Lufunjisho Bantu Bavula Lo Baitabilamo

“Nalotanga biloto byatama bingi bya kupya mu mujilo wa helo! Juba jimo nalotele babena kuntaya mu mujilo mukatampe kabiji ponkapo napapukile ne kutama muteto. Bino, naesekele na ngovu kwikala kwa kubula kulenga mambo.”—Arline.

NANCHI mwaitabila’mba helo mpunzha ya kumanyikilamo bandengamambo nyi? Bantu bavula byo byo baitabila. Kya kumwenako, mu mwaka wa 2005 shayuka umo pa Univesiti wa St. Andrews mu Scotland wataine’mba bantangi ba bupopweshi ba mu Scotland pepi na kichika baitabila’mba bantu bepatula kwi Lesa bakamanyikwanga “bingi mu milanguluko mu helo myaka ne myaka.” Bakwabo baitabila’mba aba bakataiwa mu helo, bakamanyikwanga na mujilo.

Mu byalo byavula, bantu bavula baitabila mu lufunjisho lwa helo. Kya kumwenako, mu mwaka wa 2007, kupesapesa kwaubiwe mu United States, kyatainwe kuba’mba pa bantu bo baipwizhe, bavula baitabila mu lufunjisho lwa helo. Nangwatu mu byalo mubula kumvwanyika bya bupopweshi, bantu bavula bajimo nabo baitabila mu lufunjisho lwa helo. Kupesapesa kwajingako mu 2004, kyatainwe kuba’mba mu Canada bantu bavula baitabila mu lufunjisho lwa helo. Kabiji mu Great Britain, bantu bamo basumininwe’mba helo koaji.

Bifunjisha Bantangi ba Bupopweshi

Bantangi ba bupopweshi bavula baleka kufunjisha’mba helo ke mpunzha mutema mujilo mwa kumanyikila bantu. Onkao mambo, batundaika lufunjisho lwipashako na lolwa luji mu buku utelwa’mba Catechism of the Catholic Church, wanembelwe mu 1994. Uno buku waamba’mba, “helo ke lumanamo lukatampe lwa myaka ne myaka lupitamo muntu wipatula aye mwine kwi Lesa.”

Pano nangwa kiji bino, bantu bavula bakitabilatu’mba helo ke mpunzha mwa kumanyikila bantu mu milanguluko nangwa na mujilo. Bantu batundaika lufunjisho lwa helo bamba’mba lwafuma mu Baibolo. Mukulumpe wa kipwilo kya Southern Baptist Theological Seminary, aye Albert Mohler waambapo pa byo aitabila mu luno lufunjisho lwa helo kuba’mba: “Ke kishinkatu kya mu Binembelo.”

Mambo ka o Kyanemena Kuyuka Kintu kyo Mwaitabilamo?

Umvwe helo kya kine mpunzha ya kumanyikilamo bantu, ko kuba’mba mwafwainwa kwiichina. Pano bino, umvwe kya kuba luno lufunjisho kechi lwa kine ne, bantangi ba bupopweshi belufunjisha bavulañanya bantu ne kwibalengela kukatazhiwa mu milanguluko. Kabiji bapamo ne Lesa mambo kyatutu.

Nga Mambo a Lesa, Baibolo ambapo’mba ka pa uno mutwe? Bibaba byalondelapo bisakukumbula ano mepuzho asatu: (1) Ki ka kimweka ku muntu umvwe wafwa? (2) Yesu wafunjishepo’mba ka pa mambo a helo? (3) Nga kufunda bukine pa mambo a helo kwakonsha kwimukwasha byepi?