Sapwilainga ne Kulenga Baana ba Bwanga

“Kabiji byo bamumvwine ba Pilisila ne Akwila, bamutwajile kwabo, ne kumubujisha bulongotu mwayila jishinda ja Lesa.”—BYUBILO 18:26.

1. (a) Nangwa kya kuba’mba, wajinga na “muchima wa lupata,” ki ka Apolosa kyo abujile kwikala nakyo? (b) Ki ka kyakebewenga kwi Apolosa pa kuba’mba ayuke bintu bya ku mupashi byavula?

BA PILISILA ne Akwila, bamulume ne mukazhi ba bwina Kilishitu ba mu myaka kitota kitanshi, bamumwene Apolosa saka amba mu nshinagoga mu muzhi wa Efisesa. Na mambo a kumvwanyika kwa byambo byanji ne bulume bwa kwitabisha, bantu bamutelekelenga bingi Apolosa. Wajinga na “muchima wa lupata,” ne “kufunjisha bulongotu bintu bya kwa Yesu.” Nangwa byonkabyo, kino kyajingatu kishiino kya kuba’mba Apolosa ‘wayukile lonkalwa lubatizhilo lwa kwa Yoano.’ Bintu Apolosa byo asapwijile pa mambo a kwa Yesu byajinga bya kine, bino bichechetu. Lukatazho ke lwa kuba’mba, wayukiletu bicheche pe Yesu. Apolosa wakebewenga kufunjilako byavula kuyuka mwingilo wa kwa Yesu mu kufikizha nkebelo ya Yehoba.—Byubilo 18:24-26.

2. Ñanyi mwingilo wakosa ye bepaine kuba ba Pilisila ne Akwila?

² Mu kwikebela bene, ba Pilisila ne Akwila bepaine kukwasha Apolosa kulama “byonse” byakambizhe Yesu. (Mateo 28:19, 20) Baibolo wamba’mba, Apolosa “bamutwajile kwabo, ne kumubujisha bulongotu mwayila jishinda ja Lesa.” Bino, bena Kilishitu bamo bakonsheshe kuchina kumufunjisha Apolosa na mambo a byoajinga. Nanchi wajinga byepi? Kabiji twakonsha kufunjilako ka ku kwibikishako kwa ba Pilisila ne Akwila kwisamba Binembelo ne Apolosa? Kupitulukamo mu jino jishimikila kukonsha kwitukwasha byepi kwibikako kutendeka mafunjisho a Baibolo a pa nzubo?

Taiko Muchima Kukwasha Bantu

3. Mambo ka kwamba byambo byumvwanyika ko ayukile Apolosa kyo kwalengejile ba Pilisila ne Akwila kubula kuchina kumufunjisha?

³ Apolosa wasemekelwe ne kukomena mu muzhi wa Alekesandiliya. Pa kyo kya kimye Alekesandiliya wajinga muzhi mukatampe wa Ijipita mwajinga bantu bafunjile bingi kabiji mwajinga ne laibulale mukatampe bingi wayile nkuwa. Mu uno muzhi mwajinga Bayudea bavula bingi ne bantu bafunda. Kabiji mu uno muzhi mo mwatuntulwijilwe ne Binembelo bya Kihebelu mu Kingiliki bitelwa’mba, Septuagint. Apolosa kyo kyo aikajile “wa bulume mu Binembelo”! Ba Akwila ne Pilisila bajinga basendwe ba kuluka matente. Nanchi kwamba byambo byumvwanyika ko ayukile Apolosa kwibalengejile kubula kumukwasha nyi? Ine. Na mambo a butemwe bwabo, bamwene amba bafwainwa kumukwasha.

4. Apolosa wataine kwepi bukwasho, kabiji bamukwashishe byepi?

⁴ Nangwa kya kuba Apolosa wayukile kwamba byambo byumvwanyika, wakebewenga kufunjilako. Buno bukwasho kechi bwakonsheshe kufuma ku masukulu akatampe ne, bwafwainwe kufuma ku bakwabo mu kipwilo kya bwina Kilishitu. Apolosa bamukwashishe bintu byamulengejile kuba’mba omvwishe lunengezho lwa Lesa lwa lupulukilo. Ba Pilisila ne Akwila “bamutwajile kwabo, ne kumubujisha bulongotu mwayila jishinda ja Lesa.”

5. Mwakonsha kwambapo amba ka pa bumupashi bwa ba Pilisila ne Akwila?

⁵ Ba Pilisila ne Akwila bajinga bantu bakosa bingi ku mupashi ne mu lwitabilo. Byonkabyo, ‘moba onse baikajile jimo na mwa kwibakumbwila bonse baipwizhe mambo a luketekelo lo bajinga nalo,’ nangwa kya kuba ao muntu munonshi, muyanji, shayuka, nangwa muzha. (1 Petelo 3:15) Akwila ne mukazhanji ‘batwajilenga [baambilenga, NW] mambo bulongo a bukine.’ (2 Timoti 2:15) Kine, bayukile bingi Binembelo. Apolosa bamufikile pa muchima na lufunjisho pa ‘mambo a Lesa, omi, ne kwingila engila,’ kwalula muchima.—Bahebelu 4:12.

6. Twakonsha kuyuka byepi kuba’mba Apolosa waumvwijile lufunjisho lo atambwile?

⁶ Apolosa walondejile mu ngayo ya bafunjishi banji kabiji wakijile mu kulenga baana ba bwanga. Waingijishe bulongo bintu byo afunjile mu kusapwila mambo awama, kikatakata ku Bayudea. Apolosa wakosele bingi mu kwibetabisha Bayudea pa mambo a Kilishitu. Na mambo a kuba ‘wajinga wa bulume mu Binembelo,’ wakonsheshe kwibashiina kuba’mba bangauzhi bonse baambile pa mambo a kwiya kwa Kilishitu. (Byubilo 18:24) Jishimikila jitwajijila kwamba’mba Apolosa panyuma wayile ku Akaya, ko ‘ebakwashishenga bingi aba baitabile na mambo a bupe bwa Lesa; mambo aye wibashinkishe bulaka Bayudea na bulume, ku meso a bantu, pa kwibabula na Binembelo amba Yesu ye Kilishitu.’—Byubilo 18:27, 28.

Funjilai ku Bafunjishi Bakwenu

7. Ba Akwila ne Pilisila baikele byepi basendwe mu kufunjisha?

⁷ Ibyepi ba Akwila ne Pilisila byo baikele basendwe mu kufunjisha Byambo bya Lesa? Kechi na mambotu a kwikala bakosa mu lufunjisho lwa pa bunke ne kupwila kimye kyonse ne, bino kukwatankena pamo na mutumwa Paulo kwafwainwa nako kwibakoseshe bingi. Paulo waikajile na ba Pilisila ne Akwila mu Kolinda mwaka umo ne kichika. Baingijilenga pamo mwingilo wa kuluka ne kuwamisha matente. (Byubilo 18:2, 3) Akifwanyikizhaitu kyafuminemo mu misambo yabo ya ku mupashi pa kimye kyo baikajile bonse. Kine, ino misambo yo besambilenga ne Paulo ibakwashishe bingi kukomenako ku mupashi! Byambo bya Mana 13:20 byamba’mba: ‘Awa wenda na ba maana ukekala ke wa maana.’ Misambo yawama ibakwashishe bingi kukomesha byubilo byabo byawama.—1 Kolinda 15:33.

8. Ñanyi bintu ba Pilisila ne Akwila byo bafunjile mu busapwishi bwa kwa Paulo?

⁸ Kimye Paulo kyo asapwijilenga, Ba Pilisila ne Akwila bamumwene kwikala mufunjishi wawama bingi kulondela. Jishimikila ja mu buku wa Byubilo bya Batumwa jaamba’mba, Paulo “waipuzhañenenga na bantu mu nshinagoga moba onse a Sabado kasa eseka kwibetabisha Bayudea ne Bangiliki.” Palutwe ba Silasa ne Timoti byo bakwatankene naye, Paulo “wasuminiinwe ne kusuminiinwa na kusapwila, kasa ebabujisha Bayudea amba Yesu ye Kilishitu.” Kabiji byo kyamwekele kuba’mba bantu mu nshinagoga kechi batako muchima ne, ba Pilisila ne Akwila bamwene amba Paulo wafumineko ne kuya na kusapwila ku nzubo yalamankene na nshinagoga. Akwa Paulo wakwashishe Kilishipusa, “mukulumpe wa nshinagoga” kwikala mwana wa bwanga. Byonkabyo, ba Pilisila ne Akwila bamwene kuba’mba kulengwa kwa uno mwana wa bwanga kwalengejile bantu ba mu nyaunda kutako bingi muchima. Jishimikila jaamba’mba: “Kilishipusa . . . wamwitabile Nkambo ne ba mu nzubo yanji bonse pamo; ne bavula bena Kolinda byo baumvwinenga mambo baitabilenga, ne kubatizwa babatizhilwenga.”—Byubilo 18:4-8.

9. Ba Pilisila ne Akwila balondejile byepi mwaubijilenga Paulo?

⁹ Bakwabo basapwishi ba Bufumu, nobe ba Pilisila ne Akwila balondejile busapwishi bwa kwa Paulo. Uno mutumwa wakambizhe bena Kilishitu bakwabo amba: “Ikalai ba kundondela amiwa, pamo byonka byo nji amiwa wa kumulondela Kilishitu.” (1 Kolinda 11:1) Kulondela mwaubijilenga Paulo, ba Pilisila ne Akwila bamukwashishe Apolosa kumvwisha bulongo mafunjisho a bwina Kilishitu. Kabiji, ne aye wakwashishe bakwabo. Kabiji ba Pilisila ne Akwila bakwashishe kulenga baana ba bwanga mu Loma, Kolinda, ne mu Efisesa.—Byubilo 18:1, 2, 18, 19; Loma 16:3-5.

10. Ki ka kyo mwafundamo mu buku wa Byubilo bya Batumwa kyapitala 18 kikemukwasha mu mwingilo wa kulenga baana ba bwanga?

¹⁰ Twakonsha kufunjilako ka ku byo twaumvwa mu buku wa Byubilo bya Batumwa kyapitala 18? Ee, byonka byo bakonsheshe kufunda ba Akwila ne Pilisila kwi Paulo, ne atweba twakonsha kwibikako kulenga baana ba bwanga inge satumwena ku bafunjishi bawama ba Byambo bya Lesa. Twakonsha kwendañana na boba ‘basuminiinwa ne kusuminiinwa na kusapwila’ kabiji ne boba ‘babujisha’ bakwabo. (Byubilo 18:5) Twakonsha kumona byo bafika bantu pa muchima kwingijisha mfunjishisho ya kwibetabisha. Ino mfunjishisho yakonsha kwitukwasha kulenga baana ba bwanga. Umvwe muntu umo ubena kufunda Baibolo ne atweba, twakonsha kumulomba kwitako balongo banji ne boekala nabo kinkalankulo kufunjila nabo pamo. Nangwa kampe twakonsha kumwipuzha kwitubula botwakonsha kutendeka kufunjisha Baibolo.—Byubilo 18:6-8.

Monaingapo Bimye bya Kutainamo Baana ba Bwanga

11. Kwepi kwakonsha kutanyiwa baana ba bwanga bakatataka?

¹¹ Paulo ne bena Kilishitu bakwabo balengelenga baana ba bwanga mu kusapwila ku nzubo ne nzubo, mu bisankanyi, ne mu ma lwendo abo. Ee kine basapwijilenga konse konse. Byo muji kalume wa Bufumu wa mukoyo ukeba kulenga baana ba bwanga, abya mwakonsha kukomesha mwingilo wenu wa mu bujimi nyi? Nanchi mwakonsha kutana ne kwingijisha bulongo bimye mu kukeba bantu bafwainwa ne kwibasapwila nyi? Mashinda ka amo aingijisha bakwetu basapwishi ba mambo awama mu kutana baana ba bwanga? Patanshi ubai tumone pa busapwishi bwa kwingijisha lamya.

12-14. Pa kumwesha mfweto ifuma mu busapwishi bwa pa lamya, ambai bya kumwenako byenu byamwekele nangwa kimo kiji mu ano mapalagalafu.

¹² Kimye mwina Kilishitu wa jizhina jakonsha kutelwa’mba Maria kyo asapwijilenga ku nzubo ne nzubo mu Brazil, wamwesheshe talakiti nsongwakazhi umo wavilukilenga mu kibamba kyo aikalangamo. Maria pa kutendeka mwisambo, wamushikishe mutwe wa talakiti wa kuba’mba: “Nanchi mukeba kuyuka byavula pa mambo a Baibolo Nyi?” Nsongwakazhi wakumbwile’mba: “Mwane nkeba. Pano lukatazhotu mambo amiwa ne mufunjishi kabiji kufunjisha baana ba sukulu kunsendela kimye kyabaya bingi.” Maria wamulondolwejile’mba, bakesambanga mwisambo wa mu Baibolo pa lamya. Nsongwakazhi wapele Maria nambala yanji ya lamya, kabiji jonka jo juba mabanga watendekele lufunjisho lwa pa lamya kwingijisha buloshuwa wa Nanchi Lesa Ukebaka Kwiatweba?a

¹³ Wa mwingilo wa kimye kyonse mu Ethiopia byo akebelenga kwisambako na bamo pa lamya, wakuminye ne kwakamwa pa kumvwa kyongo mu nzubo kimye kyo aambilenga na mwanamulume. Awe muntu wamwambijile nyenga amba atume kimye kikwabo. Byo atumine jikwabo, uno mwanamulume walombele lulekelo lwa mambo ne kwamba’mba, pa lamya itanshi, kwajinga kutoboka kwa maama nafwa na mukazhanji. Nyenga waingijishe kino kyamwekele kwikala jishuko ja kwisamba nanji mashinda awama a mu Baibolo mwa kupwishisha makatazho a mu kisemi. Wamwambijile’mba bisemi byavula byakwashiwa kwingijisha buku wa Icaba Inkaama ku Nsansa sha Lupwa, wanembwa na Bakamonyi ba kwa Yehoba. Byo papichile moba acheche panyuma ya kwibatwajila buku, nyenga watumineko lamya jikwabo. Na lusekelo waambile’mba: “Uno buku wakosesha masongola etu!” Kine, waichile kisemi ne kwisamba nabo bishinka byawama byo atangile mu buku. Lufunjisho lwatendekele, kabiji pa moba achechetu uno mwanamulume watendekele kutanwa ku kupwila kwa bwina Kilishitu kimye kyonse.

¹⁴ Musapwishi wa mambo awama a Bufumu mu Denmark watendekele lufunjisho lwa Baibolo pa lamya waamba’mba: “Mukulumpe utangijila mwingilo wantundaikile kutendeka busapwishi bwa pa lamya. Bimye bitanshi nakananga ne kwamba’mba: ‘Mwane kuba nakonsha ne.’ Bino, juba jimo nebikileko ne kutumina mwina nzubo mutanshi. Muntu wa jizhina ja Sonja wakumbwile kabiji byo nesambile nanji kimye kicheche, waswile kutambwila buku. Mabanga amo twisambile pa mutwe waamba pa bilengwa, kabiji wakebelenga kutanga buku wa Life—How Did It Get Here? By Evolution or by Creation.b Naambile kuba’mba kyakonsha kuwama inge kya kuba twamonañana ne kwisambila pamo pa ye uno mutwe. Waswile. Kimye kyo nafikile, nataine Sonja winengezha, kabiji kufuma pa kyo kya kimye tufunda nanji mulungu ne mulungu.” Nyenga yetu mwina Kilishitu wapezhezheko amba: “Pa myaka yavula nalombanga kwikala na lufunjisho lwa Baibolo, pano bino kechi naketekejile kwikalapo na lufunjisha mu kwingijisha lamya ne.”

15, 16. Bya kumwenako ka byo mwakonsha kwamba bimwesha mfweto ifuma mu kwingijisha mashinda a kutendekelamo mafunjisho a Baibolo?

¹⁵ Bavula babena kukonsha na mambo a kwingijisha mashinda a kusapwila bantu konse ko bakonsha kutanyiwa. Wamukazhi mwina Kilishitu umo mu United States waimikile motoka wanji pepi na motoka wazhikankana wa busulu po bemikila myotoka. Wamukazhi wajinga mu motoka byo amumwene, nyenga watatwile kulondolola biji mwingilo wetu wa kufunjisha Baibolo. Mwanamukazhi waumvwine ne kufuma mu motoka yo ajingamo, kuya kwajinga nyenga. Waambile’mba: “Natemwa bingi pa kwimana ne kwisamba ne amiwa. Moba avula bingi o naikala kwa kubula buku wenu ulumbulula Baibolo uji yense. Nangwa byonkabyo mbena kukeba kutendeka jikwabo kufunda Baibolo. Nanchi nkafundanga ne anweba nyi?” Kine, nyenga yetu wataine kimye kyawama kya kusapwilamo mambo awama.

¹⁶ Mu United States, nyenga wafwakashishe nzubo mo balamina bantu. Watambwile lūsa ku mukulumpe utangila mingilo ne kumwambila’mba ukeba kwipana kukwasha bantu bekalamo bintu bya ku mupashi. Nyenga yetu wanungilepo amba, ukatemwa bingi umvwe kafunjishe lufunjisho lwa Baibolo lwabula lupoto mulungu ne mulungu ku bonse bakakeba. Mukulumpe wa mingilo wamupele lūsa lwa kufwakesha bantu bonse mu bibamba byabo. Panyuma ya moba achechetu, watendekele kufunjisha lufunjisho lwa Baibolo lwa bantu 26 jisatu mulungu ne mulungu. Umo pa bonse utanwa ku kupwila jonse.

17. Jishinda ka jikwasha bingi kutendekelamo mafunjisho a Baibolo a pa nzubo?

¹⁷ Bamo basapwishi ba mambo awama a Bufumu batana amba kutendeka ponkapotu lufunjisho lwa Baibolo kikwasha bingi. Juba jimo lukelo basapwishi 105 mu kipwilo baitabanzhene kutendeka lufunjisho lwa Baibolo ku mwina nzubo yense ye bakonsheshe kutana. Basapwishi 86 bayile mu mwingilo wa mu bujimi, kabiji panyuma ya kwingila maawala abiji batendekele mafunjisho a Baibolo 15.

Kebakebainga Bantu Bafwainwa

18, 19. Jishinda ka jikatampe ja kwa Yesu jo twafwainwa kuvuluka, kabiji ki ka kyo twafwainwa kukebesha kuba?

¹⁸ Byo muji musapwishi wa mambo awama a bufumu, mwakonsha kukeba kwingijisha mashinda atongolwa mu uno mutwe. Bino, kyakonsha kuwama umvwe mwalangulukapo mashinda afwainwa kusapwilamo mu nyaunda yenu. Kikatakata, atweba bonse tuvulukenga jishinda ja kwa Yesu ja kukebelamo bantu bafwainwa ne kwibakwasha kwikala baana ba bwanga.—Mateo 10:11; 28:19.

¹⁹ Pa kuba’mba tube kino, twayai ‘tutwalenga [twambenga, NW] bulongo mambo a bukine.’ Twakonsha kuba kino mu kwibetabisha bya mu Binembelo. Kino kiketulengela kukwasha boba bakoka muchima byambo kwibafika pa muchima ne kwibyuba. Umvwe saka tulomba ne kumuketekela Yehoba, twakonsha kukwasha bamo kwikala baana ba bwanga ba kwa Yesu. Kabiji uno mwingilo uleta bingi mapesho! Onkao mambo, ‘kasa tuteshakotu michima tukefikizhe atweba bene kwi Lesa,’ kimye kyonse saka tunemeka Yehoba byo tuji basapwishi ba mukoyo ba mambo awama a Bufumu basapwila ne kulenga baana ba bwanga.—2 Timoti 2:15.

[Tubyambo twa mushi]

Mukivuluka Nyi?

• Mambo ka Apolosa kyo akebewenga kumubujisha bulongotu mwayila jishinda ja Lesa?

• Mu mashinda ka ba Pilisila ne Akwila mo bafunjile kwi mutumwa Paulo?

• Mu buku wa Byubilo bya Batumwa kyapitala 18, ki ka kyo mwafundamo pa mambo a kulenga baana ba bwanga?

• Ibyepi byo mwakonsha kumona bimye bya kulenga baana ba bwanga?

[Kipikichala pa peja 18]

Ba Pilisila ne Akwila bamubujishe Apolosa “bulongotu mwayila jishinda ja Lesa”

[Kipikichala pa peja 20]

Apolosa wakijile mu kulenga baana ba bwanga

[Kipikichala pa peja 21]

Paulo wasapwijile konse ko ayilenga.