Twajijilai Kukeba Patanshi “Bololoke Bwanji”

“Nanchi sambilai kukebesha bufumu bwanji, ne bololoke bwanji; ne bino bintu byonse bikemubikilwapo.”—MAT. 6:33.

1, 2. Bololoke bwa Lesa bo bu ka, kabiji bwaimena pa ka?

“NANCHI sambilai kukebesha bufumu.” (Mat. 6:33) Bino byambo bya lutundaiko byaambilepo Yesu Kilishitu mu Jashi janji ja pa Mutumba byayukanyikwa bingi ku Bakamonyi ba kwa Yehoba lelo jino. Mu mbaji yonse ya bwikalo bwetu, twibikishako kumona kuba amba twatemwa buno Bufumu kabiji tukeba kwikala bakishinka. Pano bino twafwainwa ne kuvulukanga lubaji lwa bubiji lwa bino byambo bwa kuba amba “ne bololoke bwanji.” Bololoke bwa Lesa bo bu ka, kabiji kwibukeba patanshi kwatala mu ka?

² Byambo bya mu mulaka mwine mutanshi bilumbulula “bololoke” byakonsha ne kutuntululwa amba “buchibamambo bwaoloka” nangwa amba “kuluñama.” Onkao mambo, bololoke bwa Lesa bwaluñama kwesakana na bipimo byanji ne mafunde anji. Byo aji Mulenga, Yehoba uji na lūsa lwa kubikako bipimo bya byawama ne byatama. (Lum. 4:11) Nangwa byonkabyo, bololoke bwa Lesa kechi bulumbulula amba mizhilo yanji yakatazha kulondela nangwa amba malamuna anji avujisha ne. Pa kuba bwaimena pa bumuntu bwa Yehoba ne kyubilo kyanji kikatampe kya bololoke, kyendela pamo na byubilo bikwabo nabiji butemwe, maana ne bulume bwanji. Kabiji bololoke bwa Lesa bwendela pamo na nkebelo yanji. Kino kyavwangamo ne byo akeba ku boba bakeba kumwingijila.

3. (a) Kukebesha patanshi bololoke bwa Lesa kulumbulula ka? (b) Mambo ka o tulondela mizhilo ya Yehoba yaoloka?

³ Kukebesha patanshi bololoke bwa Lesa kulumbulula ka? Kulumbulula kuba kyaswa muchima wa Lesa pa kuba amba tumutokeshe ku muchima. Kukebesha bololoke bwanji kwavwangamo kwikela mwayila mafunde ne mizhilo yanji yaoloka kechi kulondela byo tukeba ne. (Tangai Loma 12:2.) Buno bwikalo bwavwangamo bulunda bwetu ne Yehoba. Kechi kulondelatu mizhilo yanji na mambo a kuchina kwitukabisha ne. Pa kuba butemwe bwetu ne Lesa bwitukwasha kwibikishako kumutokesha ku muchima kupichila mu kulondela bipimo byanji, kechi byetu ne. Twayukishatu kuba amba bino bipimo byo byo twafwainwa kulondela, mambo twalengelwe kuba amba tukalondelenga bipimo byanji. Byonka byajinga Yesu Kilishitu, Mfumu wa Bufumu bwa Lesa, ne atweba twafwainwa kutemwa bololoke.—Hebe. 1:8, 9.

4. Mambo ka o kyanemena kukebesha bololoke bwa Lesa?

⁴ Kukebesha bololoke bwa Yehoba kwanema byepi? Akimonai kino kishinka: Lweseko lutanshi lwa mu bujimi bwa Edena lwaimenejile pa kumona inge kya kuba ba Adama ne Evwa bakonsheshe kulondela mafunde a Yehoba nangwa ne. (Nte. 2:17; 3:5) Byo babujile kulondela mafunde baleta buyanji ne lufu kwi atweba baana babo. (Loma 5:12) Pano Mambo a Lesa aamba amba: “Awa ulonda bololoke ne lusa ukatana bumi, ne bololoke, ne buneme.” (Mana 21:21) Ee, kukebesha patanshi bololoke bwa Lesa kwitulengela kwikala na bulunda bwawama ne Yehoba, kabiji buno bulunda buketulengela kupuluka.—Loma 3:23, 24.

Kizumba Kiji mu Kwimona Muntu Mwine Nobe Waoloka

5. Kizumba ka kyo twafwainwa kuchinuzhuka?

⁵ Byo anembejilenga bena Kilishitu mu Loma, mutumwa Paulo waambile pa kizumba kyo twafwainwa kuchinuzhuka pa kuba amba tukebeshenga bololoke bwa Lesa. Byo atelelenga Bayudea bakwabo, Paulo waambile amba: ‘Nebashimuna namba baji na lupata lwa kusaka Lesa, bino kechi lwayila mu maana ne. Mambo byo baluba bololoke bufuma kwi Lesa, ne kukeba kwimika bwabo abo bene, kechi bakokela bololoke bwa Lesa ne.’ (Loma 10:2, 3) Kwesakana na byaambile Paulo, aba bapopweshi kechi bayukile mwatajile bololoke bwa Lesa ne, mambo bapayankene bingi na kukeba bololoke bwabo bene.a

6. Muteeto ka ye twafwainwa kuchinuzhuka, kabiji mambo ka?

⁶ Twakonsha kufwa mu kino kitewa inge ketumone mwingilo wetu kwi Lesa nobe wa kwikyombesheshamo ne kwiesakenyamo ku bakwetu. Uno muteeto wakonsha kwitulengela kutendeka kukizhamo kuketekela mu bulume bwetu. Kwambatu kine, inge ketube bino ko kuba’mba tubena kulubako bololoke bwa Yehoba. (Nga. 6:3, 4) Butemwe bwetu pe Yehoba bo bwakonsha kwitukwasha kubanga byawama. Inge ketweseke kwibika pa koloka twakonsha kumwesha kuba amba kechi twamutemwa kya kine ne.—Tangai Luka 16:15.

7. Yesu waambile byepi pa lukatazho luji mu kwimona muntu mwine amba waoloka?

⁷ Yesu wakebele kukwasha boba “beketekele bene amba, twi baoloka, ne kusula basujile bonse bakwabo.” Waambile pa lukatazho luji mu kwimona muntu mwine amba waoloka kupichila mu kwingijisha kishimpi kya kuba amba: “Banabalume babiji bakanjijile mu nzubo ya Lesa mu kulomba; umo Mufaliseo, mukwabo musonkeshi. Mufaliseo, waimene, walombeletu byanji mwine, amba, Lesa, nemusanchila, mambo amiwa kechi nji pamo na bantu bakwabo ne, nangwa na bangata bya lunkanankana ne, nangwa na babula koloka ne, nangwa na bankende ne, nangwa na ye uno musonkeshi ne. Amiwa nzhikilwa na nzala jibiji mu mulungu umo; ndambula bifikizha mu bujikumi mu byonse byo mmona. Pakuba aye musokeshi, byo aimene kwalepa, ne kusaka nangwa kwinuna meso anji kwiulu ne, wipuminenga pa kyaji amba, Lesa, mungubile lusa, ne ndengamambo.” Yesu wapezhezheko na byambo bya kuba amba: “Nemwambila namba, uno muntu wabwelele kwanji ku nzubo, kasa abingishiwa, pa kuba mukwabo ne; mambo awa witumbijika mwine ukapelulwa, ne awa wipelula ukatumbijikwa.”—Luka 18:9-14.

Kizumba Kikwabo ke ‘Kwikizhapo mu Koloka’

8, 9. ‘Kwikizhapo mu koloka’ kulumbulula ka, kabiji kwakonsha kwitulengela kuba ka?

⁸ Kizumba kikwabo kyo twafwainwa kuchinuzhuka ke kyokya kiji mu Musapwishi 7:16 kya kuba’mba: ‘Kechi mwikizhepo mu koloka ne, nangwa kwikizhapo mu kwimwesha nobe wa maana ne; musakila ka kwionauna?’ Kabiji munembeshi wa Baibolo watangijilwe na mupashi watwajijila kwitubula ene mambo o twafwainwa kuchinuzhukila uno muteeto mu kyepelo 20 amba: “Pano pa ntanda kafwapo muntu waoloka ubatu byawama byonka, ne kubapo bubi ne.” Muntu ‘wikizhapo mu koloka’ ulondela bipimo byanji bya bololoke kabiji uzhachisha bakwabo kwingijisha byobyo bipimo byanji. Pano kintu kyo alubamo ke kya kuba’mba, ubena kutangizhako bipimo byanji kukila bya Lesa, kabiji mu kuba bino wimwesha kuba’mba kechi waoloka ku meso a Lesa ne.

⁹ ‘Kwikizhapo mu koloka,’ nangwa byonka byaambapo ma Baibolo amo amba “kwimona nobe wakila bakwenu mu koloka” kwakonsha ne kwitulengela kutendeka kuzhinauka jishinda jubilamo Yehoba bintu. Pano bino twafwainwa kuvuluka kuba’mba inge ketuzhinauke bintu byawama bifuukulapo Yehoba kuba, ko kuba’mba twatendeka kumona bipimo byetu bya bololoke nobe byakila byobya bya Yehoba. Po pamotu ne kubika Yehoba mu lweseko ne kumuzhachisha kwingijisha bipimo byetu bya byawama ne byatama. Pano bino Yehoba ye uji na lūsa lwa kubikako bipimo bya bololoke, kechi atweba ne!—Loma 14:10.

10. Byonkatu byo kyajinga kwi Yoba, ki ka ne atweba kyakonsha kwitulengela kuzhachisha Lesa?

¹⁰ Nangwa kya kuba kafwako nangwa umo pe atweba ukeba kuzhachisha Lesa ne, bumbulwa kulumbuluka bwetu bwakonsha kwitulengela kuba kino. Kino kyakonsha kubiwa inge twamona kuba’mba kintu kimo kechi kyayilamo ne, nangwa inge ketupite mu bya malwa. Nangwatu mwanamulume wakishinka aye Yoba byo byo aubile. Patanshitu Yoba bamutelele kwikala “walumbuluka ne waoloka, waakaminwe Lesa, ne kuvundamina wavundamijile ku bubi.” (Yoba 1:1) Pano bino mu kuya kwa kimye Yoba wapichile mu bintu bya malwa byo amwene kuba amba byajingatu nshiji. Kino kyalengejile Yoba ‘kwibingisha mwine [amba waoloka], kechi wamubingishishe Lesa ne.’ (Yoba 32:1, 2) Yoba bafwainwe kumololako. Onkao mambo kechi twafwainwa kukumya, inge kya kuba kimye kimo twapita mu luno lonka lukatazho ne. Umvwe kino kyaubiwa, ki ka kyakonsha kwitukwasha kupimpula ndangulukilo yetu?

Kechi Kimye Kyonse kyo Twikala na Bishinka Byonse Ne

11, 12. (a) Inge twamona kuba’mba kintu kimo kechi kyayilamo ne, twafwainwa kuvulukanga ka? (b) Mambo ka muntu o akonsha kulangulukila amba kishimpi kya kwa Yesu kyaamba pa byaubiwe ku ba mwingilo mu bujimi bwa miñanzañanza kechi byayijilemo ne?

¹¹ Kintu kitanshi kyo twafwainwa kuvulukanga ke kya kuba’mba, kechi kimye kyonse kyo twikala na bishinka byonse ne. Byo byo kyajinga ne kwi Yoba. Kechi wayukilepo amba kwajinga kukonkana kwa bamalaika ba Lesa mwiulu, Satana ko amuzhachishe Yoba ne. (Yoba 1:7-12; 2:1-6) Yoba kechi wayukile amba makatazho o apichilengamo afuminenga kwi Satana ne. Kabiji kechi twayuka inge kya kuba Yoba wayukile byavula pe Satana ne! Onkao mambo Yoba wayiletu mungi byo alangulukilenga amba makatazho anji afuminenga kwi Lesa. Ee, kyapela bingi kulangulukila mungi inge kya kuba kechi twayuka bishinka byonse ne.

¹² Kyakumwenako, akimonai kishimpi kya kwa Yesu kyaamba pa ba mwingilo mu bujimi bwa miñanzañanza. (Tangai Mateo 20:8-16.) Apano Yesu waambile pa mwina nzubo wapaine mfweto ya mali aesakana ku ba mwingilo banji bonse kikale baingijile juba jonse nangwa jiola jimotu. Mumvwa byepi pa mambo a kino? Nanchi mwikimona amba kyayilamo nyi? Kampe mwakonsha kumvwina lusa ba mwingilo baingijile juba jonse mute saka azonga. Na mambo a bino mwakonsha kwikimona amba bafwainwe kutambwila mfweto yabayako kukila bakwabo. Inge mwalangulukila mu jino jishinda, mwakonsha kulanguluka amba mwina nzubo kechi wajinga na butemwe ne, kabiji kechi kyayijilemo ne. Nangwatu mukumbu ye akumbwijilemo ba mwingilo banji bejizhañenyenga wakonsha kumweka nobe kechi waingijishe lūsa lwanji bulongo ne. Pano nanchi tuji na bishinka byonse nyi?

13. Jishinda ka jikwabo jo twakonsha kumwenamo kishimpi kya kwa Yesu kyaamba pa ba mwingilo mu bujimi bwa miñanzañanza?

¹³ Twayai twisambe pa kino kishimpi mu jishinda jikwabo. Kwakubula nangwa kuzhinaukatu ne, mwina nzubo mu kino kishimpi wayukile amba bano bonse banabalume bafwainwe kumwena ba mu mazubo abo bibafwainwe. Mu moba a kwa Yesu, ba mwingilo mu bujimi bebapanga mfweto ya pa juba jonka jo baingilanga. Bisemi byabo byaketekejilenga mu mfweto yo batambwilanga pa juba pa juba. Byo twayuka kino, akilangulukai byo kyafwainwe kwikala ku boba bo ataine mwina nzubo kimye kya mabanga kabiji baingijiletu jiola jimo. Kampe kechi bakonsheshe kujiisha bisemi byabo na mfweto yo bafwainwe kutambwila ya jiola jimo ne, bino bakebeshe bingi kwingila kabiji bapembelejile juba jonse kuba’mba bebape mingilo ya kwingila. (Mat. 20:1-7) Kechi bo balengejile amba babule kwibapa mingilo ya kwingila juba jonse ne. Kafwako po kyamwesha amba bakaine kwingila juba jonse ne. Fwanyikizhai kuba’mba yenu mwapembelejilenga juba jonse, kabiji mwayuka ne kuba’mba bantu bo mulama pa nzubo bakinka manungo mwi anweba amba mwakebamwena kajo ka jojo juba. Mwakonsha kutemwa bingi inge kya kuba bemupa mingilo ya kwingila, kabiji mwakonsha kukumya bingi pa kutambwila mfweto yafwainwa kujishishamo kisemi kyenu!

14. Lufunjisho ka lwanema lo tufunjilako ku kishimpi kya bujimi bwa miñanzañanza?

¹⁴ Pano twayai twisambe pa byaubile mwina nzubo. Kafwako ye apele mfweto icheche ne. Bino ba mwingilo bonse wibapele mfweto yo bakonsheshe kujishishamo bisemi byabo. Nangwa kya kuba wajinga na ba mwingilo bavula, kechi wibapele mfweto icheche ne. Bonse ba mwingilo babwelele ku mazubo abo na mfweto yawaina bulongo kujiisha ba mu bisemi byabo. Inge twalangulukila bintu mu jino jishinda, twakonsha kupimpula milanguluko yetu pa mambo a byaubile uno mwina nzubo. Waubijile bintu mu jishinda ja butemwe kabiji kechi waingijishe lūsa lwanji kutama ne. Twakonsha kufunjilako ka ku kino? Tufunjilako kuba’mba kwikalatu na bishinka bicheche kwakonsha kwitulengela kukabulapotu bwishi. Kya kine, kino kishimpi kimwesha bukata bwa bololoke bwa Lesa, mambo buno bololoke kechi bwaimena pa malamuna nangwa bikeba bantu ne.

Milanguluko Yetu Yakonsha Kuyatu Mungi Nangwa Kupelelela

15. Mambo ka milanguluko yetu o yakonsha kuyila mungi nangwa kupelelela?

¹⁵ Kishinka kikwabo kyo twakonsha kuvuluka inge kya kuba ketulanguluke amba bintu bimo kechi byayilamo ne, ke kya kuba’mba milanguluko yetu yakonsha kuyatu mungi nangwa kupelelela. Milanguluko yetu yakonsha kuyatu mungi na mambo a bumbulwa kulumbuluka, misalululo nangwa bisho. Kabiji yapelelela mambo kechi tuji na bulume bwa kuyuka milanguluko nangwa biji mu michima ya bantu ne. Pakuba Yehoba ne Yesu kechi bapelelela mu milanguluko ne.—Mana 24:12; Mat. 9:4; Luka 5:22.

16, 17. Mambo ka Yehoba o abujile kuminatu popolo pa muzhilo wanji waambile pa bukende kimye Davida ne Batesheba kyo balengele mambo?

¹⁶ Twayai tumone jishimikila jaamba pa bukende bwaubile Davida ne Batesheba. (2 Sam. 11:2-5) Kwesakana na byaambile Mizhilo ya Mosesa, bafwainwe kwibepaya. (Levi 20:10; Mpitu. 22:22) Nangwa kya kuba Yehoba wibakambwile, kechi waumijiletu popolo pa muzhilo wanji ne. Nanchi kino kintu kyaubile Yehoba kyayijilemo nyi? Nanchi wamulekeletu Davida ne kulala mizhilo yanji yaoloka nyi? Bino byo bilanguluka bantu bamo batanga Baibolo.

¹⁷ Pano bino uno muzhilo waambile pa bukende Yehoba wamupaine ku bamitonyi bambulwa kulumbuluka, babujile kuyuka byalangulukanga bantu ne. Nangwa kya kuba bajinga bambulwa kulumbuluka, uno muzhilo wibakwashanga kuyuka mwa kutwala pa kuchiba mambo. Pano bino Yehoba wayuka biji mu michima ya bantu. (Nte. 18:25; 1 Moba 29:17) Onkao mambo kechi twafwainwa kuketekela kuba amba Yehoba wakonsheshetu kulondela muzhilo ye apele bamitonyi bambulwa kulumbuluka ne. Umvwe waubile bino, nanchi kino inge ke po pamotu ne kukanjikizha muntu uji na meso atuntulu kuvwala malole a pa meso afwainwa kuvwala yewa uji na lukatazho lwa meso nenyi? Yehoba wayukile byajinga muchima wa kwa Davida ne Batesheba kabiji wamwene ne byo balapijile kya kine. Na mambo a kino kishinka, wibachibijile mambo monka mo ayijile, na lusa ne na butemwe.

Twajijilai Kukeba Bololoke bwa Yehoba

18, 19. Ki ka kyafwainwa kwitukwasha kubula kuzhachisha Yehoba kwingijisha bipimo byetu bya bololoke?

¹⁸ Onkao mambo inge pa kimye kimo twamona bintu bimo byuba Yehoba kuba’mba kechi byayilamo ne, kikale twibitanga mu jishimikila ja mu Baibolo nangwa bitumwekela mu bwikalo bwetu, kechi twafwainwa kuzhachisha Lesa kwingijisha bipimo byetu bya bololoke ne. Vulukainga kuba amba kechi kimye kyonse kyo twikala na bishinka byonse ne, kabiji ne kuba’mba ndangulukilo yetu yakonsha kuya mungi nangwa kupelelela. Twafwainwa kuvulukanga kuba’mba, “bukaji bwa muntu kechi bwingila bololoke bwa Lesa ne.” (Yako. 1:19, 20) Mu jino jishinda, michima yetu kechi ‘ikamunyinyita Yehoba’ ne.—Mana 19:3.

¹⁹ Byonka byajinga Yesu, ne atweba twayai kimye kyonse tuyukenga amba Yehoba bunketu ye uji na lūsa lwa kubikako bipimo bya byaoloka ne byawama. (Mako 10:17, 18) Ibikaingako kuyuka ‘maana alumbuluka’ a mwayila bipimo byanji. (Loma 10:2; 2 Timo. 3:7) Umvwe ketulondele bino bipimo ne kwikela mwayila kyaswa muchima wa Yehoba, tumwesha amba tubena kukeba patanshi “bololoke bwanji.”—Mat. 6:33.

[Tubyambo twa mushi]

Mukivuluka Nyi?

• Mambo ka o kyanemena kukebesha bololoke bwa Yehoba?

• Bizumba ka bibiji byo twafwainwa kuchinuzhuka?

• Twakonsha kukeba byepi patanshi bololoke bwa Lesa?

[Kipikichala pa peja 9]

Twafunjilako ka ku kishimpi kya kwa Yesu kya banabalume babiji balombelenga mu nzubo ya Lesa?

[Kipikichala pa peja 10]

Nanchi kyayijilemo kupa mfweto ba mwingilo bapeleleko kwingila pamo na boba baingijile juba jonse nyi?