Nanchi Kuji Wafwainwa Kwitukwasha bya Kukekala Bulongo Kulutwe Nyi?

Byonkatu byo baamba mu mitwe yafumako, bantu baeseka kuba bintu bya kuba’mba bibakwashe kukekala bulongo kulutwe. Baketekela mu bintu nabiji amba Lesa wibanengezhezha jimo kala bikekala bwikalo bwabo, kufunda, kwikala na bunonshi ne kwikala na byubilo byawama. Kulanguluka bino kujitu pamo na kuya ku mpunzha ko mwabula kuyuka saka babena kwimutangijila ku muntu wabula kuyukako. Nanchi kino kibena kulumbulula’mba kafwako wakonsha kwitukwasha kuyuka bya kukekala bulongo kulutwe nyi? Ine mwane ne!

BAIBOLO YE WAFWAINWATU KWITUKWASHA

Pa kufuukulapo bya kuba mu bwikalo twipuzha muntu wakoma kabiji uji na maana kwitubuulako bya kuba. Byo byo kiji ne kwi atweba pa kuba’mba tuyuke bikekala bwikalo bwa kulutwe. Muntu wakoma kwitukila kabiji uji bingi na maana ye wafwainwa kwitukwasha kuyuka bwikalo bwa kulutwe. Walumbulula bwikalo bwa kulutwe byo bukekala mu buku wanembelwe kala kene myaka 3,500 yapitapo. Uno buku ke Baibolo.

Pano mambo ka o twafwainwa kuketekela Baibolo? Mambo Baibolo wafuma ku muntu uji bingi na maana kukila muntu yense pano pa ntanda. Uno muntu bamulumbulu’mba “wa Kala Kene” wajingako “kufumatu kala kene kufika ne myaka ne myaka.” (Danyela 7:9; Salamo 90:2) Ye “Mulenga walengele bya mwiulu, Lesa wa kine, yenka walengele ntanda.” (Isaya 45:18) Witubuula mwine jizhina janji amba Yehoba.—Salamo 83:18.

Baibolo kechi waamba’mba bantu bamo banema kukila bantu bakwabo ne. Mambo yenka wanembele Baibolo ye walengele bantu bonse. Kabiji bintu byo aamba bikwasha bantu bonse pano pa ntanda. Bamunemba mu milaka yavula bingi kukila mabuku akwabo kabiji bantu bavula baji nanji.a Onkao maambo, bantu bavula kufuma mu mapunzha apusana pusana batanga Baibolo ne kulondela byo aamba. Abino bishinka byakwatankana bingi na byaamba Baibolo mwine amba:

“Lesa kechi uji na misalululo ne, bino mu bisaka byonse muntu umwakamwa ne kuba byaoloka ye witabilwa kwi aye.” —BYUBILO 10:34, 35.

Byonkatu biji bansemi batemwa baana babo ne kwibakwasha, ne Yehoba Lesa naye byo aji Shetu wa butemwe wingijisha Baibolo kwitubuula bya kuba. (2 Timoti 3:16) Mwafwainwa kuketekela byaamba Mambo anji. Yehoba ye witulengele kabiji ye wayuka bintu byafwainwa kwitukwasha kwikala na lusekelo.

TWAFWAINWA KUKETEKELA BYAAMBA BAIBOLO

Twafwainwa kuketekela byaamba Baibolo pa bwikalo bwa kulutwe mambo lelo jino tubena kwimwena bintu byo aambilepo myaka 2,000 yapitapo. Baibolo waambijile jimo pa bintu bikamwekanga mu ntanda ne pa byubilo bya bantu byo bikekala byonkatu byo tubena kwibimona lelo jino.

BAIBOLO WAAMBIJILE JIMO BINTU BIKAMWEKANGA’MBA:

“Kisaka kikalukuka kisaka kikwabo ne bufumu bukalukuka bufumu bukwabo. Kukekala bitentanshi bikatampe, ne bipowe bya nzala ne myalo kuku ne kuku.”—LUKA 21:10, 11.

BAIBOLO WAAMBIJILE JIMO BIKEKALA BYUBILO BYA BANTU AMBA:

“Mu moba a kupelako kukeya bimye byakatazha. Mambo bantu bakekala betemwatu abo bene, batemwa mali, bejantula, belundumika, ba mwenga, babula kukookela bansemi, babula kusanta, babula bukishinka, babula butemwe, babula kukeba kumvwañana, ba luntepentepe, babula kwikanya, bashinta, babula kutemwa kyawama, basolola bakwabo, babula kumvwa, betota, batemwa bya kisangajimbwe mu kifulo kya kutemwa Lesa.”—2 TIMOTI 3:1-4.

Kyaikala byepi kuba’mba bintu byaambijilepo jimo Baibolo bibena kumweka lelo jino? Mwafwainwa kuswa byaambile ba Leung bekala ku Hong Kong. Baambile’mba: “Bungauzhi bubena kufika ano moba bebunembele kala kene. Kafwako muntu nangwa umo wafwainwa kwambila jimo bintu bibena kumweka mu ano moba ne. Baibolo bamunembele ku muntu uji bingi na maana kwitukila atweba.”

Mu Baibolo muji bungauzhi bwavula bingi bwafika kala.b Bino bishinka byamwesha’mba Baibolo kine Mambo a Lesa. Yehoba waamba’mba: “Amiwa yami Lesa, kafwako mukwabo waesakana ne amiwa ne. Kufumatu ku ntendekelo amiwa ñambila jimo bintu bikamweka kulutwe.” (Isaya 46:9, 10) Na mambo a bino bishinka mwafwainwa kuketekela byaamba Baibolo pa bwikalo bwa kulutwe.

MAFUNDE AFWAINWA KWIMUKWASHA LELO JINO NE KULUTWE

Inge saka mulondela mafunde aji mu Baibolo, mukamwenamo bintu byawama bingi. Akimonai bintu bimo byawama byo tumwenamo.

BYO TWAKONSHA KUMONANGA MALI NE NKITO

“Kyawama kukokolokako kukila kukizhamo kwingila mingilo ne kupulwilamotu mabuula.”—MUSAPWISHI 4:6.

BYA KWIKALA BULONGO MU KISEMI

“Muntu yense wafwainwa kutemwa mukazhanji byonka byo etemwa aye mwine; kabiji mwanamukazhi naye wafwainwa kwikala na mushingi mukatampe ku mwatawanji.”—EFISESA 5:33.

BYA KUMVWAÑANANGA NA BAKWETU

“Kange uzhingile nangwa kubuuka bukaji ne; kange uzhingile ne kuba bintu byatama ne.”—SALAMO 37:8.

Inge saka mwingijisha byaamba Baibolo mu bwikalo bwenu luno mukekala bingi bulongo kulutwe. Mu Baibolo muji milaye yawama bingi itulaya Lesa kulutwe nabiji milaye ya kuba’mba

TUKEKALA MU MUTENDE NE KUZHIKIJILWA

“Bakasangalelanga mu kuvula kwa mutende.”—SALAMO 37:11.

BANTU BONSE BAKEKALA NA MAZUBO NE KAJO KAVULA

“Bakashimika mazubo ne kwikalamo, kabiji bakajimba miñanzañanza ne kuja bipangwa byayo.”—ISAYA 65:21.

BIKOLA NE LUFU KECHI BIKEKALAKO NE

“Lufu, mabingo, kujila ne misongo kechi bikekalako jibiji ne.”—LUMWEKESHO 21:4.

Mwafwainwa kuba byepi pa kuba’mba mukekale bulongo kulutwe? Tangai mutwe walondelapo.

a Pa kuba’mba muyuke bishinka byaamba pa kutuntulula ne kusampanya Baibolo, yai pa keyala wa www.jw.org po banemba’mba BIFUNJISHA BAIBOLO > BAIBOLO NE BYA MPITO.

b Pa kuba’mba muyukilepo bishinka bikwabo, monai kitango 9 mu buku wa The Bible—God’s Word or Man’s? wanemba Bakamonyi ba kwa Yehoba. Mwafwainwa kumutaana pa keyala wetu wa www.jw.org. Yai po banemba’mba MABUKU > MABUKU NE MABULOSHUWA.