Ibikilai Bikonkwanyi Byafwainwa ne Kwikala Balusekelo

“NAKANKALWA jikwabo!” Bimye binga byo mwaambapo bino byambo na mambo a kukankalwa kupwisha byo mwakebelenga kuba? Nsemi wakyanyike umo wa mukazhi wa bwina Kilishitu wakonsha kwamba bino byambo mambo a kukoka ne kulefulwa mambo a mwananji wanenda ukebewa kuta muchima, kabiji wafwainwa kulefulwa mambo kechi wata muchima ku mpopwelo ne mingilo ya bwina Kilishitu ne. Mwina Kilishitu mukwabo wakonsha kwiumvwa kupelelela mambo a byo bamusunganga saka akiji mwanyike ne kulanguluka’mba kechi wingila kya kine mu kipwilo ne. Kamonyi wa kikulumpe wakonsha kulefulwa mambo kechi wingila byo aingilanga kala mu mingilo ya bwina Kilishitu saka akiji na bulume bwa kwenda ne. Christiane uji na mitembo ya mu kisemi kyanji imulengela kubula kwingila papelela bulume bwanji mu mwingilo wa Yehoba waambile’mba: “Jashi jitundaika basapwishi kwingilako mwingilo wa bupainiya kimo kimye jindengela kujila.”

Twakonsha kubapo byepi inge ke twiumvwe bino? Bena Kilishitu bamo bekala byepi kwa kubula bijikila? Mfweto ka iji mu kubula kwikala na bijikila?

Ibikilai Bikonkwanyi Byafwainwa

Mutumwa Paulo witubula byo twakonsha kutwajijila kwikala balusekelo amba: ‘Sekelai mwi Nkambo moba onse. Kabiji nkamba jibiji namba, Sekelai! Kukokamuchima kwenu kuyukanyike ku bantu bonse.’ (Fili. 4:4, 5) Pa kuba’mba twikale na lusekelo mu mwingilo wa kwa Lesa, twafwainwa kwibikila bikonkwanyi byafwainwa kwesakana na papelela bulume bwetu ne bwikalo bwetu. Umvwe twaesekesha na ngovu kwingila bikonkwanyi byakila bulume bwetu, kikale jishinda ka jaingijishiwa, kitulengela kwikala na bijikila. Pano bino twafwainwa kujimuka kuchina ke twingiletu pacheche amba po papelela bulume bwetu kya kuba twaleka ne kwikala babambakana mu mwingilo wa bwina Kilishitu.

Monse mwakonsha kwikela bwikalo bwetu, Yehoba ukeba atweba kumupa byawamisha ne kumwingijila na muchima yense. (Kolo. 3:23, 24) Inge twabula kumupa Yehoba byawamisha, kimwesha’mba kechi tubena kwikela mwayila kwipana kwetu kwi aye ne. (Loma 12:1) Kunungapo, kiketulengela kubula kwikala balusekelo, ne kubula kwikala na mapesho akwabo afuma mu kwingila na muchima wetu yense.—Mana. 10:22.

Kyambo kyatuntululwa amba “kukokamuchima” mu Baibolo kilumbulula kubilako bantu lusa. Kine kyambo kilumbulula “kunekenena.” (Yako. 3:17) Kabiji kino kyambo kilumbulula ne kubula kwitesha muchima muntu mwine. Onkao mambo, inge twaikala bakokamuchima, tukayuka mwakubila bintu. Nanchi kino kyashupa nyi? Ku bantu bamo kyashupa, nangwa kya kuba bata bakwabo muchima. Kya kumwenako, inge kya kuba mulunda netu wamwekana kukoka mambo a kwingila mingilo yavula, abya kechi twakonsha kumukwasha kumona buwame buji mu kwingila mingilo yo afwainwa kwingila nenyi? Kyo kimotu, ne atweba twafwainwa kumona kuba’mba kechi tubena kwingila kukila pa bulume ne bwikalo bwetu ne.—Mana. 11:17.

Inge kya kuba bansemi betu jishinda jo betukomeshejilemo kechi jawamine ne, kyakonsha kwitushupa bingi kuyuka papelela bulume bwetu. Bamo beumvwanga saka bakiji banyike amba bakonsha kwingijisha na ngovu nangwa kwingila bulongo pa kuba’mba bebatemwe ku bansemi babo. Ne atweba inge byo byo kiji, kyakonsha kwitulengela kubula kuyuka bulongo Yehoba byo etumona. Yehoba witutemwa bingi mu jishinda jo twingijilamo mingilo yanji na muchima yense. Mambo a Lesa etubujishatu patoka amba Yehoba, “wayuka mibiji yetu byo iji aye uvuluka’mba, bo ba lukungu.” (Sala. 103:14) Wayuka papelela bulume bwetu kabiji witutemwa umvwe ke tumwingijile na mukoyo kukila bituyuka bansemi. Umvwe twayuka’mba Lesa kechi kapitao ne, kitulengela kwingila papelela bulume bwetu.—Mika 6:8.

Nangwa kya kuba bena Kilishitu bayuka kuba’mba Lesa kechi washupa ne, bamo kibakatazha bingi kulondela kino kishinka. Kino inge byo byo kiji ne kwi anweba, monaipo mwina Kilishitu wakoma ku mupashi wimuyukisha bulongo emukwashe. (Mana. 27:9) Kya kumwenako, nanchi mukeba kwingila mwingilo wa bupainiya bwa kimye kyonse nyi? Akino ke kikonkwanyi kyawamisha! Nanchi mubena kukatazhiwa kufikizha kino kikonkwanyi nyi? Apo kampe mukeba kwimukwashako kuba’mba mukepesheko kuba mingilo imo mu bwikalo bwenu. Nangwa kimo kimye mukwenu wa bwina Kilishitu ye mwaketekela wakonsha kwamba nenu umvwe mukeba kwingilako bupainiya pa kyokyo kimye nangwa ne, mambo a kuvula kwa mitembo ya mu kisemi. Mulongo nangwa nyenga wakonsha kwimukwasha kumona inge mwingilo ye mubena kukeba kutendeka kwingila mwakonsha kumwingila nangwa kumonapo mashinda akwabo o mwakonsha kwingijilangamo bulongo. Mulume wakonsha kukwasha mukazhanji kwingila mingilo yakonsha kumuletela lusekelo. Kya kumwenako, wakonsha kumwambila’mba akokolokele jimo saka bakyangye kutendeka ñondo mukwabo muji mingilo yavula. Kuba bino kwakonsha kumukwasha kwikala na bulume ne kutwajijila wa lusekelo mu mwingilo.

Monai Bintu byo Mwakonsha Kuba Bulongo

Umvwe twibakote nangwa tukolwakolwa twakonsha kuyuka pa kupelela mu mwingilo wa Yehoba. Inge mwi bansemi, mwakonsha kumona’mba mwabwela bingi panyuma mu lufunjisho lwa pa bunke bwenu ne kupwila kwa bwina Kilishitu mambo kimye ne ngovu yenu bitaiwa ku baana benu. Nangwa byonkabyo, nanchi kuba kyaikala kuba’mba mambo mwata muchima papelela bulume bwenu kyo kimulengela kubula kumona byo mwafwainwa kwingila nenyi?

Myaka yavula yapitapo, mwina Levi umo wakebele kwingila mwingilo wakosele bingi ye akonsheshe kubula kwingila. Wajinga na jishuko ja kwingila mu nzubo ya Lesa milungu ibiji pa mwaka pa mwaka. Nangwa byonkabyo, wakebelenga kutwajijila na kwingila kwipi na kyakusokelapo bitapisho. (Sala. 84:1-3) Ki ka kyakwashishe uno mwanamulume kutondwa na yewa mwingilo? Walangulukile’mba kwingila juba jimotu mu bipango bya nzubo ya Lesa ke mashuko bingi. (Sala. 84:4, 5, 10) Popamotu, ne atweba mu kifulo kya kutanga muchima ku bwikalo bwetu, twafwainwa kuyuka ne kusanta pa mingilo yo tuba.

Akimonai kya kumwenako kya mwina Kilishitu wa jizhina ja Nerlande wikala mu kyalo kya Canada. Wendelatu mu nkinga ya balemana kabiji wamwene kuba’mba kechi ubena kwingila kya kine mu busapwishi ne. Nangwa byonkabyo, wapimpwile milanguluko yanji, ne kuta muchima ku mpunzha ya pa shitolo kuba’mba po po ayanga na kusapwila. Mwine walondolola’mba: “Ngikala pa nkinga yami ya balemana kwipi na kipona kyo babika ku shitolo. Ngikala bingi na lusekelo pa kusapwila ku bantu beya na kwikala pa kino kipona kuba’mba bakokolokeko.” Kwingila uno mwingilo wanema wa busapwishi kumuletela bingi lusekelo Nerlande.

Monaipo Mashinda Akwabo Mwakubila Inge Kyakonsheka

Bwato bwakonsha kuba saka buya lubilo na mambo a mwela ubena kupupa ku bisapi byo babika ku bwato bikwata mwela. Nangwa byonkabyo, inge muntu ubena kuvuwa bwato wamona kuba’mba kipupu kyakilamo, wakonsha kumonapo jishinda jikwabo mwa kukashila bisapi bya ku bwato. Kino kechi kimwesha amba washinda kipupu ne, bino umvwe wauba luno lupimpu, wakonsha kuzhikijila bwato bwanji. Popamotu, javula ne atweba tukankalwa kushinda makatazho aji nobe kipupu o tupitamo mu bwikalo. Bino twakonsha kuyuka mwakwikela kupichila mu kupimpula bintu byo tuba ku mubiji, ne byo tulangulukapo. Umvwe twayuka byo tubena kupitamo pa kyokyo kimye, kiketulengela kwikala ba lusekelo mu mwingilo wa Lesa.—Mana. 11:2.

Akimonai bya kumwenako. Umvwe kya kuba bulume bwetu bwakepa, twakonsha kukepeshako kwingila mingilo yakonsha kwitukokesha pa kuba’mba twiye twikaleko na bulume bwa kuya na kutanwa ku kipwilo mabanga. Kino kitulengela kumwenamo bingi kabiji ne kwikala na kimye kya kwisamba na balongo betu ba bwina Kilishitu. Nangwa inge kya kuba nsemi wa mukazhi wakankalwa kwingilako mwingilo wa kusapwila ku nzubo ku nzubo na mambo a kukolwa kwa mwananji, wakonsha kwitako nyenga mu kipwilo kya bwina Kilishitu ku nzubo yanji kuba’mba basapwile pamo kupichila mu kwingijisha lamya, mwana saka akilaala.

Pano mwakonsha kuba byepi inge kya kuba kechi muji na kimye kya kunengezhezha jimo byonse bisakufunjiwapo ku kipwilo ne? Mwakonsha kumona bintu byo mwakonsha kunengezha bulongo. Umvwe twauba bino, kiketulengela kwikala babambakana kabiji balusekelo.

Kikebewa kwibikako bingi pa kuba’mba tupimpuleko mubena kukebewa. Ba Serge ne Agnès ba mulume ne mukazhi bekala mu kyalo kya France baubile lupimpu lwabaya bingi. Serge washimuna’mba: “Byo twayukile’mba Agnès wanema pa muchima, twalangulukile’mba kyapwa kechi tukekalapo bamishonale ne.” Pano byo baji na baana babiji babakazhi, Serge walondolola byo bebikijile kikonkwanyi kikwabo na mukazhanji. Waamba’mba: “Byo twakankelwe kuya na kwingijila mu kyalo kingi, twalangulukile kwingijila monka mu kyalo kyetu mingilo ingilapo bamishonale. Twatendekele kupwila pamo na jibumba jaambanga mulaka ungi.” Nanchi bamwenejilemo mu kino kikonkwanyi kyo bebikijile nyi? Serge waamba’mba: “Twatana kuba’mba tubena kwingila bingi bulongo mu kipwilo.”

Nyenga mukwabo wa bwina Kilishitu wa jizhina ja Odile, wikala mu kyalo kya France uji na myaka ya kusemwa kukila pa 70 kabiji ubela kikola kya mu bikupa kikolela mu manungo, ukankalwa kwimana kimye kyabaya. Walefwilwe bingi pa kutana’mba kechi waingijilenga kyabaya mu mwingilo wa kusapwila ku nzubo ku nzubo ne. Nangwa byonkabyo, kechi walekele ne. Wapimpwile ñingijilo yanji ne kutendeka kusapwila kupichila mu kwingijisha lamya. Waamba’mba: “Mbena kwingila bingi bulongo kukila ne byo naketekejile!” Ino ñingijilo yamulengejile kwikala na kizaku mu busapwishi.

Kwingila Mingilo Papelela Bulume Bwetu Kuleta Mfweto

Umvwe twayuka pa kupelela mu mwingilo wetu kitulengela kubula kulefulwa. Umvwe twibikila bikonkwanyi byo twakonsha kwingila, tuyuka’mba tusa kwingila nangwa kya kuba bulume bwakepa. Onkao mambo twikala balusekelo nangwa twaingilatu pacheche.—Nga. 6:4.

Umvwe saka tuyuka pa kupelela mu mwingilo wetu, kiketulengela kuta muchima bena Kilishitu bakwetu. Umvwe twayuka papelela bulume bwabo, tukebasanchilanga pa mingilo yo betukwashako kwingila. Umvwe ke twisanchile pa mingilo yaingijiwa, kitulengela kukwatankana ne kumvwa bibena kwamba bakwetu. (1 Pe. 3:8) Vulukai kuba’mba, Yehoba byo aji Shetu wa butemwe kechi ukeba’mba atweba twingile mingilo yakila pa bulume bwetu ne. Kabiji umvwe twayuka papelela bulume bwetu ne kwibikila bikonkwanyi byo twakonsha kwingila, mingilo yetu yo twingijila Yehoba iketulengela kwikala balusekelo.

[Mabulañano pa peja 29]

Pa kuba’mba twikale balusekelo mu mwingilo wa Lesa, twafwainwa kuyuka papelela bulume ne bwikalo bwetu

[Kipikichala pa peja 30]

Nerlande wikala bingi na lusekelo pa kwingila papelela bulume bwanji mu busapwishi

[Kipikichala pa peja 31]

Fundai “mwa kukashila bisapi bya ku bwato”

Credit Line]

© Wave Royalty Free/age fotostock

[Kipikichala pa peja 32]

Serge ne Agnès bamwenejilemo bingi mu kwibikila bikonkwanyi bikwabo