Nanchi Lesa Muntu wa Kine Nyi?
Bantu javula bakumbula’mba:
◼ “Ujitu konse, mu bintu byonse. Uji nobe mwela.”
◼ “Uji bingi na maana nangwa’mba bo bulume bubula kumweka.”
Nga Yesu waambilepo’mba ka?
◼ “Mu nzubo ya Batata muji mwakwikala mwavula.” (Yoano 14:2) Yesu waambile pe Lesa kwikala muntu uji na nzubo ya bukifwanyikizho, nangwa’mba uji na mpunzha mwa kwikala.
◼ “Amiwa nafumine kwi Batata, naiya panopantanda: kabiji mbena kufuma panopantanda, ne kuya kwi Batata.” (Yoano 16:28) Yesu wasumininwe’mba Lesa ke muntu wa kine kabiji uji ne na mwa kwikala.
YESU kechi waambile’mba Lesa bo bulume bubula kumweka ne. Pa kuba, wisambanga ne Lesa kabiji ne kulomba kwi aye. Javula wamutelanga Yehoba’mba Shanji wa mwiulu, kyambo kimwesha kukosa kwa bulunda bo ajinga nabo ne Lesa.—Mateo 6:14, 26, 32.
Kishinka ke kya kuba’mba “kafwako muntu wamwenepo Lesa nangwa pachechetu ne,” mambo “Lesa ye Mupashi.” (Yoano 1:18; 4:24) Bino kino kechi kilumbulula’mba ufwayo mwekanyikilo ya mubiji nangwa mutundu ne. Baibolo witubula’mba: “Umvwe ko aji ne mubiji wa buntunshi, ko aji ne mubiji wa bumupashi.” (1 Kolinda 15:44) Pano inge kiji bino, nanchi Yehoba uji na mubiji wa bumupashi nyi?
Ee. Mambo Yesu byo asangwilwe, “watwelele . . . mwiulu mwine, mo etumwekela ku meso a Lesa.” (Bahebelu 9:24) Kino kitufunjishapo bintu bibiji pe Lesa. Kitanshi ke kya kuba’mba uji na mpunzha mo ekala. Kya bubiji kitufunjisha’mba ke muntu wa kine, kechi bulume bubula kumweka bujitu konse ne.
Pano, kyakonsheka byepi Lesa kwikala na bulume bwa kutangijila bintu byonse konse konse? Lesa wakonsha kutuma mupashi wanji wazhila, nangwa bulume bwa kuba kintu ku mpunzha yonse yo alengele. Byonkatu shanja baana byo engijisha kuboko kwanji kutekenesheshako baana banji ne kwibakwasha, ne Lesa byo engijisha mupashi wanji wazhila kufikizhizhamo nkebelo yanji.—Salamo 104:30; 139:7.
Byo kiji kuba’mba Lesa ke muntu, uji ne na bumuntu, ko kuba’mba kuji byo atemwa ne byo ashikwa kabiji umvwa kutama ne kuwama. Baibolo witubula’mba watemwa bantu banji, usangalela mu mingilo yanji, washikwa kupopwela bankishi, kabiji ufichishiwa ku muchima na mambo a bubi. (Ntendekelo 6:6; Mpitulukilo ya mu mizhilo 16:22; 1 Bamfumu 10:9; Salamo 104:31) Mu Timoti mutanshi 1:11, watelwa’mba “Lesa wa lusekelo.” O ene mambo Yesu o aambijile’mba twakonsha kufunda bya kutemwa uno Lesa na muchima wetu yense!—Mako 12:30.a
[Tubyambo twa mushi]
a Umvwe mukeba kuyukilapo byavula pa mambo a uno mutwe, monai kitango 1 kya buku wa Nanchi Baibolo Kine Ufunjisha’mba Ka? wanembwa na Bakamonyi ba kwa Yehoba.
[Mabulañano pa peja 5]
Byonkatu shanja baana byo engijisha kuboko kwanji, ne Lesa byo engijisha mupashi wanji wazhila kufikizhizhamo nkebelo yanji