Londainga Yesu Ne Kupopwelanga Lesa Monka Mo Akebela Kumupopwela
Lesa mu butemwe bwanji waita bantu bonse “bafuma mu mikoka yonse ne mu bisaka byonse ne mu mitundu yonse ne njimi yonse ya bantu” na kumupopwela. (Lum. 7:9, 10; 15:3, 4) Aba batambwila luno lwito ‘bamona buya bwa Yehoba.’ (Sala. 27:4; 90:17) Nobe nyimbi wa masalamo, bantu basansula mawi abo na kutota Lesa, saka bamba’mba: “Iyai, tumupopwele, tumulambile panshi; tufukame mu kyenyi kya Yehoba Mulenga wetu.”—Sala. 95:6.
Mpopwelo Yakila mu Kunema
Byo aji Mwana Lesa yenkawa umo, Yesu wajinga na jishuko jikatampe ja kufunda milanguluko, mafunde, ne mizhilo ya shanji. Mu jino jishinda, Yesu wibamwesheshe bantu jishinda jawama ja mpopwelo ya kine. Waambile’mba: “Amiwa ne jishinda, ne bukine, ne bumi: ka paji wiya kwi Batata ne, poso pe amiwa.”—Yoa. 1:14; 14:6.
Yesu witushijile kya kumwenako kyawama mu kwikepesha ne kukokela kwi Shanji. Waambile’mba: “Byo mbula kwiubila kintu amimwine ne; pakuba mwamfunjishishe Batata, mo mo ñambila bino bintu.” Kabiji wanungileko’mba: “Mbenakuba bya kumutokesha pa muchima moba onse.” (Yoa. 8:28, 29) Mu ñanyi jishinda Yesu mo atokeshe Shanji pa muchima?
Kintu kimo ke kya kuba’mba, Yesu watemenwe bingi Shanji, kabiji kino kyo kilumbulula kupopwela Lesa. Yesu walamachijile bingi kwi Shanji kupichila mu mukukokela, ne kuba kyaswa muchima wanji, nangwa kya kuba kechi kyapelele ne. (Fili. 2:7, 8) Kintu kyanemene mu mpopwelo ya kwa Yesu ke kya kuba’mba waingilanga bingi kimye kyonse mu mwingilo wa kulenga baana ba bwanga, kufikatu ne kimye kyo bamwichilenga’mba Mufunjishi ku boba ba mu lwitabilo ne boba babujile mu lwitabilo. (Mat. 22:23, 24; Yoa. 3:2) Kabiji Yesu waingijile bingi na ngovu mu kukwasha bantu. Na mambo a muchima wanji wa kwipana, Yesu kechi wajingapo na kimye kyanji aye mwine ne, bino watemenwe bingi kwingijila bantu. (Mat. 14:13, 14; 20:28) Nangwa kya kuba wapayankene, Yesu kimye kyonse wamonangapo kimye kya kulomba kwi Shanji wa mwiulu. (Luka 6:12) Lesa wanemekele bingi mpopwelo ya kwa Yesu!
Ibikaingako Kutokeshanga Lesa pa Muchima
Yehoba wayukile byubilo bya Mwananji ne kutana lusekelo mwi aye. (Mat. 17:5) Nangwa byonkabyo, Satana Diabola naye wayukile bwikalo bwa kishinka bwa kwa Yesu. Kino kyalengejile Yesu kwikala mulwanyi wa kwa Satana. Mambo ka? Mambo pa kyokya kimye kafwako nangwa muntu umo watwajijile kukokela Lesa, nangwa kumupopwela na muchima yense ne. Kabiji Diabola wakebelenga kulekesha Yesu kupopwela Yehoba mpopwelo yamufwainwa.—Lum. 4:11.
Na mambo a kwibikako’mba amongole Yesu, Satana wamusolomokele’mba amweseke. Wamutwajile Yesu “ku mutumba walepesha bingi, ne kumumwesha bufumu bonse bwa panopantanda, ne lukumo lwabo.” Kepo amwambijile’mba: “Bino byonse nsakwimupa, umvwe mundambile ne kumpopwela.” Nga Yesu waubilepo byepi? Yesu wamwambijile’mba: “Fumako, Satana: mambo kyanembwa’mba, Ukamupopwela Nkambo Lesa wobe ne kumwingijila aye yenka.” (Mat. 4:8-10) Ee, Yesu wayukile kuba’mba ke kupopwela bankishi kulambila Satana nangwa mfweto iwamepotu byepi. Kechi waswile kupopwela muntu uji yense ne, kanatu Yehoba.
Mu ano moba etu, Satana kechi wakonsha kwitupa bufumu bonse bwa panopantanda ne lukumo lwabo’mba tupimpuzhane na mpopwelo yetu ne. Pano bino, wakitwajijila kuvulañanya mpopwelo ya bena Kilishitu ba kishinka kwi Lesa. Diabola ukeba atweba kupopwela muntu nangwa kintu kikwabo.—2 Ko. 4:4.
Kilishitu Yesu wamwesheshe bukishinka bwanji kufika ne ku lufu. Na mambo a kutwajijila mu bulumbuluke bwanji kwi Lesa, Yesu watumbijikile Yehoba kya kuba’mba kafwako muntu wakyubapo kala kino ne. Atweba bena Kilishitu bakine lelo jino, twakosako kulondela bwikalo bwa kishinka bwa kwa Yesu kupichila mu kubika mpopwelo ya Mulenga wetu palutwe kukila byonse. Kya kine, bulunda bwetu bwawama na Lesa ke kintu kyakilamo kunema bingi.
Mfweto Ifuma mu Kuba Mpopwelo Yawama
Kutundaika “bwina Lesa bwa kine ne bwa kubula bubi” ku meso a Lesa mufuma mfweto yavula bingi. (Yako. 1:27) Kya kumwenako, tubena kwikala mu kimye kya “bantu ba kwitemwa abo bene, ba kutemwa mali, ba kwitota,” ne “ba kubula kutemwa byawama.” (2 Timo. 3:1-5) Nangwa byonkabyo, tuji na jishuko ja kupwanañena pamo mu nzubo ya Lesa na bantu bawama ba butooto besekesha na ngovu kulondela mizhilo ya Lesa mu kumupopwela. Nanchi kino kechi kituletela lusekelo nenyi?
Umvwe twaikala balumbuluka mu ino ntanda, tukekala na jishuko jikwabo jikanungwako ja kwikala na jiwi ja mu muchima jatoka. Twafwainwa kutwajijila kwikala na jiwi ja mu muchima jatoka kupichila mu kukokela mafunde aoloka a Lesa ne kukokela mizhilo ya kwa Kesala ibula kuzhilulula mizhilo ya Lesa.—Mako 12:17; Byu. 5:27-29.
Mpopwelo ya na muchima yense ileta mapesho mu jishinda jikwabo. Umvwe twateshako maana kuba kyaswa muchima wa Lesa kwa kubula kutesha muchima mu kuba bintu byetu ne, bwikalo bwetu bukekala bwa lusekelo. Mu kifulo kya kwambanga’mba: “Tuje ne kutoma, mambo kesha tukafwa,” tuji na luketekelo lwa kine lwa kwikala na bumi bwa myaka ne myaka mu paladisa panopantanda.—1 Ko. 15:32.
Buku wa Lumwekesho wamwesha kuba’mba aba bakatwajijila kwikala batokeshiwa ku meso a Yehoba bo boba ‘bakafuma mu aa malwa akatampe.’ Jishimikila jaamba’mba, “aye waikala pa jitanda ukebavweta na tente wanji.” (Lum. 7:13-15) Awa waikala pa jitanda kafwako mukwabo ne, poso Yehoba Lesa, aye mwine wa lukumo mwaya ntanda yonse. Akifwanyikizhai byo kyafwainwa kuwamapo umvwe Yehoba wimutambwila ke mwi benyi mu tente wanji, ne kwimuzhikijila kuba’mba bulemo bubule kwimufikila! Ne mu ano moba Yehoba ubena kwituzhikijila ne kwitulama.
Kabiji aba bonse boba mpopwelo yawama kwi Lesa balondololwa’mba batangijilwa ku “masulo atupauka a mema a bumi.” Ano masulo aimenako lunengezho lonse lo etupa Yehoba kuba’mba tukekale na bumi bwa myaka ne myaka. Ee, kupichila mu bukuzhi bwa kwa Kilishitu, “Lesa ukashimuna mipolo yonse ku meso abo.” (Lum. 7:17) Bantu bakatambwila bukwasho pa kuba’mba bakekale baoloka, kabiji kikaleta bingi lusekelo lukatampe ku boba baji na luketekelo lwa kwikala panopantanda myaka ne myaka. Bapopweshi ba Lesa ne lelo jino basansula mawi abo na lusekelo, kupichila mu kumwesha lusanchilo lwabo kufuma panshi ya muchima kwi Yehoba ne kupopwela pamo na boba ba mwiulu bemba’mba: “Anweba Nkambo Lesa, Wa bulume bonse, mingilo yenu yo ikatampe ne ya kukumya; ne anweba Mfumu wa myaka mashinda enu aoloka ne a kine. Nkambo, ñanyi ukabula kwakamwa ne kutumbijika jizhina jenu? Mambo anweba yenka mwazhila; mambo mikoka yonse ya bantu ikeya ne kupopwela ku meso enu; mambo byubilo byenu byaoloka byamweka.”—Lum. 15:3, 4.
[Kipikichala pa peja 27]
Ki ka Satana kyo abena kwitupa amba tupimpuzhane na mpopwelo yetu?