Funjishainga Baana Benu

Mako Kechi Walekele Ne

MAKO wanembeleko buku umo pa mabuku ana a mu Baibolo aamba pa bwikalo bwa Yesu. Ye buku mwipi pa ano mabuku ana kabiji wapela bingi kutanga. Nanchi Mako wajinga ñanyi? Wamuyukile Yesu nyi?—a Twayai tumone meseko o apichilemo Mako tuyuke kine kintu kyamulengejile kubula kuleka kwikala mwina Kilishitu.

Mako watongolwa kimye kitanshi pa jizhina mu Baibolo panyuma ya kuba Mfumu Heloda Agilipa wabika mutumwa Petelo mu kaleya. Juba jimo bufuku, malaika wafumishe Petelo mu kaleya, kabiji ponkapo wayile ku nzubo ya inanja Mako aye Maliya waikalanga mu Yelusalema. Kukaswa ne kukasululwa kwa Petelo mukaleya kwaubiwe byopapichile myaka nobe jikumi kufuma paipayijilwe Yesu pa Kijiilo kya Lupitailo mu 33 C.E.—Byubilo 12:1-5, 11-17.

Nanchi mwayuka ene mambo Petelo o ayijile ku nzubo ya kwa Maliya nyi?—Kampe kyajinga na mambo a kuba’mba wayukile ba mu kisemi kya kwa Maliya kabiji ne kuba’mba baana ba bwanga ba kwa Yesu bapwilanga mu nzubo yanji. Muvyala wanji Mako aye Banabasa wajinga mwana wa bwanga kufumatu pa Kijilo kya pa Pentekosta mu 33 C.E. Baibolo waamba kuba’mba Banabasa wapaine bukwasho bwavula bingi pa kimye kya Kijiilo kya Pentekosta. Onkao mambo, kyamweka Yesu wamuyukile Banabasa ne inanji wa mwanyike aye Maliya ne mwananji Mako.—Byubilo 4:36, 37; Kolose 4:10.

Mu Mambo anji awama, Mako wanembele’mba, bufuku bwa juba jo bamukwachile Yesu, pajinga ne nsongwalume wikumbakenye kisapi “pa mubiji wanji.” Mako wanembele’mba Yesu byo bamukwachile ku balwanyi, uno nsongwalume wanyemene. Uno nsongwalume wafwainwa wajinga ñanyi?—Kyamweka wajinga Mako. Onkao mambo, Yesu ne batumwa banji byo banyamukile kufuma pa nzubo po baikejiile na Kijiilo kya Lupitailo bufuku bwine bwa joja juba, kyamweka Mako wikumbakenye bukiji bukiji kisapi keebalondele.—Mako 14:51, 52.

Kya kine, Mako wajinga na mashuko avula bingi a kwendañena pamo na bakalume ba Lesa kabiji ne kwimwena bintu bikatampe byalamachile ku nkebelo ya Lesa. Kyamweka wajingapo kimye mupashi wazhila kyo aitulwilwe pa Pentekosta mu 33 C.E., kabiji wapwanañenenga bingi na bakalume ba Lesa bakishinka nabiji Petelo. Bino waendelanga ne pamo na muvyala wanji aye Banabasa, wakwashishe Saulo kupichila mu kumuleta kwi Petelo panyuma ya kupitapo myaka nobe isatu kufuma kimye Yesu kyo amumwekejile Saulo mu kimwesho. Byo papichileko myaka, Banabasa watuminwe ku Talasusa amba akamone Saulo.—Byubilo 9:1-15, 27; 11:22-26; 12:25; Ngalatiya 1:18, 19.

Mu 47 C.E., Banabasa ne Saulo batongwelwe kwingila mwingilo wa bumishonale. Basendele Mako, bino na mambo a bintu bimo byabula kyayukanyikwa, palutwe kacheche Mako wabwelelemo ku Yelusalema. Saulo waishile kuyukanyikwa na jizhina ja bena Loma amba Paulo, wazhingijile bingi. Kabiji kechi watajilepotu pa kino kintu kyo amwene kwikala kilubo kikatampe kyaubile Mako ne.—Byubilo 13:1-3, 9, 13.

Byo babwelele kufuma pa lwendo lwabo lwa bumishonale, ba Paulo ne Banabasa bashimikizhe bintu byaubiwe byawama bingi. (Byubilo 14:24-28) Pa kupitapo bañondo bacheche, bano bonse babiji bafuukwile kubwela na kukamona baana ba bwanga bakatataka bo basapwijile. Banabasa wakebelenga’mba bamusende Mako, bino mwayuka byalangulukile Paulo nyi?—“Walangulukile’mba, kechi kyawama kuya nanji ne,” mambo kimye kitanshi, Mako wibashile ne kubwela ku nzubo. Kintu kyalondejilepo kyalengejile Mako kwiumvwa kutama!

Michima munda ibapile kabiji panyuma ya “lupata lwine” ba Paulo ne Banabasa baabene. Banabasa wasendele Mako ke baye na kusapwila ku Kipilusa, kabiji aye Paulo wasalulwile kuya ne Silasa na kukapempula jibiji baana ba bwanga bakatataka monka mo bafuukwijile. Kyamweka kyamukolele bingi ku muchima Mako pa kulengela luno lukatazho pakachi ka ba Paulo ne Banabasa!—Byubilo 15:36-41.

Kechi twayuka ene mambo alengejile Mako kubwelamo ku nzubo kimye kitanshi ne. Kyamweka kwajinga kintu kimo kyo alangulukile aye mwine kwikala ene mambo amulengejile kubwelamo. Monse mo kyaikejile, Banabasa washiinwe’mba Mako kechi ukabwezhepo jibiji kyo aubile ne. Kabiji waambile kine. Mako kechi walekele kwikala mwina Kilishitu ne! Palutwe kacheche waingijilenga mwingilo wa bumishonale pamo ne Petelo kufikatu ne ku Babilona. Kufuma kokwa ko bajinga, Petelo watumine mitende, ne kwamba’mba: “Ne Mako mwanami naye wimwimuna.”—1 Petelo 5:13.

Mako ne Petelo bakwatankene bingi ku mupashi! Kino twikitana, umvwe twatanga mu Mambo awama a kwa Mako. Mu jino jishimikila Mako washimikizha bintu byo amubujile kwi Petelo pa mambo a bintu byo amwene. Kya kumwenako, langulukai pa jishimikila ja pa mambo a kipupu kikatampe pa Kizhiba kya Ngalilea. Mako wanungapo byambo byaamba kwalajile Yesu mu bwato kabiji ne po alajile, bintu byo akonsheshe kumona Petelo mambo wajinga wipaya masabi. Twayai atwe bene twimwene bino bintu kupichila mu kutanga ne kwesakanya ano mashimikila a mu Baibolo aji mu Mateo 8:24; Mako 4:37, 38; ne Luka 8:23.

Paulo byo bamukashile mu Loma, wamutakaikile bingi Mako na mambo a kumukwasha. (Kolose 4:10, 11) Kabiji Paulo byo ba mukashile jikwabo monka mu Loma, wanembelejile Timoti nkalata ne kumwambila’mba amupitule Mako ne kulumbulula’mba: “Mambo aye unkwasha bulongo mu mingilo.” (2 Timoti 4:11) Mako wakonsheshe kwingijila Lesa pakatampe bingi na mambo a kuba’mba kechi walekele kwikala mwina Kilishitu ne!

[Tubyambo twa mushi]

Mepuzho:

○ Mako waikalanga pi, kabiji mambo ka o mwakonshesha kwambila’mba kampe wamuyukile Yesu?

○ Ñanyi kikatakata wakwashishe ne kutundaika Mako?

○ Ki ka kyakonsheshe kulengela Mako kuleka kwikala mwina Kilishitu?

○ Twayuka byepi kuba’mba Mako waishile kutalwa bulongo kwi Paulo?

[Pictureon page 31]

Nga uno nsongwalume ñanyi? Ki ka kibena kumumwekela, kabiji mambo ka?

[Kipikichala pa peja 32]

Mfweto ka Mako yo amwenejilemo na mambo a kubula kuleka kwikala mwina Kilishitu?