Fwenyai Kwipi ne Lesa
Mulenga ye Twafwainwa Kutota
ABYA mwakilangulukapo kala’mba, ‘Nanchi nkebelo ya bumi yo i ka nyi?’ Bantu baitabila kuba’mba bumi bwaishilekotu abo bwine bakankalwa kuyuka nkebelo ya bumi. Kino kechi byobyo kiji na boba bayuka bukine pe Yehoba Lesa kuba’mba yo Nsulo ya bumi ne. (Salamo 36:9) Abo bayuka’mba uji na nkebelo yo etulengejile. Ino nkebelo yaambiwapo mu Lumwekesho 4:11. Pano twayai tumone bino byambo byanembelwe na mutumwa Yoano, byo byalumbulula ene mambo o twaikelako.
Yoano wanembele pa lwimbo wa mwiulu wa kutumbijika Lesa amba: “Mwafwainwa anweba Nkambo yetu, Lesa wetu, kutambula lukumo, ne buneme, ne bulume: mambo anweba yenu mwalengele byonse, kabiji na mambo onka a kyaswa muchima wenu o byaikajile, o byalengelwe.” Yehoba bunketu ye wafwainwa kutambula kuno kutotwa. Mambo ka? Mambo ye “walengele byonse.” Pano nanchi bilengwa byanji bya maana byafwainwa kubanga ka?
Yehoba waambiwa’mba ye wafwainwa “kutambula” lukumo, buneme ne bulume. Mambo, ye muntu wa lukumo lukatampe, buneme ne bulume kukila bilengwa byonse. Nangwa byonkabyo, bantu bavula bakana kuyuka’mba ye Mulenga. Pano bino, kuji boba bamona “byanji” nangwa’mba byubilo bya Lesa “bibula kumweka” kupichila mu bintu byo alenga. (Loma 1:20) Na michima ya lusanchilo, bano bantu babena kumupa Yehoba lukumo ne munema. Babena kutaya mbila ku bantu bonse bakonsha kuteleka ku kiyukilo kikatampe kya kuba’mba Yehoba ye walengele byonse kabiji ye yenka ye twafwainwa kunemeka kwapwa.—Salamo 19:1, 2; 139:14.
Pano, Yehoba ubena kutambula byepi bulume kufuma ku bapopweshi banji? Kafwako kilengwa kyakonsha kupa bulume Mulenga wa bulume bonse ne. (Isaya 40:25, 26) Byo twalengwa mu kipasha kya Lesa, tuji na byubilo bijipo ne Lesa, nabiji bulume. (Ntendekelo 1:27) Umvwe kya kine tumusanchila Mulenga wetu pa bintu byo etubila, tukengijisha bulume bwetu ne ngovu yetu kumupelamo buneme ne lukumo. Mu kifulo kya kwingijishangatu bulume bwetu kuba bintu byo tukeba, tumona’mba Yehoba Lesa ye wafwainwa kutambula bulume bwetu bonse byo tubena kumwingijila.—Mako 12:30.
Pano mambo ka o twaikelako? Lubaji lwapelako mu Lumwekesho 4:11 lwakumbula’mba: “Mambo onka a kyaswa muchima wenu [bintu byonse byalengwa] o byaikajile, o byalengelwe.” Kechi yajinga nkebelo yetu kuba’mba tulengwe ne. Twaikelako na mambo a kyaswa muchima wa Lesa. Onkao mambo, kwikala bwikalo bwa kwitatu muchima kafwako kifumamo ne. Pa kuba’mba twikale na mutende wa mu muchima, lusekelo mu bintu byo tuba, twafwainwa kufunda kyaswa muchima wa Lesa byo kiji ne kwikala bwikalo mwayila nkebelo yanji. Umvwe twauba bino, popo tukayuka nkebelo yo twalengelwa ne kyo twaikelako.—Salamo 40:8.
[Byambo biji pa Kipikichala pa peja 27]
NASA, ESA, ne A. Nota (STScI)