingijile ba Enoka ne Nowa, netuwa twakonsha kushimuna byambo byauno mutundu namambo alwitabilo nekuchinchika kwitupa Lesa.

Lwitabilo Lwitulengela Kutekanya

7. Abalahama nebakwabo bamwesheshe byepi lwitabilo nebutekanye?

⁷ Kikatakata byotubena kutengela mpelo yabuno bwikalo, twafwainwa kwikala nalwitabilo nebutekanye. Paboba “bakaswana milaye monka mu lwitabilo ne mu butekanye,” paji nemushakulu Abalahama waakamwanga Lesa. (Bahebelu 6:11, 12) Mulwitabilo washile muzhi wa Ula, pamo nebintu, nebwikalo bwawama bwajingamo, nekwikala mwenyi muntanda ingi yamulayile Lesa. Ba Izaka ne Yakoba nabo bajinga banswanyi bayenkawa mulaye. Bino nangwa byonkabyo, bano “bonse bafwijile mu lwitabilo, kasa babula kutambula byalayilwe.” Mulwitabilo ‘bekisakile kyalo kyakila mu kuwama, ko kuba’mba, kya mwiulu.’ Byonkabyo, Lesa “wibamwena jimo muzhi.” (Bahebelu 11:8-16) Ee kine, ba Abalahama, Izaka, Yakoba, pamo nebakazhi babo baakamwanga Lesa, nabutekanye bapembelejilenga Bufumu bwa Lesa bwamwiulu, mobakasangwilwa kwikala bomi panopantanda.

8. Ba Abalahama, Izaka ne Yakoba batwajijile kwikala nalwitabilo nebutekanye nangwa kyakuba babujile kutambwila kika?

⁸ Ba Abalahama, Izaka ne Yakoba kechi bataile lwitabilone. Kechi batambwijile Ntanda Yamulaye mubulume bwabo nekumona bamumikoka yonse bashukilwa mukisemi kyakwa Abalahama ne. (Ntendekelo 15:5-7; 22:15-18) Nangwa kyakuba ‘muzhi Lesa ye ebamwenejile jimo’ kechi wamwekele kwiabone poso byopapichile myaka yavula, bano bantu batwajijile kumwesha lwitabilo nebutekanye mubwikalo bwabo bonse. Kwakubula nangwa kuzhinaukatune, neatweba twafwainwa kuba byonkabyo mambo Bufumu bwabu Mesiasa bwaikajikwa kala mwiulu.—Masalamo 42:5, 11; 43:5.

Lwitabilo Lwitukwasha Kwibikila Bikonkwanyi Bikatampe

9. Lwitabilo lukwasha byepi mukwibikila bikonkwanyi?

⁹ Bashakulu bakishinka kechi baubilengako byubilo byabunya byabena Kenana ne, mambo bajinga nabikonkwanyi bikatampe byobafwainwe kufikizha. Byonkabyo lwitabilo lwitupa bikonkwanyi byakumupashi bitukwasha kukana kwitwezha mubyubilo byaino ntanda iji mumaboko akwa aye mubi, Satana Diabola.—1 Yoano 2:15-17; 5:19.

10. Twayuka byepi kuba’mba Yosefwa wajinga nakikonkwanyi kikatampe kechi kukebako kutumbalala muino ntandane?

¹⁰ Nalutangijilo lwa Lesa, Yosefwa mwana Yakoba waikele kemukulumpe wakutala pakajo mu Ijipita, bino kechi kyajinga kikonkwanyi kyanji kyakwikala mukulumpe muino ntandane. Nalwitabilo lwanji mumilaye ya Yehoba, Yosefwa wajinga namyaka yakusemwa 110, wabujile balongo banji’mba: “Pano mbenakufwa; bino Lesa ukemubila lusa, kabiji ukemufumyamo mu ino ntanda ne kwimubwezha mu ntanda yo alayile na luchipo kwi Abalahama, ne kwi Izaka, ne kwi Yakoba.” Yosefwa wibalombele’mba bakamuzhike muntanda yamulaye. Byoafwile, bamushingile muchi wakumumisha nekumubika mumbokoshi mu Ijipita. Pano kimye bena Isalela kyobafuminenga mubuzha mu Ijipita, ngauzhi Mosesa wamwene kuba’mba bikupa byakwa Yosefwa bebisenda nekukebizhika Muntanda Yamulaye. (Ntendekelo 50:22-26; Kulupuka 13:19) Lwitabilo nabiji lwakwa Yosefwa lwafwainwa kwitutundaika kwikala nabikonkwanyi bikatampe kechi kukebako kutumbalala muino ntandane.—1 Kolinda 7:29-31.

11. Muñanyi jishinda Mosesa moamwesheshe’mba wajinga nabikonkwanyi byakumupashi?

¹¹ Mosesa “wasalulwileko kumanama pamo ne bantu ba Lesa, ne kukana wakaine kumona lusekelo lwa bundengamambo lwa myaka imo,” kwikala munonshi wamukisemi kya bufumu bwa bena Ijipita. (Bahebelu 11:23-26; Byubilo 7:20-22) Wasankijilepo kutumbalala muino ntanda kampe nekukanatu’mba akabule kukazhikwa mumbokoshi yakipale kubilende kuzhikwa banonshi babena Ijipita. Mambo nga buneme ka bwajinga mukino pakwikyesakanya nabuneme bwakwikala “muntu wa Lesa,” neñambi walulayañano lwa Mizhilo, ngauzhi wa Yehoba kabiji nembi wa Baibolo? (Ezela 3:2) Abya nanchi musakisha bukulumpe pankitonyi, inyi lwitabilo lwimupa bikonkwanyi bikatampe byakumupashi?

Lwitabilo Lulengela Kwikala Bwikalo Bwalumbuluka

12. Lwitabilo lwalengejile Lehaba kuba byepi?

¹² Lwitabilo kechi lulengelatu bantu kwibikila bikonkwanyi bikatampetu byonkane, bino lwibalengela nekwikala bwikalo bwalumbuluka. Mwanamukazhi Lehaba mu Yeliko kampe wamwene’mba bwikalo bwanji bwabupite kechi bwalumbulukilene. Bino nangwa byonkabyo, wafwetelwe pakatampe kimye aikele nalwitabilo. “Wabingishiwe mu mingilo [yalwitabilo], byo ebatambwile baluwe [bena Isalela], ne kwibalupwila mu jishinda jingi,” kuba’mba banyeme balwanyi babo bena Kenana. (Yakoba 2:24-26) Lehaba wamwesheshe lwitabilo lwanji pakuyuka’mba Yehoba ye Lesa wakine, nekusankila wasankijilepo bwikalo bwanji bwabupite. (Yoshua 2:9-11; Bahebelu 11:30, 31) Wasongwelwe kukalume wa Yehoba, kechi kumwina Kenana wabujile kwitabilane. (Mpitulukilo ya mu mizhilo 7:3, 4; 1 Kolinda 7:39) Lehaba waikele najishuko jikatampe bingi jakwikala kakolwe wamukazhi wakwa Mesiasa. (1 Byambo bya Moba 2:3-15; Luta 4:20-22; Mateo 1:5, 6) Byonkatu biji bakwabo basankilapo bwikalo bwabyubilo bincha, Lehaba ukatambwila nemfweto ikwabo—ukasangulwa kwikala mumi mupaladisa panopantanda.

13. Davida walengele byepi mambo ne Betesheba, bino muchima wañanyi mutundu yeamwesheshe?

¹³ Panyuma yakusankilapo bwikalo bwanji bwabupite, Lehaba watwajijile kwikala nabyubilo byaoloka. Bino nangwa byonkabyo, kwajingapo nebamo bepaine kwi Yehoba balengelepo mambo abulala. Mfumu Davida waubile bukende ne Betesheba, waipaisha nemwatawanji munkondo, kepo nekumusongola kemukazhanji. (2 Samwela 11:1-27) Nabulanda bukatampe Davida walapijile nekusanshijila Yehoba amba: “Kuñangata Mupashi wenu wazhila ne.” Mupashi wa Lesa kechi wamwamukile Davida ne. Wajinga nalwitabilo lwakuba’mba Yehoba mulusa lwanji kechi usuula muntu wa “muchima walajika ne walapila” kubundengamambone. (Masalamo 51:11, 17; 103:10-14) Namambo alwitabilo lwabo, ba Davida ne Betesheba bajinga najishuko jakwikala tukolwe mundonda mwasemekejilwe Mesiasa.—1 Byambo bya Moba 3:5; Mateo 1:6, 16; Luka 3:23, 31.

Lwitabilo Lukoseshiwa Nabukwasho bwa Lesa

14. Bishiinoka Gidiona byoamweshiwe, kabiji jino jishimikila jakonsha kwitukwasha byepi mulwitabilo?

¹⁴ Nangwa kyakuba twenda mulwitabilo, kimye kimo tukebewa kushiinwa’mba Lesa tuji nanji mukwitukwasha. Byobyaubile ne Mutonyi Gidiona, umo paboba “mu lwitabilo mo bakokeshe bufumu.” (Bahebelu 11:32, 33) Bena Mijanyi nebalunda nabo byobalukukile bena Isalela, mupashi wa Lesa wamwikijile Gidiona. Pakuba’mba ashiinwe’mba Yehoba wajinga nanji, wamulombele’mba obepo meseko amo akwanyika boya bobatenda ku mukooko konka kukipujilo bufuku bonse. Mulweseko lutanshi loamulombele, kime kyaikeletu paboya bunke bwabo, mushiji saaumatu shawu. Bino mulweseko lwabubiji bintu byapuseneko. Byoakoseshiwe nabino bishiino, Gidiona wamaana waubijile bintu mulwitabilo nekushinda washinjile balwanyi babena Isalela. (Mitonyi 6:33-40; 7:19-25) Umvwe twakeba kishiino kimye kyotubena kufuukula byakuba, kino kechi kilumbulula’mba tufwalo lwitabilone. Byotutanga Baibolo nemabuku abwina Kilishitu nebyotulomba mupashi wazhila kuba’mba etutangijile byotubena kufuukula byakuba, tumwesha lwitabilo lwetu.—Loma 8:26, 27.

15. Twakonsha kukwashiwa byepi umvwe ketulanguluke palwitabilo lwakwa Balaka?

¹⁵ Lwitabilo lwakwa Mutonyi Balaka lwakoseshiwe nakishiino kyamubulutundaiko. Ngauzhi wamukazhi Debola wamutundaikile kuba’mba akasulule bena Isalela kwibafumya mulumanamo lwibamanyikilenga Mfumu wa Kenana aye Yabina. Mulwitabilo nenakishiino kyakuba’mba Lesa usakumukwasha, Balaka watangijile banabalume 10,000 babujilepotu nekwinengezha bulongone kuya nakulwa nkondo, nekushinda bakashinjile nzhita ikatampe yakwa Yabina yatangijilwenga na Sisela. Panyuma yaluno lushinjilo betobwejile bingi nekwimba lwimbo wakwa Debola ne Balaka. (Mitonyi 4:1–5:31) Debola watundaikile Balaka kwingila nobe ntangi wakutangijila bena Isalela watongwelwe na Lesa, kabiji wajinga kalume wa Yehoba, awo mulwitabilo ‘mo eapangile mazhita a bangi.’ (Bahebelu 11:34) Kulanguluka pe Lesa byoashukishe Balaka namambo akwingijila mulwitabilo, kwakonsha kwitukwasha umvwe ketukankazhame kwingila mwingilo washupa mumwingilo wa Yehoba.

Lwitabilo Luleta Mutende

16. Ñanyi byubilo byawama byamwesheshe Abalahama mukukeba mutende ne Lota?

¹⁶ Byonkatu lwitabilo byolwitukwasha kwingila mingilo yakatazha mumwingilo wa Yehoba, byobyo luleta nemutende. Mukote Abalahama walekejile Lota mwanyike mwana kolojanji kwisajila mpunzha yawama yamunyemvu kimye bakafunga babo kyobatobokele nekwabana baabenamo. (Ntendekelo 13:7-12) Abalahama kyamweka walombele bukwasho bwa Lesa mulwitabilo lwakupwishishamo lolwa lukatazho. Mukifulo kyakwiubila byanji byamuwamijile, wapwishishe lukatazho mumutende. Umvwe paikala lutobo pakachi ketu namwina Kilishitu mukwetu, twafwainwa kulomba mulwitabilo ne ‘kukeba mutende,’ satuvuluka byaubile Abalahama mubutemwe wabujile kwikebela patanshi kyoatemwa.—1 Petelo 3:10-12.

17. Mamboka otwakonsha kwambila’mba kwizhingijila kobezhingijile ba Paulo, Banabasa ne Mako kwapwile mumutende?

¹⁷ Monai kwingijisha mafunde abwina Kilishitu mulwitabilo byokwakonsha kukwasha kuleta mutende. Paulo byoanengezhezhenga amba bayenga lwendo lwabubiji lwabumishonale, Banabasa waitabile kuba’mba kyafwainwa babwele nakupempula jibiji bipwilo mu Kipulasa nemu Asha Minor. Bino Banabasa wasakile amba bamusende mulongo wanji Mako. Paulo wakaine mambo akuba Mako wibashile ku Pamifilya. Ponkapo “pabukile lupata lwine” lwakuba baabenamo nekwabenamo. Banabasa wasendele Mako ku Kipulasa, Paulo aye wasajile kuya na Silasa nekupita ‘bakapichile monse mu Silya ne mu Kilikya na kukosesha bipwilo.’ (Byubilo 15:36-41) Mukupita kwakimye, kwizhingijila kobezhingijile kwapwile mambo kyashimunwa’mba Mako wajinga pamo nemutumwa Paulo mu Loma kabiji wamutakaikile bingi. (Kolose 4:10; Filemonyi 23, 24) Kimye Paulo kyoajinga mukaleya mu Loma mu 65 C.E., wabujile Timoti amba: “Upitule ne Mako wiye nanji kuno; mambo aye unkwasha bulongo mu mingilo.” (2 Timoti 4:11) Kwakubula nangwa kuzhinaukatune, Paulo wasolwele mambo abulunda bwanji ne Banabasa ne Mako mululombelo lwanji lwalwitabilo, nekino kibaletejile “mutende wa Lesa.”—Filipai 4:6, 7.

18. Pakachi ka ba Yodia ne Shinchike kyamweka paubiwe kika?

¹⁸ “Atweba bonse twituntula mu bintu byavula” mambo twibambulwakoloka. (Yakoba 3:2) Kabiji kwajinga nebanabakazhi babiji babwina Kilishitu bajinga nalukatazho pakachi kabo, Paulo boaambilepo amba: ‘Namusanshijila Yodia, kabiji namusanshijila Shinchike, namba bekale na muchima umo mwi Nkambo. . . . Mwibakwashe bano banabakazhi, mambo baingijilenga ne amiwa mu mambo awama.’ (Filipai 4:1-3) Kyamweka kuba’mba bano banabakazhi baakamwanga Lesa bapwishishe lukatazho lwabo mumutende kwingijisha lujimuno nabiji lwanembwapo mu Mateo 5:23, 24. Nelelo jino, kwingijisha mafunde amu Binembelo mulwitabilo kuleta mutende.

Lwitabilo Lwitukwasha Kuchinchika

19. Ñanyi lweseko lwabujile konauna lwitabilo lwaba Izaka ne Libeka?

¹⁹ Mulwitabilo twakonsha nekuchinchika byamalwa. Kimo kimye kampe tuji nabulanda pakumona mulongo wetu umo mukisemi wabatizwa wasatukila Lesa pakutwela mumasongola namuntu wabula kwitabila. (1 Kolinda 7:39) Ba Izaka ne Libeka bayanjijilemo, namambo akuba mwanabo Isao wakasongwele banabakazhi babulanga kwakamwa Lesa. Bakazhi banji bena Hiti “balengejile ba Izaka ne Libeka kumvwa bingi bibi ku michima yabo” kyakuba ne Libeka waambile’mba: “Nakoka kwikala na bumi na mambo a banabakazhi bena Hiti. Umvwe Yakoba wasongola mukazhi wa mu bena Hiti, byonka biji bano banabakazhi ba muno mu ntanda ñanyi kintu kyawama kyo nkamwena amiwa mu mweo wami?” (Ntendekelo 26:34, 35; 27:46) Bino luno lweseko kechi lwaonawine lwitabilo lwaba Izaka ne Libeka ne. Netuwa umvwe ketupite mumakatazho twayai tutwajijile kwikala nalwitabilo lwakosa.

20. Ba Naomi ne Luta bajinga byepi bakumwenako bawama mulwitabilo?

²⁰ Mwanamukazhi mukote wafwilwa aye Naomi wajinga Muyudea kabiji wayukile kuba’mba mubanabakazhi bamo bamu Yudea mwakonsha kusemwa baana babalume bakonsha kwikala bashakulu bakwa Mesiasa. Namambo akuba baana banji bafwiletu kwakubula kusemapo mwanane, kabiji neaye waubile wapita kala pajifumbi jakusemenapo baana, luketekelo lwakuba’mba mukisemi kyanji mukasemekelwa Mesiasa lwatendekele kukepana. Bino mulokazhi wanji wafwijilwe aye Luta wasongwelwe kwi Boaza, wamusemena nemwana wamulume, nekwikala kekakolwe wamukazhi wakwa Yesu Mesiasa! (Ntendekelo 49:10, 33; Luta 1:3-5; 4:13-22; Mateo 1:1, 5) Lwitabilo lwaba Naomi ne Luta kechi lwapwile byobapichile mumalwane, kabiji lwibaletejile lusekelo. Neatweba inge twatwajijila kwikala nalwitabilo mumalwa, tukamona lusekelo lwabaya bingi.

21. Lwitabilo lwitubilaka, kabiji twafwainwa kusakisha kubaka?

²¹ Nangwa kyakuba pamuntu pamuntu kechi tuyuka byakonsha kwitumwekela juba jilondelapone, mulwitabilo twakonsha kuyuka mwakupwishisha malwa onse akonsha kumweka. Lwitabilo lwitulengela kuchinchika nekutekanya. Lwitulengela kwibikila bikonkwanyi bikatampe nekwikala bwikalo bwalumbuluka. Lwitabilo lukosesha bulunda bwetu nabakwetu nekushinda byamalwa. Onkao mambo, twayai twikale “ba boba baji na lwitabilo lwa kupulusha mweo.” (Bahebelu 10:39) Nabulume bwitupa Lesa wetu wabutemwe aye Yehoba, nemukuba bintu byakumuletela lukumo, twayai tutwajijile kwikala bakosa mulwitabilo.

Musakukumbula’mbaka?

• Ñanyi biyukisho biji mu Binembelo bishiina kuba’mba lwitabilo lwakonsha kwitukwasha kuchinchika?

• Mamboka otwakonsha kwambila’mba lwitabilo lwitulengela kwikala bwikalo bwalumbuluka?

• Lwitabilo luleta byepi mutende?

• Ñanyi kiyukisho kijipo kyakuba’mba lwitabilo lwitukwasha kuchinchika mubyamalwa?

[Bipikichala pa peja 12]

Lwitabilo lwalengejile ba Nowa ne Enoka kuchinchika pakusapwila byambo bya Yehoba

[Bipikichala pa peja 13]

Lwitabilo lwajingapo ne Mosesa lwitutundaika kwibikila bikonkwanyi byakumupashi

[Bipikichala pa peja 14]

Kushiinwa kuba’mba Lesa usakwibakwasha kwakoseshe lwitabilo lwaba Balaka, Debola ne Gidiona