‘Mwana Waswa Kusolola Bashanji’

“Kafwako wayuka Batata ne, poso yenka Mwana ne yense Mwana ye akeba wibasolwelabo.”—LUKA 10:22.

MUSAKUKUMBULA’MBA KA?

․․․․․

Mambo ka o kwabujile mukwabo wakonsheshe kusolola Bashanji, kanatu Yesu yenka kwapwa?

․․․․․

Yesu wasolwele byepi Shanji ku bantu?

․․․․․

Mu ñanyi mashinda mo twakonsha kusolwela Shetu ku bantu byonka byaubanga Yesu?

1, 2. Ñanyi bwipuzho bwakatazha bavula, kabiji mambo ka?

‘LESA ye ñanyi?’ Buno bwipuzho bwakatazha bantu bavula bingi. Nangwa kya kuba bavula bamba’mba bena Kilishitu baitabila mu Balesa Basatu, bino bavula baswa kuba’mba luno lufunjisho lwa bubela. Ntangi wa bupopweshi umo waswile’mba: “Luno lufunjisho lupezha kalango, bantu kechi bakonsha kuyuka mo lwatala ne. Lwazhika kukila papelela maana a bantu.” Kabiji bavula baitabila’mba bintu bilengeletu bine, bamba’mba Lesa ufwako. Abo balanguluka’mba bilengwa byakukumya bilengeletu bine. Mu kifulo kya kukana amba Lesa ufwako, Charles Darwin mwine waletele luno lufunjisho waambile’mba: “Amiwa nayuka’mba muntu kechi wakonsha kuyuka byonse pa bilengwa ne.”

² Bantu bavula, nangwa kya kuba baitabila mu byapusana pusana, bonse balangulukapo bingi pa bintu bilengela bamo kuzhinauka amba Lesa ufwako. Bino kechi batana mikumbu ne, bamo bapulwilamotu mabula ne kuleka kukeba Lesa. Kwambatu kine, Satana “wapofola michima ya babula kwitabila.” (2 Ko. 4:4) O ene mambo bavula o baikela mu bulubi ne kukankalwa kuyuka bukine pe Shetu, aye Mulenga walengele bintu byonse.—Isa. 45:18.

3. (a) Ñanyi witusolwela Mulenga? (b) Ñanyi mepuzho o tusakwisambapo?

³ Bino kyanema bingi bantu kuyuka bukine pe Lesa. Mambo ka? Mambo bonkatu beta “pa jizhina ja Yehoba” bo bakapuluka. (Loma 10:13) Kwita pa jizhina ja Lesa mwavwangwa byavula kechi kuyukatu’mba Yehoba ko aji ne. Yesu Kilishitu walumbulwijile baana banji ba bwanga kino kishinka kyanema bingi. Wibasolwejile Bashanji. (Tangai Luka 10:22.) Mambo ka o kwabujile mukwabo wakonsheshe kusolola Bashanji, kanatu Yesu yenka kwapwa? Yesu waubile byepi kino? Twakonsha kulondela byepi byaubile Yesu pa kusolola Bashanji ku bantu? Twayai twisambe pa ano mepuzho.

YESU KILISHITU YE YENKATU WAFIKILAMO

4, 5. Mambo ka o kwabujile mukwabo wakonsheshe kusolola Bashanji kanatu Yesu yenka kwapwa?

⁴ Yesu ye yenkatu wafikilamo kusolola Bashanji. Mambo ka? Mambo bintu byonse saka bikyangye kulengwa, Yesu Kilishitu kilengwa kya mupashi, “Mwana Lesa yenkawa umotu,” wajingako mwiulu. (Yoa. 1:14; 3:18) Ye yenkatu uji na kino kifulo. Bilengwa byonse saka bikyangye kulengwa, uno Mwana waikalanga bingi bulongo ne Bashanji ne kufunda pe abo ne byubilo byabo. Bashanji ne Mwana kyamweka besambanga bingi kabiji bajinga na bulunda bwakosa bingi pa myaka ya kukankalwa kubala. (Yoa. 5:20; 14:31) Uno Mwana wayukile bingi Bashanji.—Tangai Kolose 1:15-17.

⁵ Shanji wapele Mwananji mwingilo wakumwambilako, kyo kyo atelelwa’mba, “Mambo a Lesa.” (Lum. 19:13) Kino kyo kyalengejile Yesu kufikilamo kusolola Bashanji ku bantu. O ene mambo nembi wa Mambo Awama aye Yoano o aambijile’mba Yesu ye “Mambo,” kibena kumwesha’mba ‘waikalanga kwipi ne Shanji.’ (Yoa. 1:1, 18) Yoano waingishe kino kyambo kulumbulula byo baubanga kwesakana na kisho kyajingako mu oa moba pa kimye kya kuja. Mwenyi waikalanga pa kipona kimo na mukwabo saka betala. Kwikala pamo kwibalengelanga kwisamba. Onkao mambo, Mwana byo ‘aikalanga kwipi’ na Shanji, besambanga bingi.

6, 7. Bulunda bwajinga na Mwana ne Shanji bwakosejilengako byepi?

⁶ Bulunda bwajinga na Mwana ne Shanji bwakosejilengako. Mu Mwana, ‘[Lesa] mo mo amwenanga lusekelo pa juba pa juba.’ (Tangai Byambo bya Mana 8:22, 23, 30, 31.) Bulunda bwabo bwakosele byo baingijilanga pamo kabiji Mwana wafunjile byubilo bya Bashanji. Bilengwa bikwabo biji na maana byo byalengelwe, uno Mwana wamonanga Yehoba byo esambanga nabyo kabiji kino kyamulengejile kuyuka Lesa bulongo.

⁷ Kabiji Satana byo atendekele kuzhinauka bukalama bwa kwa Yehoba, uno Mwana kyamulengejile kumona butemwe ne bololoke bwa Yehoba kabiji ne byo aingijishanga maana ne bulume bwanji mu bimye bya makatazho. Onkao mambo, Yesu wafunjile bya kuba na makatazho o aishile kutalañana nao pano pa ntanda mu mwingilo wanji.—Yoa. 5:19.

8. Mashimikila a mu Mambo Awama etukwasha byepi kuyuka byubilo biji na Shetu?

⁸ Na mambo a bulunda bwa pa muchima ne Yehoba, uno Mwana walumbulwile bulongo biji Bashanji kukila byakonsha kulumbulula muntu mukwabo. Abya kujipo jishinda jikwabo jo twakonsha kuyukilamo Bashanji kwa kubula kufunda byaubanga ne byafunjishanga Mwana yenkawa umotu nyi? Kyakumwenako, akimonai byo kyakonsha kukatazha kuyuka mwatala kyambo kya “butemwe” inge twatangatu byo kilumbulula. Bino inge twabalaula mashimikila anembele banembi ba Mambo Awama pa mwingilo wa kwa Yesu ne pa byo atele bantu muchima, popo twakonsha kumona mwatala byambo bya kuba’mba, “Lesa butemwe.” (1 Yoa. 4:8, 16) Kyo kimotu ne na byubilo bikwabo bya Lesa byasolwele Yesu ku baana banji ba bwanga kimye kyo ajinga pano pa ntanda.

YESU BYO ASOLWELE BASHANJI

9. (a) Mu ñanyi mashinda abiji Yesu mo asolwejile Bashanji? (b) Ambaipo kibena kumwesha byafunjishanga Yesu byo byasololanga Bashanji.

⁹ Yesu wasolwele byepi Bashanji ku baana banji ba bwanga ba kala ne ku ba mu ano moba? Waingijishe mashinda abiji: kupichila mu byo afunjishanga ne mu byubilo byanji. Patanshi twayai twisambe pa byafunjishanga Yesu. Byo afunjishanga baana banji ba bwanga bisolola bintu bikeba Bashanji, byo beumvwa ku muchima ne mo bobila bintu. Yesu wapashañenye Bashanji ku muntu waya na kukeba mukooko wanji waeleka. Waambile’mba inge wamutana “usekela bingi kukila yoya makumi atanu na ana ne itanu na ina yabula kweleka.” Kino kishimpi kyatala mwepi? Yesu walumbulwile’mba: “Ne Batata ba mwiulu kechi bakeba nangwa umotu wa mu bano bantu baji nobe baana babacheche konaika ne.” (Mat. 18:12-14) Mwakonsha kufunjilako ka pe Yehoba mu kino kishimpi? Inge kya kuba pa bimye bimo mwiumvwa nobe kechi mwanema nangwa’mba kechi wimuvuluka ne, yukai kuba’mba Shenu wa mwiulu wimutemwa kabiji wimuta bingi muchima. Wimubajila pa “bantu baji nobe baana babacheche.”

10. Byaubanga Yesu byasololanga byepi Bashanji?

¹⁰ Jishinda ja bubiji Yesu mo asolwejile Bashanji ku baana banji ba bwanga ke kupichila mu byo aubanga. Mutumwa Filipa byo aambijile Yesu amba, “tumweshai Bashenu,” Yesu wamubujile’mba: “Awa wammona, wamona ne Batata.” (Yoa. 14:8, 9) Twayai twisambe pa byakumwenako bimo bimwesha Yesu byo asololanga byubilo bya Bashanji. Mwanamulume wakolelwe kikola kya mbumba byo amusashijile Yesu amba amubuke, Yesu wakwachile uno mwanamulume “wajinga na mbumba” ne kumwambila’mba: “Naswa. Bukwa.” Ponkapotu mbumba yapwile, uno mwanamulume wamwene Yehoba byo amukwashishe kupichila mu byaubile Yesu. (Luka 5:12, 13) Kabiji kimye kyafwile Lazalasa, baana banji ba bwanga bamwene lusa lwa Shanji pa kumona Yesu byo ‘aumvwine bingi bulanda kabiji kyamukolele bingi ku muchima,’ “wajijile ne mipolo.” Nangwa kya kuba Yesu wayukile kuba’mba usakusangula Lazalasa, kyamukolele bingi ku muchima kya kuba ba mu kisemi kya kwa Lazalasa ne balunda nanji bonse bamwene. (Yoa. 11:32-35, 40-43) Ne anweba mwafwainwa mwayukapo mashimikila amo a mu Baibolo o mwatemwa amwesha lusa lwa Shetu lwamwekejile mu byaubile Yesu.

11. (a) Yesu wasolwele byepi Bashanji kimye kyo atokeshe nzubo ya Lesa? (b) Mambo ka jishimikila jaamba pe Yesu kimye kyo atokeshe nzubo ya Lesa o jitutekeneshesha?

¹¹ Mufunjilako ka kwi Yesu byo atokeshe nzubo ya Lesa? Akifwanyikizhai byo kyajinga: Yesu walengele bwembya bwa mizhinge, kabiji wapangilemo mikooko ne bañombe ne bonse bebapoteshenga kabiji waichijile mali o bapimpwilenga ne kupinuna matebulu abo. (Yoa. 2:13-17) Lupata lwa ku nzubo ya Lesa lwalengejile baana banji ba bwanga kuvuluka bungauzhi bwaawile Mfumu Davida bwa kuba’mba: “Lupata lwa ku nzubo yenu lwanja ku muchima.” (Sala. 69:9) Kyaubile Yesu kimwesha kuba’mba wakebeshanga kuzhikijila bupopweshi bwa kine. Nanchi jino jishimikila jimulengela kumona biji muchima wa Bashanji nyi? Jitulengela kuyuka’mba Lesa kechi ujitu na bulume bwa kupwisha bubi pano pa ntanda ne, bino ukebesha ne kwibuzhiisha. Kino kyaubile Yesu na bano babi kimwesha biumvwa Yehoba pa kumona bubi byo bwavula mu ntanda lelo jino. Byo kitutekeneshapo inge betufwa nshiji!

12, 13. Byaubanga Yesu na baana banji ba bwanga bimufunjishapo ka pe Yehoba?

¹² Twayai twisambe pa kyakumwenako kikwabo kyaamba pe Yesu byo aubanga na baana banji ba bwanga. Batwajijile kwipachika pa wafwainwe kwikala mukulumpe mwi abo. (Mako 9:33-35; 10:43; Luka 9:46) Na mambo a byo afunjile pa kimye kyabaya kyo ajinga ne Shanji, Yesu wayukile Yehoba byo ashikwa bantu betota. (2 Sam. 22:28; Sala. 138:6) Kabiji Yesu wayukile’mba muchima wa bwitote ye ujipo ne na Satana Diabola. Satana wakebeshanga bingi kutumbalala. Onkao mambo, Yesu kyamweka kyamuletejile bingi bulanda pa kumona baana banji ba bwanga bo afunjishe ke bamweshe uno muchima wa bwitote. Nabo bonkaba boasajile kwikala batumwa banji. Bamwesheshe patoka muchima wa kwitota kufikatu ne pa juba japeleleko mu bumi bwa kwa Yesu pano pa ntanda. (Luka 22:24-27) Nangwa byonkabyo,Yesu watwajijile kwibafundako na kifyele kwa kubula kwibalengulula amba kechi bakekala na muchima wawama ye ajipo nanji ne.—Fili. 2:5-8.

¹³ Nanchi mumona muchima wa Shanji mu byaubile Yesu pa kololako baana banji ba bwanga na muchima wakoka pa miteeto yo bajinga nayo yatama nyi? Abya mumona byubilo ne byambo bya kwa Yesu byo bisolola Bashanji babula kulengulula bantu nangwa kya kuba babwezha bwezhapo bilubo byabo? Pano byo twayuka byubilo bya Lesa, nanchi kechi twatundaikwa kumusolomoka inge twauba kilubo ne kumubula byo twalapila nenyi?

MWANA WASWILE KUSOLOLA BASHANJI

14. Yesu wamwesheshe byepi amba waswa kusolola Bashanji?

¹⁴ Bandamabyalo bakanama baluwika bantu bo balama kupichila mu kubula kwibabula bishinka. Yesu kechi byo byo aubanga ne, aye wabulanga bantu byavula byo ayukile pe Shanji. (Tangai Mateo 11:27.) Kabiji Yesu wapele baana banji ba bwanga “maana kuba amba [bamuyuke] bulongo awa wakine,” Yehoba Lesa. (1 Yoa. 5:20) Bino byambo byatala mu ka? Yesu wakwashishe baana banji ba bwanga kumvwisha byo afunjishanga pe Shanji. Kechi wafyanga Shanji kupichila mu kufunjisha bya bubela amba uji mu Balesa Basatu ne.

15. Mambo ka Yesu o achinuzhukilanga kufunjisha baana banji ba bwanga byonsetu pe Shanji?

¹⁵ Nanchi wasolwele byonsetu byo ayukile pe Shanji nyi? Ine, kechi wibabujile byonse byo ayukile ne. (Tangai Yoano 16:12.) Mambo ka? Mambo pa kyokya kimye baana banji ba bwanga ‘kechi bakonsheshe kwibikwatankanya byonse’ ne. Nangwa byonkabyo, Yesu wibabujile’mba bakayuka byavula byo akeya “nkwasho” aye mupashi wazhila ukebakwasha “kumvwisha bukine.” (Yoa. 16:7, 13) Byonka bansemi ba maana byo babula kubula baana babo byonse kimye kyo bakiji banyike, kufikatu ne byo bakoma kya kuba’mba bakonsha kwibyumvwa, ne Yesu naye wapembejile baana banji ba bwanga amba bakikomeko kufika po bakonsha kumvwisha bishinka bimo pe Shanji. Yesu wayukile pa kupelela pa kwibafunjisha.

KWASHAINGA BANTU KUYUKA YEHOBA BYONKA BYAUBANGA YESU

16, 17. Ki ka kimulengela kufikilamo kusolola Shetu ku bantu?

¹⁶ Inge muntu mwamuyuka bulongo mwatemwa ne byubilo byanji, nanchi kechi mukebesha kumwambapo ku bakwenu nenyi? Yesu byo ajinga pano pa ntanda watemenwe bingi kwamba pe Shanji. (Yoa.17:25, 26) Nanchi kechi twakonsha kubulako bakwetu pe Yehoba byonka byo aubanga nenyi?

¹⁷ Byonka byo twisamba, Yesu wayukile byavula bingi pe Shanji kukila bantu bonse. Kabiji wakebeshanga bingi kubulako bantu bimo byo ayukile, ne kukwasha baana banji ba bwanga kuyuka byavula pa byubilo bya Lesa. Nanchi ne atweba Yesu kechi witukwasha kuyuka bulongo Shetu kukila bantu bavula nenyi? Tumusanchila bingi Yesu mambo byo afunjishanga ne byubilo byanji bitulengela kuyuka Shanji bulongo. Kya kine, twakonsha kwitota pa byo twayuka pe Shanji. (Yele. 9:24; 1 Ko. 1:31) Byo twafwenya kwipi ne Yehoba, ne aye wafwenya kwipi ne atweba. (Yako. 4:8) Onkao mambo ne atweba twafikilamo kubulako bantu byo twayuka pe aye. Twakonsha kuba byepi bino?

18, 19. Mu ñanyi mashinda mo twakonsha kusolwela Shetu ku bantu? Lumbululai.

¹⁸ Twafwainwa kusololanga Shetu ku bantu byonka byaubanga Yesu kupichila mu byo twamba ne byo tuba. Vulukai kuba’mba bavula botutana mu mwingilo wa mu bujimi Lesa kechi bamuyuka ne. Mafunjisho a bubela akonsha kwibalengela kubula kuyuka Lesa bulongo. Twakonsha kwisamba nabo byo twayuka pa jizhina ja Lesa, byo akeba kubila bantu, ne byubilo byanji byasololwa mu Baibolo. Kabiji twakonsha ne kwisamba na bakwetu ba mu lwitabilo pa mashimikila amo a mu Baibolo asolola byubilo bya Lesa byo twabujile kuyuka kala. Inge twauba bino, nabo bakamuyuka bulongo.

¹⁹ Pano mwakonsha byepi kusolola Shenu kupichila mu byubilo byenu byonka byaubanga Yesu? Bantu inge bamona butemwe bwa Kilishitu kupichila mu byubilo byetu, bafwenya kwipi ne Shetu ne kwi Yesu pamo. (Efi. 5:1, 2) Mutumwa Paulo witutundaikile ‘kumulondela byonka byo alondelanga Kilishitu.’ (1 Ko. 11:1) Tuji na mwingilo wanema bingi wakukwasha bantu kuyuka Yehoba kupichila mu byubilo byetu. Twayai atweba bonse tutwajijile kusolola Shetu ku bantu byonka byaubanga Yesu.