Bantu Batanga Magazini Etu Bepuzha’mba

Mambo ka Lesa o Abujila Kukumbula Milombelo Imo?

Lesa utemwa bingi kumusolomoka. Byonkatu nsemi wa butemwe byo akeba baana banji kwamba kwi aye saka bakasuluka, ne Yehoba Lesa naye byo byo akeba atweba kuba pa kulomba kwi aye. Kabiji byonkatu biji nsemi wa maana, ne Lesa uji na bishinka byawama bimulengela kubula kukumbula milombelo imo. Ñanyi bishinka kabiji ne bya kumwenako bya mu Baibolo byakonsha kwitukwasha kuyuka ene mambo o abujila kukumbwila milombelo imo?

Mutumwa Yoano walondolola amba: “Luno lo luketekelo lo tuji nalo mwi aye, amba, umvwe twalomba kintu, nangwa ki ka, mwayila muchima wanji, aye witumvwa.” (1 Yoano 5:14) Bintu byo tulomba byafwainwa kwikela monka mwayila kyaswa muchima wa Lesa. Bamo balomba bintu byabula kwesakana na mwayila nkebelo ya Lesa, nabiji kukeba kushinda bakwabo mu kisela kya ngyuka nangwa kisela kya lubekyo. Bakwabo balomba na milanguluko yatama. Mwana wa bwanga Yakoba wajimwineko pa mambo a kulomba kutama, byo aambile’mba: “Kabiji mulomba ne kutambula ne, mambo mulomba kyatama, byo mulomba bya kutayaula mu bya kusakasaka byenu.”—Yakoba 4:3.

Kya kumwenako, akifwanyikizhai amba konse ku mbaji ibiji ya babena kupama mpila balomba amba bashinde. Lesa kechi wakonsha kukumbula ino milombelo ya kwilwisha ne. Byo byo kyakonsha ne kwambiwa pa mambo a makondo abena kubiwa ano moba umvwe ku mbaji yonse ibiji ya babena kulwa ke balombe kuba’mba bashinde.

Aba bakana kulondela mizhilo ya Lesa kechi bafwainwa kuketekela’mba milombelo yabo ikakumbulwa ne. Yehoba kimye kimo waambijile bapopweshi ba bukamfutumfutu amba: ‘Kine nangwa mukalomba milombelo yavula, kechi nkemumvwa ne; maboko enu atapakana na mashi.’ (Isaya 1:15) Baibolo waamba’mba: “Awa wafumyako kutwi kwanji ku kumvwa mizhilo, ne lulombelo lwanji kyo kya bunya kwi Yehoba.”—Byambo bya Mana 28:9.

Pano bino, Yehoba uteleka ku milombelo ilombewa kufuma panshi ya muchima ya bapopweshi babena kwingila papelela bulume bwabo kumwingijila monka mwayila kyaswa muchima wanji. Nangwa byonkabyo, nanchi kino kilumbulula’mba, wibapa byonse byo bamulomba nyi? Ine. Akimonai bya kumwenako bimo bya mu Binembelo.

Mosesa wajinga mulunda wawama bingi na Lesa; bino naye wafwainwe kulombanga ‘monka mwayila kyaswa muchima wa Lesa.’ Kupusanako na nkebelo ya Lesa, Mosesa walombele’mba bamuswishe kutwela mu ntanda ya Kenana byo aambile’mba: “Mwane, banswishe kwabuka, nkamone kyalo kyawama kiji ku bushiya bwa Yodano.” Pano bino, pa kino kimye saka alenga kala mambo, Mosesa bamwambijile’mba kechi ukatwela mu yoya ntanda ne. Onkao mambo, mu kifulo kya kumuswisha Mosesa, Yehoba wamwambijile’mba: “wikileketu byonkabyo, kechi uñambile jibiji pa kino kintu ne.”—Mpitulukilo ya mu mizhilo 3:25, 26; 32:51.

Mutumwa Paulo walombele’mba apokololwe ku kyo atelele’mba “mwiba mu mubiji.” (2 Kolinda 12:7) Uno “mwiba” wakonsha kwikala kikola kibula kupwa kya meso nangwa kumanyikwa kikupu ku balwanyi ne ‘balongo ba bubela.’ (2 Kolinda 11:26; Ngalatiya 4:14, 15) Paulo wanembele’mba: “Nasashijile aye Nkambo jisatu, namba kimfume.” Nangwa byonkabyo, Lesa wayukile’mba inge Paulo watwajijila kusapwila na kino kikola kya “mwiba mu mubiji,” kyakonsheshe kumwesha bulume bwa Lesa ne Paulo wakonsheshe kuketekela mwi Lesa. Onkao mambo, mu kifulo kya kumupa byo alombele Paulo, Lesa wamwambijile’mba: “Mu kunekena mo bulumbulukila bulume bwami.”—2 Kolinda 12:8, 9.

Ee, Lesa ye wayuka bulongo kukila atweba umvwe byo twalomba bituwamina nangwa ne. Yehoba kimye kyonse ukumbula mu jishinda jituwamina, monka mwayila nkebelo yanji ya butemwe yanembwa mu Baibolo.