Anweba Bene Mwafwainwa Kufuukulapo
Bintu byonse byo tufuukulapo kuba bilengela bwikalo bwetu kuwama nangwa ne. Yehoba Lesa wayuka kino kishinka. O ene mambo o abena kwitubuujila’mba tulondelenga mikambizho yanji.
Yehoba ukeba atweba kwikala bwikalo bwa mutende kabiji bwa lusekelo.
“Amiwa yami Yehoba Lesa wenu, yenka wimufunjisha kuba’mba mumwenemo, yenka wimutangijila mu jishinda jo mwafwainwa kuyamo. Kine, umvwe mwakookela mikambizho yami! Mutende wenu ukekala nobe mukola ne bololoke bwenu bukekala nobe manyaki a pa kalunga ka mema.”—Isaya 48:17, 18.
Byo aji Mulenga wetu, Lesa ye wayuka bintu byafwainwa kwitukwasha kwikala bulongo. Ubena kukeba’mba tulondelenga mizhilo yanji mambo iketukwasha. Inge twalondela mikambizho ya Lesa, bintu byo tukafuukulanga kuba mukafumanga bintu byawama bingi. Kabiji kimye kyonse tukafuukulanga bintu byawama biketuletela mutende ne lusekelo.
Yehoba kechi witwambila kuba bintu byakatazha ne.
“Uno mukambizho ye mbena kwimukambizha lelo jino kechi wakatazha ne, kabiji kechi uji kwalepa ne anweba ne.”—Mpitulukilo ya mu Mizhilo 30:11.
Pa kuba’mba tulondelenga mizhilo ya Lesa mu bwikalo bwetu, twafwainwa kupimpula byo tulanguluka ne mo tubila bintu. Nangwa byonkabyo, Yehoba kechi ubena kwitukebela bintu byakatazha kuba ne. Mambo byo aji Mulenga wetu, wayuka papelela bulume bwetu. Onkao mambo, inge twamuyuka bulongo Yehoba, tukamonanga’mba “mikambizho yanji kechi yakatazha ne.”—1 Yoano 5:3.
Yehoba walaya kukwasha bonse balondela mikambizho yanji
“Amiwa Yehoba Lesa wobe nakukwata ku kuboko kobe kwa kilujo, Yami mbena kukwambila namba, ‘Kuchina ne, amiwa nkakukwasha.’”—Isaya 41:13.
Twakonsha kwikela monka mwayila mizhilo ya Yehoba mambo twayuka’mba uketukwasha. Witutundaika kupichila mu Mambo anji etulengela kwikala na luketekelo.
Bantu bavula kuzhokoloka ntanda yonse bamwenamo mu kulondela mizhilo ya Yehoba mambo yawamisha bwikalo bwabo. Mwakonsha kutendeka kufunda mu buloshuwa wa Mukekala Myaka ne Myaka! kyatutu uji pa jw.org. Muji ino mitwe:
Baibolo Wafwainwa Kwimukwasha Byepi Kwikala Bwikalo Bwawama?
Baibolo Witubuula Bintu Byawama Biji Kulutwe
Nanchi Mwaketekela Byaamba Baibolo Nyi?
Byo mubena kubalaula Mambo a Lesa Baibolo, musakuyuka’mba kechi yapwa kinto ne, mambo “kimye kyonse yaketekelwa, pa kino kimye ne myaka ne myaka.” (Salamo 111:8) Kulondela mizhilo iji mu Baibolo kwanema bingi mu bwikalo bwetu. Nangwa byonkabyo, Lesa kechi uketukanjikizha kuba bino ne. (Mpitulukilo ya mu Mizhilo 30:19, 20; Yoshua 24:15) Atweba bene twafwainwa kwisajilapo.