Nanchi Bakamonyi ba kwa Yehoba Bapwisha Masongola a Bantu Nyi?

“BANTU bavula bamba’mba, umvwe umo wa mu masongola wapimpula bupopweshi, masongola abo akonsha kupwa.” Kimye kimo, bino byambo byo byo bamba bantu bamo kwambila umo wa mu masongola wafuukulapo kwikala Kamonyi wa kwa Yehoba. Nanchi ino ñambilo ya kine nyi?

Umvwe muntu wasongola nangwa kusongolwa wakeba kufunda bukine nangwa wasankilapo byo aitabijilemo, kilengela mukwabo wa mu masongola kukakilwa bingi. Kyakonsha ne kulengela mukwabo kwikala bingi na kijikila, kufichishiwa ku muchima ne kuzhingilatu.

Mwanamukazhi javula ye utendekelapo kukeba kupimpula bupopweshi bwanji. Umvwe bakazhi benu babena kufunda Baibolo na Bakamonyi ba kwa Yehoba, kino kyakonsha kulengela masongola enu kwikala byepi? Umvwe mwi mwanamukazhi ubena kufunda Baibolo na Bakamonyi ba kwa Yehoba, mwakonsha kuba byepi pa kuba’mba mukepesheko kijikila kya bamwata wenu?

Mwanamulume byo Amona Bintu

Mukazhanji Mark wikala mu kyalo kya Australia, watendekele kufunda Baibolo na Bakamonyi ba kwa Yehoba panyuma ya kwikala myaka 12 mu masongola. Mark waamba’mba: “Naingilanga nkito yawama kabiji twaikelenga bingi bulongo na mukazhami. Bwikalo bwawamine bingi. Mukazhami wafuukwilepo kutendeka kufunda Baibolo na Bakamonyi ba kwa Yehoba. Byo namwene bino, neumvwine kuba’mba bwikalo bwami pano kyapwa busakwaluka. Patanshitu, kechi nasekejilemo mu mulanguluko wa mukazhami wa kufunda Baibolo ne, bino byo aambujile kuba’mba ubena kukeba kubatizwa kwikala Kamonyi wa kwa Yehoba, kino kyandetejile bingi kijikila kikatampe.”

Mark watendekele kuzhinauka kuba’mba masongola anji kampe asakupwa na mambo a bupopweshi bwasajilepo mukazhanji. Wafuukwilepo kumulekesha kufunda Baibolo ne kumukanya kwisambanga na Bakamonyi. Bino, Mark kechi wafikenejiletu ponkapo kumukanya ne, wakimulekele. Ki ka kyamwekele ku masongola anji?

Mark waamba’mba, “masongola etu po po akoselako kukila ne byo ajinga kala. Masongola etu atwajijila kuwaminako kufuma kimye mukazhami kyo abatizwe kwikala Kamonyi wa kwa Yehoba pa myaka 15 yapitapo.” Ki ka kibakwashishe kukosesha masongola abo? Mark waamba’mba, “Ke na mambo a kuba’mba mukazhami walondejilenga bingi mafunde a mu Baibolo. Umpa bingi mushingi kimye kyonse.”

Bukwasho Kufuma ku Banabakazhi Bakwashapo Kala Bena Kwabo

Umvwe mwi mwanamukazhi ubena kufunda Baibolo na Bakamonyi ba kwa Yehoba, bi ka byo mwakonsha kuba ne kwamba pa kuba’mba mukepesheko kijikila kya bamwata wenu? Akimonai byaambapo bano banabakazhi ba mu mapunzha apusanapusana mwaya ntanda.

Sakiko mwina Japan waamba’mba: “Naikala mu masongola myaka 31 kabiji nji ne na baana ba balume basatu. Pabapite ne myaka 22 kufuma po naikajile Kamonyi wa kwa Yehoba. Kechi kyampelela kimye kyonse kwikala na mwanamulume wabula kwitabila mu bintu byo naitabilamo ne. Bino, ngesekesha bingi na ngovu kwingijisha lujimuno luji mu Baibolo lwa kuba’mba ‘upelawizhe kumvwa, ubande kwamba, ubande kuba bukaji.’ (Yakoba 1:19) Kabiji ngeseka kwikala wakoka muchima ku bamwatawami ne kumvwina byo bakeba umvwe kechi bibena kulwañana na mafunde a mu Baibolo ne. Kino kyakwasha masongola etu kutwajijila.”

Nadezhda wa mu kyalo kya Russia waamba’mba: “Naikala mu masongola myaka 28 kabiji papita ne myaka 16 kufuma po nabatizwe kwikala Kamonyi. Saka nkyangye kutendeka kufunda Baibolo, nalangulukilenga’mba bamwatawami kechi bafwainwa kwikala mutwe wa kisemi ne. Natemwanga bingi kwifuukwila bintu ami mwine. Nangwa byonkabyo, byo natendekele kulondela mafunde a mu Baibolo, mu kisemi kyetu mwatendekele kwikala mutende ne lusekelo. (1 Kolinda 11:3) Mu kupita kwa kimye kyampelejile bingi kwibanekenena bamwatawami kabiji bene bemwena luno lupimpu.”

Marli wa mu kyalo kya Brazil waamba’mba: “Nji na baana babiji kabiji naikala mu masongola pa myaka 21. Pabapite ne myaka jikumi na itanu na umo kufuma po nabatizwe kwikala Kamonyi. Naishile kufunda kuba’mba Yehoba Lesa ukeba bamulume ne mukazhi kwikala pamo kechi kwabana ne. Onkao mambo, mbena kwesekesha kwikala mwanamukazhi wawama kupichila mu byo ñamba ne kuba bintu mu jishinda jilengela Yehoba ne bamwatawami kusekela.”

Larisa wa mu kyalo kya Russia waamba’mba: “Kimye kyo naikele Kamonyi wa kwa Yehoba myaka 19 yapitapo, naishile kuyuka’mba kintu kyanema kwi amiwa ke kupimpula byubilo byami. Bamwatawami babena kumona’mba Baibolo wankwasha bingi kwikala muntu wawama kabiji nebasanchila bingi pa kwikala mwanamulume walumbuluka. Twapusenangamo bingi pa mambo a bya kukomesha baana, pano luno alwe lukatazho twilupwisha. Bamwatawami luno babena kuswisha baana kuya ne amiwa ku kupwila mambo babena kumona’mba baana babena kufunda bintu byawama bingi.”

Valquíria wa mu kyalo kya Brazil waamba’mba: “Naikala mu masongola myaka 19 kabiji nji ne na mwana umo. Papita myaka jikumi na isatu kufuma kimye kyo naikele Kamonyi wa kwa Yehoba. Patanshitu, bamwatawami kechi bakebanga amiwa kusapwila ne. Bino, naishile kufunda kuba’mba kukumbula na jiwi jakoka kwibakwashishe kumona’mba Baibolo wankwasha bingi kupusanako na byo najinga kala. Bamwatawami batendekele kumvwisha ene mambo o kyanemena amiwa kwingilako mwingilo wa busapwishi. Lelo jino, babena kuntundaika bingi mu mingilo ya ku mupashi. Umvwe mbena kutangijila mafunjisho a Baibolo mu mapunzha a mwalepalepa a mu mizhi, bantwala na motoka saka bampembelela pangye kufikilatu ne byo nsakupwisha.”

Kintu Kilengela Masongola Kwikala Bulongo

Umvwe mwina kwenu ubena kufunda Baibolo na Bakamonyi ba kwa Yehoba, kechi mwafwainwa kulanguluka’mba masongola enu akapwa ne. Bantu bavula baji mu masongola mwaya ntanda yonse batana kuba’mba Baibolo ukosesha bingi masongola.

Mwanamulume umo wabula Kamonyi wa kwa Yehoba waambile’mba: “Neumvwinenga bingi kutama ku muchima kimye mukazhami kyo atendekele kufunda na Bakamonyi ba kwa Yehoba, pano luno mwafuma bintu byawama bingi.” Mukwabo naye waambile pa mukazhanji kuba’mba: “Bukishinka bwa mukazhami, mukoyo wanji, ne bulumbuluke bwanji byandengela kukumbwa bingi Bakamonyi ba kwa Yehoba. Masongola etu akosa bingi na mambo a bintu byafunda mukazhami. Twinemeka bingi ne kusunga masongola etu kwikala a kikupu.”

[Kitenguluzha pa peja 32]

Bakamonyi ba kwa Yehoba Bamona Byepi Masongola?

Bakamonyi ba kwa Yehoba banemeka bingi Baibolo kuba’mba Mambo a Lesa anembelwe na lutangijilo lwa mupashi. Onkao mambo, balondela byo aamba pa mambo a masongola. Akimonai Baibolo byo akumbula mepuzho aji panshipo:

▪ Nanchi Bakamonyi ba kwa Yehoba batundaika bakwabo basongola nangwa kusongolwa ku babula Bakamonyi kwabana nyi? Ine. Mutumwa Paulo wanembele’mba: “Umvwe mulongo wetu umo uji na mukazhi wabula kwitaba, ne aye mwanamukazhi waswa kwikala nanji, kechi abane nanji ne. Kabiji ne mwanamukazhi uji ne mwata wanji wabula kwitaba, ne aye mwanamulume waswa kwikala nanji, kechi abane ne mwata wanji ne.” (1 Kolinda 7:12, 13) Bakamonyi ba kwa Yehoba balondela bingi uno mukambizho.

▪ Nanchi mwanamukazhi Kamonyi wa kwa Yehoba watundaikwa kulengulula bintu bifuukula mwatawanji wabula kwitabila nyi? Ine. Mutumwa Petelo wanembele kuba’mba: “Byonkabyo, anweba banabakazhi nenuwa, nekenenai bamwata wenu, amba, nangwa bamo babula kukokela mambo, pabula mambo betabishiwe na bwikalo bwa bakazhi babo; byo bamona bwikalo bwenu bwawama bwa mu mushingi.”—1 Petelo 3:1, 2.

▪ Nanchi Bakamonyi ba kwa Yehoba bafunjisha’mba mwanamukazhi wafwainwa kulondela bintu byonsetu bifuukula mwatawanji nyi? Ine. Mutumwa Paulo wanembele’mba: “Bino nasaka namba muyuke’mba, mutwe wa banabalume bonse ye Kilishitu; kabiji mutwe wa mwanamukazhi ye mulume wanji; kabiji mutwe wa Kilishitu ye Lesa.” (1 Kolinda 11:3) Mwanamukazhi mwina Kilishitu wafwainwa kunemeka mwatawanji byo aji mutwe wa kisemi. Nangwa byonkabyo, mwanamukazhi kechi wafwainwa kulondelatu byonse byaamba mwatawanji ne. Mambo baketotolwela kwi Lesa ne kwi Kilishitu pa byo bengijisha bumutwe bwabo. Onkao mambo, umvwe mwanamulume wakambizha mukazhanji kulala muzhilo wa Lesa, mwanamukazhi mwina Kilishitu aye ‘wafwainwa kukokela Lesa kukila muntu.’—Byubilo 5:29.

▪ Nanchi Bakamonyi ba kwa Yehoba bafunjisha’mba kwikana kwakanyiwa nyi? Ine. Yesu Kilishitu waambile’mba: ‘Nemwambila namba, Wa kumukana mukazhanji, pa kubula mambo a bukende [bulalelale], ne kusongola mukwabo, wauba bukende.’ (Mateo 19:9) Onkao mambo, Bakamonyi ba kwa Yehoba balondela byaambile Yesu kuba’mba bukende bo bwakonsha kulengelatu masongola kupwa. Kabiji bafunjisha kuba’mba masongola kechi afwainwa kupwa pa bintutu byabula munda ne munyuma ne. Abo batundaika bakwabo kulondela byambo byaambile Yesu kuba’mba: “Kyo kyo akalekela muntu shanji ne inanji, ukalamachila ku mukazhanji; ne abo babiji bakekala ke mubiji umotu . . . Onkao mambo akya kyasambakanya Lesa, muntu kechi ekyabanye ne.”—Mateo 19:5, 6.