Kafwako Kyela Kyo Bakabunda Kya Kukulwishako Kikengila Bulongo Ne

“Kafwako kyela . . . kyo bakabunda kya kukulwishako obewa kikengila bulongo ne.”—ISAYA 54:17.

1, 2. Bintu byapichilemo Bakamonyi ba kwa Yehoba mu Albania bimwesha byepi bukine bwa byambo biji mu Isaya 54:17?

PA MYAKA yavula yapitapo, mu kyalo kicheche kya mitumba ku kabeta ka ku bulenge musela wa Europe, kwajingapo jibumba ja bena Kilishitu jachinchikile bingi. Kafulumende ukana amba Lesa kafwako waingijile papelela ngovu na kwipaya bano bena Kilishitu. Bino nangwa kya kuba bebamanyikilenga, kwibatwala mu makampu a lumanamo, ne kwibabepela, kechi bakonsheshe kwibalekesha ne. Bano bonka bena Kilishitu bajinga bañanyi? Bajinga Bakamonyi ba kwa Yehoba mu kyalo kya Albania. Nangwa kya kuba kyakatezhe bingi kupwila pamo ne kusapwila, bino byo batwajijila na kuchinchika pa myaka yavula yapita batwala palutwe ne kunemeka bwina Kilishitu ne kuleta lutotelo pa jizhina ja Yehoba. Mwaka wapwa wa 2006 byo bapainenga kwi Lesa musampi wabo wa katataka, Kamonyi umo waingila myaka yavula mu bukishinka waambile’mba: “Satana nangwa angalepotu byepi, ubatu saka ajamo mpwa kubula, bino Yehoba aye utwajijilatu na kushinda!”

² Bino byonse bimwesha bukine bwa mulaye wa Lesa ku bantu banji wanembwa mu Isaya 54:17 amba: “Kafwako kyela nangwa kimo kyo bakabunda kya kukulwishako obewa kikengila bulongo ne. Kabiji obewa ukebashinka bulaka bonse bakemana na kukushinawina mu kije.” Mwapita bwikalo bwa bantu kyamweshatu patoka amba kafwakotu nangwa kimo kyakonsha kuba ino ntanda ya kwa Satana kikalengela bakalume bepana kuleka kwingijila Yehoba Lesa ne.

Bilwilo bya Satana Kechi Bishinda Ne

3, 4. (a) Pa bilwilo bya Satana pavwangiwa ka? (b) Mu ñanyi jishinda bilwilo bya Diabola mo byabujila kushinda?

³ Bilwilo bingijishiwa kumanyikilako bapopweshi ba kine byavwangamo kwibalekesha mwingilo, kwibamanyika ku mabumba a bantu, kwibataya mu kaleya, ne ‘kwibatongola bya bubi.’ (Salamo 94:20) Mu byalo bimo, ne kino kyonka kimye Bakamonyi ba kwa Yehoba kyo babena kufunda uno mutwe, bena Kilishitu bamo ba kine babena ‘kwesekwa’ pa mambo a bulumbuluke bwabo kwi Lesa.—Lumwekesho 2:10.

⁴ Kya kumwenako, ofweshi wa musampi umo wa Bakamonyi ba kwa Yehoba washimwine kuba’mba mu mwaka umotu, kwajinga bimye 32 bakalume ba Lesa byo bebamanyikile kimye kyo bajinga mu busapwishi. Kabiji kwajinga bimye 59 Bakamonyi bakulumpe ne banyike, banabalume ne babakazhi byo bebakwachile ku bakapokola na mambotu a kusapwila. Bamo bebambijile amba bafwachike, kwibakopa bipikichala, ne kwibatayatu pakazhima nobe balwanyi nanchi ne. Bakwabo nabo bebazakamisha kukeba kwibakozha. Mu kyalo kikwabo, mambo afika ke 1,100 a kukwata Bakamonyi ba kwa Yehoba ne kwibakasa, nangwa kwibapuma. Mambo o bebapelemo kukila pa 200 ajinga a juba ja kupwila ko bajinga nako na kuvuluka lufu lwa kwa Yesu! Nangwa byonkabyo, mupashi wa Yehoba walengela bantu banji kutwajijila na bumi nangwa kya kuba bapita mu makatazho akilamo kutama, mu bino byalo ne mu byalotu bikwabo. (Zekaliya 4:6) Balwanyi kechi bakakonsha nangwatu pacheche kulekesha boba batakaika Yehoba ne. Ee, twayukishatu kuba’mba kafwako kilwilo nangwa kimo kyakonsha kushinda bantu ba Lesa ne.

Kwibashinka Bulaka Bantu ba Bubela

5. Ñanyi byambo bya bubela byo babepejile bakalume ba Yehoba mu myaka kitota kitanshi?

⁵ Isaya waawile’mba bantu ba Lesa bakashinka bulaka boba bebalukuka. Mu myaka kitota kitanshi, bena Kilishitu bebabepelanga, ne kwibamona nobe bangubabibi. Byambo biji mu Byubilo 16:20, 21 byaamba pa byo bebabepela amba: ‘Bano bantu, . . . babena kwitulengela kanwa mu muzhi wetu, ne kufunjisha bisela byazhila kutambula, nangwa kwibilama, atweba bena Loma.’ Pa kimye kikwabo, balwanyi ba mu bupopweshi baesekele kwambila bakalama ba mu muzhi amba babepele baana ba bwanga ba kwa Kilishitu amba: “Bano bakuvumika ntanda baiya ne kuno, . . . kabiji bano bonse bazhilulula mizhilo ya kwa Kesala.” (Byubilo 17:6, 7) Mutumwa Paulo bamutelele amba “mulwanyi” kabiji ntangi wa kajibumba ka bantu baletelenga mepatulo “panopantanda.”—Byubilo 24:2-5.

6, 7. Ñanyi jishinda jimo bena Kilishitu ba kine jo bamwesheshamo amba byambo byo bebambila bya bubela?

⁶ Ne lelo jino kechi tukumya ne, kuba’mba bena Kilishitu ba kine bebabepela. Mambo ka o kyakonsha kwambiwa’mba twashinda bino byambo bya bubela byo betwambila?—Isaya 54:17.

⁷ Abino byambo byo bebabepela bimweshatu patoka’mba bya bubela kupichila mu byubilo byawama bimwesha Bakamonyi ba kwa Yehoba. (1 Petelo 2:12) Umvwe bena Kilishitu balondela mizhilo ne kwikala na byubilo byawama ne kuta muchima kya kine ku bantu bakwabo, byambo byo bebambila bimweshatu patoka amba bya bubela. Byubilo byetu byawama bimwesha amba twibakishinka. Bantu byo betumona na kuba byubilo byawama, kibalengela kutumbijika Shetu wa mwiulu ne kuyuka bwikalo bwawama bwikelamo bakalume banji.—Isaya 60:14; Mateo 5:14-16.

8. (a) Kimo kimye kikebewa kuba ka pa kuba’mba twizhikijile ku bintu byo twaitabilamo mu Binembelo? (b) Byonka byajinga Kilishitu, ne atweba tushinda byepi boba betubepela?

⁸ Kununga pa byubilo byetu byawama bya bwina Kilishitu byo tumwesha, kimo kimye kikebewa kulumbulula bishinka bya mu Binembelo byo twaitabilamo. Jishinda jimo jo tubilamo bino ke kwisamba na makafulumende ne bije bya mambo kuba’mba twizhikijile. (Eshita 8:3; Byubilo 22:25-29; 25:10-12) Yesu byo ajinga panopantanda, kimo kimye wisambanga na bantu bamulengululanga, ne kwibashinawina pa byambo byo bamubepelanga. (Mateo 12:34-37; 15:1-11) Byonka byajinga Yesu, ne atweba tukeba kulumbulwila bantu bishinka byo twaitabilamo. (1 Petelo 3:15) Twayai tumone kuba’mba kechi twaleka myendeleko ku sukulu, pa nkito, nangwa ku balongo betu babula kwitabila kwitulekesha kuyukanyikisha bukine bwa Mambo a Lesa ku bantu ne.—2 Petelo 3:3, 4.

Yelusalema Wajinga ‘Jibwe Janema’

9. Ñanyi Yelusalema wafwanyikizhiwa ku ‘jibwe janema’ watongolwa mu Zekaliya 12:3, kabiji bañanyi babena kumwimenako panopantanda?

⁹ Bungauzhi bwa kwa Zekaliya bwalumbulula bulongo ene mambo mikoka ya bantu kyo imanyikila bena Kilishitu ba kine. Akimonai byaamba Zekaliya 12:3 amba: “Pa joja juba nkalula Yelusalema ke jibwe ja kwibanemena ba mu mitundu yonse ya bantu.” Ñanyi Yelusalema waambiwapo mu buno bungauzhi? Bungauzhi bwa kwa Zekaliya pa mambo a Yelusalema bwaamba kutazha ku “Yelusalema wa mwiulu,” Bufumu bwa mwiulu mwaitwa bena Kilishitu bashingwa. (Bahebelu 12:22) Ba mu kajibumba kacheche ka bano bashalapo ba mu Bufumu bwa Bumesiasa bakiji panopantanda. Bengijila pamo na balunda nabo ba ‘mikooko ikwabo,’ na kutundaika bantu kuba’mba bekale bangikazhi ba mu Bufumu bwa Lesa mema saka akiji mu kapokoso. (Yoano 10:16; Lumwekesho 11:15) Pano nga mikoka ya bantu yaubapo byepi pa luno lwito? Kabiji ñanyi bukwasho Yehoba bo apana ku bapopweshi banji ba kine lelo jino? Twayai tuyuke bishinka kupichila mu kwisamba mwatala Zekaliya kitango 12. Umvwe twauba bino, twakonsha kuyuka’mba ‘kafwako kilwilo kikashinda’ bashingwa ba Lesa ne balunda nabo bepana ne.

10. (a) Mambo ka bantu ba Lesa kyo bebalukukila? (b) Ki ka kimwekela boba bakeba kufumya ‘jibwe janema’ mu jishinda?

¹⁰ Zekaliya 12:3 wamwesha’mba mikoka ya bantu ‘ilemekwa kingitu.’ Kino kyubiwa byepi? Lesa waamba’mba mambo awama a Bufumu asapwilwe. Bakamonyi ba kwa Yehoba baswikwa bingi na mwingilo wa kusapwila. Pano uno mwingilo wa kutaya mbila ya kuba’mba Bufumu bo bonkatu bwaketekelamo bamo kwaikala ke ‘jibwe janema’ ku mikoka ya bantu. Bakeba kufumya jino jibwe mu jishinda kupichila mu kumanyika boba bataya mbila ya Bufumu. Mu kuba bino, mikoka ya bantu ikanya boba bataya mbila ‘ilemekwa kingitu,’ mubiji yensetu. Nangwatu jizhina jayo jaonaikilwa kumo, mambo bapulwilamotu mabula mu byo bakeba kukanya boba basapwila. Kechi bakonsha kulekesha bapopweshi ba kine banemeka mwingilo wa kutaya mbila ya “mambo awama a myaka” a Bufumu bwa Lesa bwa Bumesiasa mpelo ya buno bwikalo saka ikyangye kufika ne. (Lumwekesho 14:6) Muota umo wingijila ku kaleya mu kyalo kimo kya mu Africa byo amwene bakalume ba Yehoba na kwibamanyika waambile’mba: ‘Anweba bantu mumanyikañana mubena kutayatu kimye kyenu na kumanyika bano bantu. Kechi bakekileka ne. Bavujilangakotu.’

11. Lesa walama byepi mulaye wanji wanembwa pa Zekaliya 12:4?

¹¹ Tangai Zekaliya 12:4. Yehoba walaya’mba ukapofula ne ‘kuvulañanya’ mu bukifwanyikizho aba bamanyika bantu banji bataya mbila ya Bufumu na mukoyo. Byo alaya ukebifikizha. Kya kumwenako, mu kyalo kimo mo balekeshe mpopwelo ya kine, balwanyi kechi bakonsheshe kulekesha bantu ba Lesa kuba’mba babule kwikala na mabuku alumbulula Baibolo ne. Pepala wa byambo umo waambile’mba Bakamonyi ba kwa Yehoba batuminenga mabuku mu kyokya kyalo kupichila mu kwiabika mu mapulashitiki oluluka na mwela! Mulaye Lesa ye alaya bakalume banji wafikizhiwe wa kuba’mba: ‘Nkebasopa bulongo ne kupofula meso a bambili bonse ba ba mu mitundu ya bantu.’ Byo bapofulwa na bukaji, balwanyi ba Bufumu kechi bayuka kwa kuya ne. Bino atweba twayukishatu amba Yehoba ukazhikijila jibumba ja bantu banji ne kwibapa byo bakajilwa.—2 Bamfumu 6:15-19.

12. (a) Mu ñanyi jishinda Yesu mo aambwijile mujilo byo ajinga panopantanda? (b) Bashingwa bashalapo baambula byepi mujilo ku mupashi, kabiji ki ka kyafumamo?

¹² Tangai Zekaliya 12:5, 6. “Babitumbafumu ba bena Yuda” babena kwimenako boba batangijila bantu ba Lesa. Yehoba upana ku bakulumpe mu kipwilo bashingwa kizaku kya kwingila bintu byonse byalamata Bufumu bwanji panopantanda. Kimye kimo, Yesu waambijile baana banji ba bwanga amba: “Naishile kutaya mujilo panopantanda.” (Luka 12:49) Kya kine, waambwile mujilo wa bukifwanyikizho. Byo ajinga na mukoyo wa kusapwila, Yesu wasapwijilenga pa mambo a Bufumu bwa Lesa. Kino kyaletele mapata ku Bayudea. (Mateo 4:17, 25; 10:5-7, 17-20) Popamotu, ne lelo jino baana ba bwanga ba Kilishitu bambula mujilo ku mupashi, “nobe mbabula yayula mujilo yo batula mukachi ka nkunyi, kabiji nobe nsama ya mujilo iji mukachi ka bikuta.” Buku umo wa mu 1917 wasanzhilemo Kilishitendomu pa bukamfutumfutu bwanji. (The Finished Mystery)a Kino kyazhingijishe bingi bantangi ba bupopweshi. Katatakatu papo, kwalupwilwe talakiti wa Mbila ya Bufumu Na. 37, wajinga na mutwe wa kuba’mba, “Mpelo Ya Bupopweshi Bwa Bubela Iji Pepi!” Ino talakiti yalengela bantu bavula kusalapo kwikala ku lubaji lwa Bufumu bwa Lesa nangwa ne.

‘Mande nangwa’mba Matente a mu Yuda’ Azhikijilwe

13. Byambo bya kuba’mba “mande a bena Yuda” byatala mwepi, kabiji mambo ka Yehoba kyo azhikijila boba balukukwa?

¹³ Tangai Zekaliya 12:7, 8. Kala mu Isalela, mande nangwa’mba matente apuseneko bingi mu yoya ntanda, kimo kimye beengijishanga bajinga bakafunga ne banjimi. Bano bantu bo bajinga batanshi kwikala mu lukatazho kabiji bo bakebewanga kuzhikijilwa umvwe balwanyi baiya na kulukuka muzhi wa Yelusalema. Byambo bya kuba’mba “mande a mu Yuda” bimwesha’mba mu bukifwanyikizho bashingwa bashalapo mu ano moba kiji nobe baji mu mpunzha yabula kuzhikijilwa. Mu ino mpunzha mo mo bazhikijila bintu byonse byalamata Bufumu bwa Bumesiasa. Yehoba wa mabumba ukazhikijila “mande a mu Yuda” mambo bano Satana bo bo alukuka kyabaya.

14. Yehoba uzhikijila byepi boba baji mu “mande a mu Yuda” bakila mu kunekena?

¹⁴ Kya kine, mpito imwesha’mba Yehoba uzhikijila bano bashingwa bantomesha ba mu Bufumu baji mu “mande” mwaya ntanda.b Uzhikijila boba ‘bakila mu kunekena’ mu jishinda ja kuba’mba wibakosesha byonka byajinga Davida, mfumu wakosele mu nkondo.

15. Mambo ka Yehoba kyo ‘afukwila jimo kwibonauna ba mu mikoka yonse,’ kabiji kimye ka kyo akoba bino?

¹⁵ Tangai Zekaliya 12:9. Mambo ka Yehoba kyo ‘afukwila jimo kwibonauna ba mu mikoka yonse’? Mambo bobatu saka balukuka Bufumu bwa Bumesiasa. Byo bamanyika bantu ba Lesa, ko kuba’mba bazhachishiwa. Katatakatu bantu ba kwa Satana panopantanda bakalukuke japelako bapopweshi ba kine ba Lesa, kino kyo kikatwala ntanda yonse ku kyalondololwa mu Baibolo amba Amagedonyi. (Lumwekesho 16:13-16) Pa mambo a kuno kumanyikañana, Nchibamambo Mukatampe ukazhikijila bakalume banji ne kuzhijika jizhina janji ku mikoka ya bantu.—Ezikyo 38:14-18, 22, 23.

16, 17. (a) Ñanyi ‘kintu kyo batambula ba mwingilo wa Yehoba’? (b) Umvwe twachinchika makatazho a kwa Satana kimwesha ka?

¹⁶ Satana kechi ujipo na kilwilo kiji kyonse kyakonsha konauna lwitabilo nangwa kupwisha mukovyokovyo wa bantu ba Lesa mwaya ntanda ne. Mutende wetu wa ku mupashi ye tuji nanji na mambo a bulume bwa Yehoba bwa kwitupokolola, kyo ‘kintu kyo batambula ba mwingilo wa Yehoba.’ (Isaya 54:17) Kafwako muntu nangwa umo wakonsha kwitwangata mutende wetu ne butuntulu bwetu bwa ku mupashi ne. (Salamo 118:6) Satana ukatwajijilatu na kuleta lumanamo ne malwa. Inge twachinchika mu bukishinka kimye kya makatazho kimwesha’mba tuji na mupashi wa Lesa. (1 Petelo 4:14) Mambo awama a Bufumu bwa Yehoba bwaikajikwa abena kusapwilwa mwaya ntanda. Byonkatu biji bilwilo bya nkondo, ne makatazho aji nobe ‘binzhipunzhipu bya mabwe’ abena kufikila bantu ba Lesa. Pano bino Yehoba upana bulume ku bantu banji bwa kushinda ano makatazho aji nobe mabwe. (Zekaliya 9:15) Bashingwa bashalapo ne balunda nabo bakishinka kechi bakakonsha kwibalekesha mwingilo ne!

¹⁷ Tubena kutala kulutwe kimye kyo tukapokololwa kikupu ku makatazho a kwa Diabola. Tuji na lutekenesho mu bino byambo bya kuba’mba: ‘Kafwako kyela nangwa kimo kyo bakabunda kya kwitulwishako atweba kikengila bulongo ne, kabiji atweba tukebashinka bulaka bonse bakemana na kwitushinawina mu kije’!

[Tubyambo twa mushi]

Musakukumbula’mba Ka?

• Ki ka kimwesha’mba bilwilo bya kwa Satana byakankalwa kushinda?

• Yelusalema wa mwiulu wikala byepi ‘jibwe janema’?

• Yehoba uzhikijila byepi “mande a mu Yuda”?

• Byo tubena kunangijila ku Amagedonyi, mwaketekela ka?

[Bipikichala pa peja 23]

Bantu ba Yehoba mu Albania batwajijile kwikala bakishinka nangwa kya kuba Satana wibamanyikilenga

[Kipikichala pa peja 25]

Yesu wamwesheshe amba byonse byo bamubepejile kechi byajinga bya kine ne

[Bipikichala pa peja 26]

Kafwako kyela kyo bakabunda kya kulwishako boba basapwila mambo awama kikashinda ne