Lekai Lesa Emutangijilenga Mu Bintu Byonse
“Lesa uno, ye Lesa wetu wa myaka ne myaka: Ye ukekala ntangi wetu kufika ne ku lufu.”—SALA. 48:14.
1, 2. Mambo ka o twafwainwa kulondela lutangijilo lwa Yehoba kukila kuketekela mu maana etu atwe bene, kabiji mepuzho ka o twakonsha kwipuzha?
UMVWE twalanguluka pa bintu byatu, kyapela bingi kwijimbaika atwe bene amba bijitu bulongo. (Mana. 12:11) Umvwe tukeba kya kine kuba kintu kyafwainwa kubula kuba mwina Kilishitu, muchima wetu wakonsha kwitujimbaika kuba’mba twikyube. (Yele. 17:5, 9) Onkao mambo, nyimbi wa masalamo wamwesheshe amba wajinga na maana byo alombele kwi Yehoba amba: “Mutume kyeya kyenu ne bukine bwenu; bintangijile.” (Sala. 43:3) Waketekejile mwi Yehoba, kechi mu maana anji mwine apelejile ne, kabiji Yehoba ye yenkatu wafwainwe kumutangijila. Byonka byajinga nyimbi wa masalamo, ne atweba twafwainwa kuketekela mwi Lesa kwitutangijila.
2 Pano mambo ka o twafwainwa kuketekela mu lutangijilo lwa Yehoba kukila kiji kyonse? Kimye ka kyo twafwainwa kukeba luno lutangijilo? Ñanyi byubilo byo twafwainwa kwikala nabyo pa kuba’mba tumwenemo mu luno lutangijilo, kabiji Yehoba witutangijila byepi lelo jino? Ano mepuzho anema o asakwambiwapo mu uno mutwe.
Mambo ka o Twafwainwa Kuketekela mu Lutangijilo lwa Yehoba?
3-5. Mambo ka o twafwainwa kuketekela kya kine mu lutangijilo lwa Yehoba?
3 Yehoba ye Shetu wa mwiulu. (1 Ko. 8:6) Wituyuka bingi bulongo pa muntu pa muntu kabiji wayuka ne michima yetu byo iji. (1 Sam. 16:7; Mana. 21:2) Mfumu Davida waambile kwi Lesa amba: “Mwayuka byo naikala ne byo naimana; Mwayuka milanguluko yami byo iji kwalepa. Ka paji nangwa kyambo kimo pa lujimi wami kyo mwabula kuyukisha, anweba Yehoba, ne.” (Sala. 139:2, 4) Yehoba byo etuyuka bulongo, twafwainwa kuketekela amba wayuka bintu bituwamina. Yehoba ye wa maana onse. Umona bintu byonse kukila muntu uji yense, ne kuyuka byakonsha kufumamo kufumatu ku ntendekelo yabyo. (Isa. 46:9-11; Loma 11:33) Ye ‘Lesa, yenka wa maana.’—Loma 16:27.
4 Kunungapo, Yehoba witutemwa kabiji kimye kyonse ukeba atweba kwikala bulongo. (Yoa. 3:16; 1 Yoa. 4:8) Byo aji Lesa wa butemwe, witupa byo tukeba. Mwana wa bwanga Yakoba wanembele’mba: “Bya kupana byonse byawama ne bya bupe byonse byalumbuluka bifuma mwiulu, kasa bikila panshi kufuma kwi Tata wa byeya.” (Yako. 1:17) Aba baleka amba Lesa ebatangijilenga bamwenamo bingi mu bumpanyi bwanji.
5 Kabiji Yehoba ye wa bulume bonse. O ene mambo nyimbi wa masalamo o aambijile’mba: “Aye waikala mwafyamika mwa kwa Mwine Wakila, Ukekalanga mu kimfute kya kwa aye Wa bulume bonse. Amiwa nkamutela Yehoba, namba, kyo kyami kya kufyamamo, yo nsakwa yami; Ye Lesa wami, mwi aye mo naketekela.” (Sala. 91:1, 2) Umvwe twalondela lutangijilo lwa Yehoba, ko kuba’mba tubena kukeba kufyama mwi aye Lesa ubula kukankalwa. Nangwatu twapita mu lumanamo, Yehoba witukwasha. Kechi uketulengesha bumvu ne. (Sala. 71:4, 5; Tangai Byambo bya Mana 3:19-26.) Ee, Yehoba wayuka bituwamina, ukeba atweba kwikala na bintu bitufwainwa, kabiji uji na bulume bwa kwitupa bino bintu. Byo kyakonsha kwikala bumbulwamaana umvwe twalengulula lutangijilo lwanji! Pano kimye ka kyo twafwainwa kukeba luno lutangijilo?
Kimye ka kyo Twafwainwa Kukeba Lutangijilo?
6, 7. Kimye ka kyo tukebewa lutangijilo lwa Yehoba?
6 Tukeba Lesa kwitutangijila mu bwikalo bwetu bonse, kufumatu ku bwanyike ne byo tukota. Nyimbi wa masalamo waambile’mba: “Lesa uno, ye Lesa wetu wa myaka ne myaka: Ye ukekala ntangi wetu kufika ne ku lufu.” (Sala. 48:14) Byonka byajinga nyimbi wa masalamo, ne bena Kilishitu ba maana kechi baleka kuketekela mwi Lesa kuba’mba ebatangijilenga ne.
7 Pano bino kuji bimye bimo byo tukeba kukwashiwatu ponkapo. Kimo kimye ‘tupelelwa,’ kampe ne kumanyikwa, kwikala na kikola kyaswezha, nangwa nkito kupwa. (Sala. 69:16, 17) Pa bimye bya uno mutundu, po pakebewa kulomba kwi Yehoba ne kusumininwa kuba’mba usa kwitukosesha tuchinchike ne kwitutangijila kuba’mba tufuukule bulongo bya kuba. (Tangai Salamo 102:17.) Pano bino tukebewa bukwasho bwanji ne mu mbajitu ikwabo. Kya kumwenako, umvwe ke tusapwile ku bakinkalankulo mambo awama a Bufumu, twafwainwa kukeba lutangijilo lwa Yehoba pa kuba’mba tusapwile bulongo. Kabiji byonse byo tubena kufuukula kuba kikale bya kisangajimbwe, mvwajilo ne mwekelo, balunda, nkito, sukulu, nangwatu bintu bikwabo, twingilatu bulongo kana twalondela lutangijilo lwa Yehoba. Kwambatu kine, tukebewa kutangijilwa mu mbaji yonse ya bwikalo bwetu.
Makatazho aji mu Kubula Kukeba Lutangijilo lwa Lesa
8. Evwa byo ajiile ku kyokya kipangwa wamwesheshe ka?
8 Nangwa byonkabyo vulukai kuba’mba, twafwainwa kwifuukwila atwe bene kulondela lutangijilo lwa Yehoba. Lesa kechi witukanjikizha kuba’mba etutangijilenga umvwe atwe bene kechi tubena kukeba ne. Muntu mutanshi wafuukwilepo kubula kulondela lutangijilo lwa Yehoba wajinga Evwa, kabiji kya kumwenako kyanji kimwesha bubi buji mu kubula kufuukula bulongo. Kabiji akilangulukai ne mwatajile byobya bintu byo afuukwilepo. Evwa wajiile kipangwa kyo bamukanyishishe mambo wakebele ‘kwikala pamo nobe Lesa mwine ne kuyuka byawama ne byatama.’ (Nte. 3:5) Byo aubile bino, wamwesheshe amba wakebele kwingila mwingilo wafwainwe kuba mwine Lesa, kwifuukwila aye mwine kyawama ne kyatama mu kifulo kya kulondela mikambizho ya Yehoba. Mu jino jishinda, wakaine bumfumu bwa Yehoba. Wakebelenga kwitangijila mwine. Mwatawanji Adama naye wasatukile.—Loma 5:12.
9. Umvwe twakana bumfumu bwa Yehoba, ko kuba’mba tubena kuba ka, kabiji mambo ka kino o kyaikela bumbulwamaana?
9 Lelo jino, umvwe ne atweba twabula kulondela lutangijilo lwa Yehoba, ko kuba’mba tubena kukana bumfumu bwa Yehoba. Kya kumwenako, akilangulukai pa muntu watemwa kutamba bipikichala bya bantu baji mulekese. Umvwe awo muntu uji mu kipwilo kya bwina Kilishitu, wayuka mikambizho ya Yehoba pa mambo a kino. Bubipisho bonse kechi bwafwainwa kutelwa nangwa kwibukomokatu ne. (Efi. 5:3) Umvwe uno muntu wakana mikambizho ya Yehoba, ko kuba’mba ubena kukana bumfumu bwa Yehoba, ne kukana lutangijilo lwanji. (1 Ko. 11:3) Buno ke bumbulwamaana, byonka byaambile Yelemiya amba: ‘Muntu mwine na maana anji kechi wakonsha kusalulula jishinda jawama kuyamo ne.’—Yele. 10:23.
10. Mambo ka o twafwainwa kwingijishishanga bulongo lūsa lwetu lwa kwifuukwila bintu?
10 Bamo bakonsha kuzhinauka byambo byaambile Yelemiya, ne kwamba’mba Yehoba byo etupele lūsa lwa kwifuukwila bintu, kechi wafwainwa kwitukatazha pa byo twingijisha luno lūsa ne. Nangwa byonkabyo kechi twafwainwa kulubamo kuba’mba lūsa lwa kwifuukwila bintu lwaikala mutembo kabiji bupe ne. Tuketotolwela kwi Lesa pa bintu byo twamba ne kuba. (Loma 14:10) Yesu waambile’mba: “Monka mo byayujila mu muchima ne kanwa kamba monka.” Kabiji waambile ne kuba’mba: “Mu muchima mo mulupuka milanguluko yatama, ne kwipayañana, ne bukende, ne bulalelale, ne bwivi, ne bubela bwa kubepela bantu, ne bya mwenga.” (Mat. 12:34; 15:19) Onkao mambo, byambo byetu ne byubilo byo tuba bimwesha muchima wetu byo aji. Bimwesha kya kine byo tuji. O ene mambo mwina Kilishitu wa maana kyo akebela lutangijilo lwa Yehoba mu bintu byonse. Mu jino jishinda, Yehoba umumona’mba, ‘waoloka mu muchima wanji.’—Sala. 125:4.
11. Tufunjilako ka ku bena Isalela ba kala?
11 Vulukai byamwekejile bena Isalela. Awa mukoka byo afuukwilepo bintu byawama, kukokela mikambizho ya Yehoba, Yehoba wibazhikijile. (Yosh. 24:15, 21, 31) Nangwa byonkabyo, javula bakankelwenga kwingijisha bulongo lūsa lwabo. Mu moba a kwa Yelemiya, Yehoba waambile pe abo amba: “Abo kechi bankokejile ne, nangwa kutako matwi ne, bino baendelengatu monka mwayila kumvwañana kwabo abo bene ne mwayila kukosa kwa michima yabo yatama, kabiji babwelele munyuma ne kuya kulutwe ne.” (Yele. 7:24-26) Byo kyaletelepo bulanda! Twayai tumone kuba’mba kuno kukosa kwa muchima kechi kwitulengela kukana lutangijilo lwa Yehoba ne kwenda mu mashinda etu atwe bene ne, mambo kino kyakonsha kwitulengela ‘kubwela munyuma ne kuya kulutwe ne’!
Twafwainwa Kuba Byepi pa Kuba’mba Tulondele Lujimuno lwa Lesa?
12, 13. (a) Kyubilo ka kitulengela kulondela lutangijilo lwa Yehoba? (b) Mambo ka lwitabilo kyo lwanemena?
12 Butemwe bwetu bo twatemwa Yehoba bo bwitulengela kulondela mikambizho yanji. (1 Yoa. 5:3) Nangwa byonkabyo, Paulo watongwelepo kintu kikwabo kyo tukebewa kwikala nakyo byo aambile’mba: “Twenda mu lwitabilo kechi mu kumona [na] meso ne.” (2 Ko. 5:6, 7) Mambo ka lwitabilo kyo lwanemena? Yehoba witutangijila mu “mashinda a bololoke,” bino ano mashinda kechi etulengela kwikala banonshi nangwa kwikala na bifulo mu ino ntanda ne. (Sala. 23:3) Na mambo a kino, twafwainwa kwikala na lwitabilo lwakosa kuba’mba tukatambule mfweto kwi Yehoba pa byo tubena kumwingijila. (Tangai 2 Kolinda 4:17, 18.) Kabiji lwitabilo lwitulengela kutondwa na bintu bya ku mubiji bicheche byo tuji nabyo.—1 Timo. 6:8.
13 Yesu wamwesheshe kuba’mba mpopwelo ya kine yavwangamo kwipana, kino nakyo kikebewa kwikala na lwitabilo. (Luka 9:23, 24) Bapopweshi bamo ba kishinka bepana bingi, bachinchika mu buyanji, lumanamo, misalululo, ne lupato lwakilamo kutama. (2 Ko. 11:23-27; Lum. 3:8-10) Lwitabilo lwakosa lo lwibalengela kwipana na lusekelo. (Yako. 1:2, 3) Lwitabilo lwakosa lo lwitulengela kusumininwa amba umvwe twalondela lutangijilo lwa Yehoba kyo kintu kyakijishamo kuwama. Twayukishatu kuba’mba mfweto ikatambula boba bachinchika mu bukishinka yakila buyanji buji bonse bwa kakimyetu kacheche.—Hebe. 11:6.
14. Mambo ka Hegala kyo epelwijile?
14 Kabiji monai ne kwipelula byo kukebewa pa kulondela lutangijilo lwa Yehoba. Kya kumwenako kya kwa Hegala wajinga muzha wa kwa Selai kyo kyalumbulula bulongo kino kishinka. Selai byo amwene kuba’mba kechi ukekalapo na mwana ne, washikwile Hegala ne kumupana kwi Abalahama, kabiji Hegala waimichile kwi Abalahama. Byo amwene’mba waimita wasujile nkambo yanji wamukazhi. Kino kyo kyalengejile’mba Selai ‘amukatazhenga Hegala,’ ne kunyema wanyemene. Bino malaika wa Yehoba wamusambakene Hegala ne kumwambila’mba: “Bwela kwi nkambo yobe umunekenene.” (Nte. 16:2, 6, 8, 9) Kampe Hegala wakonsheshe kukebapo lutangijilo lukwabo. Pa kuba’mba obile monka mwaambijile malaika, wafwainwe kuleka kwitota. Nangwa byonkabyo, Hegala wipelwile monka mwamwambijile malaika, kabiji mwananji wa mulume aye Ishimela wasemekejilwe pa muzhi wa bashanji.
15. Londololaipo bintu bimo bimwesha kulondela lutangijilo lwa Yehoba byo kukebewa atweba kwipelula lelo jino.
15 Kulondela lutangijilo lwa Yehoba kwakonsha kukebewa ne atweba kwipelula. Bamo bakonsha kuyuka amba bya kisangajimbwe byo batemwa kechi bisangajika Yehoba ne. Mwina Kilishitu wakonsha kuzhingijisha mukwabo kabiji wakonsha kulomba lulekelo lwa mambo. Nangwa walengele kilubo kabiji ukeba kwitaba. Pano kyakonsha kwikala byepi umvwe muntu walenga mambo akatampe? Wafwainwa kwipelula ne kusolola mambo anji ku bakulumpe mu kipwilo. Awo muntu wakonsha ne kupangiwa mu kipwilo. Pa kuba’mba akabwezhiwe mu kipwilo, wafwainwa kwipelula ne kulapila ne kwaluluka. Mu bino bintu ne mu bintutu bikwabo, byambo biji mu Byambo bya Mana 29:23 bitekeneshañana bingi, byaamba’mba: “Kwitota kwa muntu kukamuletela kupelulwa, pakuba awa uji na muchima wipelula ukatumbijikwa.”
Yehoba Witutangijila Byepi?
16, 17. Twakonsha kumwenamo byepi mu Baibolo byo aji nsulo ya lutangijilo lwa Lesa?
16 Lutangijilo lwine lwa Lesa luji mu Baibolo, Mambo a Lesa anembeshiwa na mupashi. (Tangai 2 Timoti 3:16, 17.) Pa kuba’mba tumwenemo pakatampe mu Mambo a Lesa, kechi twafwainwa kupembelela twaikala mu lukatazho lukatampe bino kokoko ke tukebe bukwasho mu Binembelo ne. Mu kifulo kya byobyo, twafwainwa kwikala na muteeto wa kutanganga Baibolo pa juba pa juba. (Sala. 1:1-3) Mu jino jishinda, tuyuka byambo byanembwa mu Mambo a Lesa. Twikala na milanguluko ya Lesa, kabiji kino kyakonsha kwitulengela kuyuka mwakubila ne na makatazho apulumukatu.
17 Kabiji kunungapo, kyanema bingi kulangulukanga pa byo tutanga mu Binembelo ne kulombapo. Umvwe saka tulanguluka languluka pa byepelo bya mu Baibolo, tumona byo byakonsha kwitukwasha mu mbaji yapusana pusana. (1 Timo. 4:15) Umvwe twaikala na makatazho akatampe, tulomba kwi Yehoba, ne kulomba bukwasho kuba’mba tumone lutangijilo lwawama. Mupashi wa Yehoba witukwasha kuvuluka mafunde a mu Binembelo akonsha kwitukwasha, o twatanga mu Baibolo nangwa mu mabuku alumbulula Baibolo.—Tangai Salamo 25:4, 5.
18. Mu ñanyi mashinda Yehoba mo engijishisha balongo bonse ba bwina Kilishitu kwitutangijila?
18 Balongo betu bonse ba bwina Kilishitu nabo bakonsha kwitukwasha kukeba lutangijilo lwa Yehoba. Bukwasho bukatampe bwa bano balongo bufuma kwi ‘kalume wa kishinka ne wa maana’ pamo ne Jibumba Jitangijila jimwimenako, jinengezha kimye kyonse kajo ka ku mupashi keshila mu mabuku ne mitanchi ya kupwila kwa kipwilo ne kupwila kukatampe. (Mat. 24:45-47; esakanyaiko Byubilo 15:6, 22-31.) Kabiji kunungapo, monka mu balongo betu bonse muji balongo bafikapo kikatakata bakulumpe mu kipwilo bakonsha kwitukwasha ne kwitujimunako mu Binembelo. (Isa. 32:1) Bakyanyike baji mu mazubo a bwina Kilishitu baji na jishuko jikwabo. Lesa wapana lūsa ku bansemi baji mu lwitabilo lwa kupana mikambizho ku baana babo, kabiji baana nabo bafwainwa kulondela ino mikambizho kufuma ku bansemi babo.—Efi. 6:1-3.
19. Ñanyi mapesho o twiyowa na mambo a kutwajijila na kukeba lutangijilo lwa Yehoba?
19 Ee, Yehoba utangijilañana mu mashinda avula, kabiji twafwainwa kulondela luno lutangijilo. Mukoka wa bena Isalela byo aikele wa kishinka, Mfumu Davida waambile’mba: “Bashakulu betu bemuketekejilenga: Bemuketekejilenga, ne anweba mwibapokolwele. Bemujijilenga, ne kupuluka bapulukile: Bemuketekejile, kabiji kechi bamweshiwe bumvu ne.” (Sala. 22:3-5) Umvwe twaketekela ne kulondela lutangijilo lwa Yehoba, ne atweba ‘kechi tukamweshiwa bumvu ne.’ Luketekelo lwetu lukafikizhiwa. Inge ‘twafikizha jishinda jetu kwi Yehoba,’ mu kifulo kya kuketekela mu maana etu atwe bene, tukamwenamo mfweto nangwatu luno lonka. (Sala. 37:5) Kabiji umvwe twatwajijila mu bukishinka ne kukokela Yehoba, ino mfweto ikekala ya myaka ne myaka. Mfumu Davida wanembele’mba: ‘Yehoba watemwa buchibamambo bwaoloka, Ne kwibalekelela bazhijikwa banji ne; Abo bakalamwa myaka ne myaka . . . Baoloka bakaswana ntanda, Ne kwikalamo myaka ne myaka.’—Sala. 37:28, 29.
Mwakonsha Kulumbulula Nyi?
• Mambo ka o tuketekela mu lutangijilo lwa Yehoba?
• Umvwe twakana lutangijilo lwa Yehoba tumwesha’mba ka?
• Mu ñanyi bintu bimo mukebewa mwina Kilishitu kwikala wipelula?
• Yehoba witutangijila byepi lelo jino?
[Bipikichala pa peja 8]
Nanchi muketekela mwi Yehoba mu mbaji yonse ya bwikalo bwenu nyi?
[Kipikichala pa peja 9]
Evwa wakaine bumfumu bwa Yehoba
[PictureCaption on page 10]
Kyubilo ka Hegala kyo akebewenga kwikala nakyo pa kuba’mba alondele byamwambijile malaika?