BYAFWAINWA KWIKALA BENA KILISHITU
Kookelainga Mizhilo ya Yehoba
Yehoba Lesa wapa bantu mizhilo ya kwibakwasha kwikala bulongo. Nabiji muzhilo wa kuba’mba masongola afwainwa kwikala a kikupu. (Mat 19:4-6, 9) Lesa wakanya kuba bulalelale. (1Ko 6:9, 10) Kabiji witupa ne mafunde etukwasha kusala mvwajilo itulengela kumweka’mba twi bantu banji.—Mpi 22:5; 1Ti 2:9, 10.
Bantu bavula mu ino ntanda kechi bakookela mizhilo ya Yehoba ne. (Lo 1:18-32) Mu byubilo byabo, mu mvwajilo ne nzañwino nangwa ntendelo ya nsuki balondelatu byuba bantu bavula. Bavula kechi bomvwa ne bumvu na byubilo byabo byatama ne. Kabiji balengulula boba bekala bwikalo bwapusana na bwabo.—1Pe 4:3, 4.
Atweba Bakamonyi ba kwa Yehoba twafwainwa kumwesha patoka kuba’mba tukookela mizhilo ya Lesa. (Lo 12:9) Mu ñanyi jishinda? Twafwainwa kubulangako bantu bikeba Lesa. Bino twafwainwa ne atweba bene kulondelanga mizhilo ya Lesa mu bwikalo bwetu. Nabiji pa kusala bya kuvwala, twafwainwa kwishikisha’mba: ‘Nanchi mvwajilo yami imwesha’mba nkookela mizhilo ya Yehoba nyi, inyi ngyatu na ntanda? Nanchi mvwajilo yami imwesha’mba ne mwina Kilishitu wakamwa Lesa nyi?’ Nangwa pa kusala bya kutamba pa televizhonyi, twakonsha kwiipuzha’mba: ‘Nanchi Yehoba wakonsha kunswisha kutamba bibye nyi? Awe filimu ubena kutundaika byubilo bya mutundu ka? Nanchi bya kisangajimbwe byo nsala bibena kundengela kuleka kuchiina bubi nyi? (Sl 101:3) Nanchi mbena kutuntwisha ba mu kisemi nangwa bakwabotu nyi?’—1Ko 10:31-33.
Mambo ka o twafwainwa kukookelanga mizhilo ya Yehoba? Mambo katatakatu Yesu Kilishitu onaune babi bonse pano pa ntanda. (Ezi 9:4-7) Boba kyaswa muchima wa Lesa bo bakashalapo. (1Yo 2:15-17) Twayai tutwajijile kukookela mizhilo ya Yehoba pa kuba’mba bantu betumona batumbijikenga Lesa na mambo a byubilo byetu byawama.—1Pe 2:11, 12.
Nanchi mvwajilo yami imwesha’mba nkookela mizhilo ya Lesa nyi?
TAMBAI VIDYO WA KUBA’MBA, IKALA MULUNDA NA LESA, MWANAMULUME UMO, MWANAMUKAZHI UMO, APA BINO MWISAMBE ANO MEPUZHO ALONDELAPO:
Mambo ka o twafwainwa kukookelanga mizhilo ya Yehoba?
Mambo ka bansemi o bafwainwa kutendekela kufunjisha baana babo kukookela mizhilo ya Yehoba saka bakijitu banyike?
Atweba bonse, bakulumpe ne banyike twakonsha kukwasha byepi bantu kumwenamo mu buwame bwa Lesa?