Baibolo Witukwasha Kuyuka Kyawama ne Kyatama

LESA YE WAFWAINWA KWITUBUULA KYAWAMA NE KYATAMA

Mu Baibolo, Yehobaa Lesa witubuula’mba bantu bakebewa lutangijilo lwanji kechi kwiubila bintu nangwa kwitangijila abo bene ne. (Yelemiya 10:23) O ene mambo o etupeela mizhilo iji mu Baibolo. Watemwa bingi bantu kabiji kechi ukeba’mba tufuukulenga bintu byakonsha kubika bumi bwetu mu kizumba ne kulengela bwikalo bwetu kukatazha ne. (Mpitulukilo ya mu Mizhilo 5:29; 1 Yoano 4:8) Kyakila pa byonse, byo aji Mulenga wetu, uji bingi na maana kabiji wayuka mizhilo ituwamina yafwainwa kwitukwasha. (Salamo 100:3; 104:24) Nangwa byonkabyo, Lesa kechi ukanjikizha bantu kukookela mizhilo yanji ne.

Yehoba wapeele mwanamulume ne mwanamukazhi mutanshi, Adama ne Evwa bintu byonse byafwainwe kwibasangajikanga. (Ntendekelo 1:28, 29; 2:8, 15) Wibapeele ne mikambizho yabujile kukatazha yo bafwainwe kulondela. Nangwa byonkabyo, wibapeele luusa lwa kwifuukwilapo kukookela nangwa ne. (Ntendekelo 2:9, 16, 17) Kya bulandatu ke kya kuba’mba Adama ne Evwa bafuukwilepo kintu abo bene kyo balangulukilenga’mba kijitu bulongo ne kukana mizhilo ya Lesa. (Ntendekelo 3:6) Ñanyi bintu byafumamo? Nanchi mufuma lusekelo inge bantu bafuukula bintu kwesakana na mo balangulukila nyi? Ine. Pa myaka yavula yapitapo twimwena’mba mu kulengulula mizhilo ya Lesa kechi mufuma mutende ne lusekelo ne.​—Musapwishi 8:9.

Baibolo wakonsha kwitukwasha kuyuka bya kufuukula bintu bulongo nangwa kya kuba twikala ku mapunzha apusana pusana ne nkomeno yapusana pusana. (2 Timoti 3:16, 17; monai kakitenguluzha ka kuba’mba “Buku wa Bantu Bonse.”) Monai Baibolo byo afwainwa kwimukwasha kuba bino.

Funjilaipo byavula pa ene mambo o twafwainwa kutelela Baibolo amba “mambo a Lesa.”​—1 Tesalonika 2:13. Tambai vidyo wa kuba’mba Ñanyi Mwine Mwina Baibolo? uji pa jw.org.

BAIBOLO WITUBUULA LESA BYO AKEBA ATWEBA AMBA TUBENGA

Mu Baibolo muji byambo bya kine byalumbulula Lesa byo oba na bantu kufumatu ku ntendekelo. Byambo bijimo bitukwasha kuyuka Lesa byo amona kyawama ne kyatama, bintu byafwainwa kwitukwasha ne byakonsha kubika bumi bwetu mu kizumba. (Salamo 19:7, 11) Mafunde ajimo kimye kyonse aketekelwa kabiji etukwasha kufuukula bulongo mu bintu byo tuba mu bwikalo bwetu bonse.

Monai lujimuno luji pa Byambo bya Maana 13:20 lwa kuba’mba: “Awa wenda na ba maana ukekala na maana, Pakuba awa ukaya na bakosama ukamona bya malwa.” Ne lelo jino, bino byambo bya kine byonkatu byo byajinga kala. Mu Baibolo muji mafunde akwabo avula kabiji akwasha bingi bantu.​—Monai ka kitenguluzha ka kuba’mba “Maana aji mu Baibolo.”

Kampe mubena kulanguluka’mba: ‘Nafwainwa kuba byepi pa kuba’mba nshiinwe’mba mafunde a mu Baibolo akonsha kunkwasha?’ Monai byapichilemo bantu bamo mu bwikalo mu mutwe walondelapo.