Fwenyai Kwipi ne Lesa
Umvwisha Bulanda Bwetu
MISHONALE wa kikulumpe umo wa Bakamonyi ba kwa Yehoba walumbulwile’mba, “lusa ke kumvwa kukola ku muchima byonka bibena kwiumvwa yewo mukwenu.” Yehoba Lesa ye wa kumwenako wawamisha mu kuba lusa. Umvwe bantu banji ke bamaname, umvwatu nobe aye ye ubena kumanama. Twakonsha kushiinwa byepi bino? Lusa ne butemwe bwa Yehoba bwamwekejile mu byambo ne byubilo bya Yesu kimye kyo ajinga panopantanda. (Yoano 5:19) Kya kumwenako, akilangulukai pa kintu kyaubiwe kyaambiwapo mu Yoano 11:33-35.
Mulunda nanji, aye Lazalasa byo afwile lufu lwa kubula kuketekela, Yesu wayile mu muzhi mwaikalanga Lazalasa. Kwa kubula nangwa kuzhinaukatu ne, banyenga yanji Lazalasa, abo ba Maliya ne Mata baubile bingi bulanda. Yesu wikitemenwe bingi kino kisemi. (Yoano 11:5) Pano waubilepo byepi? Jishimikila jaamba’mba: “Yesu byo amumwene [Maliya] kasa ajila, kabiji ne Bayudea bo aishilenga nabo nabo kasa bajila, ne muchima wamupile munda, ne aye kwikala bulongo ke ne, ka ambe’mba, Nanchi mwamutula pi? Kumvwa abo bamwambijile’mba, Nkambo, twayai mukamone. Yesu kajile ne mipolo.” (Yoano 11:33-35) Mambo ka Yesu o ajijile? Wajijile na mambo a kuba mulunda nanji, aye Lazalasa wafwile, pano bino Yesu wajingatu pepi kumusangula. (Yoano 11:41-44) Abya kwajingapo ne kintu kikwabo kyalengejile Yesu kumvwa bulanda nyi?
Akimonai jikwabo pa byambo byaambiwa peulu po. Monai kuba’mba Yesu byo amumwene Maliya ne boba bo ajinga nabo saka bajila “muchima wamupile munda” kabiji ne “kwikala bulongo ke ne.” Byambo bya mulaka mwine mutanshi byaingijishiwa pano, bimwesha bulanda bukatampe.a Yesu waumvwine bingi bulanda na mambo a byo amwene. Mipolo byo yayengelejile mu meso anji kyamwesheshe patoka’mba wajinga bingi na bulanda. Kwambatu kine, Yesu kyamukolanga bingi ku muchima umvwe wamona bantu saka bamanama. Nanchi ne anweba mwakijilapo kala ne mipolo na mambo a kuba mulunda nenu wajijilenga nyi?—Loma 12:15.
Lusa lwa Yesu lwitukwasha kuyuka byubilo ne mashinda a Shanji, aye Yehoba. Vulukai’mba Yesu wamweshanga byubilo bijipo ne Shanji, kya kuba waambile ne kuba’mba: “Awa wammona amiwa wamona ne Batata.” (Yoano 14:9) Onkao mambo, umvwe twatanga’mba “Yesu wajijile ne mipolo,” twafwainwa kusumininwa’mba Yehoba umvwa lumanamo lupitamo bapopweshi banji byo lukola. Banembi ba Baibolo bakwabo nabo baitabizha kino kishinka. (Isaya 63:9; Zekaliya 2:8) Yehoba Lesa, kine wa lusa.
Tukeba bingi kwikala na bantu bobila bakwabo lusa. Umvwe twalefulwa nangwa kuponenwa na bya malwa, tukeba bingi kwikala na muntu wakonsha kuyuka bwikalo bo tujimo pa kyokyo kimye ne kwitumvwina lusa. Byo kyakonsha kukilamo kuwama kufwenya kwipi ne Yehoba, aye Lesa wa lusa wayuka kumanama kwetu kabiji ne kine kintu kyo tujijila!—Salamo. 56:8.
[Tubyambo twa mushi]
a Kyambo kya Kingiliki kyatuntululwa’mba “kajile ne mipolo” javula kilumbulula “kujila kishinshi.” Pano bino, kyambo kyaingijishiwa kulumbulwilamo njijilo yajijilemo Maliya ne bakwabo bo ajinga nabo kyakonsha kulumbulula “kujila mabingo.”