Jibumba Jitangijila byo Jingila

JIBUMBA JITANGIJILA ja Bakamonyi ba kwa Yehoba jalengwa na banabalume bashingwa bepana kwingijila Lesa. Bemenako jibumba ja kalume wa kishinka ne wa maana jiji na mwingilo wa kunengezha kajo ka ku mupashi, kupana mikambizho ne kumona kuba’mba mwingilo wa kusapwila Bufumu ye mwingilo ye banemeka bingi Bakamonyi ba kwa Yehoba mwaya ntanda.—Mat. 24:14, 45-47.

Jibumba Jitangijila jikonkana na kwisamba kikatakata pa Kisatu mulungu ne mulungu. Kino kilengela bano balongo kwingijila pamo mu kukwatankana. (Sala. 133:1) Kabiji bano balongo ba mu Jibumba Jitangijila bengila mu makometi apusana pusana. Pa kuba’mba mwingilo walamata Bufumu engijiwe bulongo, kometi yense utangijilapo mwingilo umo byonka byo kyaambiwapo na bishinka byalondelapo.

◼ KOMETI YA LUTANGIJILO: Ino kometi yalengwa na balongo batangijila mu makometi akwabo a Jibumba Jitangijila, kabiji iji ne na munembeshi naye wa mu jino jonka Jibumba Jitangijila. Ino kometi itala pa makometi onse ne kumona’mba abena kwingila bingi bulongo. Kabiji yo iji na mutembo wa kukwasha mu makatazho eyatu kya kubazhimukila, lumanamo, bya malwa, ne bintu bikwabo bya bukiji bukiji byalamata Bakamonyi ba kwa Yehoba mwaya ntanda.

◼ KOMETI ITALA PA BA MWINGILO BA KIMYE KYONSE: Balongo baji mu ino kometi bapewa mwingilo wa kulama bulongo ba mu kisemi kya pa Betele mwaya ntanda yonse, kwibakwasha kukosesha bulunda bwabo na Yehoba ne mu mashinda akwabotu. Ino kometi itala pa mwingilo wa kwita balongo ba kuya na kwingijila pa Betele kabiji yo ikumbula mepuzho kutazha ku mwingilo wa pa Betele.

◼ KOMETI YA KUSAMPANYA: Ino kometi itala pa kunembwa kwa mabuku alumbulula Baibolo ne kwiatwala mu mapunzha mo akebewa monse mwaya ntanda. Yo itala ne pa minkinyi ilenga mabuku ne bipetu bikwabo bingijishiwa na Bakamonyi ba kwa Yehoba. Ino kometi inengezha mashinda awama a kwingijishishamo mibingu ya mwingilo wa Bufumu wa ntanda yonse.

◼ KOMETI YA MWINGILO: Ba mu ino kometi batala pa mwingilo wa kusapwila ne pa bintu byalamata bipwilo, bapainiya, bakulumpe mu kipwilo, ne bakulumpe benda. Yo itangijila kunengezha kwa Mwingilo Wetu wa Bufumu kabiji yo ita balongo kwiya ku Sukulu ya Gileada ne Sukulu ya Lufunjisho lwa Mwingilo ne kwibatuma kwa kwingijila.

◼ KOMETI YA LUFUNJISHO: Ino kometi yo itangijila bingijisho byonse bya kufundamo pa kupwila kwa nkambi, kupwila kwa kijiiji, kupwila kwiikajila kwa juba jimo, ne kupwila kwa kipwilo. Yo inengezhezha ne ba mu kisemi kya Betele mutanchi wa bintu bya ku mupashi, ne kutangijila masukulu apusana pusana, nabiji Sukulu ya Gileada ne Sukulu ya mwingilo wa Bapainiya, kubikakotu ne matepu ne mavidyo.

◼ KOMETI YA KUNEMBA: Yo itangijila mwingilo wa kunengezha kajo ka ku mupashi kanembwa mu mabuku ne kwikasampanya ku balongo ne banyenga yetu ba ku mupashi ne ku bantu bonse. Ino kometi ikumbula mepuzho alamata ku Baibolo ne kunengezha byambo nabiji masikilipiti a bimwesho ne maautulaini a majashi. Yo itala ne pa mwingilo wa kutuntulula mabuku wingijiwa mwaya ntanda yonse.

Mutumwa Paulo waesakenye kipwilo kya bashingwa ku mubiji wa muntu kabiji waambile bingi ne pa bonse ba mu kino kipwilo byo beta muchima, kwitemwa bene na bene ne byo bakwatankana pamo mu kwingila mwingilo wibapa Lesa. (Loma 12:4, 5; 1 Ko. 12:12-31) Aye Mutwe, Yesu Kilishitu ye upana byafwainwa ku bino binungwa pa kuba’mba bakwatankene pamo, kwingila bulongo ne kulondela mikambizho ya mu Baibolo. (Efi. 4:15, 16; Kolo. 2:19) Mu jino jishinda, Jibumba Jitangijila jinengezha bulongo kutangijila monka Yehoba mo ejibujila kupichila mu mupashi wazhila.