Nga Kufunda Bukine Pa Mambo A Helo Kwakonsha Kwimukwasha Byepi?

BONSE bafunjisha’mba helo ke mpunzha ya kumanyikilako bantu batundaika bubela bukatampe bwa kutamisha Yehoba Lesa ne byubilo byanji. Kwambatu kine, Baibolo waamba’mba Lesa ukonauna babi. (2 Tesalonika 1:6-9) Bino bukaji bwa Lesa bwaoloka, kechi kyo kyubilo kyanji kikatampe ne.

Lesa kechi wakanama ne. Waipuzha ne kuba’mba: “Nanchi mmwenamo lusekelo mu lufu lwa mubinyi?” (Ezikyo 18:23) Umvwe Lesa kechi umwenamo lusekelo mu lufu lwa mubi ne, pano wakonsha kusekela byepi kumona babi saka bamanyikwa?

Kyubilo kikatampe kya Lesa ke butemwe. (1 Yoano 4:8) Ee, “Yehoba ye wawama ku bonse; ne lusa lwanji lwakoka luji pa mingilo yanji yonse.” (Salamo 145:9) Kabiji Lesa ubena kukeba atweba kumutemwa na muchima wetu yense.—Mateo 22:35-38.

Kyepi Kimutundaikanga, Kuchina Helo Nyi, Inyi Butemwe bwa Kutemwa Lesa?

Lufunjisho lwa kuba’mba bantu baya na kumanyikwa mu helo lwalengela bantu kwikala na moyo wa kuzakama Lesa. Kupusanako, muntu wafunda bukine pe Lesa ukamutemwa kabiji ne kwikala na moyo wa kine pe aye. Salamo 111:10 waamba’mba: ‘Moyo wa kumuchina Yehoba, yo ntendekelo ya maana; bonse boba byonkabyo bo baji na maana alumbuluka.’ Moyo wa kuchina Lesa, kechi ulumbulula kuchina’mba ukankambula ne, bino ke moyo wa kine wa kwakamwa Mulenga. Uno moyo witulengela kubula kumufichisha ku muchima.

Akimonai kufunda bukine pa mambo a helo byo kwa kwashishe Kathleen wa myaka 32 waingijishanga bizhima. Bwikalo bwanji bwajingatu bwa kwitobwela, bwa bukapondo, bwa kwishikwa ne kuba bulalelale kwapwa. Waambile’mba: “Natalanga mwanami wamukazhi wa mwaka umo ne kwamba’mba, ‘byo mbena kumuba mwanami kechi byawama ne. Bakansoka mu helo pa byubilo byo mbena kuba.’” Kathleen waesekeshe kuleka bizhima, bino kafwako byawama byafuminemo ne. Waambile’mba: “Nakebeshe bingi kwikala muntu wawama, bino bintu byonse mu ntanda kechi byañendejilenga bulongo ne. Kyamwekelengatu nobe kafwako ne ene mambo a kwikela muntu wawama ne.”

Kepo Kathleen asambakene na Bakamonyi ba kwa Yehoba. Waambile’mba: “Nafunjile kuba’mba kafwako kupya mu mujilo wa helo ne. Binembelo byandengejile kushiinwa kino. Byo nayukile kuba’mba kechi bakansoka mu helo ne, kino kyantekeneshe bingi.” Kabiji wafunjile ne pa milaye ya Lesa ya kuba’mba bantu bakekala myaka ne myaka panopantanda pakatokeshiwa ku bubi bonse. (Salamo 37:10, 11, 29; Luka 23:43) Wanungilepo’mba: “Luno nji na luketekelo lwa kine—lwa kukekala myaka ne myaka mu Paladisa.”

Nanchi Kathleen wafwainwe kuleka bizhima na mambo a kuchina kutayiwa mu mujilo wa helo nyi? Washimikizhe’mba: “Umvwe naumvwa kilaka kya kukeba kwingijisha bizhima, nalombanga ne kusashijila Yehoba Lesa kuba’mba ankwashe. Nalangulukanga bingi byo amonanga bino byubilo byatama, kabiji kechi nakebanga kumufichisha ku muchima ne. Kine wakumbwile milombelo yami.” (2 Kolinda 7:1) Uno moyo wa kubula kukeba kufichisha Lesa pa muchima, walengejile Kathleen kusankilapo byubilo byanji byatama.

Ee, kwikala na butemwe pe Lesa ne moyo wa kine wa kumwakamwa—kechi kuchina kumanyikwa mu helo ne—kwakonsha kwitukwasha kuba kyaswa muchima wa Lesa pa kuba’mba tukamwenemo lusekelo lwa myaka. Nyimbi wa Masalamo wanembele’mba: “Bo bene ba lusekelo bonse baakamwa Yehoba, bonka benda mu mashinda anji.”—Salamo 128:1.

[Kitenguluzha/Bipikichala pa peja 9]

BAÑANYI BAKAPOKOLOLWA KUFUMA MU HELO?

Ntuntulwilo ya ma Baibolo amo yavulañanya bingi bantu na ndumbulwilo ya byambo bibiji bya Kingiliki—Geʹen·na ne hai’des—kwikala kyambo kimo, “helo.” Mu Baibolo kyambo kya Geʹen·na kilumbulula konaunwa kwa myaka, kwa kubula kusangulwa. Pano bino, aba baji mu Hai’des nangwa’mba Hadesi, bakasangulwa.

Onkao mambo, Yesu byo afwile ne kusangulwa, mutumwa Petelo wabujile bantu bo aambilengako kuba’mba Yesu ‘kechi washajile mu Kalunga’ nangwa’mba mu helo ne. (Byubilo 2:27, 31, 32; Salamo 16:10) Kyambo kyatuntululwa’mba “kalunga” nangwa’mba helo mu kino kyepelo kyafuma ku kyambo kya Kingiliki kya kuba’mba Hai’des. Yesu kechi wayile na kumanyikwa mu mujilo ne. Kalunga ka bafu nangwa’mba “helo,” kyajinga kilende. Yesu kechi ye yenka Lesa ye asangwile kufuma mu kalunga ka bafu ne.

Pa mambo a lusanguko, Baibolo waamba’mba: “Lufu ne kalunga ka bafu byasolwele bafu bajimo.” (Lumwekesho 20:13, 14) Kufumya bantu mu “kalunga” nangwa’mba helo kukalumbulula kwibabwezha ku bumi aba bonse Lesa bo akamona’mba bafwainwa kusangulwa. (Yoano 5:28, 29; Byubilo 24:15) Byo lwaikalapo luketekelo lwawama lwa kulutwe—lwa kukamona balongo betu bafwa bakafumanga ku bilende! Yehoba, Lesa wa butemwe, kine ukoba kino.