Nekenenainga Bakafunga Ba Butemwe
‘Kokelai bemutangijila ne kwibanekenena.’—BAHEBELU 13:17.
1, 2. Binembelo ka bimwesha kuba’mba Yehoba ne Yesu ke Bakafunga ba butemwe?
YEHOBA LESA ne Mwananji Yesu Kilishitu, ke Bakafunga ba butemwe. Isaya waawile amba: ‘Talai, Nkambo Yehoba awa, ubenakwiya na bulume, kasa akokesha bantu na kuboko kwanji; . . . Wauba nobe kafunga ujisha jitanga janji, ne kusenda baana ba mikooko mu maboko anji, kasa ebabukata mu kyaji kyanji, ne kwiitangijila bitende, bitende aya iji na baana.’—Isaya 40:10, 11.
2 Abuno bungauzhi bwafikizhiwe patanshi kimye Bayudea bashajilepo kyo babwelele mu Yuda mu 537 B.C.E. (2 Byambo bya Moba 36:22, 23) Kabiji bwaishile kufikizhiwa jikwabo kimye bashingwa bashajilepo kyo bebafumishe mu “Babilona Mukatampe” mu 1919 kwi Kilusa Mukatampe, aye Yesu Kilishitu. (Lumwekesho 18:2; Isaya 44:28) Yesu ye “kuboko” kwa Yehoba ulama bantu, usenda mikooko kabiji ne kwiifunga bulongo na kifyele. Yesu aye mwine waambile’mba: “Amiwa ne kafunga wawama; bami nebayuka, ne bami nabo bangyuka.”—Yoano 10:14.
3. Yehoba umwesha byepi amba wata bingi muchima mikooko yanji byo ilamwa?
3 Bungauzhi buji mu Isaya 40:10, 11, bumwesha Yehoba byo alama bulongo bantu banji. (Salamo 23:1-6) Kimye kya mwingilo wanji panopantanda, Yesu waubijile bingi lusa baana banji ba bwanga kabiji ne bantu bonsetu. (Mateo 11:28-30; Mako 6:34) Yehoba ne Yesu bashikilwe bingi bakafunga nangwa’mba bantangi ba mu Isalela baumine michima, basujile ne kujila makusu pa mitwe ya matanga abo. (Ezikyo 34:2-10; Mateo 23:3, 4, 15) Yehoba walayile amba: ‘Amiwa nkapulusha mikooko yami, kechi ikikekala ke ya kukwatwa ne; kabiji nkachiba mambo a mukooko umo na mukooko mukwabo. Kabiji amiwa nkabikapo kafunga umo wa kwiifunga, yenkaye kalume wami Davida, aye ukeifunga ne kwikala ke kafunga wayo.’ (Ezikyo 34:22, 23) Mu kino kimye kya mpelo, Yesu Kilishitu aye Davida Mukatampe, ye “kafunga umo” Yehoba ye apa bukulumpe pa bakalume Banji bonse ba panopantanda, ko kuba’mba bena Kilishitu bashingwa ne ‘mikooko ikwabo.’—Yoano 10:16.
Bya Bupe ku Kipwilo Kufuma kwi Yehoba
4, 5. (a) Ñanyi bupe bwanema Yehoba bo apana ku bantu banji panopantanda? (b) Ñanyi bupe Yesu bo apana ku kipwilo kyanji?
4 Yehoba wapana “kafunga umo,” aye Yesu Kilishitu, ku bakalume Banji ba panopantanda. Buno ke bupe bwanema bingi ku kipwilo kya bwina Kilishitu. Buno bupe bwa Ntangi wa mwiulu bwaambijilwe jimo mu Isaya 55:4 amba: “Umvwai, amiwa namutongwele namba ekale kamonyi ku mitundu ya bantu, ke ntangi wabo ne mukulumpe wabo.” Bena Kilishitu bashingwa ne ba mu “jibumba jikatampe” basalwa kufuma mu mikoka yonse, ne mu bisaka byonse, ne mu mitundu yonse, ne njimi yonse ya bantu. (Lumwekesho 5:9, 10; 7:9) Balenga kipwilo kya ntanda yonse, “jitanga jimo” jitangijilwa na “kafunga umo” aye Yesu Kilishitu.
5 Kabiji Yesu naye wapana bupe bwanema ku kipwilo kyanji kya panopantanda. Wapana bakafunga bakishinka balama jitanga mu butemwe byonka byuba Yehoba ne Yesu. Mutumwa Paulo waambilepo pa buno bupe bwa butemwe mu nkalata yanji ku bena Kilishitu mu Efisesa. Wanembele amba: ‘Byo akanjijile mwiulu, wasendele jibumba ja ntundu, kabiji wapaine byabupetu ku bantu. . . . Wapaine ku bamo butumwa, ku bamo bungauzhi, ku bamo busapwishi, ku bamo bukafunga ne bufunjishi; na mambo a [kupimpula bwikalo bwa, NW] bazhijikwa, bekale ba kwingila mwingilo, mu kukomesha mubiji wa Kilishitu.’—Efisesa 4:8, 11, 12.
6. Bakalama bashingwa bajinga mu jibumba ja bakulumpe mu kipwilo bafwanyikizhiwe byepi mu Lumwekesho 1:16, 20, kabiji ki ka kyakonsha kwambiwa pa bakulumpe mu kipwilo batongolwa ba mu mikooko ikwabo?
6 Bino “byabupetu ku bantu” ke bakalama nangwa’mba bakulumpe mu kipwilo, batongolwa na Yehoba ne na Mwananji kupichila mu mupashi wazhila kuba’mba balamenga bulongo jitanga. (Byubilo 20:28, 29) Pa kutendekatu, bano bakalama bonse bajinga banabalume bena Kilishitu bashingwa. Kwesakana na byaamba Lumwekesho 1:16, 20, aba bajinga mu jibumba ja bakulumpe mu kipwilo kya bashingwa bafwanyikizhiwe ku “tubangabanga” nangwa’mba “bamalaika” mu kuboko kwa kilujo kwa Kilishitu, ko kuba’mba ye wibatangijilanga. Nangwa byonkabyo, mu kino kimye kya ku mpelo, byo kiji kuba’mba kibelengelo kya bakalama bashingwa kibena kuyatu na kukepelako, bena Kilishitu bavula bakulumpe mu bipwilo ke ba mikooko ikwabo. Na mambo a kuba bano bakulumpe mu kipwilo batongolwa na bemenako Jibumba Jitangijila na lutangijilo lwa mupashi wazhila, nabo bakonsha kwambiwa amba baji mu kuboko kwa kilujo (nangwa’mba, batangijilwa na) Kafunga Wawama, aye Yesu Kilishitu. (Isaya 61:5, 6) Bakulumpe baji mu bipwilo byetu byo banekenena Kilishitu Mutwe wa kipwilo, twafwainwa kukwatankena nabo pamo.—Kolose 1:18.
Kukokela ne Kunekenena
7. Ñanyi mukambizho mutumwa Paulo ye aambile pa byo twafwainwa kumonanga bakalama ba bwina Kilishitu?
7 Bakafunga betu ba mwiulu, Yehoba Lesa ne Yesu Kilishitu, bakeba atweba kukokela ne kunekenena bakafunga bapewa mingilo mu kipwilo. (1 Petelo 5:5) Byo atangijilwe na mupashi, mutumwa Paulo wanembele amba: ‘Vulukai bajinga bakulumpe benu, bemusapwijile mambo a Lesa; kabiji langulukai ku mpelo ya bwikalo bwabo, ne kulonda lwitabilo lwabo. Kokelai bemutangijila ne kwibanekenena: mambo abo babena kwimukenkentela na mambo a kulama michima yenu, byo baketotolwela na mambo ayo: nasaka namba, bekyube kino na lusekelo, kechi na bulanda ne: mambo akya kechi kikemuletela kyawama ne.’—Bahebelu 13:7, 17.
8. Paulo witutundaika ‘kulanguluka’ ka, kabiji twafwainwa kwikala byepi ‘bakokela’?
8 Apano, Paulo witutundaika ‘kulanguluka,’ nangwa’mba kutalatala bulongo mpelo ya bwikalo bwakishinka bwa bakulumpe mu kipwilo ne kulondela bino bya kumwenako bya lwitabilo. Kabiji witukambizha kukokela ne kunekenena lutangijilo lwa bano banabalume batongolwa. Shayuka wa Baibolo aye Richard T. France, walumbulula’mba mu Kingiliki kine kitanshi, kyambo kyatuntululwa amba “kokelai” kechi “lukokelotu lonkalwe lubiwa jonse ne, bino kilumbulula ‘kwitabishiwa.’ Kyatala mu kuba’mba, ke kuswa buntangi bwabo na muchima yense.” Tukokela bakulumpe mu kipwilo kechi na mambotu a kuba’mba twakambizhiwa mu Mambo a Lesa kuba bino ne, bino ne na mambo a kuba’mba twaitabishiwa amba bata muchima pa bintu bya Bufumu, kabiji betuta bingi muchima ku mubiji ne bumupashi bwetu. Ee, tukekala balusekelo umvwe twaswa buntangi bwabo na muchima yense.
9. Mambo ka o twafwainwa “kunekenena,” kununga pa kwikala ba lukokelo?
9 Pano twafwainwa kuba byepi umvwe kya kuba twasumininwa kuba’mba jishinda bakulumpe mu kipwilo jo baubilamo bintu kechi joijo ne? Pa kimye kya uno mutundu, popo kikebewa kunekenena. Kyapela bingi kukokela umvwe bintu byonse bijitu bulongo kabiji twaswa ne kuswa byafuukulwa, pano bino tukamwesha kuba’mba kine tunekenena umvwe twalondela nangwa kya kuba pa bunke bwetu kechi twaumvwisha byafuukulwa ne. Petelo waishile kwikala mutumwa, wamwesheshe kuno kunekenena.—Luka 5:4, 5.
Bishinka Bina Byafwainwa Kwitulengela Kukwatankena Pamo na Bakalama ba Bwina Kilishitu
10, 11. Mu ñanyi jishinda bakalama mo ‘basapwijile mambo a Lesa’ ku bakwabo bena Kilishitu mu myaka kitota kitanshi kabiji ne lelo jino?
10 Mu Bahebelu 13:7, 17, baambiwapo peulu po, mutumwa Paulo waamba bishinka bina bya ene mambo o twafwainwa kukokela ne kunekenena bakalama ba bwina Kilishitu. Kishinka kitanshi ke kya kuba’mba ‘betusapwila mambo a Lesa.’ Vulukai kuba’mba “byabupetu ku bantu” Yesu byo apana ku kipwilo byaikelako “kupimpula bwikalo bwa bazhijikwa.” (Efisesa 4:11, 12, NW) Yesu wapimpwile ndangulukilo ne byubilo bya bena Kilishitu ba mu myaka kitota kitanshi kupichila mu bakafunga bakishinka, bamo batangijilwe na mupashi kunembela bipwilo makalata. Waingijishe bano bakalama batongwelwe na mupashi kutangijila ne kukosesha bena Kilishitu batanshi.—1 Kolinda 16:15-18; 2 Timoti 2:2; Titusa 1:5.
11 Lelo jino Yesu witutangijila kupichila mu ‘kalume wa kishinka ne wa maana,’ wimenwako na Jibumba janji Jitangijila ne bakulumpe mu kipwilo batongolwa. (Mateo 24:45) Byo tunemeka “Kafunga mwine mukatampe,” aye Yesu Kilishitu, tumvwina mukambizho wa kwa Paulo wa kuba’mba: “Yukai boba bengila mwi anweba, bo bemulama mwi Nkambo ne kwimufunda.”—1 Petelo 5:4; 1 Tesalonika 5:12; 1 Timoti 5:17.
12. Bakalama babena ‘kwitukenkentela byepi na mambo a kulama michima yetu’?
12 Kishinka kya bubiji kyafwainwa kwitulengela kukwatankena pamo na bakalama ba bwina Kilishitu ke kya kuba’mba ‘babena kwitukenkentela na mambo a kulama michima yetu.’ Umvwe bamona kintu kimo mu byubilo byetu kyakonsha kubika bumupashi bwetu mu kizumba, betufundako bukiji bukiji na mulanguluko wa kwitubwezha. (Ngalatiya 6:1) Kyambo kya Kingiliki kyatuntululwa amba “kwimukenkentela” kilumbulula amba “kubula kulaala tulo.” Shayuka umo wa Baibolo waamba’mba, kino kyambo “kilumbulula kukonkama kafunga ko akonkama.” Kununga pa kutwajijila kwikala balaba ku mupashi, bakulumpe mu kipwilo javula kechi balaala ne, na mambotu a kuta muchima bwikalo bwetu bwa ku mupashi. Nanchi kechi twafwainwa kukwatankena pamo na muchima yense na bano bakafunga ba butemwe, bengila papelela bulume bwabo kulonda kifyele kyamwesheshe Yesu Kilishitu, aye ‘kafunga mukatampe wa mikooko’ nenyi?—Bahebelu 13:20.
13. Kwi ñanyi bakalama ne bena Kilishitu bonse ko bakatotolola, kabiji mu ñanyi mashinda?
13 Kishinka kya busatu kyafwainwa kwitulengela kukwatankena pamo na bakalama ke kya kuba’mba babena kwitukenkentela mambo “baketotolwela.” Bakalama bavuluka kuba’mba ke bakafunga babena kwingila saka batangijilwa na Bakafunga ba mwiulu, Yehoba Lesa ne Yesu Kilishitu. (Ezikyo 34:22-24) Yehoba ye Mwina mikooko, yo ‘apotele na mashi a Mwananji,’ kabiji wibatotolwesha bakalama batongolwa mu jishinda jo balaminamo jitanga Janji, ajo jo bafwainwa ‘kulama bulongo.’ (Byubilo 20:28, 29, NW) Onkao mambo, atweba bonse tuketotolwela kwi Yehoba pa byo tubapo pa lutangijilo lwanji. (Loma 14:10-12) Kabiji byo tukokela bakulumpe batongolwa mu kipwilo, kimwesha byo tunekenena Kilishitu, Mutwe wa kipwilo.—Kolose 2:19.
14. Ki ka kyakonsha kulengela bakalama ba bwina Kilishitu kwingila “na bulanda,” kabiji ki ka kifumamo?
14 Paulo waambile kishinka kya buna kya ene mambo o twafwainwa kunekenena bakalama ba bwina Kilishitu. Wanembele amba: “Bekyube kino na lusekelo, kechi na bulanda ne: mambo akya kechi kikemuletela kyawama ne.” (Bahebelu 13:17) Byo baji na mingilo ikatampe ya kufunjisha, ya bukafunga, kutangijila mu mwingilo wa kusapwila, kulama bisemi byabo, ne kupwisha makatazho mu kipwilo, bakulumpe mu kipwilo bena Kilishitu basenda mutembo wanematu zaki. (2 Kolinda 11:28, 29) Onkao mambo, umvwe twabula kukwatankena nabo pamo, ko kuba’mba tubena kunemeshakotu mutembo wabo. Kino kibalengela kwingila na “bulanda.” Kumwesha muchima wa kubula kukwatankana kufichisha bingi Yehoba ku muchima kabiji kwakonsha ne kwituletela lukatazho. Pano bino, umvwe twamwesha munema wafwainwa ne kukwatankana, bakulumpe mu kipwilo bakonsha kwingila mingilo yabo na lusekelo kabiji kino kitukwatankanya ne kwikala basangalala pa kwingila mwingilo wa kusapwila Bufumu.—Loma 15:5, 6.
Kumwesha byo Tunekenena
15. Twakonsha kumwesha byepi lukokelo ne kunekenena?
15 Kuji mashinda avula o twakonsha kumwesheshamo amba twakwatankena pamo na bakalama batongolwa. Na mulanguluko wa kukeba kutana bantu mu nyaunda, nanchi bakulumpe mu kipwilo batanchika mutanchi wa kupwila kwa kuya mu mwingilo wa mu bujimi pa moba ne bimye bikebewa amba tupimpule mutanchi wetu nyi? Twayai twibikisheko kulondela lolo lunengezho lwa bukumo. Twakonsha kumwenamo bintu byawama bya kubula ne kuketekela ne. Nanchi mukulumpe utangijila mwingilo ukafwakesha jibumba jetu ja Lufunjisho lwa Buku lwa Kipwilo nyi? Twayai twingileko papelela bulume bwetu mu mwingilo wa kusapwila mu yeo mulungu. Abya twapewa jashi mu Sukulu ya Mwingilo wa Teokalasi nyi? Twafwainwa kwibikishako kwiya ne kwamba jashi jetu jo twapewa. Nanchi mukulumpe wa Lufunjisho lwa Buku lwa Kipwilo wabijika amba ke kimye kyetu kya kuwamisha Nzubo ya Bufumu nyi? Twayai tumukwashe ponka papelela butuntulu bwetu bwa mubiji ne bulume. Mu ano mashinda ne akwabotu, tumwesha amba twanekenena banabalume batongolwa na Yehoba ne Mwananji kulama jitanga.
16. Umvwe kya kuba mukulumpe waubila bintu mu jishinda jabula kulumbuluka, mambo ka kino o kyafwainwa kubula kwikela kintu kya kusatukilapo?
16 Kimo kimye mukulumpe mu kipwilo wakonsha kubila bintu mu jishinda jabula kwamba jibumba ja kalume wa kishinka ne Jibumba janji Jitangijila. Umvwe watwajijila kuba bintu mu jonkajo jishinda, bakamutotolwesha kwi Yehoba, ‘kafunga ne kalama wa michima yetu.’ (1 Petelo 2:25) Pano bino, kechi kyawamapotu nangwa pacheche kubula kukokela na mambotu a kuba’mba bakulumpe bamo mu kipwilo bauba bilubo nangwa bakankalwa kubila bintu mu jishinda jalumbuluka ne. Yehoba kechi ukwasha bantu ba milengulwila nangwa basatuka ne.—Kubala 12:1, 2, 9-11.
Yehoba Upesha Boba Bakwatankena Pamo na Muchima Yense
17. Bakalama betu twafwainwa kwibamonanga byepi?
17 Yehoba wayuka kuba’mba bantu boatongola kwikala bakalama bambulwakoloka. Nangwa byonkabyo, ubena kwibengijisha, kabiji ulama bantu banji baji panopantanda kupichila mu mupashi wanji. Bakulumpe mu kipwilo kubikapotu ne atweba bonse, twayuka kuba’mba ‘bukata bwine bwa bulume bo bwa Lesa, kechi bufuma mwi atweba ne.’ (2 Kolinda 4:7) Onkao mambo, twafwainwa kumusanchila bingi Yehoba pa byo abena kwingila kupichila mu bakalama betu bakishinka, kabiji twafwainwa kukwatankena nabo pamo na muchima yense.
18. Umvwe saka tunekenena bakalama betu mu kipwilo, ko kuba’mba tubena kuba ka?
18 Bakalama bengila na ngovu kwikela mwayila byambo bya Yehoba byo alumbulula bakafunga boatongola kujisha jitanga janji mu ano moba a kupelako bitanwa mu Yelemiya 3:15 byaamba’mba: ‘Kepo amiwa nkemupa bakafunga baya monka mwayila muchima wami, bo bakemujishanga byambo bya maana ne bya milangwe.’ Ee kine, bakulumpe mu kipwilo botuji nabo babena kwingila mwingilo wanema bingi wa kufunjisha ne kulamawizha mikooko ya Yehoba. Mwane kine twayai tutwajijile na kusanchila mwingilo wabo ye babena kwingila na ngovu kupichila mu kukwatankena nabo pamo, kwibakokela, ne kwibanekenena. Umvwe saka tuba bino, tukamwesha’mba twasanchila Bakafunga ba mwiulu, Yehoba Lesa ne Yesu Kilishitu.
Kupitulukamo
• Yehoba ne Yesu Kilishitu bemwesha byepi kwikala Bakafunga ba butemwe?
• Kununga pa lukokelo, mambo ka kunekenena o kukebewa?
• Mu ñanyi mashinda mo twakonsha kumweshesha kunekenena?
[Kipikichala pa peja 29]
Bakulumpe mu kipwilo ba bwina Kilishitu banekenena buntangi bwa Kilishitu
[Bipikichala pa peja 31]
Kuji mashinda avula a kumwesheshamo amba tunekenena bakafunga batongolwa na Yehoba