Timoti Wakebeshe Bingi Kukwasha Bantu

Timoti wajinga mwanyike wamulume watemenwe bingi kukwasha bantu. Wayile ku mapunzha avula bingi na kukwasha bantu. Na mambo a kino, waikele bwikalo bwa lusekelo. Ukeba kuyuka byo aikelenga nyi?—

Timoti wakomejile mu muzhi ye batelanga’mba Lisitila. Kimye kyo akijingatu lukeke, bankambo yanji abo ba Loisa ne bainanji ba Yunisa batendekele kumufunjisha pe Yehoba. Byo akomenenga, Timoti wakebelenga kukwasha bantu kuyuka Yehoba.

Timoti byo akijingatu mwanyike, Paulo wamwambijile’mba aye nanji ku mapunzha akwabo na kusapwila. Timoti waswile kuya ne Paulo. Wakebelenga bingi kuya na kukwasha bantu.

Timoti wayile ne Paulo ku muzhi mukatampe ye batelanga’mba Tesalonika, wajinga mu kyalo kya Makedonya. Pa kuba’mba bafike ku uno muzhi, patanshi baendele panshi lwendo lwalepa bingi, apa bino bakanjila ne mu bwato. Byo bafikile, bakwashishe bantu bavula bingi kuyuka Yehoba. Pano bino, bantu bamo bazhingijile bingi kabiji bakebelenga ne kwipaya Paulo ne Timoti. Onkao mambo, Paulo ne Timoti bafumineko ne kuya na kusapwila ku mapunzha akwabo.

Byo papichileko bañondo, Paulo waambijile Timoti kubwela ku Tesalonika na kukwasha balongo ba mu kipwilo. Pa kuba’mba abwele ku uno muzhi ko bakebelanga kwibepaya, wafwainwe kukosa. Nangwa byonkabyo, Timoti wayile mambo a kuba watemenwe bingi balongo bajinga mu yewa muzhi. Byo abwelele kwi Paulo, wa mushimikizhe bintu byawama bingi pa bena Tesalonika. Balongo mu Tesalonika baingijilenga bingi bulongo.

Timoti waingijile ne Paulo pa myaka yavula bingi. Kimye kimo, Paulo wanembele’mba Timoti ye muntu ye afwainwe kutuma ku bipwilo. Timoti watemenwe Yehoba ne bantu.

Nanchi watemwa bantu ne kukeba kwibakwasha kufunda pe Yehoba nyi?— Inge watemwa bantu ne kukeba kwibakwasha, ne obewa ukekala bwikalo bwawama kabiji bwa lusekelo byonka byaikele Timoti.