Funjishainga Baana Benu

Timoti—Winengezhe Kabiji ne Kwipana Kwingila

“MWINENGEZHA kala nyi?” Nanchi bakimushikishapo kala buno bwipuzho nyi?— Awo muntu wimushikishe wakebelenga kuyuka umvwe mwikokozha kala nangwa ne. Kya kumwenako, kampe wikitazhizhe mu kuba’mba: ‘Nanchi muji na mabuku a kufundamo nyi? Nanchi mwatanga lufunjisho lujimo nyi? Byonka byo tusakumona, Timoti wajinga winengezha.

Kabiji Timoti wipaine. Nanchi mwayuka kino mo kyatala nyi?— Timoti byo bamubujile kwingijila Lesa, wajinga na muchima wajingapo na kalume wa Lesa mukwabo waambile’mba: “Amiwa bano! Ntumai amiwa.” (Isaya 6:8) Na mambo a kuba winengezhe ne kwipana, Timoti waikele bwikalo bwa lusekelo. Nanchi mukeba kuyuka bwikalo bwanji byo bwajinga nyi?—

Timoti wasemekejilwe mu Lisitila, muzhi wajinga kwalepa bingi na Yelusalema. Nkambo yanji Loisa ne inanji Yunisa, bafunjile bingi Binembelo. Nangwatu Timoti byo akijinga lukeke, batendekele kumufunjisha Mambo a Lesa.—2 Timoti 1:5; 3:15.

Timoti byo akijinga kampe saka akyangye kufikizha myaka 20, mutumwa Paulo ne Banabasa bapichile mu Lisitila pa lwendo lwabo lutanshi lwa busapwishi. Kyamweka pa kikye kimye bainanji ne bankambo yanji Timoti po po baikele bena Kilishitu. Nanchi mukeba kuyuka lukatazho lwapichilemo ba Paulo ne Banabasa nyi?— Bantu bashikilwe bena Kilishitu bamwashile Paulo mabwe, kumwalañanya ne kumukulumwina pangye ya muzhi. Balangulukile’mba wafwa.

Aba baitabijile bintu byo afunjishenga Paulo baishile ko aji, kabiji ne kubuka wabukile. Juba jalondejilepo, ba Paulo ne Banabasa bafumine mu Lisitila, bino palutwe kacheche babwelele monka. Byo babwelele, Paulo waambile jashi ne kubula baana ba bwanga’mba: “Mu bya malwa byavula mo mo tutwelela mu bufumu bwa Lesa.” (Byubilo 14:8-22) Nanchi mwayuka mo ekitazhizhe Paulo nyi?— Wikitazhizhe mu kuba’mba aba bengijila Lesa bakamanyikwanga. Palutwe kacheche Paulo wanembejile Timoti amba: “Bonse bakeba kwikala na munema wa kunemeka Lesa mwi Kilishitu Yesu, bakapatwanga.”—2 Timoti 3:12; Yoano 15:20.

Panyuma ya kuba ba Paulo ne Banabasa bafuma mu Lisitila, babwelelemo kwabo. Byo papichile bañondo bacheche, Paulo wasendele Silasa ne kubwela na kukakosesha baana ba bwanga bajinga bakatataka mu mapunzha mo asapwijile. Byo bafikile mu Lisitila, kyamweka Timoti wasekejile bingi pa kumona Paulo jikwabo! Kabiji kyamuletejile bingi lusekelo byo bamubujile kwi ba Paulo ne Silasa amba bendelenga nanji pamo. Timoti waswile luno lwito. Winengezhe kabiji ne kwipana kuya na kwingijila pamo nabo.—Byubilo 15:40–16:5.

Bano bonse basatu bayile nongo, baendele miseke yalepa bingi kabiji kulutwe bakakanjijile mu bwato. Byo bapatukile mu bwato, bayile ku Tesalonika ne ku kyalo kya Bangiliki. Kuno ko bayile bakwashishe bantu bavula kwikala bena Kilishitu. Bino bakwabo bazhingijile ne kulenga kiombe kya kubusha kiwowo. Ba Paulo, Silasa ne Timoti byo bamwene’mba bumi bwabo bwajinga mu kizumba, banyemejile ku Beliya.—Byubilo 17:1-10.

Paulo watumine Timoti kubwela ku Tesalonika mambo wajinga na kijikila pa baana ba bwanga bajinga bakatataka. Nanchi mwayuka kyo aikejile na kijikila nyi?— Palutwe kacheche, Paulo walumbulwijile bena Kilishitu ba mu Tesalonika amba: ‘Emukwashe ne kwimukosesha mu lwitabilo kuba’mba mubule kulefulwa.’ Nanchi mwayuka ene mambo Paulo o atumijile Timoti kuya na kwingila uno mwingilo wamubikile mu kizumba nyi?— Kyajinga na mambo a kuba’mba Timoti kechi wayukanyikilwe ku balwanyi bavula ne, kabiji wipaine kuya. Kino kyakebewenga kwikala wakosa! Ki ka kyafuminemo mu kwibafwakesha? Timoti byo abwelele kwi Paulo, wamubujile bena Tesalonika byo bajinga bakishinka. Onkao mambo, Paulo wibanembejile’mba: ‘Twakoseshiwa na lwitabilo lwenu.’—1 Tesalonika 3:2-7.

Timoti waingijile pamo ne Paulo pa myaka jikumi yalondejilepo. Palutwe kacheche, Paulo bamutayile mu kaleya mu Loma, kabiji Timoti ye bakasulwiletu kufuma mukaleya wayile na kwikala nanji. Byo ajinga mu kaleya, Paulo wanembejile nkalata bena Filipai, kyamweka Timoti ye wajinga munembeshi wanji. Paulo waambile’mba: ‘Naketekela kutuma Timoti kwi anweba, mambo kechi nji na muntu mukwabo uji na muchima pamo ne aye, ukateshako bulongo muchima ku bwikalo bwenu ne.’—Filipai 2:19-22; Bahebelu 13:23.

Bino byambo byafwainwa byamusangajikile bingi Timoti! Paulo wamutemenwe bingi Timoti, na mambo a kuba’mba winengezhe ne kwipana kwingila. Twaketekela namba ne anweba mukekala byonka byo ajinga.

Mepuzho:

○ Timoti wakomejile pi, kabiji ki ka kyaubiwe kimye Paulo kyo ayileko kimye kitanshi?

○ Timoti waubile byepi ba Paulo ne Silasa byo bamubujile’mba bendelenga naji pamo?

○ Timoti wamwesheshe byepi kukosa, kabiji mambo ka Paulo o amutemwejile kya kine?

[Kipikichala pa peja 18]

Ki ka kyaubiwa pa po?