“Saka Munemeka Bantu ba uno Mutundu”

KUTENDEKATU mu 1992, Jibumba Jitangijila jitongola bakulumpe mu bipwilo bayuka bulongo mingilo kabiji bakoma ku mupashi kuba’mba bakwashenga tuvoto twa mu Jibumba Jitangijila.a (Monai tubyambo twa munshi.) Bano bankwasho ke ba mu jibumba ja “mikooko ikwabo,” bino bakwasha bingi Jibumba Jitangijila mu mingilo yanema. (Yoano 10:16) Ne abo batanwako ku kusambakana kwa ba mu kavoto ko bajimo kwikalako mulungu ne mulungu. Mwingilo wabo ke wa kukebakeba bishinka pa bintu byapusana pusana ne kulangulukapo mashinda a kupwishishamo makatazho amo. Jibumba Jitangijila jo jifuukula bya kuba, apa bino bankwasho babo bebikako kumona kuba’mba byafuukulapo Jibumba Jitangijila byaingila. Bano balongo bepana kwingila mwingilo yense ye bebapa. Bayila pamo na ba mu Jibumba Jitangijila na kutanwa ku kushonkena ne kukonkana kwa byalo. Kimye kimo, bebapa ne mwingilo wa kwimenako ofweshi mukatampe wa ntanda yonse na kufwakesha maofweshi a misampi.

Mulongo umo waingila mwingilo wa kukwasha Jibumba Jitangijila kufuma mu 1992 waambile’mba, “Inge naingila mingilo yo bampa, kikwashako Jibumba Jitangijila kuta maana pa kunengezha kajo ka ku mupashi.” Mulongo mukwabo waingila uno mwingilo pa myaka 20 waambile’mba, “Kwingila uno mwingilo ke jishuko jikatampe jo nabujile kuketekela.”

Jibumba Jitangijila japana mingilo yavula ku bano balongo bebakwasha kabiji jibasanchila bingi pa mingilo yabo ne bukishinka bwabo. Atweba bonse twayai ‘tunemekenga bantu ba uno mutundu.’—Filipai 2:29.