Yehoba Wayula Butemwe Bubula Kwaluka
“Yehoba ye... wa lusa [“kifyele,” NW] lukatampe.”—MASALAMO 145:8.
1. Butemwe bwa Lesa buji byepi?
“LESA ye butemwe.” (1 Yoano 4:8) Abye byambo bya lusangajiko bitubula kuba’mba bukalama bwa Yehoba bwa butemwe. Mambo nangwatu bantu babula kumwakamwa nabo bamwenamo mu juba ne mvula byo etupa aye wa butemwe. (Mateo 5:44,45) Na mambo a kuba Lesa watemwa ba pano pa ntanda, nangwatu balwanyi banji bakonsha kwiya kwi aye ne kulapila kepo ne kukamona bumi bwa myaka ne myaka. (Yoano 3:16) Katatakatu Yehoba akafumyepo byubilo byatama pano pa ntanda pa kuba’mba bantu bakekale bulongo myaka ne myaka mu ntanda ipya yaoloka.—Masalamo 37:9-11, 29; 2 Petelo 3:13.
2. Ñanyi butemwe Yehoba bo amwesha ku bantu bepana kwi aye?
2 Yehoba umwesha butemwe ku bapopweshi banji bakine mu jishinda jawama kabiji ja kikupu. Butemwe bwa uno mutundu bwimenwako na kyambo kya Kihebelu kyatuntululwa’mba [“kifyele, NW”] nangwa’mba “butemwe bubula kwaluka.” Mfumu wa bena Isalela bakala aye Davida wanemekele bingi butemwe bwa Lesa bubula kwaluka. Na mambo a byoapichilemo ne kulanguluka languluka pe Lesa byo aingijilenga na bantu, na luketekelo Davida waimbile’mba: “Yehoba ye . . . wa lusa [“kifyele nangwa butemwe bubula kwaluka,” NW] lukatampe.”—Masalamo 145:8.
Kuyuka Bantu ba Lesa Bakishinka
3, 4. (a) Masalamo 145 etukwasha byepi kuyuka bantu ba Yehoba bakishinka? (b) Bantu ba Lesa bakishinka bamutakaika byepi?
3 Hana, inanji ngauzhi Samwela waambile kutongola Yehoba Lesa amba: “Aye ukalamanga banji bakishinka.” (1 Samwela 2:9) “Bakishinka” bo bañanyi? Mfumu Davida wibatongola. Panyuma ya kutakaika Yehoba pa mambo a byubilo byanji byawama, waambile’mba: “Bazhijikwa [“bakishinka,” NW] benu bakemutakaika.” (Masalamo 145:10) Nga bantu bakonsha kutakaika byepi Lesa? Bamutakaika kupichila mu kumutota nangwa kwamba byawama pe aye.
4 Bantu ba Yehoba bakishinka bayukanyikilwa ku ñambilo yabo yawama ya kumutumbijika. Ñanyi mutwe ye besambapo kimye kyo bapwañana pamo ne mu kupwila kwa bwina Kilishitu? Kwa kubula nangwa kuzhinaukatu ne, besamba pa Bufumu bwa Yehoba! Bantu ba Lesa bakishinka balabijila byambo bya kwa Davida waimbile’mba: “Bakambanga mambo a lukumo lwa bufumu [bwa Yehoba] bwenu, ne kwisamba mambo a bulume bwenu.”—Masalamo 145:11.
5. Twayuka byepi kuba’mba Yehoba umvwa inge bantu banji bakishinka saka bamba bintu byawama pe aye?
5 Nanchi Yehoba uteleka ne kumvwa bimutota bantu banji bakishinka nyi? Ee, uteleka ne kumvwa byo bamba. Mu bungauzhi bwaamba pa mpopwelo ya kine ya ano moba, Malakai wanembele’mba: “Ponkapo aba baakaminwenga Yehoba baambañenenga bene na bene, kabiji Yehoba watelekelenga, ne kwibomvwa wibomvwine, ne buku wa kwibavulukilako aba bamwakaminwe Yehoba ne kulanguluka jizhina janji wanembelwe ku meso anji.” (Malakai 3:16) Kimutokela bingi Yehoba ku muchima inge bantu banji bakishinka saka bamba bintu byawama pe aye, kabiji ne aye wibavuluka.
6. Ñanyi mwingilo witukwasha kuyuka bantu ba Lesa bakishinka?
6 Bantu ba Yehoba bakishinka bakonsha ne kuyukanyikilwa ku kwibikako kwabo ne kumonapo mashinda mwa kwambila na bantu babula kupopwela Lesa wa kine. Kine, bantu ba Lesa bakishinka ‘bayukisha bantu byubilo byanji, ne lukumo lwa buneme bwa bufumu bwanji.’ (Masalamo 145:12) Nanchi nenuwa mumonapo mashinda ne kwiengijisha bulongo kwambilamo mambo a bufumu bwa Yehoba ku bantu babula lwitabilo nyi? Bufumu bwanji kechi buji pamo na makafulumende a bantu akafumishiwapo katataka ne, abo bwa myaka ne myaka. (1 Timoti 1:17) Kibena kukebewa bingi lonka luno kuba’mba bantu bafunde mambo a bufumu bwa Yehoba bwa myaka ne myaka ne kwikala ba kwibutundaika. Davida waimbile’mba: “Bufumu bwenu bo bufumu bwa myaka ne myaka, ne bunkambo bwenu bukayayayangatu ne ku bisemi byonse.”—Masalamo 145:13.
7, 8. Ki ka kyaubiwe mu 1914, kabiji ñanyi kiyukilo kibena kuyukisha’mba Lesa ubena kulama kupichila mu Bufumu bwa Mwananji?
7 Kutatula mu 1914, kuji kishinka kikwabo kitutundaika kwamba pa bufumu bwa Yehoba. Mu yewa mwaka, Lesa waikajikile Bufumu bwa Bumesiasa mwiulu ne Yesu Kilishitu mwana Davida waikele ke Mfumu. Yehoba wafikizhe mulaye wanji wa kuba’mba ukebwikajikisha bufumu bwa kwa Davida myaka ne myaka.—2 Samwela 7:12, 13; Luka 1:32, 33.
8 Kiyukilo kya kuba’mba Yehoba pano ubena kulama kupichila mu Bufumu bwa Mwananji, aye Yesu Kilishitu kibena kumweka mu kufikizhiwa kwa kwikalapo kwa kwa Yesu. Lubaji lukatampe lwa kyo kino kiyukilo ke mwingilo Yesu ye aambijile jimo amba bantu ba Lesa bonse bakishinka bakamwingilanga. Waambile’mba: “Ano Mambo awama a bufumu akasapwilwa panopantanda ponse mwa kwibashimwina ba mu mikoka yonse ya bantu; bino ke ku mpelo.” (Mateo 24:3-14) Na mambo a kuba bantu ba Lesa bakishinka bapayankana mu kufikizha buno bungauzhi, banabalume, banabakazhi ne banyike bonse kukila 6 milyonyi babena kwingilako uno mwingilo ukabula kubwezhiwapo ne. Katataka bansatuki bonse ba Bufumu bwa Yehoba bakavile.—Lumwekesho 11:15, 18.
Byawama Bitubila Bumfumu bwa Yehoba
9, 10. Yehoba wapusana byepi na bandamabyalo ba pano panshi?
9 Umvwe twi bena Kilishitu bepana, mu bulunda bwetu na Mfumu Nkambo Yehoba mufuma byavula byawama. (Masalamo 71:5; 116:12) Kya kumwenako, twaitabilwa kabiji ne ku mupashi twafwenya kwi aye, mambo a kuba tumwakamwa ne kuba bintu mu bololoke. (Byubilo 10:34, 35; Yakoba 4:8) Akye kyapusana bingi na bandamabyalo ba pano panshi, javula abo bomvwañanako na babinemanga, nabiji bantangi ba bashilikale, banonshi, nangwa bantu baya nkuwa mu makayo ne bya kisangajimbwe. Kwesakana na pepala umo wa byambo wa mu Africa wa Sowetan, mukulumpe umo mu kafulumende wayukanyikwa bingi, kwamba pa mapunzha ekalako bantu bayanji mu kyalo kyanji washimwine’mba: “Pano nayuka kine kintu kyo tubujila kukeba kufwakashisha ku mapunzha kwaikala bantu bayanji. Mambo tukeba kuvulama kuba’mba mapunzha a uno mutundu ko aji. Etuvulañanya bongo ne kwitulengela kumvwa bumvu pa kumona myotoka yawama yo twendamo.”
10 Kya kine kuba’mba bandamabyalo bamo baji bingi na kijikila pa mambo a bwikalo bwaikelamo bantu babo. Bino nangwatu bano bantangi baji na muchima wawama byonkabyo, bakankalwa kuyuka bulongo bantu bo balama. Kino kyakonsha kwitulengela kushikisha’mba: Nanchi kujipo Kalama ulama bantu banji bonse bulongo upana bukwasho ku bantu bonse pa muntu pa muntu mu kimye kya malwa nyi? Ee, ko aji. Davida wanembele’mba: “Yehoba wibakwachisha bonse bapona, ne kwibenuna bonse banyeñamina panshi.”—Masalamo 145:14.
11. Ñanyi meseko afikila bantu ba Lesa bakishinka, kabiji bukwasho ka bo baji nabo?
11 Meseko ne bya malwa byavula bimwekela bantu ba Lesa bakishinka mambo a bumbulwakoloka bwabo, ne na mambo a kuba ino ntanda iji mu bulume bwa kwa “aye mubi” Satana. (1 Yoano 5:19; Masalamo 34:19) Bena Kilishitu bapita mu lumanamo. Bamo babela kimye kyabaya nangwa kwikala na bulanda bukatampe. Kimye kimo bilubo bya bantu ba Yehoba bakishinka bibalengela ‘kunyeñamina panshi’ ne kulefulwa. Nangwa byonkabyo, Yehoba winengezha kikupu kutekenesha ne kwibakosesha ku mupashi bonse bafikilwa na meseko nangwa abaye byepi. Mfumu Yesu Kilishitu naye ubila bantu banji bakishinka mu butemwe bintu bya mutundutu umo.—Masalamo 72:12-14.
Kajo ka Kwikusha mu Kimye Kyafwainwa
12, 13. Yehoba upana byepi byonse byafwainwa ku “byonse byumi”?
12 Na mambo a butemwe bwanji bubula kwaluka, Yehoba upana byonse byafwainwa ku ba mingilo banji, ne kwibekusha na kajo kawama. Mfumu Davida wanembele’mba: “Meso a bonsetu emupembelela anweba [Yehoba]; ne anweba mwibapa kajo kabo mu kimye kyafwainwa. Muvungulula kuboko kwenu, ne kwikusha michima ya byonse byumi.” (Masalamo 145:15, 16) Nangwatu mu bimye bya malwa, Yehoba wakonsha kupimpula bintu ne kulengela bantu banji bakishinka kwikala na ‘kajo ka pa juba.’—Luka 11:3; 12:29, 30.
13 Davida waambapo ne kuba’mba “byonse byumi” bikushiwa. Akye kyavwangamo ne banyama. Umvwe ne kuvula kwa bijimwa ne bichi bya mu mema ne, banyama ba mu mema, bañonyi ne banyama ba kumutunta kuba baikala na mwela wa kupema nangwa kajo ne. (Masalamo 104:14) Bino, Yehoba umona kuba’mba byonse byaikala na byonse bibifwainwa.
14, 15. Kajo ka ku mupashi kapanyiwa byepi ano moba?
14 Kupusanako na banyama, bantu bafwainwa bintu bya ku mupashi. (Mateo 5:3) Yehoba mu buwame upana bya ku mupashi byafwainwa bantu banji bakishinka. Yesu saka akyangye kufwa, walayile amba ‘kalume wa kishinka ne wa maana’ ukapanga baana ba bwanga ba kwa Yesu “kajo pa kimye pafwainwa.” (Mateo 24:45) Jibumba ja kalume wa mu ano moba jalengwa na bashingwa bashalapo ba mu ba 144,000. Kupichila mwi abo, Yehoba ubena kupana kajo ka ku mupashi kavula bingi.
15 Kya kumwenako, bantu ba Yehoba bavula babena kukwashiwa bingi kumvwisha Baibolo wakatataka watuntululwa mu milaka yabo bene. Byo kyawamapo kino kya bupe kya New World Translation of the Holy Scriptures! Kunungapo, mabuku a kukwasha kufunda Baibolo abena kunembwa mu milaka kukila pa 300. Kano kajo konse ka ku mupashi kabena kunengezhewelwa bapopweshi bakine kuzhokoloka mwaya ntanda. Ñanyi wafwainwa lutotelo pa bino byonse? Yehoba Lesa. Mu butemwe bwanji bubula kwaluka, umona kuba’mba jibumba ja kalume jibena kupana ‘kajo mu kimye kyafwainwa.’ Kupichila mu luno lunengezho, “michima ya byonse byumi” biji mu paladisa wa mu ano moba wa ku mupashi bikushiwa. Kabiji ba mwingilo ba Yehoba byo bajipo na lusekelo pa kwikala na luketekelo lwa kuba’mba bakamona ino ntanda yaaluka ke paladisa katataka!—Luka 23:42, 43, NW.
16, 17. (a) Bya kumwenako ka bya kajo ka ku mupashi byaishile pa kimye kyafwainwa? (b) Salamo 145 ilumbulula byepi bantu ba Lesa bakishinka byo bamba mambo a bumfumu aletele Satana?
16 Akilangulukai pa kya kumwenako kyawama kya kajo ka ku mupashi katambwijilwe pa kimye kyafwainwa. Mu 1939, Nkondo ya kibiji ya Ntanda yonse yatatwile mu Europe. Mu yenkawa mwaka, mu Kyamba kya Usopa kya November 1 mwajinga kibaba kyaambilenga pa mutwe wa kuba’mba “Kubula Kwikala mu bya Panopantanda.” Na mambo a mabulañano awama aambiwepo, Bakamonyi ba kwa Yehoba kuzhokoloka mwaya ntanda bamwene ene mambo o bafwainwa kubula kulwila nkondo. Kino kyalengejile makafulumende mu yo ya nkondo ya myaka itanu na umo kwibabukila bukaji. Nangwa kya kuba bantu ba Lesa bakishinka bebalekeshenga ne kwibakatazha, batwajijile na kusapwila mambo awama a Bufumu. Kufuma mu 1939 kufikatu ne mu 1946, bapeshiwe bingi, kya kuba kibelengelo kya bantu baitabijile kyananukile. Kabiji, kya kumwenako kyabo kya bulumbuluke mu kimye kya yo ya nkondo kyatwajijila na kukwasha bantu kuyuka bupopweshi bwa kine.—Isaya 2:2-4.
17 Kajo ka ku mupashi kapana Yehoba kechi wikapanatu pa kimye kyafwainwa ne, bino kekushañana. Mikoka ya bantu byo yalwilenga mu Nkondo ya kibiji ya Ntanda yonse, bantu ba Yehoba bakwashiwe kuta muchima ku kintu kyanema kukila ne lupulukilo lwabo abo bene. Yehoba wibakwashishe kumvwisha kuba’mba ene mambo avwangamo ne bilengwa byonse, aimena pa bumfumu bwa Yehoba. Kisangajika bingi kuyuka kuba’mba Bakamonyi ba kwa Yehoba batwajijila mu bukishinka pa muntu pa muntu batumbijika bumfumu bwa Yehoba ne kushiina Diabola amba wa bubela! (Byambo bya Mana 27:11) Kupusanako na Satana wamba bya bubela bya kubepela Yehoba ne bukalama bwanji, bantu ba Yehoba bakishinka batwajijila na kwamba’mba: “Yehoba ye waoloka mu mashinda anji onse.”—Masalamo 145:17.
18. Ñanyi kya kumwenako kya katataka kya kajo ka ku mupashi kekusha kapainwe pa kimye kyafwainwa?
18 Kya kumwenako kikwabo kya kajo ka ku mupashi kapainwe pa kimye kyafwainwa ke buku wa Palameni Kuli Yehova, walupwilwe pa kupwila kwa nkambi kwa “Bamukoyo wa Kutaya Mbila ya Bufumu” kwajingako mu 2002/03 kuzhokoloka mwaya ntanda. Uno buku wanengezhewe na ‘kalume wa kishinka ne wa maana’ ne kunembwa na Bakamonyi ba kwa Yehoba, waamba bingi pa byubilo byawama bya kwa Yehoba, kuvwangako ne byatongolwa mu Salamo 145. Uno buku wawama kine ubena kwingila mwingilo wanema wakukwasha bantu ba Lesa bakishinka kufwenya kwipi ne aye.
Kimye kya Kufwenya kwi Yehoba
19. Kimye ka kyafwenya kala pepi, kabiji twakonsha kubapo byepi?
19 Kine kimye kya kupwishishamo mambo a bumfumu bwa Yehoba kyafwenya kala ke pepi. Byonka byo kyaambijilwe jimo mu Ezikyo kyapitala 38, Satana aye “Gogi wa mu ntanda ya Magogi” katatakatu akapwishe mwingilo wanji. Kino kikavwangamo kulukuka bantu ba Yehoba mwaya ntanda. Kuno kukekala kulukuka kwakatazha bingi Satana mo akeseka konauna bulumbuluke bwa bantu ba Lesa bakishinka. Kyo kimye bapopweshi ba Yehoba bakamwita kya kine kukila ne kala, kumwita kuba’mba ebakwashe. Nanchi moyo wabo wa kwakamwa Lesa ne kumutemwa bikekala ke byatu nyi? Ine, mambo Salamo 145 yaamba’mba: “Yehoba uji kwipi na bonse bamwita. Ku bonse bamwita kya kine. Ukoba kyo basaka abo bamwakamwa; kabiji ukomvwa ne kwita kwabo ne kwibapulusha. Yehoba wibalama bonse bamutemwa; pakuba babi bonse ukebonauna.”—Masalamo 145:18-20.
20. Byambo biji mu Masalamo 145:18-20 bikekala byepi bya kine mu kimye kya kulutwe kyafwenya kala ke pepi?
20 Byo kikasangajikapo kufwenya kwipi na Yehoba ne kumona bulume bwanji bwa kupulusha kimye akonauna babi! Mu kyo kya kimye, kyafwenya kala ke pepi, Yehoba ukatelekatu ku “bonse bamwita kya kine.” Kwa kubula nangwa kuzhinaukatu ne, kechi ukateleka ku bakamfutumfutu ne. Byambo bya Lesa bitubula kuba’mba bangubabibi beta pa jizhina janji kimye saka kyapwa kala, javula kwita kwabo kwikala ke kwatutu.—Byambo bya Mana 1:28,29; Mika 3:4; Luka 13:24,25.
21. Bantu ba Yehoba bakishinka bamwesha byepi kuba’mba bengijisha jizhina ja Lesa?
21 Kino kyo kimye bonse bamwakamwa Yehoba kyo bafwainwa “kumwita kya kine” kukila ne kala. Bantu banji bakishinka bengijisha bingi jizhina janji mu lulombelo lwabo ne kwambapo pa kupwila. Bengijisha jizhina ja Lesa mu misambo yabo. Kabiji na mukoyo basapwila jizhina ja Yehoba mu mwingilo.—Loma 10:10, 13-15.
22. Mambo ka o kyanemena kuchinuzhuka byubilo ne bya kukebakeba bya ino ntanda?
22 Pa kutwajijila kumwenamo byawama mu bulunda bwetu na Yehoba Lesa, kyanema bingi kuchinuzhuka bintu byakonsha kwitubwezha mu nyuma ku mupashi nabiji kutemwisha bya ku mubiji, bya kisangajimbwe byatama, kukankalwa kulekelako bakwetu mambo, nangwa kubula kuta maana ku bayanji. (1 Yoano 2:15-17; 3:15-17) Umvwe ne kuleka bya kulondalonda ne byubilo bya uno mutundu ne, byakonsha kwitulengela twalenga mambo ne kubula kwikala bantu baitabilwa kwi Yehoba. (1 Yoano 2:1, 2; 3:6) Jishinda jimo ja maana ke kulabijila kuba’mba Yehoba ukatwajijilatu kwitumwesha kifyele nangwa amba butemwe bubula kwaluka posotu twaikala bakishinka kwi aye.—2 Samwela 22:26.
23. Ñanyi mapesho akatampe a kulutwe apembelela bonse bantu ba Lesa bakishinka?
23 Twayai tulangulukenga pa mapesho akatampe a kulutwe abena kupembelela bantu bonse ba Yehoba bakishinka. Inge saka tuba bino, tukekala na luketekelo lukatampe lwa kubajilwa pamo na bonse basangalela mwi Yehoba, bamutakaika ne kumutota “moba onse” kabiji “myaka ne myaka.” (Masalamo 145:1, 2) Onkao mambo, ‘twilamenga monka mu butemwe bwa Lesa buleta bumi bwa myaka.’ (Yuda 20, 21) Byo tubena kumwenamo mu byubilo byawama bya kwa Shetu wa mwiulu, kuvwangako ne butemwe bwanji bubula kwaluka bo amwesha bonse bamutemwa, lekai twambenga byambo byapelako byaambile Davida mu Salamo 145, kuba’mba: “Kyakanwa kyami kikambanga bya kumutota Yehoba; kabiji ne bonsetu batakaike jizhina janji jazhila myaka ne myaka.”
Musakukumbula’mba Ka?
• Masalamo 145 akwasha byepi kuyuka bantu ba Lesa bakishinka?
• Yehoba uba byepi kuba’mba ‘ekushe michima ya byonse byumi’?
• Mambo ka o twafwainwa kufwenyenya kwi Yehoba?
[Kipikichala pa peja 9]
Bantu ba Lesa bakishinka besamba bingi pa mingilo yanji ya kukumya
[Kipikichala pa peja 10]
Bamwingilo ba Yehoba na mukoyo bakwasha bantu babula kwitabila kufunda bya bufumu bwanji bwa lukumo
[Bipikichala pa peja 11]
Yehoba upana kajo ku “byonse byumi”
[Byambo bya Muntu Ungi]
Banyama: Parque de la Naturaleza de Cabárceno
[Kipikichala pa peja 12]
Yehoba upana bulume ne mikambizho ku bantu banji bakishinka, bamulomba kuba’mba ebakwashe