Bantu ba Yehoba Batemwa Bololoke

1. Ñanyi lweseko Yosefwa lo bapichilemo kabiji waubile byepi?

YOSEFWA mwana Yakoba wapichile mu lweseko lwakatazha bingi. Mwanamukazhi wamwambijile’mba: “Laala ne amiwa.” Wajinga muka nkambo yanji Potifwalo. Bino Yosefwa wakaine. Bamo bakonsha kwamba’mba: ‘Pano mambo ka o akanyijile?’ Mambo Potifwalo wafuminepo. Kabiji Yosefwa wajinga muzha mu yonka ino nzubo. Kukana byakebelenga uno mwanamukazhi kwakonsheshe kubika Yosefwa mu lukatazho. Nangwa byonkabyo, watwajijile kukana. Mambo ka? Waambile’mba: “Nanchi nakonsha kuba byepi buno bubi bukatampe ne kumulenga mambo aye Lesa?”—Nte. 39:7-12.

2. Yosefwa wayukile byepi kuba’mba kuba bukende kulenga mambo kwi Lesa?

² Yosefwa wayukile byepi amba Lesa umona bukende kuba’mba “mambo akatampe”? Mambo pa kyokya kimye, Mizhilo ya Mosesa mwajinga muzhilo wa kuba’mba “Kechi wafwainwa kuba bukende ne,” kechi bakiinembele ne. Papichile myaka 200 pa kuba’mba inembwe. (Lupu. 20:14) Nangwa byonkabyo, Yosefwa wayukile Yehoba byo afwainwa kumvwa ku muchima umvwe muntu wauba bukende. Yosefwa wayukile’mba Yehoba ye wabikileko masongola. Ko kuba’mba mwanamulume wafwainwa kusongalatu mwanamukazhi umo kwapwa. Kabiji kyamweka waumvwineko Yehoba byo azhikijile bankambo yanji ba Sala jibiji jo basaka bakebalenge mambo ne byo azhikijile Libeka muka Isaka. (Nte. 2:24; 12:14-20; 20:2-7; 26:6-11) Kulanguluka languluka pa bino bintu kwamulengejile kuyuka kyawama ne kyatama. Na mambo a kuba’mba Yosefwa watemenwe Yehoba waubile kintu kyaoloka ku meso a Yehoba.

3. Ñanyi bintu byo tusakwisambapo mu uno mutwe?

³ Nanchi mwatemwa bololoke nyi? Kwakubula nangwa kuzhinaukatu ne, mwibutemwa. Pano bino, atweba bonse twi bambulwa kulumbuluka, inge ne kujimuka ne, twakonsha kumonanga bintu byabula koloka nobe byaoloka. (Isa. 5:20; Loma 12:2) Onkao mambo, twayai twisambe pa bololoke byo bulumbulula ne byo tumwenamo inge ketube byaoloka. Kepo tusakwisamba mashinda asatu afwainwa kwitukwasha kutemwa mafunde a Yehoba.

BOLOLOKE BULUMBULULA KA?

4. Ñanyi byubilo bimwesha bantu babula koloka?

⁴ Bantangi babupopweshi ba mu moba a kwa Yesu pano pa ntanda balangulukilenga’mba baubilenga bintu byaoloka. Nangwa byonkabyo, Yesu wibapelemo mambo, mambo bemweshanga’mba baoloka kukila bakwabo. Kabiji bebikijile mizhilo yabo abo bene ya kuyuka kyawama ne kyatama. (Sapwi. 7:16; Luka 16:15) Ne mu ano moba, bantu boba byaubilenga bantangi babupopweshi kobaji. Batemwa kuzhachisha bakwabo ne kwimona’mba baoloka kukila bakwabo kabiji bakizhamo kwiketekela. Bino byubilo byatama bifichisha bingi Yehoba ku muchima kabiji washikwa bantu boba bintu byabula koloka.

5. Kwesakana na byaamba Baibolo, bololoke bulumbulula ka? Ambaipo bintu bimo.

⁵ Bololoke ke kyubilo kyawama bingi. Kilumbulula kuba bintu Yehoba byo aamba’mba byawama. Muntu ‘waoloka’ ke yewa ulondela mafunde a Yehoba. Yehoba waambile’mba basulu bafwainwa kwingijisha “bya kupiminako kinemenezhi byalumbuluka.” (Mpitu. 25:15) Kyambo kya Kihebelu kyatuntululwa’mba “byalumbuluka” kyakonsha ne kutuntululwa’mba “byaoloka.” Onkao mambo, mwina Kilishitu ukeba kwilala waoloka kwi Lesa kechi wafwainwa kujimukila bakwabo mu bya busulu ne. Muntu watemwa bololoke kechi ukeba kumona mukwabo na kumuyanjisha ne. Muntu waoloka ‘pa kuba’mba atokeshe Yehoba ku muchima’ ufuukwila bintu monka mukebela Lesa.—Kolo. 1:10.

6. Mambo ka o twafwainwa kuketekela bitubuula Yehoba byaamba kyawama ne kyatama? (Isaya 55:8, 9)

⁶ Baibolo wamulumbulula Yehoba amba ye Mwine wakilamo koloka. O ene mambo, o bamutelela’mba: “Yenka wa bololoke.” (Yele. 50:7) Yehoba byo aji Mulenga, ye mwine uji na luusa lwa kubikako mafunde aamba pa kuyuka kyawama ne kyatama. Yehoba byo aji walumbuluka wayuka bingi bulongo kyawama ne kyatama. Pakuba atweba kechi twakonsha kuyuka kyawama ne kyatama ne, mambo twi bambulwa kulumbuluka kabiji twi bandengamambo. (Maana. 14:12; tangai Isaya 55:8, 9.) Nangwa byonkabyo, na mambo a kuba’mba twalengelwe mu kipasha kya Lesa, twafwainwa kuba byo aamba’mba byo byawama. (Nte. 1:27) Kabiji tukebesha bingi kuba byo etubuula. Twibikako bingi kuba bikeba Shetu mambo twamutemwa bingi.—Efi. 5:1.

7. Mambo ka o twafwainwa kulondelanga mafunde? Lumbululai.

⁷ Tumwenamo byawama bingi umvwe ketulondele mafunde aamba pa kuyuka kyawama ne kyatama. Mambo ka? Fwanyikizhai kyakonsha kumweka mu kyalo inge taunyi yense keelengele tuyukilo ne mizhilo ya pa mukwakwa nangwa kyakonsha kumweka inge ntungi wabula kulondela bipimo byo bamubuula kulondela pa kushimika kishimikwa. Mwakonsha kufuma malwa. Kabiji umvwe badokotala ne bamanase babula kulondela bulongo mashinda a kubukilamo bakolwa mwakonsha kufuma lufu. Onkao mambo, bantu inge balondela mafunde o babikako, bakonsha kuzhikijilwa. Po pamotu mafunde a Lesa aamba pa kuyuka kyawama ne kyatama aikelako kwituzhikijila.

8. Ñanyi bintu Yehoba byo alaya bantu batemwa bololoke?

⁸ Yehoba upesha bonse balondela mafunde anji. Walaya’mba: “Baoloka bakaswana ntanda, kabiji bakekalangamo myaka ne myaka.” (Sala. 37:29) Fwanyikizhai bantu balondela mafunde a Yehoba byo bakakwatankana, kusangalala ne kwikala mutende. Abino Yehoba byo byo akeba’mba mukekalenga. Atweba bonse kuji byafwainwa kwitulengela kutemwa bololoke. Pano twakonsha kutwajijila byepi kutemwa kino kyubilo? Twayai twisambe pa mashinda asatu afwainwa kwitukwasha.

TWAJIJILAI KUTEMWA MAFUNDE A YEHOBA AOLOKA

9. Ñanyi kintu kyakonsha kwitulengela kutemwa bololoke?

⁹ Jishinda jitanshi: Mwafwainwa kutemwa bingi Mwine mwina mafunde. Pa kuba’mba tutemwe bololoke twafwainwa kutemwa bingi Yehoba. Yenka wabikako mafunde a kuyuka kyawama ne kyatama. Umvwe twatwajijila kutemwa Yehoba tukakebesha bingi kuba bintu byaoloka. Akilangulukai pa kino: Umvwe Adama ne Evwa batemenwe Yehoba inge kechi bamusatukijile ne.—Nte. 3:1-6, 16-19.

10. Abalahama waubile byepi pa kuba’mba akwatakanye bilanguluka Yehoba?

¹⁰ Kechi tukeba kulubankanya byonka byalubankenye Adama ne Evwa ne. Twakonsha kuchinuzhuka kino inge twatwajijila kufunda pe Yehoba, kutemwa byubilo byanji ne kuyuka milanguluko yanji. Umvwe ke tube bino tukamutemwa bingi Yehoba. Akilangulukai pe Abalahama. Watemenwe bingi Yehoba. Nangwa kimye kyo akankelwe kuyuka ene mambo Yehoba o afuukwijilepo kuba bintu bimo, Abalahama kechi wasatukile ne. Pakuba Abalahama wakebeshe bingi kumuyuka bulongo Yehoba. Byo aumvwine’mba Yehoba wafuukulapo konauna muzhi wa Sodoma ne Gomola, Abalahama waumvwine moyo kuba’mba “Mutonyi wa ba pano pa ntanda” ukonawina pamo baoloka ne babi. Mambo kechi wakwatakenye kino ne. Onkao mambo, waipwizhe Yehoba mepuzho avula bingi. Yehoba wamutekenyejile ne kumukumbula. Kepo Abalahama ayukile’mba Yehoba utalatala mu michima ya bantu ne kuba’mba kechi ukambula bantu babula mambo pamo na babi ne.—Nte. 18:20-32.

11. Abalahama wamwesheshe byepi amba watemwa Yehoba ne kumuketekela?

¹¹ Abalahama waumvwine bingi bulongo byo besambile pa konaunwa kwa muzhi wa Sodoma ne Gomola. Kino kyamulengejile kutemwa Shanji wa mwiulu ne kumunemeka. Palutwe kacheche, Abalahama wapichile mu kintu kikatampe bingi kyaesekele luketekelo lwanji mwi Yehoba. Yehoba wamwambijile kulambula mwananji ye atemenwe bingi aye Izaka. Pa kikye kimye, Abalahama saka amuyuka bulongo Lesa. Onkao mambo, kechi wazhinaukile byo amubuujile kuba ne. Abalahama winengezhezhe kuba byamubuujile Yehoba. Nangwa byonkabyo, fwanyikizhai bulanda bo ajinga nabo byo anengezhezhenga kulambula mwananji. Abalahama wafwainwa walangulukile bingi pa bintu byo afunjile pe Yehoba. Wayukile kuba’mba Yehoba kechi wafwainwa kuba kintu kyabula koloka nangwa kibula kumwesha butemwe ne. Kwesakana na byaambile mutumwa Paulo, Abalahama walangulukile kuba’mba Yehoba uji na bulume bwa kusangula mwananji Izaka ye atemenwe bingi. (Hebe. 11:17-19) Mambo Yehoba wamulayile kuba’mba bisaka byonse bya pano pa ntanda bikobilwa bibusa kupichila mwi Izaka kabiji pa kyokya kimye Izaka kechi wakijingapo na mwana ne. Abalahama watemenwe bingi Shanji aye Yehoba. Onkao mambo, waketekejile’mba jonse uba byaoloka. Na mambo a lwitabilo wakookejile nangwa kyakuba kyo bamubuujile kuba kyakatezhe bingi.—Nte. 22:1-12.

12. Twakonsha kuba byepi byonka byaubile Abalahama? (Salamo 73:28)

¹² Twakonsha kuba byepi byonka byaubile Abalahama? Twafwainwa kutwajijila kufunda pe Yehoba. Umvwe twauba bino, po po tukafwenya kwipi ne aye kabiji tukamutemwa bingi. (Tangai Salamo 73:28.) Tukalangulukanga byonka bilanguluka Yehoba. (Hebe. 5:14) Ne kikafumamo, muntu inge witweseka kuba kyatama tukakananga. Kabiji tukachinuzhukangatu ne kulanguluka pa kintu kyatama kyakonsha kufichisha Shetu wa mwiulu ku muchima ne konauna bulunda bwetu ne aye. Ñanyi jishinda jikwabo jo twakonsha kumwesheshamo amba twatemwa bololoke?

13. Ñanyi bintu byakonsha kwitukwasha kutwajijila kuba byaoloka? (Byambo bya Maana 15:9)

¹³ Jishinda ja bubiji: Twajijilai kubanga byaoloka pa juba pa juba. Pa kuba’mba tutemwe mafunde a Yehoba aoloka, twafwainwa kwibikangako bingi kwialondela. Twafwainwa kubanga bino pa juba pa juba. Yehoba wituyuka bingi bulongo kabiji kechi witukebela bintu byo twafwainwa kukankalwa kuba ne. (Sala. 103:14) Witulaya’mba “watemwa yewa ukeba bololoke.” (Tangai Byambo bya Maana 15:9.) Inge paji kyo tukeba kuba mu mwingilo wa Yehoba, twingila bingi na ngovu pa kuba’mba twikifikizhe. Abino byo byo twafwainwa kwingila na ngovu pa kuba kyaoloka. Kabiji Yehoba uketutekenya ne kwitukwasha kutwajijila kuba bintu byawama nangwa kyakuba pakonsha kupita moba pa kuba’mba tufikilemo.—Sala. 84:5, 7.

14. “Kyela kya pa kyaji kya bololoke” kyo ki ka, kabiji mambo ka o tukebela kwikala nakyo?

¹⁴ Yehoba wituvululamo’mba kuba bintu byaoloka kechi kwakatazha ne. (1 Yoa. 5:3) Pakuba bituzhikijila kabiji bonse tukeba kuzhikijilwa pa juba pa juba. Vulukai bivwalo bya nkondo byaambilepo mutumwa Paulo. (Efi. 6:14-18) Ñanyi kivwalo kizhikijila muchima wa mushilikale? Ke “kyela kya pa kyaji kya bololoke” kimenako mafunde a Yehoba aamba pa kuba byaoloka. Byonkatu kyela kya pa kyaji byo kyazhikijilanga muchima wa mushilikale, ne mafunde a Yehoba aamba pa kuba kyawama azhikijila muchima wetu wa kifwanyikizho ko kuba’mba milanguluko. Onkao mambo, pa bivwalo byenu bya nkondo pafwainwa kwikala ne kyela kya pa kyaji kya bololoke.!—Maana. 4:23.

15. Mwakonsha kuvwala byepi kyela kya pa kyaji kya bololoke?

¹⁵ Mwakonsha kuvwala byepi kyela kya pa kyaji kya bololoke? Mwakonsha kwikala na kino kivwalo umvwe saka mulondela mafunde a Lesa mu bintu byo muba pa juba pa juba. Pa kufuukula bya kwamba, nyimbo ya kutelekako, filimu wa kutamba nangwatu buku ye mukeba kutanga, patanshi mwafwainwa kwishikisha’mba: ‘Ñanyi bintu byo mbena kufunjisha muchima? Nanchi bino bintu bitundaika byubilo bya Lesa nyi? Nangwa bitundaika bulalelale, bukapondo, lunkumbwa, byubilo bya kwitemwa ko kuba’mba bintu Yehoba byo amona’mba byabula koloka nyi?’ (Fili. 4:8) Umvwe saka mufuukula kuba bintu bitokesha Yehoba ku muchima, mukazhikijila milanguluko yenu ku bintu byatama.

16-17. Kinembelo kya Isaya 48:18 kitutundaika byepi kulondela mafunde a Yehoba aoloka?

¹⁶ Nanchi mwaakamwa’mba kana mukatwajijila kulondela mafunde a Yehoba aamba pa kuba byaoloka mu bwikalo bwenu nyi? Akilangulukai pa byambo byaamba Yehoba biji pa Isaya 48:18. (Tangai.) Yehoba witulaya’mba bololoke bwenu “bukekala nobe manyaki a pa kalunga ka mema.” Fwanyikizhai kuba’mba mwaimana ku kitulu kya kalunga ka mema saka mubena kutala manyaki byo abena kwimana. Nanchi mwakonsha kwakamwa’mba juba jimo manyaki akaleka kwimana nyi? Ine. Mambo mwayuka kuba’mba manyaki emanatu kikupu kabiji kechi akaleka ne.

¹⁷ Bololoke nabo buji nobe manyaki a kalunga ka mema. Mu ñanyi jishinda? Inge mukeba kufuukulapo bintu bimo, patanshi mwafwainwa kulanguluka pe Yehoba byo akeba’mba mube. Kepo mwakonsha kuba kyo mwafuukulapo. Onkao mambo, kechi twafwainwa kwakamwa inge kyo tukeba kufuukulapo kyakatazha ne. Mambo Shetu wa butemwe uji ne atweba, uketukosesha kabiji uketukwasha kubanga bintu byaoloka pa juba pa juba.—Isa. 40:29-31.

18. Mambo ka o twafwainwa kuchinuzhukila kuzhachisha bakwetu?

¹⁸ Jishinda ja busatu: Kechi twafwainwa kuzhachishanga bakwetu ne, twafwainwa kulekela Yehoba. Twibikako bingi kulondela mafunde aoloka a Yehoba. Pano bino twafwainwa kujimuka ne kuchinuzhukanga kuzhachisha bakwetu ne kumona nobe twaoloka kukila bakwetu. Kechi tuji na luusa lwa kuzhachisha nangwa kubingisha bakwetu ne. Twafwainwa kuvuluka’mba Yehoba ye “Mutonyi wa ba pano pa ntanda ponse.” (Nte. 18:25) Yehoba kechi witupa luno luusa ne. O ene mambo, Yesu o etukambizhizha’mba: “Kilekai kuzhachisha bakwenu pa kuba’mba bakabule kwimuzhachisha.”—Mat. 7:1.b

19. Yosefwa wamwesheshe byepi kuba’mba waketekejile mu bunchibamambo bwa Yehoba?

¹⁹ Twayai twisambe jikwabo pe Yosefwa mwanamulume wajinga waoloka. Wachinuzhukanga kuzhachisha bakwabo, nangwatu bantu bamubile byatama. Bakolojanji bakebelenga kumwipaya, bamupoteshe mu buzha ne kubuula bashabo amba wafwa. Byo papichile myaka yavula, Yosefwa wamonañene na kisemi kyanji jibiji. Yosefwa byo ajinga ndamakyalo wakonsheshe kwibazhachisha ne kushinkanya nabo. Nangwa kyakuba bakolojanji Yosefwa balombele lulekelo lwa mambo, bajinga bingi na moyo amba kampe wakonsha kushinkanya nabo na mambo a kintu kyatama kyo bamubile. Nangwa byonkabyo, Yosefwa wibambijile’mba: “Kange muchine ne. Nanchi amiwa yami Lesa nyi?” (Nte. 37:18-20, 27, 28, 31-35; 50:15-21) Yosefwa wipelwile ne kulekela Yehoba kuchibila mambo bakolojanji.

20-21. Twakonsha kuchinuzhuka byepi kumona’mba twaoloka kukila bakwetu?

²⁰ Byonkatu byajinga Yosefwa, ne atweba tulekela Yehoba mwine kuchibila bantu mambo. Kechi tumona nobe twayuka kilengela balongo ne banyenga kuba bintu bimo ne. Mambo kechi twayuka biji mu muchima wa muntu ne. Pakuba “Yehoba [ye yenkatu] utalatala mu michima.” (Maana. 16:2) Aye watemwa bantu bonse. Kabiji Yehoba witutundaika ‘kushinkwisha michima yetu.’ (2 Ko. 6:13) Kechi tukeba kuzhachisha balongo ne banyenga ne mambo twibatemwa bingi.

²¹ Kabiji kechi twafwainwa kuzhachisha bantu babula Bakamonyi ba kwa Yehoba ne. (1 Timo. 2:3, 4) Nanchi mwakonsha kuzhachisha mulongo wenu wabula Kamonyi wa kwa Yehoba ne kwamba’mba: “Awe muntu kechi ukeya mu bukine nenyi”? Ine. Kuba bino kumwesha’mba mwijantula kabiji mubena kumona’mba mwaoloka kukila bakwenu. Yehoba ukeba’mba “bantu bonse konse konse” balapile. (Byu. 17:30) Vulukainga kuba’mba bonse bamona kuba’mba baoloka kukila bakwabo, Yehoba kechi wibamona’mba baoloka ne.

22. Mambo ka o twafwainwa kutwajijila kutemwa bololoke?

²² Kuba bintu byawama kwituletela lusekelo kabiji kwitundaika kukwasha bakwetu ne kwibalengela kufwenya kwipi ne atweba ne Lesa pamo. Onkao mambo, twayai tutwajijile kubanga bintu byaoloka. (Mat. 5:6) Yukai kuba’mba Yehoba umona byo mwibikako kuba byaoloka kabiji kino kimusangajika bingi. Kabiji mu mutokesha bingi muchima umvwe mwauba bino. Byo twayukila jimo kuba’mba bantu babena kuya na kutaminakotu, kitutekenesha bingi kuyuka kuba’mba “Yehoba watemwa baoloka.”—Sala. 146:8.